Kristianten kan inzirtir leh beisei ber chu Van ram a ni. Chuta lut tura kan inzirtir avang chuan a nawmzia tur kan inhrilh nasa mial mial hle. A nawmzia tur kan sawi thin tlangpuiah chuan lungman tam leh rangkachaka luan, khawpui mawi leh thianghlim, intihnat, damloh leh nat, tah leh lungchhiat a awm tawh reng reng lohna, sual thiltihtheihna reng reng a awm tawh lohna a nih thute hi a ni ber a.
A eng bera hi nge a nawm chhan bulpui ber tur, he kan chenna lei aia kan thlakhlelh em em chhan ber tur chu ni ang aw… tih hi ka ngaihtuah mai mai thin. Rangkachak khawpui a nih vang ngawt hi chu a ni lovang. Hriselna tha tak neih a, malsawmna dawn bawk chuan Vanram hi chuti takin a thlakhlelh awm tehchiam mang lo thei tlat nia.
Hremhmun hrehawmzia hi tem lawk zeuh theih ni ta se, chumi avang chuan a thlakhlelhawm phian mai thei a, mahse hremhmun hrehawmzia pawh chu tuman kan experience der bawk si lo. Chatuan rama rorelna hunah hremhmun hi a lo hrehawm em avanga Van ram hi nuam chawp ta chauh tur a ni mai ang em? tihte hi ania ka ngaihtuah rum rum.
He kan chennaa harsatna lian tak tawk lem lo tan chuan lei hi nuam deuh a nia. Kan hmuhpui leh hriat phak bak hian Sap pui lanu val rualte khuan nuam an ti riau hian ka hria a (A ruk takin hrehawm an lo ti phian pawh chu a ni thei bawk, ka hre lo). Kan thianpa pakhat Singapore han zin ve thut pawhin Air Conditioned Hotel-ah kan thleng a, A/C motor vekah kan chuang a, A/C dawrah kan chawl leh a, kan kalna in apiang A/C a ni zel bawk si a, khawlum avanga hrehawmna hi tawrh hman a ni lo va, Van ram tenau kan tem chu a ni ber e, tih thu a sawi chamchi a. Mi hrisel bawk si, hausa bawk si tan chuan hrehawm tawrh tur a vang awm kher mai.
Ti hian ka ngaihtuah ta a. Nuam leh hlimawm kan tih reng reng chu eng emaw min kap tlattu thil atanga kan fihlim te, hrehawmna nasa tak kan tawhna atanga kan talchhuahte hian kan hria a lo ni ber a. Chuvang chuan lei mihring zawng zawng, a lian a tê, a hausa leh rethei ten kan pumpelh theih hlek loh eng emaw tak avangin Van ram hi thlakhlelh loh theih loh turah ka ngai ta deuh ber a.
Chu thil chu eng nge ni ta ang tih ka ngaihtuah a. Mi tumahin kan pumpelh theih miah loh leh tawrh hrehawm ber, hausa leh rethei tan pawha na em em theuh mai chu ‘Thihna avanga hmangaihte nena inthen’ hi a lo ni. Hmangaihte nena inthen tluka na hi khawvelah hrehawmna tawrh tur a lo awm mang hlek lo mai.
Hausak leh nawmna chi tinreng hian tumah a hnem zo tlat lo. In ropui leh hmun nuam ber berte pawh hi a thing thuap a, a huatthlala awm rum rum thei zawk. Kan hmangaih ber kan then takte min pe kir leh thei engmah khawvelah hian a awm loh avangin kan tawh leh theihna hmasa ber leh inthen reng reng a awm leh ngai tawh lohna hmun tur Van ram chu thlakhlelh loh rual a ni ta lo tlat mai le!
Hmangaihte kan tawn leh a, inthenna reng reng a awm tawh lohna hmun tur chu a thlakhlelhawm a ni satliah mai lo va, a nuam lo thei dawn lo a ni. A nawmna tur kan sawi tlanglawn ber ber – Rangkachak tual, lungman tama cheimawi, damloh leh nat a awm tawh lohna, riltam tuihal a rehna, sual thiltihtheihna reng reng a awm tawh lohna, etc. tihte zawng zawng hi chu inthenna a awm tawh dawn loh avanga a nawmna belhchhahtu mai an lo ni.
Lalpa Isua hova chatuana ro kan relna tur a nihna hi a bulpui ber tur nia ngaih theih chu nimahse a hova ro kan la rel chhin loh avangin hriatfiah thiam tawk a har riau tlat pek a (Thlarau lam thila ka hniam luat bik vang ni maw?). Lei nun atanga ka hriat thiam, thihna avanga hmangaihte nena inthen a nat em emna hian inthenna reng reng a awm tawh lohna tur Van ram hi min ngaih tir a. Ka thlen ve theih loh hlauvin chak lo tak chungin Lal Isua hnung hi ka zui ve tawk tawk chu a ni e.
