Favang tlai nitla tur dul ruih mai hnuaiah chuan chu ka la kal ngailohna khua chu fang turin ka han lengchhuak a. Tlai nitla turin tlang a chhun pawt ruih mawi em em mai chuan chu khua chu a timawi zual em em a. Ka suangtuahna chu a kan kawm a, nitla tur mawi tak mai ka han thlir vang vanga..hetih laitak hian aniang ‘TLAITLA ENGMAWI’ tih hla pawh kha an lo phuah ang ti tein ka han ngaituaha, nitla mai tur chuan ka lung a ti leng em em a. Nunhlui ngaiin ka kiu vawng vawng hial a ni.
Chu nitla tur ngaihtuah chung chuan ka kal zel a. Thilmak ka hmu ta! Lasi note ang maia hmeltha, a hmaifang lah chu sawiseltur awm lo khawpa dik hi a ni a. An dawrah chuan thil kan leia, ka han kawm vel a. Sawiseltur pakhat erawh ka hria a nuihzawnga a biangsum lang kelh ngaihno bei takin rilru a hneh em em nghal mai kha a huatthlala em em kha ka sawisel a ni. Kha nula awh tleitiri kha..
Kawlvalenchham ram maw i tuanna? Aw tuan ve theih ka nuam ngei e,
Chutin i sakhmelmawi leh anka nen tawn ka nuam ngei e,
Hriat ngailoh ramnuama tleitiri zawng ni mah la aw lungrun
Suihlung zawng i len ngei e engtin hian lo ngai che maw?
Suihlung ti leng thlawn mai turan zawng aw ka phal lo che
Dar ang tawn ve ni te zawng aw a her mahna
Khua pawh chu a thim zuia, ka haw ve taa. A tukah hmuhleh ka tum tehlul nen hmanhmawh takin zanah kan khaw lamah kan haw ta si. Kha lasi note-i mawlh mai kha! Kawngtluanin ka mitthlaah a cham a. A hmel hmuhleh ka va han chak em.
A tukah chuan kan khua kan thlenga, zankhuaa ka mut loh avangin ka muhil nghal bawrh bawrha. Ka mumangah chuan lasi note-i bawk chu ka hmu leha, ka va vei tak em? Amah khan min hre ve zel angem aw?
Tunah chuan amah kawmtur khan kan inhlat tawh si. A laitual lenna hmun chu kan khua atang chuan a hla hle mai si a. Ka hman alawm tih vanga len ngawtna chi a ni si lo. Ka ngaihtuahna vak vel chuan chu lasi note-i te dawr chu min hruai thleng thuaia hlim takin kan inkawm a, fiamthu thawhin kan nui dun ar ar enge maw ri reng ka hriaa, kan ngaihthlak chian chuan ka bulah chaw ei tura min lo ko turin ka nau a lo ding reng a. Ka ngaihtuahna ka phu zawka, ka ngaihtuahna mai mai a ni tih ka hre ta. Aw lasi note-i kha engtinnge a awm zel.
Khawvela ka thilduh min zawt ta se kha lasi note-i te khuaa chen ve kha ka thlang ngei ang. An khuaah chengin awm ve ila chuan a hmel mawitak leh a aw ngaihnobei huatthlala hial khawpa mawi kha ka hre thei dawn si a. Lung ti leng mai tur atan chuan a va uihawm em! Ka hmuh leh theihnan khi ni khian ka tana ni duhthusam a rawn her chhuahpui leh angem le?
Hriatngailoh chhinkhual ram hla a tleitir,mitthlaan aw i cham reng mai;
Kan vangkhua an lo lawi in lengdun zawng ka nuam ngei e,
Chutin kan vangkhua lo mawi in zo thlifim han dawng ve in
Mahse ka ring thei mawlh lo tuanna tlang a sei em mai
Ka dem lo che aw mengmawí tawn i rem loh pawn
Mahse aw ka dawn reng hi i ti sei dawn ngei e
Khuareiin min hnem mahna tiin ka han inhnema. A teuh lo mai. A rei tulh tulha,a hmel ka hrechiang telh telha, ka hmu leh chak em em ringawt mai a ni. Lasi note, hetiang em em a min tihhrehawm le? te ka han ti leh ringawt thin. Mahse, engmah a sawt chuang si lo. Keizawng hriat ngailoh tleitir zuna uaiin ka ka nun ka hmangral dawn ni awm e.
Ka ngaihtuah nasa telh telha, ka vei tulh tulh a, bei erawh a dawng em em mai si. Kan tuallenna hmun lah chu a inhlat satliah a ni lo, a karah khaw tam tak kaltlang a ngaia, chung khuate pawh chuan hmeltha an tih thu an sawi nasa em em mai si. Kei chang ni lo, valdang pawh a zûnah an uai tih a chiang bawk si.
Khawvel hi danglam thutin an khua kha kan khuaah rawn pem vek se. Kan thenawm chiahah rawn awm se te ka ti thin. Mahse chutiang thilmak chu khawvelah a la thleng lo tih ka hre chiang em em bawk si. Lasi note, nangmah vang hian ka va buai em?
Kan khuaah lo pem se, ka thlifim dawn thin ngei han dawng ve se. A hmel ka hmuh chak em em leh a aw ka hriat leh chak em em kha ka hre leh thei anga. Vawkchaw belso vil ang vut vutin ka vil ngei ang. Kan khaw tlangvalte chuan a hmelthat zia an sawi huai huai anga, ka hmuh tawh avang khan min nel anga, kha ringawt pawh kha inchhuanna tham a tling ngei dawn si a.
Chu ka ngaituahna pawh chu a hlawhtlin ka ring si lo. Lasi note, engtin pawn awm mahla keiin sawitheih ka nei lo.. kan intawn theihlohna turin khawvel hian ro a lo rel tawh bawk si. Mahse, ka ngaihtuahna lamah chuan ka taksa erawh chuan a tuar khawp mai.
Lasi note, i vangkhua lamtluang chhuiin ka lo kir leh hunah hlim takin kan inkawm leh anga, nangmah vanga hrehawm ka tawrhte hi hmaichhanah ka hrilh an
