Evening Popt 23.8.2010 (Reporter Tea Khawlhring: Tukin dar 2:00 vel khan Zotlang Aizawl-a Sapchhungi Inah hmaituam tute tih hriat loh pahnih lutin a pawisa cheng nuai 2 chuang an laksak niin thudawn a ni.
Thudawn danin tukin dar 2:00 vel khan Sapchhungi hi mi tu tih hriat loh pakhatin phone-in an bia a, Sapchhungi unaupa K. Lalrinthanga, Serlui bialtu MLA bial a mi te niin a insawi a. An dam loh avangin injection tir an duh niin an insawi a, a ni pawh hian chutiang mi tanpui ngaite chu tiin a Ina kal tur hian a lo ti ve mai a ni.
Hemi hnu hian kawngkhar an kik a, Sapchhungi hian hawnsakin hmaituam pahnih hi an lut nghal a, a mobile phone laksakin a hmaa amah an call-na number chu an delete sak nghal niin a sawi.
Inah hian an awm rei lo a, Sapchhungi hnenah hian a steel almirah chabi an dil a, a ni hian pe in steel almirah-a pawisa an la a, an chhuah leh ta mai niin Sapchhungi chuan a sawi.
Inchhunga an luh dawn hian pheikhawk an phelh a, pakhat zawk hian pawnah mobile phone hmangin Sapchhungi hian Hmar tawng a hmang niin a sawi a, amah an biaknaah hian chuan Lusei tawng an hmang thung. MLA Pu Rina te hian ui an la neih leh neih loh te an zawt a, an neih thu a hrilh hnuah, “Kal ngam chi a ni lo a nih chu,” an ti niin a sawi bawk.
Ina an luh hlim atang hian hriamhrei emaw, ralthuam lam chi engmah ken lan an nei lo niin Sapchhungi chuan a sawi a. Amah vau zawngin tawngkam an chhakchhuak lo niin a sawi bawk.
Sapchhungi te chhung hian Lunghnema, IRS (Rtd) In an luah a, concrete building chhawm thumah a lai an luah a. A fanu leh a fapa bakah, a tu pakhat nena khawsa an ni a, a fapa hi a awm loh lai a ni.
Pawisa an lakzat hi a chiang chiah lo niin Sapchhungi hian a sawi a, cheng 2,50,000 dawr siamna tura an dah niin tlema zawng an hmang then tawh avangin a zat chiah a hre lo a ni.
