mi(sual).com

Chhura nupui hi tawng sual hmang ve deuh mai hi a ni a. Tumkhat chu chhura puzawn hi a lo zin a. A nupui chuan Chhura hnenah, “I mawlin i â si a, ka pa awm laiin fimkhur ang che. Ka sawi ang chiahin awm tum la a fel a ni mai,” a ti a. Chhura pawh chuan, “Nia maw le” a ti a. Chhura puzawn chuan Uipa hi  a rawn hruai tel ve a. Ni khat chu a lenna atangin Chhura puzawn leh uipa chu an lo haw a. A nupui chuan, Chhura, ka pa Ui kha  banah lo thlung rawh,” tih a tum khan, “Chhura, ka pa kha banah lo thlung rawh” a ti ta hlauh thung  a.

Chhura chuan, “Aw le” a ti a, a nupui sawi ang chuan a puzawn chu hruiin a hling a, banah chuan a thlung ta a. A nupui chu choka-ah a awm  avangin a lo hre lawk lo va. A nupui chuan, “Chhura, ka pa kha dawhkanah chaw tui  tak lo ei tir rawh” tih tum khan, “Chhura, ka pa ui kha dawhkanah chaw tui tak lo eitir rawh” a ti leh ta a. Chhura chuan a nupui sawi ang chuan Ui chu a kai lawk a, dawhkanah a thut tir a, chaw tui tak tak te a pe a.

Chhura nupui chuan a tawng sual hre lovin, Ui chu banah thlungin a pa chu dawhkanah chaw ei ah a ngai a ni. Rei vak loah chuan Chhura ka pa Ui kha kawmcharah va thlung la, ka pa kha chaw a ei kham tawh chuan thlutthlengah khan thlut hahdam tir rawh,” tih tum khan, “Chhura, ka pa kha kawmcharah va thlung la, ka pa Ui kha chaw a ei kham tawh chuan thutthlengah thut hahdam tir rawh” a ti leh a. Chhura chuan, “Aw le, a ril a tam ve tawh bawk ang a, saruh ka pe nghal dawn a nia,” a ti a.

Ui chu chaw ei dawhkan atang chuan a pawm sawn a, thutthlengah a thut tir a. Chumi hnu chuan a puzawn chu kaiin kawmcharah a thlung leh a, Saruh khel tir a tum ta a. A puzawn chuan a duh lo hle a, a tang tlat a, “Ka duh lo, ka ei dawn lo, kha tiang khan min ti suh, a ti a. “Ka nupuiin, a sawi ang chiah a ti tur a tih ka ni. I ei duh loh chuan i ka ah ka thun lui tho ang,”a ti a. Saruh chu a puzawn ka chhungah chuan a thun lui ta a. A puzawn duh lo au thawm chu a rin tak em avangin Chhura nupui chuan a hre ta a. Choka atanga alo dahchhuah chuan thil awmzia chu a zuk hmuin a pa a thlun nate chu a va phelh sak a. Chhura chu a hau ta vak vak mai a, Chhura chuan, “Min tih tir ang chiahin ka ti a nih hi,” a ti ve tlat a. Chhura puzawn pawh chuan, “In nupa hian thi mah ila, pawi in ti lo a nih hi,” a ti a. A ni la la chuan an khaw lamah a hawng ta nal nal a.

Tumkhat chu a khual zinna atangin Chhura a lo hawng a, khua a thlen hma deuh  kawng chanveah chuan khua a thim ta mai si a. Mahse, khaw lam panin a kal zel a. An khaw kawtchhuah a thlanmual a thlen chuan Sakawr chung chuang misual ho nen an intawng ta a. Chhura hlau lutuk tih ngaihna hre lo chu thlan khur chhia pakhatah a zuang lut ta ringawt a, chu chu misual ho chuan  hmuin an va pan hnai a, “Tu nge i nih?” tiin Chhura chu an zawt a.

