Zirtirtu pakhat hian zirlaite hnenah lehkha pheka chhun han te tak te awmna hi a entir a. “ Eng nge in hmuh?” tiin a zawt a, anni chuan, “ A laia chhun han te tak te chauh kan hmu,” tiin an chhang a. Zirtirtu chuan, “ Thil dang engmah in hmu lo maw?” tiin a zawt leh a, zirlaite chuan, “ Engmah kan hmu lo,” tiin an chhang a. “A va mak em, a pawimawh leh hmuh awlsam ber lehkha phek var in hmuh kan a, pentui dum chhun han te tak te chauh in hmu thei a,” a ti a.
Hmuh awlsam zawk thil tha tam tak hmuh kanin a chhe lam hmuh len hi a awl thin reng a ni. Kan vui vaina tam takte, kan lungawi lohna tam takte, kan inhmuh khawlohna te, kan inremloh thinna te leh kan beidawn fona te hi a tha lai hmuh kana a tha lo tlem zawk kan inhmuh sak thin vang a ni fo. Kan bul vel kan han thlir a, kan chhevela mite kan han thlir a, sawisel tur hlir ni a hriat chang a awm thin! Midangte insiamthatna tur hmuhsak tam lutuk hian mihring min tichau ve thei asin.
Nitin chanchinbu kan han chhiarin chanchin thalo lampang ni lo chu CHANCHINTHAR a ni tawhlo emaw tih mai tur a ni tawh a. Ram politics chungchang kan han khel bap bap a, sawrkar officer-te chungchang leh kut hnathawka inhlawhfa te chanchin thlengin mi tha te chanchin sawi tur kan nei zo thlawt tawh lo emaw tih tur a ni zo ta. Hnathawh that avanga kaisang leh rinawmna avanga chan ngamte aiin anticipatory bail la chanchinin kan thinlungah hmun a luah thuk zawk a.
Rinawm taka Kohhran tana bei tang tang thin rawngbawltu aiin capitalism hmachhuana rawngbawl tum chanchin kan sawi hnem zawk a. A tha aia a thalo lam kan hriat hnem tlat zawk avang hian mi tha deuh tura kan ngaihte pawh … “a eiru thei dinhmunah chuan ding ve se eng a ni chuang hlei law’nge” tiin a eng amah hmain kan hmu pharisai zo tawh a. Mipuite rilruah hian midangte rinna aiin kan chhevela mite rinhlelhna hi a lian tawh zawk niin ka hria.
Confucius-a chuan ‘ram inrelbawlnaa hlauhawm ber chu mipuiten roreltute chunga rinna an nghah theih tawh loh hi a ni’ tiin a zirtir a. Kan ramah dikna aiin diklohna lo langsarin, kan bei a lo dawng ru viau tawh a nih pawhin dikna chhete la awm chu i chawi lar zawk teh ang u. Thang lo thar leh turte hian beiseina nung nena hmabak eng an rawn sut ngamna turin kan chanchin tha lam hi i au ring pui zawk teh ang u.
Rilru hrisel : Mihringte hi in mamawh tawn theuh kan ni a, tumahin ‘midang ka mamawh lo’ kan ti thei hauh lo. He kan in mamawh tawnna hi hrechianga midangte tana tangkai lehzual tura inpe te bula awm hi a nuam a, a thlamuan thlakin a hahdam thin a ni. Chutiang mite chu mi hrisel an ni a, rilru hriselna hian mihring a ti zahawm a, a ti nelawm a, a ti mawi thin a lo ni. Miin a lo tisualin a lo tidik lo emaw, a lo rintlak loh emaw a ni thei a, miin a ti dikin kawng dik a zawh emaw pawh a ni thei … engpawh nisela midangte kan hmuh dan leh an chunga kan rilru put dan hi hrisel ta sela, chu chuan midangte a siam tha zawk hlauh thei a ni. .
Mi that lohna leh tlin lohna lai chauh hai lang a, in mawh in mawh te, in sawisel chin te hian mihring min khawsakho tir thei lo fo thin. Chutihrual erawh chuan thil diklote hailang ngam lo leh haichhuak ngamlo khawpa DAWIHZEP tur tihna lam chu a ni lo. Chaklo zawk te, tlinglo zawk te khaichhuah dan hi zawn thiam a tha hle. Mahni tih lam ringawt kan dah lian anga, midangte kan hmu tling leh silo thin a nih chuan khawi hmunah pawh inpumkhatna a tichhe thin ang.
Khawtlang leh kohhran-a rawngbawlnaah te, hnathawhnaah te thlengin chhun han te takte hmu lian tlat zawk thin kan nih chuan midangte siam that aiin midangte hlata min awm tirtu a ni zawk fo thei thin. Hawh u, in tanpui tawnin in hmangaih tawn ila, kan that tlanna tur ngaihtuah hram hram ila, midangte thatna hmuh tumin leh midangte thatna tur ngaihtuah tlat chungin i nung ang u hmiang.
