mi(sual).com

1^st. Sunday: Mamit Bazar Vengah lei a khik a, a tlakhniam bawk avangin chhungkaw engemaw zat an riak chhuak.

2^nd. Monday: Santosh Trophy, Kolkata-a khelh mekah Mizoram chuan 1-7 in a thlengtu leh champion ngun ber West Bengal chu an hneh lova; heti hian an khelh hmasakah an chakloh bawk avangin khelh khat la nei mahse an tla ta. Hei hi quarter final stage a ni. 1^st. leh 2^nd. Round-te an paltlang tawh a; quarter final hi ligue system-a khelh leh a ni.

3^rd. Tuesday: I & PR Auditorium-ah Social Welfare Department leh Human Rights & Law Network(HR&LN) tangkawpte chuan ‘Preview Workshop on Study of Child Sex Abuse in Mizoram’ an buatsaih a. He programme hi Director, Social Welfare Department Pi B. Sairengpuii’n a kaihruai a ni.

4^th. Wednesday: Synod Moderator, Rev. C Chawngliana chuan tun hnai ruahsûr nasa vanga chhiat tâwk leh in leh lo chânte chhawmdawlna tur, Synod Relief Fund atangin mi paruk hnenah Rs. 38,000/- a hlan.

5^th. Thursday: Mizo thalai internet hmangtute’n an tlawh nasat ber pawl mi(sual).com chuan kum nga hmel a hmu ta. He website hi Benjamin Rualthanzauva’n Chennai-a a awm laia a siam a ni a; tunah hian amah phei chu a chawl tawh nghe nghe. A website siam hetiang em em a mipuiin an hlut avang hian amah pawh a lawm hle. Tunah hian member 8932 an awm a; nitin hian in register thar an awm reng bawk a ni. Topic hi 9311 a chhuak tawh a; comment pawh 2,60,000 chuang fe a awm tawh bawk a ni.

6^th. Friday: Art & Culture Minister Pu P.C. Zoram Sangliana chuan “Emergence of Mizoram” chhut thumna Pu P. Lalnithanga ziah chu Chanmari YMA Hall ah a tlangzarh.

7^th. Saturday: Aizawl veng hrang hranga Chanchinbu sem, Zaliana (58) s/o Khawthanga, Sesawng Venglai chu Aizawl atanga a haw tur Zemabawk dai atangin mi panga-in taxi hmangin an kidnap a, nasa taka an sawisak hnuah Tuirini atangin a tlan chhuak. Midang puna ûm lêtin a kidnap-tute hi  zanin khan an man kim nghal a ni. Heng kidnap-tute hi Laltlanmawia (35) s/o Thangchhuanga, Zuangtui; Lalnuntluanga (39) s/o Ringliana, Zuangtui; Lalinliana (30) s/o Hmingthanga, Zuangtui te bakah taxi driver Laldinpuia (19) s/o Sekhawliana, Phuldungsei, Tuna taxi neitu Hmangaiha, Thakthing Veng hnena khawsa mek leh a thianpa Vanlalpeka (19) s/o Deli, Chanmari te an ni.

8^th. Sunday: Falkawn tlangval palite tlai leng chu helai hmuna awm, IR Police-te nen an intibuai a; police lamin an police puite punin Falkawn tlangvalte’n midang an pun ve bawk a; an intibuai ta. Silai pawh hmehpuah hial a ni. Mahse hliam na lutuk an awm lo. He thil thleng hi tunhma lama boruak lo awm tawh inmun leh nia hriat a ni.

9^th. Monday: Pu Kunal IAS, Deputy Commissioner, Saiha District office chamber ah MGNREGA leh IWMP Convergence Meeting neih a ni.

