Enge ni mak ? Thil nih dan phung pangngai ang ni lo hi thil mak an tia lawm !! Thilmak han insawi siak dawn ila a sawi tur hre lo ber ber ka ni awm si a, mahse hriat vang ni lo, hriat loh lutuk avang tal pawhin han phun ve tak chiam chu a tul ve tlat (Fang tlakuh tawng).
Hmanlai daih tawh atangin thilmak hi a lo awm daih tawh a, tunlai hian lakbo a hnekin thilmak lah chu a pung tual tual lawi bawk si nen !! Mite`n ni thum kala an hman, nikhgat a thleng thei khawpa kal chak te, Ha balh vang ni hauh lova a chhiat lutuk avanga CHEPAHAKHATA an tih mai te, midang aia a chak bik em em avanga ‘Thuamchaka’ an tih mai te chenin an awm bawk a ni.
Hmeltha hmingthang ni lo, hmelchhe lutuk leh zaithiam lutuk kan chipui Buizova lah sawi hmaih chi lah a ni der si lo. Chungte ka han ngaihtuah chuan ka thil hmuh hi chu a mak dangdai lova, a mak danglam hek lova, a mak dang daih zawk a ni. Kha…. A mak mai mai teh e.
Chhun a ni a, mu dawn ila lu a na duh si, hna thawk dawn ila ka peih der si lo (Samdala nau nge nge), lengchhuak dawn ila cheng hnih zawr tawk bak ka nei hek lo i le, ka nu han dil dawn ila, ‘Hna thawk peih si lo, pawisa pawisa ti reng mai’ tiin a ang leh dawn chiang si a, ka nu an hla ngaihthlak a, thinrim zeta cheng sawm (10) neih ai chuan ka tih hmaa chhuah nal nal chu a hlawk daih zawk. Engvang maw ? Engvang mah ni nang.
Biak In leh khawhar Ina dak hlarha tawngtai ang hi inah chuan a ni awzawng lo. A thusawi zana a that teh luh nen !! A thusawi lai kha chuan a ka pawh zen ila min seh lovang, tih khawp kha a ni a, mahse inah chuan Keite hlauin a sin kan hlauh. Zawng hmaa Mai tai khai ang maia seh theih theih seh zel mai zu nia !! Hui ha, a mak mai mai teh e.
Hui…. dil lo tawp ang. Officer fate lenin leng mai teh ang. Tunlai tih dan tho mawle. Kawrchung haa lengte leh khawlaia neih hmel tak taka vak vel te hi ‘Kuhva chu’ han ti ila, an mi chhanna tur chu a ngai thi ‘Ka nei bik lo’ tih hi. Bazar chu a lum hle mai. Hnathawh tur nei lo bawk an leng leh suau suau a, mite chan tur eiru ho dulkiar (kamis hma puar) ho hlir an tei leh tak hup hup hi. vai nin tawh nak alaiin vai hmel bawk kan hmu leh ta.
Chhangthawp zuar an ni bawk si lo. Bazar chhuahsan daih teh ang. Cheng nga ka chhar hlauh chu le, a va han zawrin bel a va han kai hnem tawh teh reng em. Putar pakhat thawhlawm ang mai a nih hi. Tunlaia cheng khat pawh thawhchhuah nei lova n u leh pate thawhsa ring an tam teh lul nen ! Chunga chhapah cheng nga han chhar te chu a va han hlu teh reng em ? A mak mai mai teh e.
Eng ber nge ka lei ang, teh teuh hian. Var em ni ang aw ? A thlum leh awm lo em mai, Zochhang em ni ang, a funna hnah a lian anga, a tak a te leh awm si a, kuhva lei teh mai ang, ei loh pawha ha sen tawh teh luh nan (school naupang chuan en sela chawlh a ni vek mai) ei phei chuan Utawk sahbawn sen hmuam kan ang teh a nia, Yes… ka hre ta, ka hre ta, ka hre ta hlauh mai. A sakhming tak ngial pawha ka koh phal loh Madangtea (khawthlang dalda).
Ka han rawh rim nam ram leh cham cham anga, ka pi melh zauh zauh pahin tengtere mu tiat lek lekin ka han hmawm leh thuih thuih anga, a va han tui leh dawn em !! Ka pi tui ti lutuk tur hmel mitthlaah a lang, ka lei ngei ngei ang, ka va han lei dawn chiang em, a mak mai mai teh e.
Ka thil lei chu hum ran chungin ka kal pawk pawk a, ka hmaa kal chu ka hmu thut mai. Kekawr a ha a, a sam lah a sei bawk si, mipa nge hmeichhia ? Ka hre teuh lo mai, a tawng a thum lo, hmeichhia a ni ang. Mahse,kamis a ha si, ka han pelh a, ka han hmuhchian hnu phei chuan a hma ai khan a mak tulh tulh mai a, a mit kotlang te lah chu midum thlan (meihawl khur) ang mai, a dum huam mai a, a mithmul te lah chu a la Up-to-date leh nghal.
Mithmul hmuh tur reng reng zu awm lova, ui takngial pawn an Poh (Poh, Poh) ngam lo nge ? Amah an hre lo ? A hmui te lah chu thisen bual ang mai, no tlanga Chukchu vakchhuah ang mai a ni a, sawi dan tur pawh ka thiam lo, a sen da duk do a ni ber mai. Mak tak a ni, mak thlawt reng e.
Mak tak tak an tam tawh hle. Mi anglo kan tih te hi chu mak an ni lova, an awmdan a ni mai. Kan zaithiam hote lah hi zai an thiam teh lul nen, YMA thiltih honaah te Pathian hlate leh hnam hla te sak aia sap hla sa duh zawk tlat te zu awm a. T.V han en ila Local (Mizo Channel) aia VAI film leh MTV en duh lah tam zawk ziah nen, kan hmingah te lah sap hming dah tel zel kan tum tawh. Putar pakhat pawn a fapa hming atan PIGROUTUT FIELD a ti, an ti a ni awm e. A mak mai mai teh e. Dawt pawh va ni suh. A mak hiau huau e.
Kan Pastor te lah hi mizotawnga sawi theih reng, saptawng an han telh/hmang kher te hi a lawm ram lak tihartu chu. Mi mak chu an awm, inti mak ve erawh chu mimawl nihna, miropui te pawh hi an damlai ai chuan an thih hnuin zu ropui tlat thin a, mak chu a mak a ni ti ru….!!
He thu ziaktu mak tih ber mai chu. Mi chanai eiru ho te, mipa inti hmeichhia, hmeichhia inti mipa te leh hmeichhia mipa thuamhnawm inbel chingte hi an ni. Sawi dan pawh ka thiam lo. Sa mak em ni, Va mak em ni zawk ? Hmei mak mawle !! Hui ha, a mak mai mai teh e.
