1st. Saturday: Lung natna avanga Kolkata damdawi in pan Pi Vanlalvuani (51) w/o Pu V.Zamluaia, Tuikual D chu Kolkata thlen hmain thlawhna chhungah a thi.
2nd. Sunday:Mizorama Kohhran tam zawk chuan Sande Sikul hming ziah thar niah an hmang a; hming ziak pawh an thahnem hle.
3rd. Monday: Lammuala phûl lem (artificial turf) phah tur thenkhat chuan Lammual a rawn thleng ta. Heng artificial turf ho hi USA-a Fieldturf Tarkett company siam a ni a, Kolkata-ah lawng hmanga phurh thlen a nih hnuah Mizoramah truck 17 hmanga rawn phurh chhoh a niin a tam zawk chu kawng lakah an la thang a ni. Krismas hmaa thawh zawh hman tum ni mah se, artificial turf-te hi Kolkata lawngchawlhna hmunah an hrên rei avangin a khawtlai ta a ni.
4th. Tuesday: Nikum, kumtawp nia 12th. Assam Rifles sipai, Manipur-a helpawl, PLA-te nena an inkahnaa thi ta, Sepoy PC Lalrinmawia, Serchhip AOC Veng chu Serchhip Chandmary Veng thlanmualah sipai chawimawina famkim nen bialtu pastor, Rev. Lalrinsanga’n a vui liam ta.
5th. Wednesday: October 30th, 2010 atanga Mizoram Electoral Roll Summary Revision neih chu state pumah zawh fel a niin Mizoram pumah voter 6,40,754 an awm tak thu Chief Electoral Officer, K Riachho chuan thuthar thehdarhtute a hrilh. Roll tharah hian voter 6,40,754 awmin, hei hi nikum Roll-a voter zat, 6,30,259 aiin 10,495-in a tam a, voter punna hi 1.67% a ni. A pumpuiah mipa aiin 9,408-in hmeichhia an tam a, mipa vote nei thei 3,15,673 an awm laiin, hmeichhe vote nei 3,25,081 an awm.
6th. Thursday: Guwahati atanga Aizawl pan maxi-cab pakhat chu Silchar leh Kalain inkarah misual rualin suamin passenger-te thil neih laptop 1, mobile phone handset 3, hmeichhe bag, driving licence leh photo ID bakah, pawisa eng emaw zat an chhuhsak a; an thil chhuhsak hlut zawng hi Rs. 80,000/- hû vel a ni. Maxi cab-ah hian mi pakua an chuanga, an zinga pahnih chu naupang an ni. He thil thleng chungchangah hian maxi cab driver, Siamlala chuan Vai¬rengte Police Station-ah FIR an thehlut nghal a; Vairengte police-te chuan misualte zawn chhuah a, an thil hlu bote hmuh lêt a nih theih nan tih tur tulte an ti nghal a ni.
7th. Friday: Pu S.Hiato, Minister i/c P.H.E. etc. chuan Saiha District chhunga Lohry khua-ah DRDA, Saiha District, Saiha in NREGS (National Rural Employment Guarantee Scheme) hnuaia Materials Component sum hmanga a siam Power 7.5 KVA pe chhuak thei “Micro Hydel Project” chu a hawng.
8th. Saturday: Assam-a Dima Hasao Autononous Council (DHAC), Haflong hruaitute chuan Chief Minister Pu Lal Thanhawla chu a chenna In Mc Donald Hill, Zarkawtah hmuin, autonomous council an hmuh theih nana nasa taka a lo tanpui avangin lawmthu an sawi. Autonomous Council an ngiat lai hian Assam Governor in nasa taka a hnial lai a ni a; Pu Lal Thanhawla hian sorkar laipui thlenga sawipuiin, tih puitlin sak an lo ni ta a ni. Lawmthu sawina lantir nan hian thil pek chi hrang hrang an hlan nghal a ni.
9th. Sunday: Mizoram Synod hnuaia missionary-a chhuak turte chu Mission Veng Presbyterian Kohhran Biak Inah thlahna inkhawm neihpui an ni. Missionary-te hi Synod Moderator, Rev. C Lalsangliana’n a tír chhuak a, tun ṭuma missionary tirhchhuahte hi pastor 37 leh missionary dang 56 an ni.