In ngaihdan a ni ve hlawm emaw ka hre lo va. Ka ngaihdan leh hriat dan aia ril leh thuk zawk hria hi khawvelah in/an tam avangin ‘Van ram panin kan kal mek’ kan ti awl lo sia, a nawm chhan leh a thlakhlelhawm bik chhan em em hi I chai ho ve reng reng teh ang u hmiang.
Similar Posts:
- Nupa inthen hi
- See you in Heaven
- Hmangaihna hi enge a awm zia aw?
- Kan thawnthu II
- Pathiana mihringte dinhmun;
April 9th, 2011 at 6:41 am
Thihna hi mihringin a hlauh ber a ni a, thi tawh lo, hrehawm tuar tawh bawk si lo nun chu a thlakhlelhawm. Chu ai mah chuan chhas te nena rei lo te inhmuh loh pawh a hrehawm thin ang leh inhmuh a thlakhlelhawm thin aia nasa hian min chhandamtu, min hmangaihtu hmuh a, a hnena awm chu a thlakhlelhawm hle dawn a ni.
Report this comment
April 9th, 2011 at 6:53 am
francis-a tawngtaina kha ka rilruah a awm reng thin “thihna hi nun nei tura kailawn a nih avangin..” tih lai kha. thihna-a va ha’n tawp chiang em!mahse beiseina kan la neih hi maw. i ngaihtuah chian avangin mi vannei tak i ni
Report this comment
April 9th, 2011 at 7:13 am
thihna awm tawh dawn loh vang ani ang
Report this comment
April 9th, 2011 at 8:07 am
Nuam zawng zawng an nei reng ang,tih a nih kha
Ti chuan a nawmna ber an sawi chu in duhsak leh in hmangaih tawn vek a an lenna hmun a nih vang an ti bawk…
Report this comment
April 9th, 2011 at 8:21 am
Van Lalram tih a ni kher a, chu chu Pathian Lalram tih euphemise-na a ni. Vanram hi chu a kimchang lo hret. Messianic Age kha kum thum leh a chanve temchhin a ni a (AD 27 – 33 ca), ringtu dik takte beisei next world to come a ni a, tuna kan tragic world nena khaikhin mai mai chi a ni lo vang. A danglam zar ang, tehna kil tin atang pawhin.
Report this comment
April 9th, 2011 at 8:34 am
#5, typo regreted. AD 27 – 30 ca.
Report this comment
April 9th, 2011 at 9:26 am
Inthenna leh lungngaihna awm lohna hmun a ni a, hmangaihtu leh hmangaihte nen chen hona hmun tur a ni.
He khawvela kan zawn ber chu hlimna leh lungawina a ni a, tuman kan nei tluantling thei si lo. A famkimna hmun tur chu Vanram a ni tlat.
Report this comment
April 9th, 2011 at 9:56 am
Dam tinuamtu/tihlutu chu thithei kan nihna hi ani a, hlimna kan han tihte pawh hi lunngaihna leh tuarna te avanga nuam ani mai a. Thitheilo, natna leh lungngaihna tuar thei tawhlo han nih ngawt te pawh hi a boring phian ka ring. Hremhmun hi awm kherlo ta se Vanram kal hi a chakawm lemlo thei ang. Vanram tinuamtu chu Hremhmun hi ani e.
Report this comment
April 9th, 2011 at 9:58 am
Naupangte a thi ho hi Vanram ah hian an la thang ve tho ang ngem le? Nausen a thi ho te hi an sen reng mai dawn mi le? (rilru ah lo awm thut mole)
Report this comment
April 9th, 2011 at 10:03 am
Mad,Mihring tawngin a hrilhfiah theihloh lai tak chu a ni. Chu chu a ropui lehzualna tur a ni ang.
Report this comment
April 9th, 2011 at 10:24 am
A chhungten a thih an hlauhthawn ai mahin, a zu man batnaten a thih an hlauhthawn em emna khawvel a la ni rih, van lalramah chuan chutiang a awm ve dawn tawh si lo!
Report this comment
April 9th, 2011 at 10:29 am
Pathian khawngaihna kan dawn lohna hmun hi hremhmun chu a nih hmel. Chhungkuaah pawh Pathian a lal lohva an han buai nuaih tawh hi chuan hremhmun pate a ni hawt; Pathian a lal tlat chuan vamram kan tem lawk thin. Khawvel nawmna lamah ni lovin rilru hlimna leh thlamuanna-ah.
