Chhunzawmna..
A tûkah chu a rang a rangin a awmna damdawiin ka pan vat a. Damdawiin khuma chauh hmêl taka Notei lo mu bâm chu ka va hmu ta a. A pa leh midang pahnih pathum vêlin an lo kîl laih a, an bulah ka inzep lût nghâl a. Zah pawh dâwn lovin a kut dâng bei mai chu ka vuan chawt a, chuveleh muhîl emaw ka tih kha a lo meng diar diar a. A nui sak a. Engmah hre lo ang maiin a chhîng leh daih a. Ka rilru a khawihin a ngaihna ka hre lo kher mai.
A pa hnênah thil awmdân ka han zawh chuan a tlai chawei kham, bathroom-a a lût tur tlu thut chu biak hleih theih lohvin a awm hi a lo ni a. Zâna a harh zawk thu leh a hnuah biak theih lohva a awm tâk reng thu min hrilh tel bawk a. Zâna a harh zawk laiin a chanchin min lo la hrilh hrâm hrâm a lo ni reng mai!
Test chi hrang hrang an neih avângin a result ngaihchângin damdawiinah ka tàp nilêng a. Tlai lama a thisen test result a rawn chhuak a, a thisen zâmte chu engemaw thildang avângin hmun tam takah a keh a, a thisen kal vêl chu a kalna tur thleng lovin a taksa hmuntinah an kal darh vak a.
Chutianga a taksa mamawh tâwk thisen a neih loh avângin a lung pawhin hna a thawh tur ang a thawk thei lo hi a lo ni reng a. Doctor chuan a natna an hriat mai theih loh thu leh phai lam panpui nghâl vat a ngaih tur thu a sawi bawk a. Chu thu chuan min barakhaih kher mai!
Rilru hah tak leh ipik tak chungin chawei turin ka haw ta hnak hnak a. In ka thlen chuan khumah ka thu hnawk a. Ka mittui chu rawn parawl nghâl tiam tiamin lungchhe takin ka inhnît faih faih a. Ka kâ-ah chaw rêng a lût thei lo.
A dinhmun a that vak loh avângin mawi leh mawi lo pawh dâwn lovin damdawiin lam ka pan leh ta nghe nghe a. Damdawiina ka han luh chuan a lo harh tawh a, min hmuh veleh hlim takin min nuih nghâl ver ver a; ka hlim kher mai. A bulah thuin kan inkâwm leh melh melh a. Kan inngainatzia leh inhmangaihzia hretu, a chhûngte pawhin min hrethiamin min chhuahsan nghâl vat a.
An chhuah veleh a kuta vuanin ka hmangaihzia leh chàn mai ka phal loh thu ka hrilh mawlh mawlh a. Ani pawhin min hmangaih thu min hrilh lo chuang lo.
“Mate, naktûkah phai lam kan pan dâwn a. Ka awm loh chhûngin nitin ice-cream lo ei ziah la, min lo hrechhuak thîn dâwn nia. Ice-cream ka ngainatzia i hriat kha.”
A aw chau tak chuan ka pumin min fanchhuak vek a, ka tawng hlei thei lo.
“Mate, dam takin i lo haw leh vat dâwn alawm..”
A chhûngte lo luh leh hma chu a dam huna kan hun hmandân tur leh inneih lam thleng sawi kaiin, suangtuahna leh duhthusàm nen kan inkâwm a, kan hlim hle.
A chhûngte an lo luh tâk avângin leh a harh that tho avângin ngaihtha tak chungin ka haw ve ta a.
A tûkah chuan phai lam an pan tih ka hre thei a, Notei chanchin erawh ka hre mai thei lo. Chutiang chuan kâr khat chhûng chu rilru laklawh tak chunga awmin a chanchin ka ngaichâng reng a. Chanchin an neih zui loh êm avângin, ziaawm lam pana ngaiin tlêmin ka thla a muang deuh a.
Notei te’n phai lam an pan atanga a ni 9-na chiah a ni a. Nidang ang bawkin office-ah hnathawkin ka buai leh map map viau a. Chhûn dar 12:22-ah phone call ka dawng a. Ka han en chuan ka no. hriat ngai loh a lo ni a, ka la a.
“Sangtea maw? Notei û ka nia. Nichin chawhma lawk khân i thiannu chuan min kalsan ta…!”
A sawi chhunzawm ka hre tawh lo; phone ka thlauh tawp a, chhuatah thingthi hnawkin ka ngawi reng a. Eng nge ka ngaihtuah ka hre lo va, engtin nge ka awm tih pawh ka hre hek lo; ka chhia leh tha hriatnaten min phatsan ta pawh a ni ta ve ang.
Pute hnênah pawh engmah sawi lovin a rang lamin inah ka tlânhaw vat a. In ka thlen veleh khumah ka bawk thlawp a, tah pawh tap chhuak thei lovin ka biangah mittui a luangthla zawih zawih a.
Ka hmangih berin fam a chang ta! Damdawiina kan duhthusàm zawng zawngte kha a thlâwn mai niin, a message ka paih phal lohte pawh min tihrehawmtu mai a lo ni ta! A hnêna ka lo sawi fo tawh, khawvêl thara mi thar nena nun thara nunga thil thar kan dinchhoh mêk chu a tluchhe ta!
A hnua a chanchin ka hriat leh dânin khatia phai lam an pan hnu khân a dinhmun a hlauhthâwnawm avângin leh nikhua hre lova a awm reng avângin doctor-te chuan damlo na zual dahna (ICU=Intensive Care Unit)-ah an dah nghâl a. A thisen exam tura lâk an han tum chuan a thisen zâm an hmu zo mai lo va. A thisen zâm zawnga a taksa hmun hrang hrang an zai kak hnuah thisen tlêm azâwng an la thei hlauh a.
A result an han hriat nâk chuan a thisenah potassium leh calcium chu hlauhthâwnawm khawpin a tlêm a. Chuvângin a lung pawhin thisen sem chhuak thei lovin, a kut leh ke te chu a duk vek a. A lungphu pawhin that lam pan thei lovin thi leh dam kârah a awm reng a ni.
Tichuan, ICU-a a awm atanga a ni 8-na chiahah a thluak leh lungten hnathawk thei tawh lovin, theihtâwpa doctor thiam bîkten tihdam tuma an enkawl nachungin a thlarau chuan a chhuahsan ta a ni.
Chumi ni atang chuan engmah eiin ka in hlei thei lo va, ka mu thei hek lo. Khawlaia ka chhuah chânga mi ice-cream zawrh ka hmuh apiangin mittui ka hru lo thei lo va, chu ka mittui nen ice-cream chu harsa ti tak chungin ka ei thîn a; nitin ka hlah ngai lo. Tichuan, ka ice-cream chu be mawlh mawlh chungin ka fâwp vawng vawng thîn.
Hringnun hi mumang ram ang mai a ni;
Reilotè an lo lang a, an ral leh mai thîn.
Lungawi lohna chu hlimnain a zui;
Reilotè-ah lungngaiin kan tap leh si thîn.
