Tlai dar 6:30 bawr vel ani a, ka inluah tereuhte mi inhnuai thlakhata rs 500 chawia ka luahah chuan ka inkalh khum a, ka stool upa tawh lam sawi bei maiah chuan thuin ka chaw ei dawhkan a rial no lo in hung chhungah chuan kohhran sadai \hiat tuisik chu ka thli ri keuh keuh a, kan tlak leh pawp a, mahse ka thaw chu aven phah sawt chuang reng reng lo, ka hma zawna hruihrual inthen nalh nalh ka nunna titawp tura keimah ngeiin ka buatsaih chu ka thlir vawng vawng a, chuti maia nun tihtawp chu ka duh hauhlo, mahse he ka hringnun kawng ka lo zawh tawh ve dan hian a zir miau lova, midawihzepte tihtura ka lo dah thin chu tive turin ka rilru chu ka siam ani.
Ka thiltum chu ka hlenchhuah theih ngeina tura inin lungpuam te te tum ka ni a, mahse rawlthar camp chhuak hlim angin`thih thlamuanna` ka nei thei chuang si lo. Van Angelte khian beramno fakna zai rimawi nen minlo hmuak ve dawn chu nisela chuan thlamuang takin he ka nunna hi ka thlah mai tur. Mahse he ka hringnunah hian eng hi nge ka damchhan ni ve chuang le? Keimah ngei ka nunna ka inlaksak chuan ka chan tur pawh ka hria, mahse ka tan chuan `Hremhmun` ai pawhin he khawvel hi a hremhmun zawk tlat ani.
Ka inluah chunga a neitu fate chu antlan ri khut khut a, chu mai mai pawh chuan kei chu min vel zel si. An pa ber hi kum 30 vel chauh ani a, kei aiin kum hnih vel chiahin a upa awrh chauh a, mahse a ni chuan chhungkaw hlim tak a din thei tlat a, keive erawh chu… mihlim nui ri hian ka pawi a sawi a, mi hlim hmel ka hmuh hian ka nun khua an ti ngui thin. He khawvel a ka rian bik ziate chu ka ngaihtuah a, nung ve reng tlakah pawh ka inruatlo. Nia mite vanneihna hian ka vanduai bik zia mai min chhiarchhuah tir leh thin.
Nu leh pa kara seilena hringnun hlim taka hman hi mihring tupawhin kan duhthusam anih ka ring, mahse keichu chutia duhthu kan sam thin chuan kum sawm awrh ka nih in min phatsan nghal! Ka pa chuan zu ngawl a vei a, a fapa neihchhun leh a nupui aichuan zu a hmangaih zawk! Zu a ruih phur chang chuan duat tak leh duh taka a neih, hmangaih leh duat taka enkawl tura a intiam a nupui sawisak chu ngaiah a neih tawh ani. Mahse chu thil chu a tuartu keini nufa tan chuan ngawirenga enliama ngaia neih chu thil har tak ani.
A tawpkhawkah chuan ka nu leh pa chu anlo inthenta a, kei chu FAHRAH ka lo nita. Ka nu nen an inthen hnu lawkah chuan ka pa chuan zu zuar a luhkhung a, a chanchin kan hriat chhun chu a zu in nasat thu bak kan dawng ngailo, chutiang thu dawn reng takah chuan ka pa ka hmangaihna leh lainatna chuan hmun achang tlem tawlh tawlh a,a hnu kum hnih lekah chuan a inhlum ta hial a.Khang hunlai khan thil awmzia ka man pha tehchiam lo, mahse tun hnu a ka ngaihtuah erawh hi chuan ka pa lak ah khan ka vui thin.Sawrkarah hna chhete a thawk ve a, mahse a fapa tan hian engmah dah a nei lo. A khawvel rosum leh pai te chu ka awt tehchiam lo, mahse `Hmangaihna` takngial pawh min pek tur a neilo erawh kha chuan ka thinlung hi a tina thin.
Ka nu erawh sawiselna tur reng ka hre phaklo, mithianghlim ani erawh chu ka ti biklo, ani chuan hmangaih takin min enkawl a, mi ka an phak loh hlauvin ka tan thawh hreh reng aneilo, ka nu anga nu tha kha chu khawvelah hian an awm tam pawh ka ring bik lo. Ani pawh kha fahhrah a seilian ve tho ani a, chhungte han belh leh han pur tur pawh kha a nei bik chuang lo, a nulat lai pawhin mi inah a awm lawr mai mai thin a, chutia a awmna lamah chuan ka pa nen hian an lo intawng ta a, hlimna alo neih ve theih mial inringin inneih a remti a, mahse a zawn hlimna chu a hmu chuanglo, ka pa in a tih retheihna zawng zawng pawh ka fahrah ngaingam lovin a tuar tang tang a, mahse a tawp atawpah chuan a tlin ta ngang lo a, min hmeithai pui ta mai ani.
