He mi turu hi tawngtai dam thei a ni. Hmanni deuh lawk khan ka nu hian ka remti lo chung chungin a lo han pan ve a. Ka nu hi zunthlum vei, damdawi pawh ei reng a ni.
Chu mi turu chuan a dawi hla oh khaih..tawngtai hla chu chham pahin ka nu ban chu a’n hmehsak a; chutah a kut thiltithei lutuk tak mai chuan ka nu ban lehlama thisen zam pahnih awm tha hle hle lai chu a ban lehlamah a’n sawn phei dawrh mai anih chu ( a insawi danin )!!! He major operation beitu hian inzaina hmanrua te, hnimhlum thiam te, puibawmtu nurse te a mamawh lo; a kut pakhata a’n hmeh nawk nawk khan chung zawng zawng chu a hen a ni phawt mai.
Chung thil ropui lutuk a tih zawh chuan chu mi turu chuan, ” Ka pi, i lung pawh a khawih tel tawh anih hi. I damdawi ei lai hi lo ei chhunzawm tawh lo la, damdawi dang ka chawh dawn che nia, ” tiin. A damdawi chawh chu ramhmul damdawi(?), tui bottle khat pawh Rs. 500 man lai, Bangladesh atanga an chawkluh ngat a ni awm e.
Ka pa pawh hi dar na ngut ngut nei a ni a. Specialist mai pawh ni lo, Super Specialist meuh pawh a lo rawn ve zak zak tawh a; a dam hlei thei lo va. Kan mi turu hnenah hian a lo han kal a, ani chuan a kut thiltithei lutuk tak mai chuan a’n dek a, ” E, Ka pu, i pumpui pan vang anih hi, ” a lo tih leh ngawt pek a!! Ba-sa ngam ve tak chu a ni.
Kei chuan ngawi rengin heng thil kal vel hi ka lo thlir reng a; ngai teh, an dam phah lem hlei lo va. Ka nu pawh a random blood sugar chu 3oomg/dl a la ni zak zak a; ka pa pawh chuan, ” RenghangMan, ka dar hi a na riau mai, nachhawkna mi’n pe leh mai teh, ” a la ti fo thin nia maw le….
