Ka hmaa tleirâwl kum 19 mi vêl lo kal chu ka thlîr reng a, ka bulah lo dingin hah hmêl takin a thaw hliam hliam a, a thlan tla chu a rawmawl kenin a hru thuak thuak bawk a. Ka hmêlhriat loh nghah lai a nih ka rin avângin no. pakhat chu ka han dial a, chutih lai chuan ka bula tleirâwl awm chuan a phone a en vat vat a. Chiang thawkhata ka ngaih avângin a pick up hmain ka dah leh nghâl vat a. A hnu rei lo tè-ah chuan ka va pan a, biak ka tum lai takin a tawng hmasa-ah a rawn tang ta zâwk a.
“Mi nghah i nei em?”
Ka ring dik a ni tih ka hre nghâl a.
“Aw, nei e. Nangmah kha..!”
Thla khat vêl liam tâ-ah khân hmeichhe pakhat hnên atangin sms ka dawng a. A ngaihzâwng nena an harsatna chungcháng leh, puih leh thurâwn beisei a lo ni a. Theih ang anga hnêmin ka fuih a. Chuta tang chuan kan inbe chho zauh zauh a. A hnuah a mizia tur âwm ang chu hriain, mi fel leh nun ngîl, inngaitlâwm tak a ni tih ka hre thei ta a.
Nikhat chu tihtur tûl a awm avângin ka lêngchhuak a. Upper bazar thlanga bus stand-a bus ka chàn lai chuan message a lo thleng a. Ka han en chuan Notei mi rawn thawn a lo ni a, ka han chhiar a.
“Bazar ka kal dâwn a, inhmu ila..”
Ka reply vat a.
“Hospital thlang bus stand-ah ka awm. Lo kal rawh, ka lo nghâk ang che.”
A hnu reilotè-ah chuan tleirâwl kum 19 mi vêl lo kal nen chuan kan inhmêlhriat ta a ni.
Thian inkâwm thang ang maiin tlângnêl tak leh inpawh taka inkâwmin a chanchinte kan sawi dûn bawrh bawrh a. Darkar chanve vêl zet kan tîtî hnuin a kalna tur, bazar lam kan pan dûn ta a.
A thil lei tur ang angte a lei hnuin a haw tur chu ka thlah a. Ice cream-te leia eiin kan infiam bawrh bawrh a. An vêng pênna thleng ka thlah hnuin ka tihtur pawh thulhin inah ka haw ta a.
Khuma mut hahdam pahin ka thil tawn ka ngaihtuah lêt neuh neuh a. Kha hmeichhia, Notei nena kan vawikhat inhmuhna atanga hetiang khawpa inkâwmngeiha kan innêl nghâl thei mai kha mak ka ti hle a. Ka ngaihtuahna pawh a kal thui hle nghe nghe.
Kum 19 mi lek a ni a, ft 5.3 vêla sáng, ngo lutuk lo, hâng lampang deuh hret a ni a. Hmai bial lam, nui mawi tak leh aw thâm chàl mai a ni a. A mawng vaw hnâpa a sum dum hlap zuah chuan a tilang nûin a tilang-duhawm zual hle a ni.
A zân atangin sms-te inthawn lehin, kan inkâwm nasa tial tial a. Chu chuan kan inkârah hriatthiam hleih theih loh inngainatna chu a piantîr ta vat a. Mak tak maiin a ni tèlin ka rilru a luah hnem tial tial a, a hnuah phei chuan a âw hre lovin zân ka muhîl tha thei lo hial a.
Zankhat chu nidang ang bawkin a message ka dawng leh a. Ka han chhiar chuan hetiang hi a lo ni a.
“Mate, ka duh che tih ka hria. Mahse, chu chu ka rilruin a pawm si lo. Ka awmdân hi ka hrethiam lo a ni..”
Kan inhmuh hmaa a chanchin zawng zawng min hrilh fai kèlh tawh avângin a inthlahrung a, a inthiam lo tih ka hria. Mahse, chu’ngte hlei hlei chuan min hneh a, keimahah a tla-na deuh deuh zâwk a.
Kan inhmuh hmasak ber ni-a a khawsazia atanga ka rilru put hmang vângin inngaihtuah rei vak ngai lovin a rûl tâwkin ka chhâng lêt ve ta a nih kha.
A chanchin a chhia a tha ka hriat vek hnua chhia leh tha hriatnaina a hnâwl loh hmeichhia tluka ka tâna tha tur an awm dâwn chuang em ni le?
Chuta tang chuan khawvêl thar ka kai ta a. Nun hranga nungin rilru dang nen nitin hun ka hmang chho tan ta a.
Zîngtina ka thawha beiseina thar min lo siam thîntu, zân ka mut dâwna duhsakna tawngkam thlum ber bera min mangtha thîntu a ni a, ka khawhar chânga min hnèmtu, ka lungngaih leh mangan chânga min thlamuantu a ni bawk. Ka thian tha ber a ni a, ka hmangaih ber a ni tel bawk. Min duh leh min hmangaih thu nitin min hlân àwl lo va, chu chuan keimaha rinawmna leh chakna min siam a ni. Intihthiam loh châng leh tihtauh châng pawha boruak thelh-daitu a ni a, ka laka a thinrim rei ngai lohna chuan amah ngaina lo thei lovin min siam a ni.
Kum chanve vêl zet hlim tak leh tudangmah ngai lova kan lèn laiin zankhat chu Notei hnên atangin chanchin duhawm lo tak ka hre ta a. Chu chu a chauh thut avânga damdawiina a luh thu a ni.
Chhunzawm tur….
