A khuhhawnna
Zinglam dar tlemte a ni tawh a, phone nghawr der der chuan min tiharha, ka han chhanga “mangtha aw” tih chiah a sawi a, a dah nghal daih a. Khatiang huna han in mangtha kha chu a lawmawm viau rualin min lo mangtha lo mah se ka mu nghet tawh hle a sin le. Muhil leh thei tawh hek lo le, kha thu kha ka ngaihtuah chhunzawm ta chiam a…
Duhsakna tawngka..
Kha min rawn phone tu ka thianpa khan duhsak takin tui taka mu turin min rawn hrilh hram hram nge ni anga a kuthlei veng zo lo tih chu hriat hran har tak a ni. Eng pawh chu ni se khatiang huna min rawn phone ngamtu a nih hrim hrim kha chuan min duhsak loh pawhin min ngamtlak tak nih a ngai a, chuvangin khatiang huna phone ngam thei tura ka awm kha kawng lehlamah chuan lawmawm ka tihial zawk a.
He “mangtha aw” tih thu hi ngaihtuah chiang teh ang u. Zan mut hun a ni dawn tawh a, thian thate chu zana tui taka mu a, mumanga hlim taka cheng tura duhsakna tawngkam a ni a. Chutianga zan mut dawn apianga i mangtha ziah chuan eng buaina pawh tawk la a kiansan ngai lovang che. Ngati maw? A chhan chu i thian tha tak a ni a, engkima hlim taka awm reng tura i duh a ni a. Ani pawn hlim taka awm ve reng turin a duh dawn che a ni. I hmelma chu i mangtha khat viau thung ang!
Petu dinhmun atangin..
He “mangtha aw” tih hi a sawitu dinhmun atangin bihchiang teh ang u. Kha “mangtha aw” i va tih sms i va thawn khan engnge i rilruah awm le? Kha i va thawn lo dawngtu kha hlimnain tuam se, vanneihnain chenchilh se i tih vang a ni lo’m ni? Kha i va thawn lo dawngtu kha zan thim hnuaiah thlamuang taka muhil a, mumang lama hlim taka awm tur leh zing boruak thiang takin lo hmuak turin i duh sak a nih kha.
Kawng dang lehah chuan kan thiante khualkhuaa kal mai tur thlahnan kan hmang bawk thin a nih hi. Kha i thian hmun danga awm mai tur i thlah a, “mangtha aw” i tih khan i thian tan khan a hlu a sin! Kha i awmna hmunah khan amah thlahlel ngawih ngawihtu a awm tih a hriat khan a tan kha i awmna kha mikhualna hmun a ni tawh lo, thiantha bul a ni tawh zawk!
Tin, beisei tur awm tawh lo, thlan khur chhunga mu tawh, vur hnan mai tawh tur pawh kan la mangtha a nia. Ni e, kha vaivuta kir leh tawh tur kha kan la thlahlel a, kan la ngai a, kan bulah la awm se kan ti em em a. Mahse thlan chuan a khur hmangin min pawt then tawh si. Kumkhuaa hmu leh tawh lo turin leh mahnia khawhar taka thlan khura mu turin kan thlah a..kan mangtha thin a nih hi.. He thumal hi chuan hringnun hi a lo va chiah hneh em!
Dawngtu i la ni dawn!
I muhil tur leh i zinbo tur chu vawi tam i dawng tawh ngei ang tih chu zawlnei sawi ngai lovin ka chiang a. Lungchim taka mangtha tu che pawh kutthliaka chhiar tham an awm tawh ngei ang. Mahse, khatianga mangtha tu nen che kha chuan in inhmuh ni tur chu thangvanzawlah a lo chhuak leh thin.
Nakinah chuan i zinkawng chu i zawh tawp anga, i nunna hlu tak chu lak bo a ni tawh ang. Thlan khur chuan a angchhungah a pawt lut tawh si che a, vaivutah i kir a ngai tawh ang. Chu hunah ngei chuan a ni i chhungte leh laina te, thiantha te pawhin tawrh har an tih hun tur chu. Beisei tur i awm tawh si lo.
Thlana vur hnan mai turin a khur chhungah i mu tawh a. I thenrualte leh chhungte an thlahna tur che pawh he thu “mangtha aw” tih bawk hi a ni.
Ni e, hringnun khawvel kan hman chhung hi chuan “mangtha aw” tih thu hian min chenchilh reng dawn a nih hi!
