Kan hostel hlui tawh tak tukverh pawh hawn that theih tawh meuh loh chu nam hawng rawpin ka hawi chhuak a, khua a thiangin van dum pawla chhum var te pawh a fiah em em a. Thla lah a eng nangiang mai. Mizo dang tumah an awm ve loh avangin lung a leng hle a. Nun hlui chhui kir neuh neuh pahin mahni chauhvin thla eng chu ka thlir vawng vawng a, ka room tukverh chu chiang em em mai hian a rawn chhun eng a. Ka ngaihtuahna a kal dingin engmah tih zai rel thei ta lo chuan ka tham vel ruai ta a ni.
Kan intawn atang khan kum tam a lo vei ve ta reng mai. Mahse, zanin zet zawng hun hi a let zawngin a kal ta em ni? tih theihkhawpin hun hlimawm tak kan hman dun lai te kha thinlaiah a rawn thar leh a; nimin lawka thil thleng ang maiin a rawn fiah leh ta a nih hi.  “ D’ ka ngai ber mai che” tia a phun rik sap te kha bengah a rawn ri nawn leh a,rilruah a rawn thar leha ka ngai vawng vawng mai a ni. Mut ka sual a mahse, ka muhil thei lo. Ka tho va, ka mu a, ka tho leh a ka mu leh a, “Hla ngaithla ila min awi mu mai ang chu maw?’’ tiin ngaihthlak ka han tum ngiala mahse, mutthilh a hnehin ka harh tulh tulh mai si. Sulhnu ramah ka chenga ka vak vel ruai ta a ni. A tawpa tawpah chuan samang then hnu Boihi bawk chu ka va rim leh ta nge nge a. A bulah ka thu leh a, a kut no nalh tak sei sin sil sel te kha ka vuan leh a, a sam dum hlap mai te kha ka chul ka chul leh ta a ni. A ni! a bulah ka thu a, a mit meng mawi fiah em em leh a he sen vam ham mai te chu suangtuahna mitthla mai mah nise, aw… a va fiah leh si em! Val hi a D’ then hnu ngaiin a van ruaia, beiseina thamral tawh hnu ngaihtuahin a mangang ta em em a ni. Ka ngaihtuah nasat poh leh ngaih a zual tulh tulh si a, “Ngaihzual, ka ngai ber mai che!”
Sulhnu chhui leh nunhlui ngaih zawng
Awmkhua a va har lua e!
Ka ngai em che, ka ngai vawng che
Ngaihzual ka ngai em a che.
Kum tluanga fanau maltluan chawia lengdun turin ka tiam che a, nang ngei pawhin min tiam a nih kha. Mahse, kumtluang chu sawi loh kumsul pawh a vei hmain thenna biahthu min hlan ta mai si a. Nasa khaw lovin i zunah min uai tira, khawdang min hawi tir thei lova, ka chhungte leh ka thian te min phatsantira, i tan hian ka inpumpek a nih kha ti raw? Mahse, I duh hunah ka chan tur reng dawn lovin min phatsana lengdang tang min belh san si. A na! Ka ngaihtuahna leh ka tawngkam te hian nang tih bak sawi tur a hre lo a nih kha. I hai lo. Mahse, heti maia inthen leh tur hian enga’n nge ka lo tawn kher che?, inchhira lungvai mai tur hian maw ka lo tawn che? Dik takin hmangaihna min hlan te kha tunah zawng ka tan chuan a rawngin phatsan tu lian berah ka chan che a; mahse, chuti chung pawh chuan nghilh ni erawh i awm thei si lo a nih hi. Hei erawh Rinpui, lo nghilh bik suh ang che, hlimtaka kan pahnih chauhva naktuk lungkham buai nei miah lova, zankhua pawh dawn lova laikhum kan zal lai kha….
Engvang nge maw nang nen kan in tawn
Nghilhni reng I awm si lo
Laikhum zala tlai khua kan var lai
Nghilh bik suh aw Rinpui!
Thlamuang takin kan leng dun a. Tu dang mah kan ngai lova, leng dang reng kan awt bik lo thin kha a ni a. Ka bulah kha’n i thla a muang a, i bulah ka thla a muang ve bawk. Kan inringtawka, karah sawi neuh neuh awm thinin thinrim chang te thleng ve bawk mah se inngaidam tawnin hmangaihna par kan kan vul tir leh thin. Kan invel-tapa kan han inthlem-lungawi leh changa kan hlim thin zia te kha aw. A ni, duat tak a ka fawh vawng vawng lai te kha chuan kum tluanga samang then hi kan ngaihtuahnain a thleng pha lova, ngaihtuah pawh kan ngaihtuah ngai lo a nih kha. “ Boih, i kianga ka awm loh chuan engdang mah hi ka ngaihtuah thei lova , khawdang ka hawi thei lo a ni ber e, i kianga ka awm phei chuan….” tia biahthu ka hlan lai che a.. “keipawh …” ti paha min rawn en phei haw te kha nghilh thei hian ka mawi lova, nang ngei pawhin ngilh bik lovin lo dawn kir ve thin ang che…
Hmangaih bianga kan fawp lai khan
Ka dawn ngai lo sam ang then.
Chutin hlimte-a biahthu kan hlan lai te
Han dawn ve ang che aw
Ni e, kha’ng zawng zawng kha kan chungah thleng tawhin theihnghilh ni reng awm tawh lo mah se, inthen i duha, sawi tur ka nei lo. Engmah thiam thu emaw thiam loh thu emaw sawi tur ka nei lo. Kum tluanga len dun i lo rilruk tak tak lo a ni tih reng ka lo hre lova. Kan neih ro sum leh kan chhung kaw dinhmun hian a phu lo che a, thiamna lamah ni se cho rual loh i ni. Phu loh hi kha chen engtin nge kan len dun theih tih hi ka inzawt chatuan dawn ta a nih hi. Kei chu mittui nen rilru na em emin ‘Ka tling zo lo a ni’ ka ti kumkhua tawh ang a mahse, Boih! hei erawh lo hria ang che. Zangkhua hian bungbut hun ala nei anga, zawhte hian ngiau hun a la nei chek ang. I hringnunah khua lo durin chhum zin chang a la thleng ve chek ang, “Hmangaihtu ka haider a ni” i tih hun te hi a la thleng mai thei e. Chu’ng hunah chuan lungchhirin lamang lo let leh mah la.. he Mipa fa hian “ I tan ka rem tawh lo” tiin hnung lam ka chhawn san tawh ngei ang che.
Hmangaih eng dang vang mah a ni lo
Ka tling zo lo a ni e
Suih lung chhirin lo kir leh mah la
I tan ka rem tawh lo ve
(Thu belh: Hetianga mi hla phuah han chinlet hi dan kalh a ni em ka hre lova, a phuah tu ka hre mai bawk si lo, nalh ka tiin ka rawn luan liam pui ve tawp mai a ni. Ka ti sual a nih chuan a phuah tu ngaihdamna ka dil nghal e.)