Thlan khur atang chuan a lo dak chhuak a, “He thlana mitthi hi ka ni a” tiin a chhang a. Misual ho chuan, “Zan lai lai-ah eng ti turin nge thlan atangin i lo chhuah?” tiin an zawt leh a. Chhura chuan, “Thlifim dawng turin,” tiin a chhang a. Misual-ho chuan mitthi thli fim dawng pawh kan hre ngai lo” an ti a. Chu veleh Chhura chuan, “A lo nih tak chu, he thil hi ka tih sualah ngai mai rawh u” a ti a, thlan khur chhungah chuan a lut leh ta daih mai a. Misual ho pawh chuan an kalsan ta mai a. Chu veleh Chhura chu rang tak in thlan khur atang chuan a zuang chhuak a, a tlan haw vang vang ta a.

Chhura te hian  bawngpui sawngnawi leh hnute tui pawh ngah lo zet pakhat hi an nei a. A nupui chuan va zuar turin a ti a. Chhura’n “Aw le” tiin bawngpui chu a kai chhuak a. Bawng zawrhna hmun a pan ta a. Chhura Bawngpui chu miten lei tumin an lo pan hnai a, a bawng that leh that loh chu an zawt a.

Chhura chuan a nihna dik tak chu a lo hrilh zel hlawm a, Bawng lei tum tu te chuan an lu an thinsan a, an lei duh lo zel a. A bul lawk a Bawng zuar thin chuan Chhura chu a khawngaih ta hle a, “Kei man ka zawrh sak dawn che a mi?” tiin bawng­zuartu chuan a zawt a, Chhura chuan, “Min zawrh sak thei a nih chuan ka lawm hle ang,”  tiin a zawrh tir ta a.

Bawng zuar thin tu chuan Chhura bawng chu a kai a, “Bawngpui tha leh fel in lei duh em? Nikhatah bawng­hnute no 15 lai an sawr chhuak thin a sin,” tiin a au lauh lauh a, a zuar ta lawp lawp mai a. Chu veleh Chhura chuan Bawng zuartu in a zawrhsak lai a Bawngpui chu chhuhsakin, “Ka Bawngpui hi nikhatah bawnghnute no 15 a sawr theih a nih chuan eng vangin nge  ka zawrh phal teh lul ang,” a ti a.

A Bawngpui chu a kai haw leh ta a, In a thlen chuan a nupui chuan a lo hau ta hrep mai a, “Bawngpui i zuar thei lo a nih chuan kan sakawr hi va zuar rawh,” tiin Sakawr a zawrh tir leh ta a. Chhura chuan, “I tih tlat te chuan,” a ti a, Sakawr chu a kai chhuak leh ta a.

Sakawr zawrhna hmun a thlen hmain a Sakawr mei velah chuan chirh­diak a kai luai mai a, Chhura chuan Sakawr lei tumtu ten a mei bal chu an hmuh chuan an lei duh lo mai ang tih a ngaih tuah a, a Sakawr mei chu a tan sak ta a. A iptepui chhungah chuan a khung tha ta daih mai a. Mi te chuan a Sakawr zawrh chu lei tumin an rawn en sap sap a. Mite chuan Sakawr tha chu a ni a. Mahse, mei a nei lo hi chu thil pawi tak a ni,” an ti a. Chu veleh Chhura chuan, “Ka pu, ka Sakawr hi i duh tak tak anih chuan a mei-ah  buai mah ta che, hei a mei chu ka ak reng a lawm,” a ti a. A iptepui chhung a sakawr mei chu a hmuh ta a.

Vawi khat chu, Chhura leh Naa chu an ram vak a, Vanneih thlak takin Chhura chuan rangkachak zungbun a chhar ta hlauh mai a, a kut nen chuan a lo inmil chiah mai a, a bun ta reng a. Naa chuan Chhura zungbun chu a it em em a. Ruk sak a tum thin a, mahse Chhura’n a kutah a bun tlat a vangin a ruk sak thei lo a. A tawp atawp ah chuan fin kherek chhuaha dil a tum ta a, Chhura hnenah chuan va kalin, “Thian duh tak Chhura, nang nen kan inhmuh khat deuh chang hian ka ngai vawng vawng thin che asin.

