Hmanlai kha chuan nula tlangval te kha mitmei veng reng rengin an hun an hmanga. Engkimah khan aia upate zâi ngai reng rengin an awm a. Tin,lal leh upate thu leh hla kha an veng thawng reng bawk a,an nun kha a chep hle a ni.
Tunlaiah erawh thalai fing tak tak,thu leh hla nei tha tak tak an tam ta a,aia upate thu chu a thing/hlui tawh tiin kan hnualsuat tan ta ringawt mai a. A pawi hle mai,mahse tunlai hun erawh chu thalaite khawvel tiin kan sawi tawh tlat si a. Thalai sukthlekna lam lam chu ram sukthlekna lam a ni miau tawh si a.
Ni e,tunlai hun chu computer age tiin kan sawi a. Kan pi leh pute,kan nu leh pate hunlaiah kha chuan tunlaia kan hman than em em computer a la vâng em em a,internet phei chu a awmzia pawh an hre kher lo ang. Heng vang pawh hi a ni mahna upa deuhte thu chu a hlui tawh kan tihna chhan.
Tunlaiah chuan thalaite hi ram darthlalang a tih theih hial awm e. Thalai nunchang hian ram nunphung a tilang thui hle a ni. Fiamthua an sawi thin angin kawtchhuah han luh chiaha khuang a rik tleng tleng chuan khaw changkang a ni duh lo khawp mai an tih ang deuhin khua han luha thalai an lo awm mai mai hi chuan khaw taima an nih a rinawmloh thin. Hawh u,mizoram hi han en teh ang u..kan thalaite hi kan taima kan ti em le?
Zan lama kan thalai nun hi en teh ang u. Bike a chak taka tlan,min eizawh san ang tih ni awm hrima tlan vak vak kan va tam em? Thalai kawngkama thu mai mai,hmuh apiang lo au,tawngpawng sa rak vak vak ho hi ka ngaituah mai mai a..kan hman hi ka va han ti thin tak em! Nu leh pate tan harh a hun e,kan fate hi zanah engtin nge an awm? Ngaihngam takin kan chhuahtir a,an nunphung kan hre bawk si lo. Nge ni a fate control zawhloh kan nei ta zawk.
Kan incheina lam hi. Chawmhlawm state nisi incheina lama khawvela a sang ber kan ni mai lo maw? I han inngaihtuah teh ang u.. Khawi ram changkang,mahni buh leh thlai thar ei ram,lakluh aia thawnchhuah ngah zawk ram inchei dan kan la a. Keini,silchar kawng a pin hleka thil man sang nghal vak,thawnchhuan nei mang lova lakluh erawh ngah ram,ram intodelh lo ramin an incheina lo lak ve ngawt mai hi chu a zahthlak deuh hlek a ni. Hawh u,kan sukthlekna lam hi thlak phawt ila,ram intodelh ni phawt ila hnamdang incheidan chu lak ngai lovin hnamdangin kan incheidan an lo la zawk dawn a ni.
Khawvel a changkang zela, mizote pawh kan thiamna a sang ta hle a. Computer hmangin khawvel letliama mite pawh kan kawm thei ta. Mizote pawh kan duai love,khawvel changkanna in a ken tel chu kan thiam ve ta vek a ni ber e. Mahse..mahse..hi a lo awm tlat thin. Kan nunphung erawh changkang viau mah se kan ram erawh a la hniam kher mai. Mautam avanga kan la mangan chhung chu inti changkang viau mah ila keichu ka la inti changkang ngam lo. Changkanna mawngpawp a ni tlat. Mautam avanga kan buailoh nan tha takin ram hmasawnna lam thil ngaituah ila,kan ram hi developed country a kan siam hunah kan changkanna chu a mawng a pawp a ni kan ti tawh dawn lo alawm.
Tunlai khawvel hi thalaite kutah a innghat tawh takmeuh a,thalaite an pawimawh tawh hle a ni. Incheina leh nawmsip bawl ringawt ngaihtuah tawh lovin ram hnukkhawih thilte kan ngaihtuah thei tawh zawk lawmni – thalaite khawvel a ni tawh si a