10th. Monday: Putlungasih leh Belthei inkar service Pu CL Mawia Thuampui ta, MZ 02-5986, C.Rualchhinga s/o CL Mawia khalh chu Belthei khaw bulah a accident-a; mi pasarih an thi a ni. An zingah hian Mizo tellovin Chakma 5 leh Bru 2 anni. A chuang dang zawng zawngte pawh hian hliam an tuar vek a ni. An zingah hian spinal cord chhia pawh an awm. Driver hi a zuang chhuak thei renga; a zuangchhuak duhlo niin an sawi. A fakawm takzet a ni.
11th. Tuesday: Zosap missionary J.H. Lorrain (Pu Buanga) leh Rev. F.W. Savidge (Sap Upa)-in Mizoram an rawn thlen ni (Mizorama Chanchin Ṭha thlen ni) champhaphâk a ni a; Presbyterian leh Baptist Kohhran chuan he ni pual hian inkhawm programme an hmang.
12th. Wednesday: Kum 2011 kumthar atan Mizorama sikul hrang hrangte chu an kai ṭan leh ta a; mimal sikul zingah erawh sikul la lut ṭan lo eng emaw zat an awm. Kumin hian primary school leh middle school-te chuan April 15th.-21st. chhungin first term exam neiin, chawlh an hman hnuah May 2nd.-ah second term atan an lut leh ang a; July 25th.-29th. chhung second term exam an nei ang a, July 30th.-August 7th. chhung an chawlh hnuah, August 8th.-ah an lut leh ang. Third term exam chu November 24th.-30th. chhunga neih tur niin, December 7th.-ah result puan a ni ang. High school leh higher secondary school-te chuan April 19th.-26th. chhung first term exam neiin, May 2nd.-ah second term an lut leh ang a; July 27th.-2nd. August chhungin second term exam nei ang a, August 3rd.-7th. chhung an chawlh hnuah August 8th.-ah an lut leh ang. November 28th. – December 2nd. chhungin promotion exam an nei ang a, December 9th.-ah result an puang ang. Primary school leh middle school (Elementary school)-te hian first term-ah ni 69, Second term-ah ni 61 leh third term-ah ni 81, a vaiin kumin chhungin ni 211 sikul kaina hun an nei ang. High school leh higher secondary school-te chuan first term-ah ni 71, second term-ah ni 63 leh third term-ah ni 83, a vaiin kumin chhungin ni 217 sikul kaina hun an nei dawn a ni.
13th. Thursday: Revenue Minister, JH Roṭhuama, Champhai South bialtu chuan Zotlang East-ah a bial chhunga mi harsate hnenah Rs. 3,60,000/- a MLA fund hmanga lei puanthui khawl 100 a sem.
14th. Friday: Mizoram sorkar flagship programme, NLUP chu Aizawl leh district headquarters hrang hrangah hawn a niin tanpuina sum pawh mi engemawzat hnenah sem nghal a ni. Lawngtlai Dist.-ah erawh chuan LADC inthlanna a la rei loh avanga district thuneitute ngenna angin hun dangah hawn a ni ang. A hawnna pui ber Vana Pa Hall-a neihah chuan Chief Minister Pu Lal Thanhawla’n a hawng a ni. CM hian NLUP website https://www.nlup.mizoram.gov.in/ chu a hawng nghala; 14th. January hi ‘Kut hnathawktute ni’ tih a nih tawh tur thu a sawi bawk. Hetih rual hian Congress term hmasaa an sem khan a hmanna tur nilova hmang an tam avang khan ’First installment hmang thalo leh hmang diklo te tan Second installment an beisei thei lovang’ tih thu a sawi bawk. Kan hriat theuh tawh angin nikum October 29th. khan Darlawn leh Sakawrdai chhehvela hmunphiah ching tur chhungkaw 300 hnenah NLUP sum chu a thawhkhatna atan an sem tawh bawk a nih kha.
15th. Saturday: Vairengtea kut hnathawktute hmunphiah chìnna leh kehna hmun pakhat, Aitlang chu bialtu MLA, K Lalrinthanga hovin sorkar officer-te leh hmunphiah chíngtute’n an tlawh. Hetih lai tak hian hmunphiah kek ru an lo awma; MLA leh a thuihhruaite hian an umdarh a ni. Pakhat chu an man hmana; amaherawhchu, an hlawhfa chhawr mai a lo nih avangin chhuah leh nghal a ni.