Rual ka awh hlau reng reng khan ka nu khan a hun leh nite a hmang thin. A fapa ka hlim theihna tur anih phawt chuan hrehawm reng a pawisa lova ka nu khan khawvel dang aneilo a, atan chuan a fapa hi a khawvel a ni. Ka nuih chuan a nui ve a, ka tah leh a tap thin. Ka lungngai hmel leh hrehawm ti hmel kha a hmu duh ngailo a, a hmu ngam hek lo. Ka tana a inpumpekna zarah harsa tak chungin B.A lai ka zir zo ve thei ngawt pawh hi thiamna hi ka nu min pek ka ti lo theilo.
B.A ka zir lai khan ani vawin ni thlenga theihnghilh theih tawh ngailoh tur ka tawn ni,1st year ka nih kum ani a, kan class ah chuan duh em em Sangtei ka nei a. Mahse ka dinhmun ka en in ka tan ka phu loh zia ka hriat chian em vangin ka duhna thu pawh chu ka hrilh ngam lo a, ka chetzia ah erawh chuan ka theih tawk chuan tilang tawk chuan ka inhre ve thin, nula ngo lampang 5:4ft vel, samsei nu hnap mai, ka duhthusam ang chiaha sam sei hnap mai, a hmuichung chiah khuavangchhingchhiah nei kalh mai, a mawina ti nalh tura hnawihsen chawp anilo tih hai rual loh khawp a hmui sen duhawm nei ani.
Chhungkaw khawsa thei ti a han sawi tur chu anni hran em em lo, apa chu Kohhran upa min ani a, amah pawh chu kohhran lam ngaihsak mi tak ani a, kan inthurual phah phian lehnghal. Kan inkawm nel tawlh tawlh a, a chhungte pawh chuan min be chhe lo a, a tawp a tawpah chuan kan lo inngaizawng ve ta hial a, Kan in thlahlelin kan inngai ngawih ngawih a, kan tan khawvel kha a par vul thar leh nite hian kan hre thin.
A chhungte chuan kan inkawm mai mai ani lo tih an han hriat chhuah takah chuan an ina ka lenluh a tha taka min be thinte khan min tum khum zo ta a,kan inkawm an phal ta tlat lo. Mahse chu chuan min suihnghet zual sauh thung si. Chuta ka rilru tina em em tu erawh chu vengchhung leh kohhran ah pawh mi fakrawn kan ni ve a, mahse hmeithai fapa ve mai chu min endan alo dang deuh a ni tih ka hriatna chu ani.
Ka BA kum thumna ka zir kum ani a, Sangtei nen pawh kan inkawp rei ve ta hle ani. Nikhat chu ka nu damlo awmpuiin damdawi in verandah ah chuan ka vei thauh thauh a, ka rilru chuan thil eng eng emaw a chhui kual a, ka nu damlo damdawiin a kan hruai hmaa Sangtei thu min hrilh Minister fapa inleng a neih thu leh a nu leh pa ten duh tur a an tur nasat zia thu min hrilh te chu ka ngaihtuah a,ka rilru chu a mangang takzet ani.
Chutiang thil ka ngaihtuah lai a ka thu hriat chuan min thawng takzet. Ka phone a min rawn betu chu Sangtei ani. A thu min hrilh chu pasal a neih tur thu ani. Amah pawh in hrehawm a ti, mahse ka cho loh val a tawng a, a nu ten an duh bawk si a, a tette atanga amah enkawl seilian tu a nu leh pa thupek chu a hnial thei lova, a zawm mai a ngai ani, chu chu kan thu keuhthluk dan chu ani. Kan inhmuh hnuhnun ber ni a Sangtei mittui a biang no leh nel thap mai a lo luangthla ngiai ngiai tak te kha aw!
Nia, khatih lai khan tlanbo pui mai duhna rilru ka nei, mahse natna khuma mu chunga thu min chahtu ka nu thusawi chu bengthla ah alo thangkhawk reih reih a, “KAN THATNA TURIN PATHIANIN RO A REL” tih chu. Chu tawngkam chuan min thunun ani.
