-rlc 04-06022002
A ni lah tak a, khami zân zet kha zawng aimithlawn pawh a lêm chuangin ka ring bik lo; a thim êm a tin ni. Pasaltha zân ramvâk pheikhai hruaitu leh a kah chin tur dik tak a hrilh hretu HMEHEN awm lo se’ng chuan kal ngaihna a awm lo reng a ni.
‘A pawichai lo, thim raw sek sek; kan kal tho tur a ni’ ti a kan tum hmun lam kan pan lai chuan; lairila riak hnawh tawt tuar lo, up beh harsa tak chu, thlasik maupuah pui phawng phawng chakawm khawpin a lawr hian a rawn lawr tuam tuam mai si, mahse mawihawih ka zawn a talâng em ni, eng ka tih loh chhan ? Ka hrethiam bik lo Vâlnêm-a ka va tlawm chiang kher êm!
‘Nilo, a ni thei ngang lo, tun bak huntha a awm thei tawh lovang, I nih nih I ni ang a, I thak thak naah I thak mai tur a ni’ ti a chhûngril lam a min fantu leh min fuihtu, so bulh bulh mai chu tû tawrh atân mah hian a nêm bikin ka ring chuang lo. ‘Nie, mi tihdan a ni lo chuang hlei nem’ ti a ka chhungril thu ka AMEN takah chuan, ‘Khawnge ka duhna leh ka suangtuahna mitthla chu atakah kan chantir teh ang’ ti a rilru tipaukhauh chawp a insawh insawh chungin , kan haw hnu chuan chu ka thil tum chu ka puitlin thei ta hram a. Valnema ka va han tlawm leh teuh kher em !!!
Hmm!! Hei hi em ni; mite’n hmangaihna bul lo intanna ti a an lo sep rawtui thin chu le? Nilo, a ni thei lo hmangngaihna chu atirte-ah a ni lo’m ni a lo intan thin? A nih loh leh, chuti nise, hmangaihna lipuiah ka zuang lut ta em ni? Chu lipui chu a thukin a ralti em? A tui ka hakin ka talbuai mai lo’ng maw? Nge ni a, chu tui chu ka lo hak reng tawh zawk? Tanpui tu ka va ngai em? Ni e, chu tui chu ka la hak ri bawrh bawrh em lo a nih pawhin, kawng thleng emaw tal chu ka lo dai reng tawh pawh a ni mai thei a sin, tu’n nge hria??? Ka ngaihtuahna a kal buai tan, mahse eng emaw min mawlh tu puitlin ngei ngei ngai chu a awm si. A!! engpawhnise, ka nih nih ka ni mai a niang chu(h)!!!.
Ma’rawh chu , chu ka duhthusam ka puitlin tak a chin zan hnih lo liam a kal hman awm love, thuthinthawng, thinlung kheitu, hnar hmuhlen vaw vaw na tham leh hmusit duhtu leh thing ti tu tan a; an duhthusam mual a min hnuk liam thei tu leh hnung lam a min thlir rutu tan a chawh-tak-rawh ti a min nuih tet tet na tham ngei mai chuan rin loh lam atangin min rawn deng ta dawt mai, a va nain awih har ka va ti tehreng em!!! Mumang ni tase; thanharh hnu pawh a thinrim insawh insawh na tham a ni reng a ni. Mahse mumang awzawng a ni silo, a tak ngei nihnih khat lek liam ta a mi ngei kha a ni si!! Khawi atanga lo thleng nge?? Engvang a lo awm nge a nih ? chhan thatawk tak a nei ngei tur a ni. Mahse ka hamhaih atalang ka bangbo rih hle !!!!
‘Mi han hrilh chiang deuh teh, I thusawi ka man thiam mai lo’ tia ka bula thu ka’n zawh chian nak chuan, a mak ka ti lutuk chu; min lo enchik tu awm se’ng chuan ka meng phar awn awnin ka inring hial. Ni e, a mak em a lawm! Phatsanna rapthlak leh phiarrukna ten awm, itsikna tihbaiawm leh elrelna huatthlala tak zawng a ni chiang a lawm!! Chumi a nih loh chuan chhan thatawk tak han puhmawh tur awm mawlh hek lo!! Nilo, a ni thei lo, thildang a awm ang!!! Ni e a awm chiang alawm, awmlo nise chuti ngawt a he thil hi ka hnen lo thleng tur a tan chuan kei duang-am tan hian a u lam hrat si a ni.
Hmm!! Ka hrechhuak ta, tu thiam loh va ni suh, kei, keimah ngei hian ka kuang lo nawrin, thangkamtu thang ka daiper palh ta hlauh a ke vanvawr suauvin ka thal ta mai mai zawk a ni lovem ni?? Tu han dem thei ka ni em ni? Ni suh e! ka ni mawlh lo a lo’m, mit mimin hla tak thlir turin a mit a meng zau thei dawn em ni? Anih loh leh, mitnaute khawih sakin a mit a hup lovang em ni? Chuti nise, mit hup chungin khua a hmu thei dawn em ni? Hnailo ve, a bul hnaia awm, lo dipdal tu nia a hriat apiang a vaikian mai loh nakah, chubak engnge a tan tih tur awm??? Khawngaihthlakin.