Vanram nawmna chhan tur ber chu Pathian ropuina hnuaiah a khawngaihna changin Pathian nen kan leng dun tawh dawn-vanramah nupui pasal a awm tawh dawn lo, mahse thlemnain min tibuai leh tawh ngai lovang; nat reng reng a awm lovang; Beram no chu an vengtu a ni ang a, nunna tuikhurahte a hruai ang. Lum reng rengin a tihrehawm tawh lovang a, riltam tuihal a awm tawh lovang-Lalpa hmangaihna chuan min ngulzem chiat ang a, lei lungngaih mittui min hruk faisak ang. Ani chuan ‘ka fa, i lo haw ta maw’ min ti ang. Ka va sawi zel chak ve…
Report this comment
April 9th, 2011 at 11:15 am
Hethil hi keipawh ka ngaihtuah ve thin,a nawm dan tur hi mihring te hriathiam phak ani lo tih hi ka ngaih ve dan a ni tawp mai,a tem a tem ngai tak tak thil ni in ka hria,sermon thiam leh mithi tho leh kan tih ten. a nawm dan tur leh a nawmdan an han sawi te hian a nawm loh hmel zo vek hian ka hre thin.A SAWI A SAWI CHI NILOVIN A EXPERIENCE CHI NIIN KA HRIA.A nawm dan tur hi tawngkam leh he khawvela awm thil te hian a sawi/tehkhin phak lo niberin ka hria.Vanram nawmdan tur hi hre chiang mang si lova lo sawi ve vak vak chiah pawh ka ngai lemlo,Lal Isua pawh khan a nawmdan tur a sawi a sawi nem maw…
Report this comment
April 9th, 2011 at 11:29 am
A tha hle mai Poat tupa. Hethu hi ka lo beisei ru reng thin a.
Bible in Rangkachak khawpui leh lungman tam atih na chhan a lang chu mihringte tan chung aia ropuui dang teh khintur a awmloh vang a ni ber ang.
Vanram chuan Isua Hmangiahna eng zam velin min hual tawh dawn a. Nuam zawng zawng awmna ani tawp mai hian ka hre thin.
Atawp nana ka sawi ve duh chu Pathianin he khawvelah hian Van nun nei hmasa turin min duh a ni.
Report this comment
April 9th, 2011 at 11:35 am
Vanram chu Kan Mizo khawhar hla hian a hrilhfiah berin ka hria, kan va vannei em?
Report this comment
April 9th, 2011 at 11:35 am
Vanram chu Kan Mizo khawhar hla hian a hrilhfiah berin ka hria, kan va vannei em?
Report this comment
April 9th, 2011 at 12:15 pm
@Cmawia : kan va vannei em? (Question) ni daih mai!
kan va vannei eeemmm!!!! i tihna ni zawk in ka ring
Report this comment
April 9th, 2011 at 12:25 pm
I ngaihtuah hi thlaraua nung tur chuan ngaihtuah awm reng a ni in ka hria, i hre fiah tawklo anga kan hre fiah tawk lo bawk ang, mahse ngaihtuah tur chuan Bible in min ti a ni. “Chung lama thil awmah te chuan in rilru nghat tlat rawh u” tih ziak a awm a, mahse nghat turin rinna bak engmah tih theih kan nei lo.
Tin, mihring chunga Pathian lawmna ber pawh hi enge ni chiah? Beram 99 aia 1 bo a hmuhah a lawma, Bible a kan hmuh tam ber pawh sual sim chunga a lawmna lo lawmna dang a neih sawi tur avang khawp in ka hria. Anih chuan Vanram ah sual a awm tawh dawn si loh chuan Pathian lawmna chu enge ni ta ang (ka hrelo vai vai khawp mai). Tingtang te, tawtawrawt te, khuang te kan tum tlauh tlauh reng mai dawn em ni? Hei pawh ka hre lo.
Tin, a hmangaih mihring ten an fak theih nan damloh leh natna khirh taka tlakbuak tir phawt chu a duh dawn em ni? Chu pawh chu hmangaihna hmuchhuaktu rilru ah a tirin a awm sa ka ring chuanglo. Vaivut maia siam kan ni tih a hriat avangin a dawh thei em em a mihring tihnat hi a thinlungah a hnuhnung berah pawh a awm ka ring chiahlo, keimahni kan in commited vang zawka thleng a niin ka hria. Chutiangin vanram nawmna khaikhin nan natna hi Pathian hmanrua ber a nih ka ring chiahlo, kan hlimpui duh Pathian chu a nih ka ring.
Natna te, thihna te, lungngaihna te awm avanga vanram hi lo nuam ta anih mai chuan Chatuana cheng tur tan heng te hi kan theihnghilh thuai anga a nawmna pawh a bo vek lo’ng maw? Nge nawmna dang a in her chhuak leh dawn?