Tunah hian hmun hla takah rei tak zin ka tum a. Nang ka ngaihna che min hnemtu atan khawngaihin i zungbun kha min pe mai ta che,” tiin zawldawh takin a dil a. Chhura chuan, “Thian pa Naa, min ngaih  avang chuan ka lawm lutuk e, i zin daih chuan kei pawh hi ka lung a leng khawp ang, Mahse, he zungbun erawh hi chu nei lo mai zawk rawh khai.

A chhan chu kei pawhin he zungbun ka hmuh  a piangin, Aw… he zungbun hi ka thianpa Naa khan min dil thin a, ka pe ta lo a nih kha’ tiin ka theihnghilh theih lohna tur a ni ve a sin” tiin a chhang ve tlat a. Naa chuan tih ngaihna vak a hre bik lo a, beidawngin a haw ta a ni.

Tum khat chu Bazar-ah Chhura a kal a, chutih lai chuan Naa hian Thingrem pakhat hi a lo pu luah mai a, chu Thingrem chhungah chuan thleng keh thei-in a khat vek a, Naa chuan Chhura a hmuh chuan, “Chhura, he thingrem hi ka in thleng min phurh sak chuan thufing pathum ka hrilh ang che” a ti a. Chhura chuan rem a ti a, a phurh sak ta a.

Thui fe an kal hnu chuan Chhura’n thufing chu hriat a chak ta em em a, Naa hnenah chuan, “Naa, thufing ka hrilh ang che i tih chu min hrilh tawh mai rawh, hriat ka chak tawh teh a sin,” a ti a. Naa chuan, “In kan la thleng lo na a, pakhat chu ka han hrilh ang che, lo ngaithla rawh, ‘Chaw puar tak a ei hi riltam tak a awm reng aiin a tha zawk, an tih chuan awih duh reng reng suh ang che,” a ti a.

Chhura chuan, “Thufing tak leh hlu tak a nih chu,” tiin an kal ta zel a. Rei vak lo an kal hnu chuan Chhura chuan thufing dang chu sawi leh turin Naa chu a ngen leh a. Naa pawh chuan, Ngaithla rawh, ‘Sakawr chunga chuang a zin aiin ke lawng a zin hi a nuam zawk’ an tih chuan awih duh reng reng suh ang che,” a ti leh a. Chhura chuan, “A va dik teh lul em, thufing leh ril tak a nih chu, a tha lutuk,” a ti leh ta a. Ti chuan, an kal leh zel a, thui deuh an kal hnu chuan, “Naa, thufing pathumna chu min hrilh law law teh khai, hriat ka chak tawh lutuk a nia,” a ti leh ta zel a.

Naa pawh chuan, “A nih chuan ngun takin lo ngaithla rawh le, ‘Khawvelah nang aia mawl leh â mihring hi an la awm a ni’ an tih chuan awi duh reng reng suh ang che” a ti ta a. Chu veleh Chhura chu a thinrim ta hle mai a, a Thingrem put lai chu leiah a paih thla ta hnawk mai a, thleng kehthei chu a keh ta vek mai a. Chhura chuan, “He thingrem chhung a thleng keh theite hi a keh miah lo a ni, an tih chuan i thih thleng pawhin awih duh reng reng suh ang che,” a ti a. A kalsan ta daih a ni.

Similar Posts:

• Pizawn leh Puzawn Koh Dan : Ka Nu/Ka Pa or Ka Pi/Ka Pu?
• Thufing leh Mi Ropuite thusawi Part I
• Chhura leh Nahaia
• Bawng Vulh Maw!?
• A ruala nupui 4 nei!

Recent Posts:

• L.Kira an tih chu (The man behind Lalzova)!
• LUNGPHUNLIAN TUMKAWNG
• A liampui ta si
• ZU HI SUAL A NI LO, A IN A TE PAWH AN SUAL HEK LO
• Like!

This entry was posted on Tuesday, September 14th, 2010 at 10:04 am and is filed under HAHAHA, Mizo Society & Culture. You can follow any responses to this entry through the RSS 2.0 feed. You can leave a response, or trackback from your own site.