Pathian khawngaihna azarah ka nu leh pa leh ka unau ten min la boralsan lova, hetih lai hian mihring nuna rilru hrehawmna engemaw zat chu ka lo tawng ve tawh. Ngaihzawng ten min kalsan avanga hrehawm tih em em changte, tawngkam ngaihnawm loh deuh deuhva midangin min an khum changte ka lo tawng ve tawh thin. Heng zawng zawng aia na leh hrehawm ka la tih chu ka thian thaten min phatsan tum kha a ni.
THIAN INHMANGAIH
Mizoram pum huap Under 16 Football Tournament-ah kan tel ve dawn a, kan inbuatsaih ve nasa khawp mai. Kan Team hi naupan lai atanga inkawm hovina kan din a ni a, kan inkawmngaih avangin kan tangruala, team tha ve tak chu kan ni thin. Kan hausa lova, Tournament telna tura Entry Fee-ah pawh kan buai viau thin.
Hetih lai hian kan vengchhunah Team dang pakhat an awm ve a. Kan venga mihausa deuh pakhat ta a ni a,jersey leh ball bout pawh an duh hun hunah an dawng thei. Kan team-a kan thiam neih pathum kan thiante chu an team-a tel turin an lo sawm thin a, mahse kan thiante chuan an duh loh thuin an lo chhang thin.
Kan thiante pathum chu kan innghah ve na an ni a, anni pathum an tel chuan eng team mah hi kan huphurh bik lo. Tournament hawn niah chuan team zawng zawng field-ah kal vek tur a ni. Tin, kan venga team pakhat zawk, kan thiante rawn sawm thintute chuan first match an khel dawn bawk a, vannei kan ti hle. Tichuan Republic veng field-ah a hawnna hmang tur chuan kein kan phei dam dam a, naupang leh zual, kan team tan em em thinte nen chuan hlim deuhvin kan kal hova.
Mahse kan thiante pathum chu kan zingah an tel ve ta hlauh lo mai, kan han inzawt hlawm a, kan striker chuan “An hmanhmawh deuhva, field thleng hmasa turin an kal ta nih kha”, tiin min chhang a. Ngaih thatlohna engmah nei lo chuan kan kal ta zel a.
INPHATSANNA HUATTHLA CHU
Chutia hlim em ema kan kal dam dam lai chuan kan veng atanga team tel ve, hausa deuh ka tihte ngei khan intithei deuh hian Taxi ngei hian min rawn tlanpel a, a nuam kan ti chiah lo, mahse kan inlungrual tho tiin kan inhnem. Taxi pali chuan min tlanpel a, a pangana a rawn tlan ta chiah chu, kan thiante pathum, a hmaa an lo sawm an lo sawm thinte ngei kha chumite jersey ha ngei chuan taxi hnungah chuan an thu kan hmu ta, kan hmel pawh hmu duh lo chuan min tlan pel ta a !!! Kan thin a rim lutuk, sawi tur pawh kan nei lo, kan hawi kan hawi a. Kan Team zinga nuapang deuhte kha chu an mittui a parawl tuauva.
Ka rilru a na a, sawi tur ka hre lo, keipawh chu ka hawi ka hawi ve mai a. Tette atanga inkawmho kan ni a, khatiang mai mai khan min phatsan ka ring ngai lo, a mak ka ti a, tun thleng hian mak ka la ti reng. Ka zawi vek a, ka hrawk hi a na nghal vawng vawng. Chil lem zawng ringawt pawhin a na a, ka’n hawi chhuak a, ka Teammate-te hmel ka hmuh khan hrehawm ka ti leh zual, khatiang em em a beidawng hmel kha ka la hmu ngai lo. Tournament chu kan khel ta a, an ni chuan 3rd Round an thleng chauhva, keini chuan Semi Final kan thleng a, anni pathum kha chu awm selang chuan kan champion ngei ang mawle.
ISUA PAWH PATHIANIN A KALSAN
Khang ka thil tawn atang khan thil hriat thar ka nei a, Lal Isua pawh Kross lera a thih lai khan Pathian khan a kalsan a nih kha. Khata Lal Isua mangan zia leh hrehawm tih zia kha !!! “Ka Pa, ka Pa engah nge mi kalsan”, tiin a au ruai anih kha. Mihring pawh ngaihzawng leh thiantha ten min phatsan chuan hrehawm kan tiin kan chau ngawih ngawih thin. Lal Isua meuh pawh Pathianin a kalsan khan mangangin a au anih kha. Keini hi Lal Isua hmangaihte kan ni a, Lal Isua nei tawhtute kan ni.
Mahse khawvel in min hip thin avangin Lal Isua min hmangaiha min chhandamtu hi kan phatsan thin. Chutah chuan Kross lera manganga a au ang khan, kan hming lamin “Engah nge mi kalsan”, tiin a au thin asin. Nangmah hmangaihtu hi engtia rei nge mangang taka i au tir reng dawn ? Good Friday a lo thlen hian kan hmangaihna hmasa kan bansan takah khan i kir leh ang u.
Similar Posts:
- Holy Week: Isua phatsantuten an phatsanna chhan – ‘F’ pathum!
- I Phatsan thin em ? (Pathian Ni pual)
- