mi(sual).com

1st. Monday: Social Welfare Minister, PC Lalthanliana chuan department Secretary, Director leh Officer-te a office-ah kokhawmin, department hmalakna hrang hrang a thlirpui. He hunah hian, Mizorama Anganwadi Centre 292 sakna turin sorkar laipuiin cheng nuai 511/- a rawn pek chu hman tur a peih a nih tawh thu tarlan a ni.

2nd. Tuesday: J.Lalringa (55) S/o Pazawna Bunghmun chuan hmeichhe naupang 4 (Kum 7 leh Kum 9 inkar mi hran theuh) a khuaikhem nia hriat a nih avangin Bunghmun Police te’n manin Lunglei Police Station-ah thlenpui a ni. Police-te sawi danin J.Lalringa hi nupui pahnih nei tawh, then ve ve tawh, pathlawi a ni a, heng naupang 4 te hi a Inah duat takin a kawm thin a, nikum atanga lo khuaikhem tan tawhin tunhnaiah an hrechhuak ta a ni. Mahse, a chakna a puitlin dan hi an hmeichhiatna tichhe lo zawng vek in a ni thung.

3rd. Wednesday: Aizawl Municipal Council inthlanna hmasa ber chu Electronic Voting Machine chiankuanglo a awm nual tih lohah chuan tluang taka zawh a ni a, vote a tla tha thawkhat hle. A pumpuiah vote 63.60% a tla a ni. Vote tlak thatna ber, Ward no. I-ah chuan voter 8,899 zinga mi 6,390-in vote an thlak a, percentage chu 71.81% a ni. Vote tlak chhiatna ber chu Ward no. II a ni a, voter 9,346 zinga 5,910 (49.43%)-in an thlak thung. AMC inthlanah hian zing dar 7:30 atanga tlai dar 4 thleng vote thlak a ni a. Veng tinah Mizoram People Forum (MPF) Local Forum-te’n duty insiamin, thil tul ang ang an buaipui bakah, inthlana official duty-te an pui a; political party hrang hrang aiawhte’n vote thlâkna hmunte an vil tha hle bawk. Vote thlaktu upa ber chu Chanmari West II-a mi, Khiangthuama, kum 102 a ni.

4th. Thursday: ‘Politics ruihchilh hauh lote’n AMC inthlan result atana an duhthusam rem khawm ta se, mihringah ni lovin, tling zatah hi chuan, tun aia thaa remkhawm ngaihna hi a awm chuang awm lo ve’ tih theih turin Aizawl Municipal inthlan hmasa ber puan tak chu hetiang hi a ni. Congress, ZNP leh MNF te’n Ward panga theuh an chang a, MPC-in Ward pali an chang thung. Congress-in an chan Ward-te chu – X, XII, XV, XVII leh XIX an ni a; ZNP-in Ward no. II, VII, XI, XIII leh XIV-te an chang a; MNF-in Ward no. I, IV, VI, VIII leh XVIII changin, MPC-in Ward no. III, IV, IX leh XVI-te an chang bawk. Kan hriat theuh angin Congress leh ZNP-te tang dunin MNF leh MPC-te an tang dun a nih kha. Heti a nih avang hian Congress leh ZNP tang dun chu chaka puan an ni. He AMC inthlan-ah hian, thlan tlin leh a hnaih bertu vote-a an inthlauh tamna ber chu Ward no. XIV a ni a, ZNP/INC candidate, Lalrimawia chuan a khingpui awmchhun, Malsawma Chuauhang, MNF-MPC candidate chu vote 1,446-in a hneh a, inthlauh tlemna ber chu Ward no. XIII a ni a, Congress-ZNP candidate, W.Chhuanawma chuan MNF-MPC candidate, Zoramthanga chu vote 23-in a hneh thung a ni. Aizawl Municipal Council-a councillors thlan thar 19-te zingah Ward 15-naa Congress ticket-a tling C.T. Zakhuma chu kum 61 mi niin a upa ber a, naupang ber erawh chu Ward 11-naa ZNP ticket-a thlan tlin Lalchhuanmawii a niin kum 30 mi chauh a ni thung. Heti hian an kum chawhrual chu kum 46.69 a ni.