Ka hmangaih Sangtei ka chan chu ka nu avang chauh chuan ka tuar dam thei. Mahse, engatinge LALPA nufa inhmangaih ngawih ngawih leh inthlahlel ngawih ngawih hi min pawh then kher a, ka hmangaih em em ka nun min dinsak a nunna thaw min petu ka nu lehzel hi min lakbosak mai le? Intih pachan hram hram ka tum thin a, mahse, ka tan chuan avan harsa thin em! Dan rual lohvin ka biangah hian mittui alo luangchhuak thin a, mittui luanchhuah tam avanga lo kir leh tur chu nise ka nu kha ka chelhding ngei ang. Mahse Pathian remruat chu Pathian remruat ani a, mihring tihdanglam rual ani silo.
Harsa ti tak chungin Exam pawh ka hmachhawn a, Pathian zarah ka Graduate ve ta hial a, mahse hlawhtlinna pawh hian mittui tho a ko chhuak a, la dam se chuan min hlimpui em em tur ka nu a awm tawh lo, ka thiante chu an chhungte’n an hlawhtlinna an lawmpui a, kei ve erawh chu ka mal ngawih ngawih a, rinawmna thu min tiamtu Sangtei tal ka bul ah awm ve se a tha tur…..Ka phu ang tawk hna ka han dilve a, beidawnna chauh lo chu engmah kan hlawhchhuak ve chuang silo.
Hna hmu tur chuan tihpuitu tha neih angai ani awm e. Mahni phulo hnathawk an kat nuk a, a phu ve tawk te erawh chuan hna kan hmu zo ve lo. Inthlan dawn hnaiha kan chhung hnaivai te emaw tih mai tur a min nuih ver ver tu te pawh an pisa ah nuih chu sawihloh keini biak eih zawh ve rual lohvin an lo thu tumhmuk tawh mai si! Keini ang duang tan chuan khua hi a var ve dawn lo ani ngei ang.
Chutiang zawng zawng ka ngaihtuah chuan ka tan chuan nun hian awmzia a neilo ka ti thin a, chuvang chuan ka nun tihtawp mai chu ka tan chua a hahdamthlak zawk mahna. Mahse, chutih lai tak chuan ISUA Krosa an khengbet lai lem ka nu min pek ka roh em em banga ka tar chu ka han hmu fuh a, ka rilru ah chuan ‘I beiseina leh rinna chu amah ah chuan nghat ngam ta che’ tih chu a rawn in thum nawn tlut tlut a, mahse ka thei tlat lo.
Kha leh chen kha amah ah chuan ka rinna chu ka nghat a, mahse harsatna lo chu chu ka rinna chuan hlawhchhuah a nei ve lo, Mi a tidam a , amah a inti dam thei silo’ tih ai chuan ‘Amah a inti dam a, a mite hliam erawh a tidam thei silo’ tih chu ka rilru a lo lut chu ani. Ni e, kan tan hrehawm nasa tak a tuar alawm, mahse ni thum ni ah a tho leh a, a inti dam leh a,kei erawh chu he hringnun hian min nghaisa a, chuti chunga Pathian ngilneihzia leh duhsakbik a neihlohziathu sawi chu ka tan chuan arsi lak tluk zeta harsa ani.
Chutiang thil ka ngaihtuah vak vak lai chuan dawhkan ah chuan ‘chukchu’ alo vak phei a, ka rial no chuan ka lo hup thawih a, chu rannung chuan a nun khawchhuahna tur zawngin a bei nasa ngei mai, mahse chu chuan zirtir min pe tlat.
Thlarau nei lo leh rannung satliah mai pawhin chuti khawpa a nun chhuahna tura a beih si chuan kei Pathian thilsiam zawng zinga ropui ber phei hi chuan damchhan ka la neive tih hi ka hre tur ani, mahni nunna ngei inlaksak te ka lo tum a, ka lo va pa lo em! Ka in banga ka nu thil min pek a roh em em ‘Khenbeh Krista’ chu ka en ngawih ngawih a, ‘I kiangah ka awm zel ang, hlau suh’ min rawn ti ni hian ka hria a,tah chiah chuan ka thinlung ah chuan ‘BEISEINA ENG’ chu lo eng thar lehin ka hmaa harsatna lo thleng te pawh huaisen taka hmachhawn turin ka in buatsaih ta a. Kan thatna turin Pathian in ro a rel thin si a.
