mi(sual).com

Kan kawmchhak chiahah hian Pu Darthankima, Education Department-a an hotu lian thin khan in tha tak a sa a. Buai hma pawhin chutah chuan in tha fe a nei tawh a, mahse Aizawl bomb a nih khan a chhe tel ve a niang, ka naupan tet lai chuan a chhuat concrete deuh chauh hmuh tur a awm a.

Ka pain “Hei hi Pu Darthankima in a nia” tiin min hrilh thin a; vawi khat chu “Pu Darthankima chu taktak em ni?” ka tih ka la hria…thawnthu emaw ka lo ti ve char char a. Buai hnuah in thar, a aia tha a rawn sa leh a ni.

Chu in chu sumdawng khawsa thei takin an rawn luah a, an in chhawng hnuai zawkah chuan ice cream siamna khawl an bun a, an siam vut vut thin. Kay Kay Ice Cream an ti a, Aizawlah chuan a lar ve viau thin. Kay Kay Ice Cream chuan vurbawm pawl an siam a, ice cream zuar duhin a bawm chuan an ak chhuak a, pawisa pek lawk emaw, pek luh zat tur bituk emaw pawh awm chuang lo-in, a hralhna man atangin a enkawltu (a neitute nau) te’n an hlawh awm tawk an lo pe mai thin.

A chang chuan an vur siam fuh loh, hralh tlak loha an ngaih kha chawhtawlhin pawnah an rawn hung chhuak hnawk a, thenawm hnaiho-in kan la sup sup thin. Naupan laia ka thil tawnah chuan khang te kha a nuam pawl a tling ve.

Kum 10 mi ka ni a, sum ngainatnain ka rilru a luah khat ve ta tlat ni ngei tur a ni.  Ka chhungte ka hrilh leh hrilh loh pawh ka hre tawh lo, ka hrilh lo a nih ka ring zawk (a hnuah min hau tlat).…vur siamnaah chuan ka han kal a, vur zawrh ve ka duh tih ka han sawi a. Vur bawm pakhat an thun khat a, min ahtir a, ka chhuak ve ta par par a.

Mi tamna lai hnaivai ber Sikulpuikawn lam panin ka inak hnak hnak a. Mahse ka va thlen nak chuan vur zuar dang an lo awm tawh! Tun lai angin mihring an la tam lo a, vur bawm hnih lei zo tur Sikulpuikawnah an awm dawn lo tih kha ka hrethiam ve ni tur a ni, Khatla kawn lam panin ka chhuk thla leh a. Chutah zawng vur zuar dang an lo awm ta lo hlauh. Phur takin ka innghat a, ka vurbawm chu ka dinpui ve ta tau mai. Mi veng a nih vang erawh chuan ka tlangnel lo hle.

Mi kan la tam lo ka tih kha. Vur bawm khat hralh chhung pawh a rei hle, ka la naupan vang khan rei lehzualin ka hria pawh a niang. Khua a lum avang leh vurbawm kha a that vak loh bawk avangin ka vur zawrh lai chu a tui zel a, a tawp lamah phei chuan a te zo vek a, hralh tlak a ni ta lo. Ka tih ngaihna hre lo chuan pahnih vel chu ka ei ngei tih ka la hria.

Ka dawr chu kharin ka inak haw leh ta hnak hnak a, vurbawm kha a lian tham ve viau a, a ruak pawh naupang tan chuan chai fe tham a tling. Ka hah khawp mai a, ka koki pawh a thip ngang mai. Ka pawisa leichhuah zawng zawng chu a-bo-a-bang awm lovin a enkawltute hnenah ka submit ve ta rap a, ani’n awm tawka an ngaih, Re. 1 (Rupee One only) chu ka hlawh atan min lo pe a! Hei hi keima pual liau liaua ka pawisa thawhchhuah hmasak ber a ni. Ka hah viau naa lawm tak ka ni! Tun thlengin mahni kutkawih ngeia thawhchhuah hlut bikzia mi hriat chiantirtu a la ni reng.

Tun hnuah, thlalai dam tha hmel tak tak, engmah thawh tum mang si lo ka hmuh hian kha lai hun kha ka la ngaihtuah chhuak fo thin.

Similar Posts:

• Investment basic: Hriat thiam loh ka nei
• “I âw-ah a âw ka hre thei asin!”
• Pawngeklira
• Halpuah khapna thupek
• Zu man thawhlawm a thawh hi.

Recent Posts:

• Phaia chhungte dinhmun hre turin chah
• Health minister bàn turin CM ngen
• Daihnai lui-II
• Kan va tam em!
• 2011 a PUNE a mizo nula boral chungchang hrechiang lehzual duh tan

This entry was posted on Thursday, March 10th, 2011 at 8:09 pm and is filed under Economics, More than words. You can follow any responses to this entry through the RSS 2.0 feed. You can leave a response, or trackback from your own site.