10^th. Tuesday:  Aizawl – Khawlailung sumo service MZ-O1/E-1746, driver Vanlalzama, Khawlailung khua chu chawhma dar 11 leh 12 inkar vel khan Aizawl atanga Sialsuk luh dawnah a motor-in parliamentary secretary KS Thanga motor (Car) a sut avangin, KS Thanga thinrim hian  kut thlakin, a hmaiah a hnek. Hetih lai hian Pu KS Thanga chuan driver hi   ruihhlo a tih thin leh thin loh te zawtin a kawk deuh sak sak a; chu chu Vanlalzama hian hnek angah a ngai niin a sawi thung.

11^th. Wednesday: Tunlai ruahsur nasa avangin Suangpuilawn leh East Phaileng inkar kawng chu tukin khawvar hma khan leiminin a hnawhping a, Suangpuilawn atanga km 40 velah kawng chhuat phah a tla hlawk a, a hnuaia culvert chawpa a hnawl avangin kawngthar sial hial a ngai dawn niin a lang.He lei tla hi metre 20 vela sei a ni a, a bul hnaiah leimin 20 vel a awm bawk.

12^th. Thursday; Central sorkar hnuaia Raja Rammohan Roy Library Foundation (RRRLF) ngenna angin Library tana mi thawhhlawk ‘Father of Library Science in India’ ti a hriat Dr. S.R.Ranganathan-a piancham 12^th. August chu Central sorkar-in ram puma “Librarians’ Day” atana a puan angin Mizoram-a a vawi 1-na atan Art & Culture Department buatsaihin Chanmari YMA Hall-ah hlawhtling taka hman a ni.

13^th. Friday: Department of Personnel & Administrative Reforms (Secretariat Service Wing), Government of Mizoram hnuaia Assistant Grade (Unreserved) hna atana  exam result chu Mizoram Public Services Commission(MPSC) in vawiin tlai khan a ti chhuak a, a pumpuiah Isak Lalmuanpuia Chuaungo s/o C. Lalsawta. Upper Republic, Aizawl chu pakhatna a ni.

14^th. Saturday: All India Radio Aizawl Live Phone in hunah chuan tunlai tlang hrileng leh natna chi hrang hrang chungchang a zawh a ni a. Zawhnate hi Dr. Martin Vanlalfela Zadeng, MD (Medicine), Bethesda Hospital, Bawngkawn, Aizawlin a chhang a ni.

15^th. Sunday: Tukin dar 7:15 vel khan Laipuitlanga Apollo Nursing Institute Girls Hostel choka chu gas cylinder an thlak tur gas a lo leak avangin a kang a; vanneihthlak takin hliam na lutuk an awm lo hlauh. Bungrua engemawzat lakchhuah hman a niin fire dept. lam an chet hman bawk avangin pawi liantham a thleng lo hlauh.He hostel kangah hian gas cylinder pasarih a puak a ni. Lapuitlang YMA chuan vawiin vek khan a hmunhmate tifaiin, bungraw kâng chhiate an senghawi sak.

16^th. Monday: Environment & Forest Minister, H Rohluna chuan E&F depart­ment-in Thenzawla sazuk humhalhna hmun (Deer Park) an siam chu a tlawh.Thenzawla Deer Park-ah hian sazuk 17 (a nu 11 leh a pa 6) an awm mek a; Deer Park páwnah sazuk nufa pahnih an tlan chhuak a, mahse a chhehvel khuaa mipuite’n an lo humhalh a, thlai an tih chhiat pawhin an tina ngai lo a, thlai an peh chhiat chuan E&F department-in zangnadawmna an pe thin a ni.