Mihring a din tirh a Pathian purpose kha ka’n chian chuan chu nun chu LALPAN min din chhan leh kan vanram nun tur chu niin ka ngai deuha, kha mi hunlaia kan bawhchhiat hma sual batna thuthlung awm reng reng lo kha tuna Vanram nawmna teh nan chuan tling tawk in ka hre loa. He sual phur rit te hi chu Chatuan nen a teh chuan Vanram nawmna hrilhfiah nan chuan a pamhai lua deuh e ka ti.
Report this comment
April 9th, 2011 at 12:38 pm
Pathian hian mihringte hi a hmangaih em em a, mahse an lo tih sual tawh rah/nghawng kha chu a bo thei chuang lo. Uire a piangthar a, a pianthar hnuin a uirena nghawng kha a bo chuang lo; mahse amah kha ngaihdam a ni tawh zawk a, sualna ni lovin. He sual tihbuaia kan awm tawh lohna tur leh a nghawng pawhin min vuaklet tawh lohna tur hmun hi vanram nawmna tur pakhat chu a nih ka ring ve tho mai.
‘Lal Isua nen engkim a ropui’ tih a ni a, Vanramah chuan Lal Isua nen kan awm dun reng tawh dawn alawm. He hla hi a english chuan ‘Little is much with Jesus in it’ tih a ni daih thung. Mahse a inzul tho e. Little, we experience here will be much with Jesus in Heaven.
Report this comment
April 9th, 2011 at 12:41 pm
@Feeder tih sual palh a ni e.
inziak vang chuan ka pawm tho.
Thihhnu piah hi chu sawia fiah chi pawh a nilo. Mithhi tholeh sawi dan pawh ka ring em em chuanglo. “Inlarna a awm loh chuan mipui an in thlahdah thin” tih
Report this comment
April 9th, 2011 at 2:23 pm
‘ Van ram ‘ ni lovin ‘ Vanram’ tih zawk tur.
@ Vanram hi chu a nuam em em dawn a ni ringawt. A siam mihring te hian hriatthiam tuma lo sawi ve vak kher hi a tul ber love.
Report this comment
April 9th, 2011 at 3:58 pm
Pathian ropuizia pawh kan hre phak lo. Vanram nawm turzia hi hringmi anka hian hril seng ta se’ng, chuta kal chu kan thlakhlelh loh sawt i ring ve em? Keichu hei tak hi ka kai chaknachhan leh a ropuizia min hriattirtu a ni tlat mai
Report this comment
April 9th, 2011 at 4:01 pm
Vai ram hi eng anga nuam tur nge?…tihin ka lo chhair a ..NOI
Report this comment
April 10th, 2011 at 1:19 am
Kei paw’n Zualbona chhiar dan ang chiahin ka chhiar! A thupui hi ziah uluk viau thin tur asin le.
Report this comment
April 10th, 2011 at 2:32 am
Eng pawl member te emaw chu khawi ram emaw an thlenin an vanram an thleng tawh an ti thin hairehai
Vanram nawm dan leh hremhmun hreawm dan hi chu kan mizia a zirin kan ngaihtuah ropuiin kan ngaihtuah hlauhawm/hreawm ni maiin ka hria. A sawi tum ber erawh chu pakhat hmun nuam tak anih laiin pakhat zawk chu hmun hreawm tak a ni.tra la la la la ♫ ♫
Report this comment
April 10th, 2011 at 2:51 am
25..Pu Hv..ka ngaihtuah nasa ve a sin..vanram ‘eternity’ a a nawmna chhan tur hi..ka hrethiam lo a, a dik tak chuan..a posttu sawi ang deuh a hremhmun a hrehawm em dawn avanga nuam em em tur anga ngaihna hi ka rilru hmasa ani..ka ngaihtuah thiam lo..lunghlu leh rangkachak leh sakeibaknei ‘tuai’ hi kha nuam em em tur ah ka ngai lo…
Mahse, thil nuam leh thlakhlelhawm te hi ‘tem chin’ angai ve a..Pathian a piantharna dik hi neita ila chu vanram hi kan ngai veng veng ang tih erawh ka ring hlel hauh lo!
Report this comment
April 11th, 2011 at 12:50 pm
Vanram nawm dan tur hi mihring tawnga han sawifiah rual a ni lovang. Engkimtithei kan PATHIANIN a duhtawka tha a a mite tana a siam chu a nuam tawk ang tih ka ring viau mai. Natna, hreawmna, lungngaihna, thihna awm tawhloh na hmun chu hmun nuam ava ni dawn em! Ringtute hi kan va vannei em!
Report this comment