5th. Friday: Mizo thalai internet hmang thinte zinga mipui tlawhtu ngah ber mi(5ual).com member engemawzatte chuan Hmuifangah ti ti hona neiin hlim takin hun an hmang a; tlaiah zanriah an kil ho nghal. He ti ti ho na an neih hi ‘Hmuifang MI’ an ti.

6th. Saturday: Aizawl Municipal inthlan neih zawh taka sawrkar siam tur Congress leh ZNP atanga thlan tlin takte chu Chief Minister Bangla-ah CM Pu Lal Thanhawla bakah Home Minister Pu R.Lalzirliana, UD&PA Minister Pu Zodintluanga, ZNP President Pu Lalduhoma leh Vice President Pu K.Liantlingate’n meeting neihpuiin Aizawl Municipal Council-a sorkar kaihruaitu tur an invuah fel. Heta ruahmanna an siam dan chuan Chairman ah CT Zakhuma, Vice Chairman ah Zarzoliana, Executive Member ah Pi Hmingthanzami, Pu Zirliana leh Pi Lalhuthangi te an ni. Hengte hi sorkarna siam tura lakluh vek an nih hnuah ruat tur an ni ang.

7th. Sunday: Khawvel Sunday School Ni a ni a, Presbyterian Kohhran leh Baptist Kohhrante’n an hmang. Presbyterian Kohhran hian Sunday School-ah zirlai 3,49,888 an nei a, Baptist Kohhranin zirlai 67,315 an nei thung. Khawvel Sunday School Ni hi Dr.George W. Bailey, Tabernacle Presbyterian Church, Philadelphia rawt chhuah niin, May 22nd. 1910 atangin hman tan a ni a; Mizoramah chuan kum 1944 atang khan serh tan niin, kum 1949 atangin thupui neiin November Pathianni hmasa berah hman thin a ni.

8th. Monday: Lalhlimpuii (Abawihi) (5) D/o Daniala, Muallungthu khua chu Henry Vanneichung (25) S/o Chungling, Tanbu, Kalemyo District, Myanmar chuan pawngsualin a hnuah a that.

9th. Tuesday: Naupang kum tlinglo pawngsuala thattu Henry Vanneichung chu Sateekah man a ni a; a hnu deuhvah Police kut atangin Muallungthu leh Falkawn mipui thinrimin an hnehchhuh a, an piai deuhhlek a ni mahna; a hliam tuar lovin a hnu lawkah Kulikawn outpost ah a thi.

10th. Wednesday: Hnamdang, dan kalha Mizorama pánhnah leh kuhva rah zuar, Rahul Islam (22), Bagha Bazar chu police-te’n Ramrikawn-ah an man a, Vaivakawn Police Station-ah thubuai an siamsak.

11th. Thursday: Mizoram Presbyterian Church Synod-in kum 2007 atanga a sak tan Synod Office thar chu Synod Moderator Rev. C Chawngliana’n Pathian hnenah a hlan. Synod office building thar hi July ni 7th. 2007-ah a lungphum phum a ni a, chhawng ruk, ft. 80-a sang a ni a. Sq.ft. 4,980 awhin a inpui zau zawng chu a dung ft. 78 leh a vang ft. 60 a ni. He building atan hian November ni 2nd. 2010 thleng khan sum senso zat chu Rs. 522,80,518/- a tling tawh.

12th. Friday: Mizo Hmeichhe Insuihkhawm Pawl (MHIP) buatsaih thawmhnaw duma inthuam Mizo hmeichhe rualte chuan, Mizorama hmeichhe pawngsual leh thahna hial thleng thin an duhlohzia lantirna atan leh, hetiang thil hi a thlen tawh lohna tura Pathian tanpuina dilin Lungngaihna Ni ‘Black Day’ Mizo High School Field, Mc Donald Hill, Zarkawtah an hmang.