17^th. Tuesday: Kum 2009 atanga vawiin thlenga Secretariat Administration Department-in Ministers leh Parliamentary Secretary-te Mizoram pawna official-a an zinna senso a chhinchhiah zat chu Rs. 27,32,246/- a ni. Hetah hian free travel leh damlohna thila an zinna tarlan tel a ni lo. Minister leh Parliamentary Secretary-te zingah Transport Minister PC Zoram Sangliana’n official thila zinna atan a hmang hnem ber a, Rs. 5,09,497/- hmangin, vawi 13 a zin. Hmang tlem ber Parliamentary Secretary S. Laldingliana chuan Rs. 13,172/- hmangin vawi khat a zin. Average a lakin Minister zingah Revenue Minister JH Rothuama’n vawi thum zinna atan Rs. 212189/- hmangin tumkhat zin nan Rs 70,729.66/- hmang ang a nih laiin Home Minister R Lalzirliana chuan vawi thum zinin Rs. 26,278 a hmang a; tumkhat zin nan Rs 8,759.33/- hmang ang a ni thung.  Parliamentary Secretary zingah KS Thanga chu tum hnih a zinin Rs. 88,723 a hmang ral a; tumkhat zin nan Rs 44361.50/- hmang ang a ni.

18^th. Wednesday: Chawhnu dar 1 vel bawr khan Kolasib atanga Aizawl lam pan Gypsy MZ 01 D 6145, chu Kawnpui khaw tawp chhim lam Kawnpui Banglavenga Sihpui bulah Truck nen an inpelhna lamah Truck Body hnung lamin kawng thlang lamah a tai thla a, Feet 30 chuang a lum a, a lumna hi kawr anih avangin Kawngpui atang a hmuh phak loh a ni. Gypsy a chuang, motor neitu Pu Duhawma E.E. Kolasib Power Division (Kanan Veng Aizawl) leh a Driver Pu Thanchhunga (48) S/o Thaduha, Kolasib Electrict Veng te chuan hliam an tuar a ni.

19^th. Thursday: Zemabawka Regional Cancer Centre building chu,Chief Minister Lal Thanhawla’n a hawng.

20^th. Friday; Government Higher Secondary School Hall, Mc Donald Hill-ah October ni 3, 2010 a Commonwealth Games Opening Ceremony, New Delhi-a neih tura Mizoram aiawh a Cheraw (Bamboo Dance) kan tura Mizoram Sawrkarin a thlante chuan final rehearsal an nei a, Art & Culture Minister Pu PC Zoram Sangliana’n a hmunah kalin a telpui.

21^st. Saturday: Saikuti Hall Lungleia The Leprosy   Mission  General  Conference  leh Silver Jubilee chu Chief Minister Pu Lal Thanhawlate nupain an hmanpui. He huna    khual zahawm chu Dr.  Sunil Anand, The Leprosy Mission Director for India a ni.

22^nd. Sunday: Thuampui JAC leh Bawngkawn Police tang kawp chuan, tukin khan Aizawl veng hrang hranga petrol rûk chíng mi pahnih – Lalrohrenga, Khawruhlian khaw chhuak nia insawi leh Lalropuia, Thuampui Vengthara awm nia insawite an man. Lalrohrenga leh Lalropuiate hian Zemabawk, Ramhlun, Tuikhuahtlang, Vaivakawn leh Durtlangahte petrol hi an ru thin a, black-a zuartute hnenah an hralh chhawng leh thin niin Thuampui JAC-te chuan an sawi.

23^rd. Monday: Sorkar hmasa (MNF sorkar) hunlaia Health Minister, R Tlanghmingthanga leh Animal Husbandry & Veterinary department a thawk, Dr. C Lianmawia te chuan antici­patory bail an la. R Tlanghmingthanga hian Aizawl Civil Hospital compound-a AYUSH department building sak chungchang avangin anticipatory bail hi a dil a; Dr C Lianmawia hian ACB-in Vety Director tanglai suspend mek, Dr C Sangnghina chungchang an chhuinaah a hming a lan ve avangin a dil thung a ni.

24^th. Tuesday: MIFCO Employess Association (MEA) chuan, thla sarih chhung hlawh la loa an awm tawh avangin, September thla atang khian an hna thawh chhunzawm loh a, production unit-te pawh chawlhsan mai a, an intun nunna tur dap an tum thu Aizawl Press Club-ah thuthar thehdarhtute hnenah an sawi.