16th. Sunday: Presbyterian Kohhran, Mizoram Synod hnuaia pastor bial eng emaw zatah pastor leh probationary pastor awm tharte lak luhna inkhawm neih a ni. Pastor thar leh awmna hmun sawnte lak luhna hi Mizoram chhungah bial 38, Mizoram páwnah 31 leh Manipur area-ah bial 11, a vaiin bial 80-ah neih a ni a; Aizawl khawpui chhungah chuan Mission Veng, Mission Vengthlang, Chhinga Veng, Electric Veng, Ramthar Veng, Leitan, Zemabawk, Chaltlang, Ṭhuampui, Khatla leh Chanmari bialahte pastor dah thar an ni. Bial 23-ah pro. pastor lak luh an ni bawk. Hetihlai hian zirna sak zawka awm mekte, kumin April thlaa an zirlai zo turte erawh chu May 8th. 2011 (Pathianni)-ah lakluh prog. hi neih a ni thung ang.
17th. Monday: Guwahati leh Aizawl inkara tlan, MST Night Bus, (MZ 01 D-9098) Aizawl pana tlan chu Sonapur thlen hmain misual rualin suam an tum a, mahse driver Laltlanzauva huaisen em avangin bus-a chuangte bungraw chhuhsak leh tihnat an nei lo. Amah zawk hian hliam tenau a tuar thung. Bus-a chuangte hian driver chu fakawm an tih thu leh rilru fim tak pu a, passenger te awmdan tur a hrilh avanga him thei nia an inngaih thu an sawi hlawm a ni.
18th. Tuesday: Orissa Legislative Assembly-a Committee on Ethics Chairman, Dr RC Chyau Patnaik leh member pakuate leh mi pawimawh dang pasarihte chuan zan khat riakin Mizoram an rawn tlawh. Orissa MLA-te hian Mizoram Assembly Speaker, R Romawia chu a chennaah an kâwm a; he hunah hian Mizoram Assembly Ethics Committee Chairman, Lalrobiaka pawh a tel a ni.
19th. Wednesday: June 23rd. 2010-a Lalpiangliana (46), Tanhril thih avanga Mizoram Police pasarih heng: VL Ramhluna, Luangmual Out Post OC, Vaivakawn PS-a duty-te: ASI Prem Nath, ASI Gnat Lalrinchhana leh constable Chanchinliana leh police dang pathum: Lalhmangaiha Sailo, J Lalchungnunga leh driver C Lalruatfelate chu thla 6 chuang suspend an nih hnuah Mizoram sorkar chuan suspend-na a sûtin an hna an zawm leh ta. Amaherawhchu, an awmna ngaia dah chi a ngaih an nih loh avangin, hmun hran hranah dah darh an ni.
20th. Thursday: Mamit district-a Silsuri atanga West Phaileng pan, 407 truck, Tripura lam motor chu Pukzing khaw bulah a chesual a, motor-a chuang mi 28 zinga pali an thi a, hliam na zual mi parukte chu West Phaileng damdawi-in panpui an ni bawk. Motor-a chuangte hi Silsuri leh Andarmanik-a Chakma ho, West Phailenga Mizoram Rural Bank-a NLUP account hawn tum an ni a, mitthite hi Silsuri khaw mi pathum leh Andarmanik khaw mi pakhat an ni. Motor hi kawng ko a sut hnuah kawngpuiah a let a, mi pariat chu na loin an chhuak a, handyman leh driver, Tripura mi ve vete chu motor leh hmaa an zuan chhuah hman avangin an na lo. Driver leh handyman hi tlanbo an tum a, mahse, West Phulpui-ah man leh an ni. He chetsualna hmun¬ah hian Puk¬zing YMA leh mi tlawmngaite an kal nghal a, West Phaileng SDPO, Vulmawia leh police dangte pawh a hmunah kal bawk.
21st. Friday: UPC (NEI) Social Committee chuan I&PR Auditorium-ah Aizawl khawpui chhunga kohhran upa, tirhkoh leh pastor-te pualin TB, HIV/AIDS, sikserh leh zûk leh hmuam chungchang zirhona an buatsaih. He training hi UPC (NEI) General Secretary, Rev. R Lalrinsanga’n a hawng a; Aizawl khawpui chhunga UPC kohhrana rawngbawltu thahnem tak an tel a ni.
22nd. Saturday: Lunglei DC Pi M. Zohmingthangi, IAS hovin Police Officer te, LAD, UD&PA, Addl. DC, Official thenkhat leh vengchhung mi tlawmngai te’n Lunglei Electric Venga LDSC Gr-II (Baze mual) sira dan lova sa talhna hmun an tlawh. He joint inspection team hian mual sira sa talh hi dan pal zutna anih bakah hriselna atan a pawi dawn hle niin a hria a, he lai hmuna sa talh leh sawngbawl a nih tawh loh nan UD&PA official-te chu ti fai nghal tura ngen anni. DC office atanga khapna thupek tih chhuah turin joint inspection team chuan thu tlukna a siam nghal.
