Hmanah Shillong-a kan awm ve lai chuan October thla det tirh atang hian Masi hla kan sa tan thin a. A urlawk hmasa pawl kan ni thinin ka ring. Zanriah eikham hunawl kan neih veleh rawl tawp tawpin, a hmuh pawh la hmu ngai hauh si lo khan “ Aw Bethlehem, ka ngai a che”, te kha kan ti ve vak vak a. Lalrina (Lecturer, PUC) te ang, ‘Doh Re Me’ pawh a ki dika sa chhuak thiam mang hlei lo te khan a tial a tialin “ Aw, Bethlehem ka ngai a che” tih zawh rual khan, thum theihtawpin ‘a che, a che’ an ti vak vak a.
Kan junior Thanga, Champhai atang pawha khawchhak lam hawi zawnga la kal fe ngai atanga lo tlathla, vaitawng leh saptawng tih vel ai chuan Paihte tawnga ‘Halelui’ hnehsawh zawk fe leh Davida, vei nei mang lo, “ I pi a thi a, i intithei” tih nachang hre tawka fingvar, zaithiam emaw inti tlatte khan theihtawp chhuahin an lo tenor ve bawk thin a. Shillong KTP tana full time-a thawk tura lokal ni awm tak Maenga’n dawhkan khawng meuhva min han zawm ve chang phei kha chuan Bar thla te pawh kha a eng zual ta riau hian ka hre thin. Ngawiteh, ‘a cow’ a tih a tih hnu pawha ‘Bawngpui’ a sawina a ni tih kan hriat mai theih loh khawpa saptawng tiduhdahtu Lapi-a, B.A. Final Year a zir kuma an kohhranin Upa atana an thlan tak te pawh kha a zai ve nasa thin. Suangtuahna te hi a tak rama chantir theih nise chu, zanin na na na hi chuan kan han zaiho leh tur a nia.
Kumin chu kum dang ang lo takin Zoram ngaih a zual a. November thla em pawh kan chuankai hma daih tawh khan Masi chawlha haw dan tur ngawt mai ngaihtuahin ka phar kual a. Mihring siamchawp eng dang engmahin a pawlh dal loh Bar thla eng ngei mai kha ‘kan zotlang ram nuam’ atang ngeia thlir a ni ka chak ni.
Zanin angah te hian Zoram lama chengte chuan an vanneih bikzia hrechang hauh lovin an ar mit del hawi vel mai mai hlawm anga. Chung zingah chuan kan U Renthleia (Lalremruata Renthlei) chanchinbumi pawh a tel ve ang. A motorbike chei duhdan atang reng pawhin kan pu Hawla te ai chuan Sir Alex-a a ngaisang zawk fe a ni tih a hriat theih a. Hei leh chen ngaihzawng mumal nei lova a talna chhan te hi nula a ngaihsak loh vang ni lova, nula lamin an ngaihsak loh vang zawk a nih thute pawh hi sawi lang ta mai mai ila thil pawi a ni em lovang chu maw.
A mak ngawt mai, Zoram mipui nawlpui leh a mi nazawng Korean film leh inthlan tih velin a nuai laiin keini ve lem khawvela lung tileng lo pawl ber mai, Orissa khawpuiah lunglengin kan dak fan kan dak fan a. Nunhlui sawitlak alawi nei mang hawt si lo hian ‘nunhlui’ te hi kan han ngai ve kawkalh a. Lunglen hnemah tlangval thankin ve uah tawh hi Pathianni tukah naupangho nen te kan la inbihruksiak ta mai mai a, ni e, pipu-ah te kan uai thul. Lunglen erawh a nem hleithei meuh chuang si lo. Zing nichhuak, tlai lama tla leh thin hian ‘homesick’ atangin ‘Lovesick’ ah min hruailut a, chutah, ‘Lovesick’ atangin ‘Homesick’-ah min hruaichhuak leh ta ni berin ka hria. Zoram lama Masi hmang tura haw peih lo thin khan zaipawl zai rual ngeia ‘Aw, Bethlehem’ tih ve leh te ka chak tak hi !
Masi a lo inherchhuak anga, damtea awm chuan kan khua, khua nuamah ngei khan Masi hmang turin Sumo paw thur atang khan kan han penchhuak ve chhak chhak anga. ‘Inti nula leh inti tlangval’ an lo tam leh tawh viau anga, naupang kekawr hak nachang pawh hre lova tal mai mai thin ho pawh khan ngaihzawng te sawiin an lo inla phawhraw ve viau hlawm tawh ang. Mahni pian leh murna tlangah na na na chuan engtia rei pawh thangbo mah ila, mikhual chan kan chang chuang lovang a. Mikhual chamrei deuh ho erawh chuan mikhual emaw te min lo ti ve leh chhawng ang. Thian thenkhat, nupui pasal an nei tawh a ni tih pawh kan hriat mumal mang loh te khan an fate an rawn kai ang a, hawina lam apiangah ennawm, tuma hriatthiam pui ve hauh loh khan min hmuak ang. Zan thla eng hnuaiah duh leh Siampuii kan zaitir anga, duh leh Sangzuali zawk. Chutih lai chuan khawlai dung suar tluana tleirawl rual nui ri ham ham te chu beng khawn lovin he an ‘airtel’ ngei mai hmang hian ‘Krismas chibai’ kan inbuk ang.
