mi(sual).com

Khawengah kan dak chhuak ve tih hriaten ‘chhimkun’ min tih hian hapui lang huauin kan nui a, dak ar chunga ‘chhimkunpa’ min tih erawh chuan ‘chhimdak’ intih mai a chakawm rum rum thin.

Nikum lama zawngchhangthlak zeta Zawlkhawpui lama an lo buatsaih tawh avangin Leitlangpui mi(sual) rual ho pawhin thil tha a nih chuan midang tih han thik chu kan lo zak mang hlek lova, kan sawi a, kan rel a, kan rawt thlu der mai.

Dt 27th November 2010, Inrinni tlai dar 4 kan tiam a, mahse thimhmula lo thleng tawk pawh an awm. Tichuan, Saitawk, Ku Muanga, Diktea_Pa, Mama-B, Jinx, Turu^lo, Caribou, mpralte, b_reza, Epistemology, Kawnga leh muantea te chu kawnga dawrah patling riltam pelh zet thleng kan thukhawm a kumin Masi lo thleng turah hian chanhai leh pachhiaten hlim hmel an put ve theih nan inlungrual takin kan theih tawk theuhva luangchhuak turin ro pui kan rel ta a ni. hemi tlai hian chhimkeite, sonju-a, tlau, xman, thiana leh adt. te ho tel lovin puar el euhin Hotel Grand-ah zanriah kan kila, mpralte phei chuan a chhungte ei atan a it thlu ngang a niang a fun haw-na tur a melh ruai a, a hmu zo ta silo.
1st December hian kawnga dawrah mpralte bawm siam ngei mai chu kan hung chhuak ang a, PMCI rorel khawlin bawm dang a la mamawh avangin mpralte bawk hian a lo siam leh ang.

Theme : 2010 Krismas – Midangte Tan.
mi(sual) ho chauh lo pawh hi min phurpuitu an lo thahnem hle a ni tih kan hriatin samah sam luat a awm love kan ti a mi inpe biru an awm tak dahin tiin media lamah puangzar ila, phone number nen dahin a duh tan pek theih turin siam ila, Video clip-te pawh buatsaih ta ila a luangkhawm tam hlei hlei kan ti ta a ni.

Dt 16th December ’10 hian bawm veivak kengkualin office leh dawr hrang hranga min lo phurpuitute tlawh kual ila, Dt. 21st Dec ah buh mal thlauh ngeiin kan bawmte chu hawng ta ila, tin, hmun dang a mite pawhin an rawn thawn duh chuan Western Union lamah emaw Saitawka a/c ah emaw rawn thun ta se tiin ruahmanna kan siam a.(a/c no chu saitawka mail-ah zawh mai tur) ‘Heng mi te ber tana in tih chu ka chunga ti in ni..’ titu ngei kha Lal Isua niin a duh zawng ti tura kan inngaih tlat avangin kan phur hle a ni. Kan Pathian pawhin mal min sawm ngei kan beiseia kan tawngtaina pawh a ni.

A semchhuah dan turah hian rel fel kan la nei rih lova, kan titina eng atang chuan Home/orphanage ho hi chuan petu an neih nual thin avangin he lamah hi chuan pe ta lo mai ila, mimal/chhungkua harsate zawng chhuakin Lunglei khaw chhung leh a chhehvel thingtlang lamah hial pawh vak chhuak ta zawk ila tiin kan ngaihtuahna chu a awm deuh thum a, thutluknal erawh a la ni lo.

Tun hi a sawi phurna chauh a la ni a, tihtur a intan chiah a ni. Malsawmna min petu duh anga mahni hmuna lo tang ve thei a kan awm hi kan lawm takset a ni. 2010 Krismas midangte tan tiin far khat tal ni turin i pen chhuak ang u hmiang.

Similar Posts:

• Charity 2011 Bawm hawn leh Sem Report
• Misual Charity 2011
• Bawm Pahnih
• Hei le Krismas Charity bawm chu
• Hey Tonight! -Misual.Commers Charity bawm hawn a ni dawn ta!

Recent Posts:

• Mizo tawnga Android Application thar Play store ah
• Saikhumphai-bawk Chungchang Kha…
• Induhna nei ve teh ang u!
• Chi
• Nipui Kaihhnawih

This entry was posted on Monday, November 29th, 2010 at 8:45 am and is filed under Event. You can follow any responses to this entry through the RSS 2.0 feed. You can leave a response, or trackback from your own site.