25^th. Wednesday: India ram pum huapa mit pêk (eye donation) chungchanga beihpui hman thin, ‘National Eye Donation Fortnight’ vawi 25-na hman a ni a, Mizoramah chuan Chanmari YMA Hall-ah hman a niin, Health Minister Lalrinliana Sailo-in a hawng. He hunah hian Mizorama mitdelte tana mit pe tawh mi 13-te hnenah chawimawina hlan a ni.

26^th. Thursday: Kumin June 23-a Lalpiangliana, Tanhril thihna chungchanga an man, an hriselna dinhmun avanga interim bail-a chhuah mek police pasarih zinga pali heng: Prem Nath, Chanchinliana, C Lalruatfela leh VL Ramhlunate chu Court-in bail puitling an dilna a hnâwlsak. Heng mi palite hi District Jail-ah an tang dawn a ni. Hetih lai hian an hriselnain a zirloh avanga jail tang tlaklo hote chu bail puitling a pe thung.

27^th. Friday: Bamboo Development Agency Mizoram leh India  a Agarbati siamtu company lian ber M/s N. Ranga Rao & Sons Mysore te chuan vawiin tlai khan thawhhona thuthlung (Memorandum of Understanding), Commissioner & Secretary of Industries pisa-ah an ziak fel. MoU ziahna inkhawm hi Executive Chairman Bamboo Development Agency Pu R.L. Rinawma, IAS,  leh Commissioner & Secretary of Industries  ni bawk chuan  a kaihruai a ni. MoU hi Pu M.S. Suresh, Chief Operating Officer, N. Ranga Rao & Sons, Mysore leh Pu Shurbir Singh, IAS Executive Director, Bamboo Development Agency & Director of Industries, Mizoram te’n an ziak a ni.

28^th. Saturday: Chhun dar 12:00 khan Mizoram Cheraw Troupe thalai 80 (mipa 40 leh hmeichhia 40) leh leader pahnihte chu October 3, 2010 a New Delhi hmuna Commonwealth Games hawnna a lam turin Vanapa Hall kawtah  Art & Culture Minister Pu P.C. Zoram Sangliana’n a vailiam.

29^th. Sunday: Malaysia rama Mizote chuan Mizo Christian Fellowship Day Vawi 6-na an hmang. He hun hian dt.31^st. Monday thleng a awh ang.

30^th.  Monday:   Road Safety Council chu Tran­sport Minister, PC Zoram Sangliana hovin an thukhawm a, kawngpui venhim dan chungchangte leh lirthei khalhtute an fimkhur zawkna turin ruahmanna an siam. He meeting-ah hian PWD Chief Engineer (Building), R Vanlaltluanga paper buatsaih, ‘Road Safety in Mizoram (New Directions)’ tih chu zirho a ni

31^st.  Tuesday: Zing dar 8 vel khan Kepran khaw mi Remvela (52) te nupa chu an khua atanga km 1 vela hlaah an ram kal tur savawm no hruai laiin Pu Remvela zawk hi a seh a, a hnar a seh chhiat bakah a taksa dangah hliam a tuar bawk. He savawm hi a nupui au thawmah reivaklo hnuah a insaseng leh mai a ni. Kepran ram velah hian sa chi hrang hrang chu awm fo mahse savawm tak hi chu a hnuhma niawma ngaih bak a tak hmuh ala ni ngailo tih Kepran YMA hruaitu pakhat chuan a  sawi.

Mi thenkhatin ‘Mizoram Diary’ nilovin ‘Mizo Diary’ a nih zawk hi’ an ti fo mai a; chuvangin braket-in ka han daidang a ni e.

שנה טובה לכולם, Kumthar chibai vek ule. (Lev 23;23-25)

This entry was posted on Wednesday, September 8th, 2010 at 9:30 pm and is filed under Information. Both comments and pings are currently closed.