mi(sual).com

Ka bang a sana lian inkhai ah chuan a banpuiin zinglam dar 2 a kawk tawh. Ka khum a lukham chawhnu zet tawh inlet reng chuan peihlo zetin inchung a fan vir khawngkhawbai zuk zuk chu tan la sauh sauh tur a fuih ni awm melh hian a melh ngawng ngawng a. Khua a lum tehreng nen ka thinlung chhung chu a vawt vek a. Diktak chuan zandang ang bawkin ka duhtak hmu zo hlim haw lam, ka computer ah lunglen vaw mawih lehzual tur hla hlui zawn ka tum a ni.

Mahse zanin zawng khawvel hi a letling zo ta. Uluk tak a ka ngaihtuahin he hringnun hi chuan min la phatsan si lo. Ka mitthla ah a mitmeng pawisawi ngailo kha a lo lang a. Vawi tam tak hapui lang thaw a ka nuihpui thin a tawngkam leh fiamthu te kha zanin atan chuan tahna a lo ni ta.

Hringnun ah hian engmah hi awmsa leh chiangsa a awm hauhlo, mahse duhthlanna fel tak siam tawh hnu a beiseina ti tawp vek khawp beidawnna lo thleng leh thin hian a hmei a pa in min suasam fo a. mi tamtak tahpui fo chu atak in ka chungah a lo thleng ve ta. Enge ka tih leh ang tih pawh hrethei map lo in mipa hi kan lo awm thei a ni ang.

Heti chung chung hian ka thinlung hian a phatsan theilo che a. Anchhia lawh tur che a min thlemtu te chu ka hua a. siamtu’n duhtak a nang a siam rual che a a lo siam beiseina chuan I nui hmel vawi khat tal min beisei tir a. khamlo tak a ka en thin I mitmeng mawi tak te kha tuna tan chuan nawhreh rual a ni lo. Bang te hian min nuihzat a, thli thaw vuk vuk hian ka mittui hi min tlensak an tum silo.

Nangmah avanga mualpho tur hian vawi khat tal pawh hun nei thei ila, ka bawhpelh lo ang. I tana ka mittui te chuan he thuziak hi a delhkilh tlat a. ka pentui karah hian I zunzam hi a kal tlang vek a. heti em em a ka lo duh che hi I hriatloh ka hlau thin a sin.

Vawi khat tal chu ti in ka phone chu ka ban zuai a. mahse I number ka nei tawhlo, ka tan han banphak rual I lo ni tawhlo. Ka beiseina neih chhun ti in I hla duh em em thin ‘help me make it through the night’-Engelbert sak ngei kha vawi khat chauh tal tiin ka phone ah chuan kan zaitir riai riai a. thiam ang tawk a kan leh dun thin a thunawn lai… ‘nimin lam te chu hunin a liampui zo ta, naktuk beiseina pawh lam hla thil a la ni. Mahriak te a zankhua hman zawng ka zuamlo, D’ min pawm la min awm rawh…..’

Sana kan en a, facebook lam pawh a reh thuap tawh ang e. Peihlo zetin ka inher a, chhin khat pawh ka chhing dawn lo tih hre reng mah i la, zanin ah chuan ka che peih tawh ngang lo a ni e. Dimte in ka computer chu ka khuh tha a, naktuk lam ah windows load tha tur chuan ka mutsan ta a. Rilru ah erawh ka computer nen kan inzawm leh theih dan tur leh wallpaper a thlalak ka dah bo tur chu a awm reng thung si.

This entry was posted on Friday, February 18th, 2011 at 10:00 am and is filed under Luangliam. Both comments and pings are currently closed.