mi(sual).com

Khawvêl mihring, tungchhova kal zawng zawngte hian duhthusâm kan nei vek a, chu duhthusâm chu tihhlawhtlin ngei kan duh bawk ṭhin. Kan duhthusâm chu a tê emaw a lian emaw; a ṭha emaw, ṭha lo emaw pawh ni se, duhthusâm a nih phawt chuan a aia thlanawm zâwk a awm thei chuang lo.

Ka duhthusâm chu thil lian leh ropui tak a ni lêm lo, ‘hmangaihna’ bawk a ni (kual kual ve thin mah ila, a bu kan lêt hi chuan hmangaihnaah bawk kan inchhuih tlu leh ṭhin!). Khawvêl ropuina zawng zawng neih a, engkim neih theih hi ka thlang ber lo. NANG hi ka thlang che a, ka duhthusâm chu i ni. Ka theihna tlêm hle mah se i duhzâwng tihhlawhtlin a, i lâwmna tûra phei khai vawr hi ka châk reng ṭhin, chutichuan nang hi ka lamah lo hnaiin ka tân i pâr ve thei mah na! Chu te mai chu ka duhthusâm chu a ni (holam leh si ve!).

Chu duhthusâm tihhlawhtlin nân chuan ka theih tâwp ka chhuah a. I lungngaihna hnêm tûrin ka bân ka phar a, mahse ka ban phâk lohah i tawlh sawn zêl si. I mangana thlamuan tûrin Bible ka bih âwl lo va, mahse Bible châng ka by-heart te chu thil tih nei lovin boruakah a thâm ral leh si ṭhin. I hlim loha tihlim tûr chein thawnthu bu ka chhiar tlut tlut a, mahse i nuih ka tiza zo si lo. I lâwmna tûr a nih dâwn phawt chuan eng pawh, harsa mah se ka ti zêl ang.

Ka zahawmna zawng zawng pawh hloh dâwn ila, nang ber ka neih che chuan ka lâwm tho tho ang. Nang i hlima i nuih theihna tûr a nih phawt chuan kei chu lo tap mah ila eng nge a pawina? I hlimna leh lâwmna lo liama thil pawimawh he khawvêl hian min hrinsak mawlh lo vang!

Midang vanga nuih ai chuan nangmah avanga ka ṭap thei hi ka lâwm a, nangmah avanga ka lungngai pawh hi ka hlim ṭhin asin! Kan naupan lai khân kan infiam a, kan khûp te kan tihliam a, kan tap thin. Puitlin thuai thuaia hmangaih neih ve te kan châk a, tichuan kan lo puitling a, hmangaih te pawh chu kan lo nei ve ta a. Ka hmuhchhuah tâk erawh chu hei chauh hi a ni – Thinlung hliam ai chuan khûp hliam kha a lo nuam zâwk a ni tih hi! Ka tlin lohna tam tak i hmu a, ka tihlim zo lo che tih pawh ka inhria e. Ka theih tâwp chhuah mah ila i thinlung chu a to êm a ka lei zo mawlh si lo! I tel lo chuan ka tân khawvêl hi a thim a, ka thlarau hian riakmaw iangin chawlhna a van ruai ṭhin asin.

En teh, kâwl lo êngin zîng khua a lo vâr a, sîrva ten zâi vâwrin hlimlai ni an chên a. Kâwl lo nguiin zan chhuak sa tinrêngten chu zân chu âm takin an chên bawk asin. Khawvêl hi a vir muai muai a, hlimna au thawm chu a thangkhâwk rum rum ṭhin. Ka khawvêl zîm tê erawh ṭahna ruamah a chang a, chumi hmuna ka lungngaihna mittui chu nghâwng thleng thlengin ka dai si ṭhin. Ka rilru natna chuan min seh ngawt ngawt a, ka thinlung hliam keh sawm chu mi PAKHAT bakin a tuam dam thei hek lo. Chu chu NANG hi i ni, ka hmangaih i ni si a.

Ka hmangaih che tih i hria e, i hre mai pawh ni lovin i hmu ngei alawm. Ka duhthusâm hi nei thei dâwn ta ila nang hi ka nei ngei ang che maw le! Mahse, duhthusâm mai a ni a, tawnmang iangin a ral ta si!

Similar Posts:

• Mi fel tawngtaina
• Mite chuan…
• Beiseina nung (Pathianni pualin)
• Hei hi maw khawvêl chu…?
• Min hmangaihtu vs Kan hmangaih

Recent Posts:

• Davida Kha ‘Pathian Thinlung Ang Pu’ Kan Ti Thei Dawn Emni
• SETANA CHU FING TAK LEH NÂ TAKIN A CHE ȚAN TA E!! (Setana Pawlten America Sorkar Dân Phalna-in Setana Biak In Hawnna/Hlanna An Nei)
• David Bowie a boral
• SUNDAY SCHOOL KAIKIM LAWMMAN KA LA LEH TA
• December 2015, Mizo(ram) Diary

This entry was posted on Friday, May 11th, 2012 at 8:31 pm and is filed under Luangliam. You can follow any responses to this entry through the RSS 2.0 feed.