Mitin mai hian sum leh pai hmuhna tur zawngin kan phek buai tlang a ni ber a, chu mi rual chuan a tlem emaw tam emaw eiruk pawh hnial lem lovin kan intlansiakte pawh a ang thin. Sorkar kan tih hi mipuiin sum kan thawhchhuah chhiah ( Tax ) kan pek tlingkhawm atanga kal ve mai chauh a ni tlat. Chhiah kan pek loh chuan sorkar hian hnathawhna tur sum khawi atang mahin a nei hran lo. Hei vang tak hian sorkar sum eiruk hi a huatthlala a, do a ngai reng a ni.
Mi tam ber hian alang apau chuan eiruk hi kan huain kan ngaimawh viau mai. Midangte hmuh loh emaw, hriatpui lova eiruk erawh chu kan chak ( Welcome ) viau lawi si ta ve ang. Chutiang rilru kan put mek lai chuan ram tana chhiah ( Tax ) pek erawh chu thih hrehin kan hreh viau si hian a lang. Chhiah pek tam kan hreh hian ram leh hnam kan hmangaih lo tihna a ni a, eiruk kan duh viau pawhin ram mipui sum bawm rawk kan pawisa miah lo tihna a ni bawk.
Engineer 13 eirua puh thubuai awrh mek te hi sorkarin suspend se, hnathawktu tur an tlemin, ramin a tawrh an hlau maw!!! Baal hmaa thingthi ngai lo, mithiam sorkar hnathawk lo engzat nge awm? Upa pakhat chuan, “ Keini a hminga Kohhran upate hi awm lo vek mah ila, kohhran hi tun aia tha hian a kal thei tho ang,” a ti hmiah mai a ni. Tun kan tawng an huat thu suh ah, kan sorkar hi lo tlain, lo awm ta lo pawh ni se, Ministry dang hi chu a ding leh thuai mai dawn.
Chhiah pek hreh em em Kristian nih hi a ropui lem lova, eiruk pawisa lo kristian nih pawh a zahawm hek lo. Kohhran leh NGO hruaitu, a kul a taia tang zingah eiruk pawisa lo engzat tak awm ang maw? Chhiah pek tam an hreh hle mai thei. Chuvang chuan mipui tam ber hi kan dawng lel a ni mahna. Ram changkang zawkah chuan an tax pek tam an chhuangin an chanpui ngam an ti. Ram hmangaihtu dikah an inngai tlat. Thawk mang lova hlep teuh an hisap ve lo a ni ngei ang.
Eiruk teuhva hausak aiah, thawk tama tax pek kha an inchhuanna a ni zawk. A lu ber atanga eirukna do a nih a, ahnar a fim phawt chuan a mawng lam a tawp reng lo vang. Kan ram thuvawn “ Rorelna dik” hi Ministry, official-technocrats leh bureaucrats hian an zawm hmasak phawt chuan eiruk a tlem anga, chhiah pek tur sum mipuiin an harsat loh a rinawm.
