mi(sual).com

Hmuifâng tlâng sâng atanga hawi khawthàwn hi a nuam hrim hrim, November 6 zîng khaw-èng, khawthlang lam thlîrin hun tlêm ka hmang a. Thiante an haw zo va, lung a lèng duh hle mai! Tùn hmâa Lalruanga Lungdah an tih kha a awm tawh lo va, Châl-khawh-kham pawh kawngpui thar hrûlah a awm ve ta lo!! World Bank kawngpui chu kan ram tân chuan a tha ve fu ta e. Tùn hmâ chuan, Midum Khàm chhovah te hian thingtuai remchâng dawh belhin Jeep kan khalh chho châwk asin!

Eng tikah tak intàwkkhàwm leh hlawm ang ìmaw? Hei hi chu kan rawt (propose) thei, a thlen dikna erawh chu —kan thu pha lo. Remruattu —chunglama mi thu thu a ni e.

Kawng kual thlang lam, thingbuk awmna platform zâwl khi HMUIFANG KHUA ka nih vena chhan a ni ta!

Hmuifâng chauh hi Mi5ual Intawhkhàwmna TRYST a ni bìk lo va … remchâng (when and where) chi tin kan melh chu a ngai dâwn. Tihtùr hmachhawp nei kan ni leh ta a. Nikum lama kan thian kâwlhàwk rawtna màwl tè anga lang, chawplehchilh taka thil tih —zahawm zui leh zawngchhàngthlàk ni tà chu kan  inhuam nawn leh ta hi a làwmawm!

Retheihna Umbo (Garibbi Hatao) èm hi chu kan project a ni pha lo mai thei; mahse, a sik leh sâ —Kùtpui hun laia rual-awt èm èm, mi chanhai lehzualte nia kan hriatte chhawmdàwl ve zauh hi chu kan kovah kan dah ve ta a ang e. Chhûng tin kan kèp pha lo; mahse,  harsâte lei rah a rem leh theih nân Rupees 7,000 thuak han sem thei khawpa MI5UAL.COMMERS-te han chèt ve hràm hràm hi a chàkawm khawp mai!

Kum AD 2011 a thlen nân ni 60 pawh a tling tawh lo. Hmànni lawka inhmukhàwmte pawh kan chèttlàtna hmun a inhlat leh hle tawh hlawm a … Measured in miles leh measured in thoughts erawh hi chu a danglamna kan tem ru veng veng a nih sì hi le! Alms-giving Widow han nei thahnem viau mai ila, a va chàkawm èm! Kan hmâ lawkah khian rethei rualawt, puih thatho-awm tak tak kan hmachhawn leh dâwn. Nikum lamte kan thlìr lètin, a dawngtute chàng kha an hlim lo, a petute kha an hlim tel mah mah zàwk khân a lang. Zawngchhàngthlàk niin kan hre tlâng a, a làwmawm e. November 5 Hmuifâng Resolution a hlawhtlin ngei i beisei ang aw! Hmuifâng han tih hrim hrim pawh hi Chaw-hmui tui tak sawina a nih duh hmèl! Tùn hmâ te kha chuan phal bìkte chauh —beràm vulh tùr leh alu chîng tùr te an khawsa thìn. Hmuifâng khua nih ve in duh em?

Luka 21:3 Tichuan, “Tih tak zetin ka hrilh a che u. Hèng zawng zawng ai hian he hmeithai rethei tè hian a thlàk tam zàwk. 21:4 hèng zawng zawng hian an neih liama mi thawhlàwmah an thlàk a ni; ani erawh hi chuan a duh lai tak, a intùnnunna tùra a neihchhun tè a thlàk vek a ni,” a ti a.

Kan Lalpa thil thlìr dàn hi a mit a kalh riau châng a awm! A lang lo lam A thlìr daih châng a awm zauh zauh! A thlîr SERIOUS viau lawi si!

Kan hlimna chauh zawng lovin, mi dangte’n a zâr zo tel ve se tih hi … mi5ual-te rilru-put lo ni zui zèl se. Abram (Abraham) hnèna Pathian inpuanna pawh kha a ropui teh asin, “Nang malsàwmna ni ang che …” — tisa lam  leh thlarau lam thilah pawh a malsàwm zârzotu kan ni ve ta … a chi thlah kal zèlah Khawvèl Chhandamtu, hnam tin chi tinte tâna MALSAWMNA HNAR a rawn thleng chiang ta chiah rèng a ni! Chu ngei chu Israel-te beisei leh an nghahfàk tho thìn kha a ni!

“Ka tui a hàlin … lung ina ka tànin …” titu ngeia khàn, rethei-fate chhawmdàwl hna hi Amah chhawmdàwl-ah a puang chiang. Hretu leh hmâ la zuitu i nihzia hi … malsàwmna dawng tlàk i ni ngawih ngawih asin!

Chhûngkhat rethei deuh pawhin Christmas tùk-ah Zote Bakery Cake tuihnai lutuk an dawng thut mai a. Chhûngkaw pa ber, hlim lutuk chuan a petute awm laiin tawngtaina hun a hmang ta a. An fate pawh an inhup thei mang lo, cake kha a hmuhnawm tlat! Chilpùt dep dep chung chuan, ”Aw Lalpa, min petute chungah hian kan va làwm tak èm, hetiang Cake tlang lian, ìtawm leh thlum tui lutuk ang hi keini rethei buchip lutuk chhûngkàw tân chuan KAHA SEEEEEEEE … kan làwm a ni,” a ti. He thu hi Upa Zoliana Royte (Sports & Youth Welfare Director) min hrilh, kan hlim dùnpui èm èm a ni!

KAHA SEEEEE ti lo va, “IDHAR ME, MERA GHAR ME” an lo tih theih hlawm nân hma thar i la zui zèl ang aw! Thilpèk hi Aizâwl kàwtkaiah chauh tùr em ni dâwn? Ngaihtuah zau leh hret bawk ila …

Similar Posts:

• Plain Cake vrs Fruit Cake
• Mite chuan…
• Mi fel tawngtaina
• Duhthusâm
• Hmeichhe tlâwm lai hmêl – Hmuh tûr a vâng!

Recent Posts:

• Nova’n Anchhia A Lawh Sual Emni? {:Sunday Pual:}
• Beiseina nung (Pathianni pualin)
• Burma-ah ka zin Part – IV (Tuingo khuaa lung satel mak an tih kha)
• Thianpa lr hlonchhing birthday lawmnan..
• Paula Pawla

This entry was posted on Sunday, November 7th, 2010 at 10:25 pm and is filed under Opinion. You can follow any responses to this entry through the RSS 2.0 feed. You can leave a response, or trackback from your own site.