Chu chauh em ni? Ni suh e, he thu rawn thlentu hi thildang a ni em ni? Nilo, ka hnen a cheng thin, kawng engkima thurawn ka lakna, harsatna bakberh tak ka tawh lai ngei pawh a min phatsan miah lova min khaichhuak tu, rilrem loh thil ka neih laia hlatekhua thleng pawh a palaihna min thawh sak tu, ka tun dinhmun min hruai thlengtu leh he thu ngei pawh au chhuahpui thei tura chakna leh fuihna thu min fah tu ngei a ni lovem ni?? Aw ! A va khawngaihthlakin a va chimawm si em! Ka tan thahnem a ngaiin, mi va ti beidawng si em!
“Khawngaihthlakte, demawm takin che mahla, ka thinlung hian a hriatthiam pui chein, a lainat ngawih ngawih che a sin, mahse maw demna che kawng khat ka nei; I thil tawn tur ngaihtuah chiang lova chet ila vak leh thlemna do tur a chakna i nei lo lutuk hi, tlem han tang hlek la chuan e, fak i hlawhin chawimawina NOPUI I dawm thei tur hi a ni a le!!! Mahse tunah chuan ‘thu a tawp e lumam’ tih bak engnge tih theih kan neih ?”
Hmangaihna hi zawngin mi a lo bual a thei hle zawng a lo nih dawn hi! Mahse engnge pawihai awm? Ngaihtuah tam a ngai em ni? Khing ka thil tawn avang te khian ka inlamletin phatsantu dinhmun ka luah ve ang maw? Hnai lo ve, ka luak chhuah hnu ei leh tur chuan ka kir aw zawng lovang . Ka duhna leh ka suangtuahna mitthla, a famkimin la chen rih mah suh ila, a tak a ka chantir a lo liam, ka tan, thilhlu dang a awm chuang dawn em ni? Ka hriattheih tirh ata ka duh a, ka rim a, ka rimthlu ta nge nge a ni mai a; harsa tak, relchhiat leh tlanghuat hnial lova ka hlawh chhuah keima kut kawih liau liau hi ka thehthang ralin, engmah lovah ka thamral tir leh mai si ang maw ? Teuh suh e! Chu ti nise, thlansa phulkai a ka thawhrimna khan engnge awmzia a neih ang.?
A man chhut ila nuai(h) sang sawm hian a lei zovang em ni? Ka bulhnaia a awm avang ngawt pawh a hahdam ta sawng sawng a ka lo inngaih thin na te, ka nunhlui min chhuikir tir a, siamthat ngai laite siamthat tum a hma ka lo lak ve sauh sauh tawhna te, ral-leh-lem ram kai tur a hunbi herliamin darkar sawmhnih leh pali ngawt a mamawh tih hrereng chunga nghakhlel tak leh engthilin nge min rawn thlen chilh ang tih hre lawk hauh lo leh ngaihtuah duh lo lui a, Tlumtea thlir tak a ka lo thlir ve tlawk tlawk thin lo thleng ta cheng ka phatsanin, hluihlawn thilah ka ngaiin, daipawnah ka theh chhuak leh hlauh si ang maw? Chutiang dan ka hre ngai love. Mahse rinawmna hi thilsiam zzawng zawng hnenah Siamtu’n a pek rual rualin kan tlakchham lian ber chu RINAWMNA bawk hi a ni leh fo thin tih ka lo mangnghilh hman pek kha erawh chu ka tisual chhiava.!!
Sawitam a tul ka ring lo, ka hun hman tawh, hman mek leh hman zel tur min hriatpuitu atana ka sawm he ka BALLPEN, thu, a kip akawi min hriatpui hian HRIATPUITU DER a atan vawi khatna leh min phatsan ni a ka hriat vawi khat na ah hian a thiamloh vek a nihna ka hmuhpui bik hauh lo, a enkawltuin ka enkawl uluk loh avangin, a hmang tu an lo dang ta mai a ni zawk, ma’rawh chu ka bula awm reng thin, thu ka zawh fo thin leh ka hun kal tawh, ka hman dan dik tak min hrilh hretu he ka DIARY bu te reuh tein a lo thik em avanga ka ka ka han ang ve ta mai erawh hi chu ka tihtur diktak ti a, hlenchhuak taah erawh ka inngai lo thei lo mai zawk a ni.
Mahse he ka BALLPEN ka hloh thu ka Diary (Ka bula thu ka tih kha) in min hriatchhuah tir lai a, ka ui thu leh mak ka tihna zawng zawng te khan ngaiawh lehin, HRIATPUITU DER ti a ka lo puh hmanhmawh, ka BALLPEN ka hloh tak ngei mai khan a awmna tur hmun rawn luah lehin a tihtur diktak HRIATPUITU RINAWM nihna hna hi rawn chelh zui leh se tih chu ka duhsam ber a ni reng fovang.
