mi(sual).com

Khawvelah hian lungawina zawngin hlimna kan beisei thin a, kan beiseite alo thlen vek theih loh avangin lungawi thiam hi a har thin. Lungngaihna hian kan nunah hun a chang hnem zawk fo anih hi! Kan nuna bet tura kan duh loh, beisei tlak nilo, ngainat reng hlawh bawk lo ‘lungngaihna’ hi a nunrawng ngawt mai.

Lungngaihna ruamah hian pan bik tur hre lo va vahvaih a awl a; hlimna lamtluang zawh kan tum pawha min dang tlattu a awm thin. Chantawka lungawi hi hlimna chu ni teh meuh mahse, kan chantawka lungawi tur chuan kan beiseite’n kan hnen arawn thlen hmasak phawt a ngai thin si a! Hmanah Eden huanah Adama leh Evite’n hringnun an bawhchhiatna kha kan chhawm zel bawk nen; lungngaihna ruam atanga kalbo turin kan thlarau chhuah tira kan taksa piallei run remtir a tul si. Chu mai piah lamah kan hmuh theih thilte hian kan chungah thu an nei lian hle si a.

He khawvel eng kan lo hmuh atangin mi pangngai inti chin kherlo nen lam pawh, induhsak tawnna te, inlainat tawnnate leh inhmangaih tawnnate neiin, kan kum leh taksa lo danglam ang zelin kan nun pawh kan thlak danglam thin a. Hei vang hian lungngaihna min thlentu thilte hi mitin chungah hian a inang vek lo. Keia lungngaihna chu ‘hmangaihna’ an tih the chawk hi ania… Hmangaihna hi lei leh hralh theih ani lo va, inpekna anih tlat zawk avangin hmangaihtu hian lungngaihna lo thleng turte hi kan hmu lawk thiam thin lo a ni.

MAY BE I AM CRAZY

Kha tleirawl, ka ngainat em em vang khan ka â zo ta vek thin em ni le? Ani chu hun liam ta zawngah khan ka vei ngailo va,ka ngaihtuah bing bik ngailo. Ngaihnobei tak anih vang te, a nui hmel mawi tak te, inkiltawih lemlo va ka bula a awm thin vang te, lehkhathiam thei tak leh rilru tha tak anih vanga hmangaih ka nih pawh ka inhre lo. A mitmei lah ka hmu silo. Hun hian arawn hrilchhuak zawk a ni.

Ka ngainatzia te, ka duhzia leh hmangaih thu te hi hrilh châk fo mah ila, ahria ang tih ka hlau zek zek zawk fo thin. Midangin a laka ka rilru puthmang hi an hria ang tih mawlh hi ka hlau a. Chumi thlenglo tur chuan keimah ngei pawh ka insûm hram hram a; achâng phei chuan keimah leh keimah ngei hi ka inringhlel fo thin!

Ka hmangaih avangin a chungah thiltha chauh thleng se ka duh a, a hmakhua ka ngai em em a. Hei vang hian engmah hi la hre lo se ka duh a. Dik chiah chuan amah hi tunah ngei hian theihnghilh hmak thei ila ka ti kher mai! Ka hmangaih a, ka hmangaih tih erawh a hre silo. Min ngaina a, min ngainat theih nan a lakah ka intinelawm thin tih a hre silo.

A kianga ka awm hian lawm hle thin mah ila, ka hlim tak tak thei lo. Engmah a hriat ve lohna hian min tihlim theilo thin a ni. A kiangah chuan thiltih a nuam a; theih se, ka hmangaih thu hi hlân mawlh mawlh thin ila…Mahse maw, chhânletna nunrawng mai hi ka chantawk a ni ang tih ka hlau a ni. Amaherawhchu, a awmdan ka enin nunrawng tak chuan min chhânlet ka ring phal lo; thil dang vang zawk a ni? Ka taksa chu a kiangah a awm loh lai pawhin ka rilru chu a hnenah a awm reng asin!

HUAISENNA A TLAWM TLAT SI

Eng’emaw châng chuan i sakhmel mawi tak darthlalanga i cheimawi laiin i ngaihtuahna kha keima chungah reilote tal chu awm tir ve la ka ti fo thin. Mahse, engtiang chiahin nge min ngaihtuah ang tih erawh ka ring thiam lo; i hlimna tizualtu atan chauh min ngaihtuah la ka ti!

Hei leh chen hi engmah hriattirlo chein nangmahah hian ka lo buai ve em em a. Tunge i nih ka hria a, ka duhna che hi paihbo theih a ni silo. Ka thinlung kawngkhar hi i tan ka hawng a,mahse, lut turin ka la sâwm ngam silo che a. Ka hmangaihna che hian hmangaihna bawk a phut avangin engtikniah emaw chuan hmangaihna ka la dil dawn che a; chutih huna hmangaihna min pek chuan tuna ka lungngaihna zawng zawng hi hlimnain ka thlak vek tawh ang tih ka beisei a ni.

Engati nge tunah hian ka hrilh mai loh che le? Ka hmuh lâi che hian ka hrilh tur che a ni lo’m ni? He hmangaihna hi lungngaih nana ka hman reng hi atul em ni? Ka thinlunga ka zep tlat hi min tinatu mai anih avangin zep lovin engati nge ka hrilh mai loh che? Min ngaina tiraw? Kei chuan ka ngainat luat che avangin ka hmangaih che a sin. Ka thinlung Lalnu i ni a, ka theihnghilh theilo che a,ka vei reng che.

HERE AM I, BUT WHERE ARE YOU?

“Aw…vansanga lal lai pâr tlân chhawrthlapui leh si-âr lêng zawngte u, tlâwm ngailo thinlung huaisen min pe ula. Aw…leilung leh a chhûnga awm zawng zawngte u thâwm dim r’u, lunglam ka vâi, min hnemtu an awm love.”

Harsa lemlo va amah nen kan intawn theih lai khan engvangin nge ka hmangaih tih ka hrilh mai loh le? Amah chu ka hmangaih a, ka duh a, ka ngaina em em a. Mahse, ka hmangaih tih a hre lo va; ka ngâi ngawih ngawih ani tih phei chu a hre dawn em ni? Min nel em em a, keipaw’n ka nel a. Amaherawhchu, thian inkawm ngeih tak ang kan ni si. Ani’n thian tha tak anga min ngaih laiin kei chuan a thian tha tak chauh nih ka duh silo.

Kumsul veiin kum lo thar sela, ka hrilh tawh ngei ngei ang ka ti a. Kum alo thar a, hrilhna hun pawh ka nei; ka la hrilh ta chuang lo! Hrilh tum em em mah ila, a kiangah hian ka huaisenna a tlawm leh thin.

Tunah zawng amah nen awlsam takin kan intawng thei ta lo………Thiamzirna rûn kaiin Zawlkhawpuiah min liamsan ta si a!

(February,2008)

*********************************

Similar Posts:

• Lungngaihna
• TAWNGTAINA
• Hmangaihna Par – Lalrintluanga Varte
• Ka hmangaih che, ka hmangaih fo ang che.
• Lehkhathawn 2-na

Recent Posts:

• ZU HI SUAL A NI LO, A IN A TE PAWH AN SUAL HEK LO
• Like!
• LUNGHNUR
• SADHU SUNDER SINGH-A CHANCHIN ROPUI CHU:
• KA ṬAHPUI LEH SI ṬHIN

This entry was posted on Tuesday, September 21st, 2010 at 10:28 pm and is filed under Fiction. You can follow any responses to this entry through the RSS 2.0 feed. You can leave a response, or trackback from your own site.