Ti hian hun-àwl kan neih apiangin he misual tawmkùkah hian kan titi a. A changin kan inkhak, kan inchhaih, kan inkap, kan inbawl, kan inti fek fek, kan inhâu. Chutin a then kan HO, thenkhat an TAK. A nuam ani ti r’u! Ti chuan, he mumang mai mai hi atakin athleng èm lo turah ngai ila, ka’n hrilh ve mai mai ang che u. Khawi atanga rawn richhuak nge tih pawh hriat loh ‘Aw’ ka hria a, Pathian ‘Aw’ ngei ani tih ka hre bawk a. Hetia’ng hian–
“Nangni Misual, nîtin zantina inkawm thinte u,
He thu hi in tan thu hriat nuam ani hauh lo ang tih ka hria. Mahse, inhriat loh ka duh lo e. Kumin chung hian in zinga mithenkhat ka sèng dawn! A tlèm berah mi pathum tal in thi ngei dawn! In admin te ngei pawh an tel thei. Chùmi hunah chuan engtin nge inawm tàk ang? Chù hun lothleng tur chu hlau leh khur chungin nge, thlamuang takin i n lo hmachhawn dawn le?
Mihring mihrinnaa mizahawm, mithiam leh mihlawhtling tak tak te in ni a. Chu’ng in zahawmna, thiamna leh hlawhtlinnate chuan thlamuanna a pe tawp lo ang che u. Inhausakna zozaite khan a chhanhim zo hek lo ang che u. Tu nge inbelh tàk ang?
He khawvel thlamuanna ang ni lo, thlamuanna famkim pe theitu leh neitu chu kei hi ka ni lo em ni? Chù, thlamuanna famkim chu chang turin, thlamuanga min siam ve erawh ka phút tlat a che u. Ka kut ngeia ka din, ka ká ngeia nunna thaw ka thawk khum, ka fapa mal thisena ka tlan, hmangaihna a zawnga hmangaih sáng ber pék te in ni si.
Min kal bo san zel dawn em ni le? Kei, in samzai leh in thisenzam tè ber nenlama awmlo ata dintu che’u hian, inngaihtuahna chhungril ber nenlam ka hre si a. Tu tute nge ka séng dawn tih lah in hre si lo. Thlamuangin min siam rawh u, thlamuanna inchan theihnan. Lawmin misiam rawh u, chatuan lawmna inneih theihnan. In nun uluk u la, Setana bàwina laka intlukluh mai lohnan fimkhur rawh u, hun leh ni innei tlem tawh si a.
Kawlhawk, Inpeih rawh, Mi(sual) kumin chhunga ka séng tur zingah i tel lo ang tih tu nge sawi thei.” Ka harh ta a. Ka mumang ngaihtuah chhunzawm ta lo chuan, a túk/ chawlhni tùk inkhawm peih loh chhuanlam atan eng nge ka hman ang aw… tih leh, tlaiah engtin nge ‘kerh kerh’ ka neih theih ang aw… tih lam ngaihtuahin ka mu meng ta kàr a. Hmmm… Sual hi hneh alo va har em!