23rd. Sunday: Mizoram Synod hnuaia Pastor bial hrang hranga Kristian Thalai Pawl Conference 21st. January a tan tak chu harsatna liantham thleng lova tluang taka neih a ni. Hetihlai hian bial thenkhat chuan rokhawlhna eng eng emaw avangin 28th-30th. January-ah khian an hmang thung ang.
24th. Monday: Mizoram State Social Welfare Board chuan, thla 10 vel tar pension an pek tawh loh hnuah, April-September, 2010-a pek tur chu Aizawla mite tan District Social Welfare Office, Chanmari-ah sem tan a ni a; Aizawl khaw páwna mite tan pawh thuneitute kutah sum pek niin, anni hian remchangah an sem ve dawn a ni. Tar pension hi thla khat atan Rs. 200/-a sem thin a ni a, kumin hian dawng thar tur mi 8,320 an awm. Tar pension sem har a nih chhan hi Finance department lamin sanction an pek chhuah har vang a ni.
25th. Tuesday: Ram pumah National Voters Day hman a ni. Mizoramah pawh he ni pual hian Vanapa Hall-ah Governor MM Lakhera hova hun hman a niin district headquarters tinah hman a ni bawk.
26th. Wednesday: Indian Republic Day vawi 62-na a ni a; district headquarters tinah Minister-te insem darhin lawmna neih a ni.
27th. Thursday: Zemabawk Pastor Bial chuan an bialtu Pastor June 17th. 2010-a chatuan ram panta nupui fanaute chenna tur an buatsaih sak chu Bial Puipate’n tawngtaina hmangin an luah luhpui ta. Zemabawk Bialtu Pastor, Rev. R.C. Zokhuma hian January 7th. 2007 atang khan Synod Inkhawmpui ruat angin Zemabawk bial a vawng tan a, vanduaithlak takin natna khirh takin a tlakbuak hnuah nikum (2010) June 17th. khan chatuan ram a pan ta a. A kalsan tak, a nupui fanaute tan Pastor Quarters luah reng a rem silova, insawn chhuahna tur in an neih mai loh avangin Zemabawk Bial Standing Committee chuan an chenna tur in hmun leisakin an saksak ta a ni.
28th. Friday: Chief Minister thiannu Pi Lal Riliani chuan MHIPte’n Krismas leh Kumthar vuakveta Tiranga leh Gutkha products engemawzat an man chu Aizawl SP Parking Lot-ah a hal ral a. He programme hi MHIP General Headquarters te huaihawt niin, MHIP hruaitu thahnem takin Pi Rii hi an tawiawm a ni.
29th. Saturday: Sports Minister Pu Zodinluanga’n Aizawl Venglaiah Basketball Court thar a hawng. Aizawl Venglai Basketball Court hi Pianghleia High School hmun hluiah sak a ni a. Aizawl Venglai V/C-te leh Mizoram State Sports Council hmalakna in 2007 atang khan siam tan a ni a. Court len zawng hi 26m x 14m a ni, a sakna senso ah hian a vaiin Rs. 26,57,600/- sen a ni. Court thar lawm nan Sports Minister hian khawtlang hnenah ball 2 a pe bawk.
30th. Sunday: Mizoram Baptist Kohhran chuan January Pathianni hnuhnung ber hi ‘Phar Pual Pathianni’ atan an hmang thin a.Kumina an thupui atan Lal Isua tawngkam, “Nun an neih nan, tam taka an neih nan,” (Johana 10:10) tih a ni. BCM Biak In tinah he ni pual hian chawhma inkhawmah hun hman a ni.
31st. Monday: Lunglei DC Office chamber-ah District Fire Prevention Committee(DFPC) an thukhawm. He Meeting hi Lunglei DC Pi M.Zohmingthangi’n a kaihruai a ni. Kal khawmte chuan chuan kum 2011 chhunga Fire Prevention Week hlawhtling zawk leh sawt zawka kalpui dan tur ruahmanna siam nghalin, ‘kum 2011-a Kangmei laka ram venhim leh inzirtirna hapta chu February ni 7th. atanga hman ni se’ anti.