13th. Saturday: Sports & Youth Services Minister Pu Zodintluanga chuan Lammual-a Artificial Grass phah hna kal mek chu a hmunah a enfiah. Minister hi Sports & Youth Services Director Pu Zoliana Royte leh official dangte bakah Press lam atangin mi thahnem takin an tawiawm a ni. Minister chuan Lammual-a grass phah hna thawktu Company-te chu hna an thawh uluk leh an thawh chak avangin a fak. Minister chuan lammual chu thildangah pawh la hman theih tho tur a nih thu leh ram rohlu a nih anga duat taka enkawl chungin a tul ang angah hman theih a nih tho tur thu a sawi.

14th. Sunday: 30th. October-a a zinna hmun New Serchhipa khawtlang hruaitute nena an inkawm laia chau thut Chief Minister Pu Lal Thanhawla chu Sir Gangaram Hospital, New Delhi-ah admit a ni a, doctor rualte’n uluk takin an en nghal.

15th. Monday: Central YMA hnuaia Central Anti Drugs Squad leh Police (Security)-te tangkawp chuan Sangchia building, Zarkawta Hotel Dove room no. 205-ah Parvon Spas bâwm 200 an man a, a neitu Sanjeev Deb (36) s/o Sudam, Silchar pawh an man nghal. Ruihhlo hi Aizawl rate-in Rs. 14,90,000/- man a ni.

16th. Tuesday: Aizawl Municipal Council(AMC) hmasa ber atana Councillor thlantlin 19-te chu AMC Office Session Hall, Thuampui, Aizawl-ah rinawmna thu tiamtira lakluh an ni. Councillors te hi Ward hmasak dan indawtin Aizawl District Magistrate C.Thanchhuma’n rinawmna thu a tiamtir hnuah Chairman leh Vice Chairman thlan zui an ni a. AMC Chairman hmasa ber atan Ward No.15 atanga thlantlin C.T.Zakhuma chu chuhtu awm lovin a tling a. Vice Chairman atan Ward No.7 atanga thlantlin Zarzoliana chu chuhtu awm lo bawkin a tling. Chairman rawtna angin AMC Executive Council Members (Executive Councillor) atan Lalzirliana, Hmingthanzami leh F.Lalhuthangi te chu ruat an ni bawk.

17th. Wednesday: Lunglei Open Tennis Tournament 2010, chu Parliamentary Secretary Pu.S.Laldingliana’n a hawng. Ruahman lawk dan chuan he tournament hian 23rd. November thleng a awh ang.

18th. Thursday: Lai Autonomous District Council inthlanna chu tluang taka neih a ni. He inthlan-ah hian vote a tla tha thawkhat a, 70% chuang hret a tla a ni, vote tlak thatna ber, Bungtlang South biala Saikhawthlir polling station-ah chuan vote nei, mi 105 zinga mi 104-in vote an thlak a, vote thlak dan hi za zela 99.05% a tling a ni. Hetih lai hian EVM Chawngte P biala Hmunlai polling station leh Sakeilui biala Jognasuri polling station-ahte a chhiat avang leh khawl hran a lo thlen hman loh avangin polling station-ahte hian remchang dangah inthlan hi buatsaih leh tura ruahman a ni.

19th. Friday: New Delhi, Samrat Hotel-ah Mizoram chuan ‘Indira Priya Darshini Vrik Samitral’ (Ramngaw humhalh tha leh ramngaw nei tha) lawmman Rs 5,00,000/-, Scroll leh Citation a dawng. He lawmman atan hian India ram hi hmun hnihah thenin, ram zau zawng 80,000 Sq. Km aia zauvah Jammu & Kashmir State chu lawmman pakhatna pek an ni a. 80,000 Sq. Km aia zim ah Mizoram chu lawmman pakhatna pek a ni.

20th. Saturday: Lai Autonomous District Council inthlanna, November 18-a neih tuma harsatna a awm avanga vote thlak hun sawn takna, Hmunlai leh Jognasuri polling station-ah chuan vote thlak that a ni a; heng polling station pahnihahte hian vote 88% ve ve a tla a ni. Heti hian a hmaa tlate nen, LADC inthlana vote tla chu 86.25% a ni ta a ni.

21st. Sunday: Serchhip Darnam Venga Ramthar UPC(NE) Biak In, nula leh tlangvalin mipat hmeichhiatnana an lo hman chu Tirhkoh T. Zakunga’n Pathian hnenah a hlan thianghlim a, dan pangngai angin inkhawmnate neiin Biak In hi an hawng zui leh nghal.