Similar Posts:
- “Change”, Ngaihtuah a ngai e
- Leithum pastor bial thar awmze neilo
- January 2009, Mizoram Diary
- Masihi Sangati Convention tluang taka neih zawh a ni
- Hmeichhe Pastor neih a hun tawh
January 31st, 2011 at 6:08 pm
chhiar ila
Report this comment
January 31st, 2011 at 6:10 pm
31st monday….Misual.com ah comment pek tluang zel ala ni e
Report this comment
January 31st, 2011 at 6:13 pm
31st monday….Misual.com ah comment pek tluang zel ala ni e…Hnathawk thenkhat te tan chuan hlawh lak ni ania as per revised pay, thingtlang mi tam tak erawh buhfai eitur nei thalo in lungngai takin an awm mek…
Report this comment
January 31st, 2011 at 6:14 pm
chhana hi i fel thrin khawp mai, mizoram chanchin kan lo hriat ve phah a, lawmawm thrin e
Report this comment
January 31st, 2011 at 6:18 pm
Tha e i ‘Journal chu’ bengvar thlak hle mai.
Report this comment
January 31st, 2011 at 6:22 pm
World diary
January ni 1: Khawvel pumah kumthar ni lawm a ni.
January ni 2: Khawvel pumah kumthar ni tûkleh a ni.
January ni 3: Khawvel pumah January ni 3 a ni.
Report this comment
January 31st, 2011 at 6:24 pm
January 31, 1824 hrs: Bonez a mut a chhuak
Report this comment
January 31st, 2011 at 6:27 pm
27th January : Zemabawk Pastor Bial hmalakna a ropui hle mai. Entawn tlak hle in ka hria… Hip2 hooray
Report this comment
January 31st, 2011 at 6:42 pm
chhana, i va titha thin tak em! Tawngthuchhelo-in han thi ta mai la, ka ui ngawt ang che. Mi zawng2 aiawhin lawmthu ka hrilh a che. KA LAWM E.
Report this comment
January 31st, 2011 at 6:50 pm
Fak hi ka dawl lo teh a nia aw!!
Report this comment
January 31st, 2011 at 6:50 pm
chhana hi ti tha thei hle mai…. khi 17th phei khi chu ka lo hre chiang reng reng hlei nem, chawimawi tlak tak meuh anih khi ! Kei phei chu hei hna in siam chawp ka neia, ka ‘misual’ tam vak hman dawn tawh lo a ang khop mai…hetianga misual journal i ron siam thin hi i fakawm hle mai…..
Report this comment
January 31st, 2011 at 6:53 pm
Jan 31: Those of you who did not have a great start to the week should read this – Today is apparently the happiest day of the year.
Two weeks after Blue Monday, the day when our spirits are at their lowest because of post-Christmas debt and limited daylight, comes Happy Monday – as good as it’s going to get all year, reports the Daily Mail.
According to psychologists, a combination of getting the first pay cheque of the year and booking your summer holiday make today the highpoint of the year.
source: London, Jan 31 (ANI)
Report this comment
January 31st, 2011 at 7:33 pm
Inrinni kal ta khan Aizawl Private Hostel Owners Association an inkhawm a, kumkhat chhunga an hruaitu turte an inthlang a, hostel admission fee Rs.1,000 ni se, thlatin fee-ah a hniam berah mipa Rs.3000 ni se, hmeichhia Rs.2800 ni se, a sang lamah bithliah awm lo se an ti.
Report this comment
January 31st, 2011 at 8:01 pm
Fonz #13: chu ava dangdai teh tlat ve, tak tak ami? a sang lam hi bithliah zawk awmtak ania.
Sawrkar pawh hian regulate ve awm alawm le.
Report this comment
January 31st, 2011 at 10:08 pm
@zualbonez, FB a
HIT 
deuh kha a impostor an ti!!! 
Report this comment
January 31st, 2011 at 10:13 pm
15, wonderboy chu i va vei ve, mi rawn hrilh zo chiah a …hihihi….pawi ti deuh deuh an awm nuk ang a hhihihii
Report this comment
January 31st, 2011 at 10:36 pm
Ka chhiar chhuak lo
Mahse ka save keuh 
Report this comment
February 1st, 2011 at 1:28 pm
A tan dan chu ,.. Khawhar chhungte tan chuan hlu viau mahse , Kumthar lawmna Ruaitheh tih vel ni ta se oo !!
Report this comment
February 1st, 2011 at 2:33 pm
POST MARATHON! nakin ah uluk deuhin ka chhiar anga ka lo Kawmmen leh ang
Report this comment
April 10th, 2011 at 4:44 pm
Kan tui zawng a ni em? Ka hrelo. Gay Doctor lar tak kan nei tlat mai. A patient ten tih ngaihna an hrelo. Amah a lar si.
Report this comment