22nd. Monday: November 18-a Lai Autonomous District Council (LADC) inthlana vote tlate chu chhiar a ni a, result pumpui hriat theih nghal a ni. He inthlanah hian Congress party candidate 19 leh Independent candidate paruk an tling a ni.

23rd. Tuesday: Art&Culture Minister Pu PC Zoram Sangliana chuan MBSE Conference Hall, Chaltlangah Pu JF Laldailova leh a fapa JFL Junior-te kutchhuak ‘Lurhpui Dingdi’ tih lehkhabu a tlangzarh.

24th. Wednesday: Bukpui khuaa khawsa Vanlalmuana chuan ramhnuaiah amah chuk tuma umtu rulngan, feet 9 leh inches 2 zeta sei chu a nghawngah seh sakin, a seh hnu rei vak lovah he rulngan hi a thi zui nghal.

25th. Thursday: Mizoram Finance & Account Services (MF&AS) chuan General Conference, Tourist Complex, Luangmualah an hmang a, Home Minister R Lalzirliana’n a hmanpui. He conference-ah hian hruaitu thar atan President-ah R Lalbiakthanga (Dy. Secy, Finance) leh Secretary-ah Zokunga (Addl. Secy, IF&SL) te an thlang nghal.

26th. Friday: Presbyterian Kohhran hnuaia Kohhran Hmeichhe Ni a ni a, tualchhung kohhran thenkhata hmeichhiate chuan ruai nen an lawm a ni. Kohhran Hmeichhe Ni hi kum 1997 atang khan hman tan a ni a; Kuminah hian Buhfaitham Centenary denchhenin kohhran hmeichhe inkhawmpui lian chairman, Pi Zomuani ziah, ‘Buhfaitham rawngbawlna chanchin’ an zirho a ni.

27th. Saturday: Mizo-te zinga thu leh hla thiam leh Kohhran hruaitu hlun Upa K. Saibela (76), Republic Veng Presbyterian Kohhran Upa chu Civil Hospital, Aizawlah accident avangin a boral.

28th. Sunday: Chanmari West thlanmualah thlan lai tura kalte’n nausen, mipa, pian pangngaia piang thiin an chhar. He nausen hi tu fa nge tih leh engtia hetianga awm (paih) nge tih police-ten an chhui nghal a; nausen tuamna puanah hian a nu Lalnuntluangi, Lungchem tih ziak a awm a. Hei vang hian police-te hian Lalnuntluangi, Lungchem hian ni 27th. Nov. 2010 zan dar 9:55-ah Aizawl Civil Hospital-ah nau mipa a hring tih chu an chhui chhuak nghal a ni.

29th. Monday: Republic Veng khawtlang hruai¬tute chuan, Republic Veng khelmual chu Mizoram State Sports Council (MSSC) kutah an hlân a; hlanna inkhawm hi Sports Minister Zodintluanga office-ah neih a ni.

30th. Tuesday: Ramhlun South YMA hruaitu pakhat chu misual pahnihin a inah luhchilhin bang te an tichhia a, bungbel vel an suasam bak ah amah pawh hi an khawih ani. Heng mi pahnih te hi Police te’n an man nghalin Bawngkawn Police Station-ah lak anni.

Masi thla a lo herchhuak leh ta. Lal Heroda anginnge beram pute angin chibai kan buk dawn le? Mahni theuh in enfiah ang u.

Similar Posts:

• VC leh LC Inthlan result
• November 2015, Mizo(ram) Diary
• Councillor 19-te hausakna belhkhawm nuai 318.41
• Municipal Council Inthlan Results!
• Mizoram Sorkar in Municipality din a remti

Recent Posts:

• mi(sual).com hi!
• KA MITTUI A TLA!
• ȚAHNA NUNHLUI
• March 2017, Mizo(ram) Diary
• NUN THÂMRAL

This entry was posted on Wednesday, December 1st, 2010 at 2:02 am and is filed under Event, Mizoram, News. You can follow any responses to this entry through the RSS 2.0 feed. You can leave a response, or trackback from your own site.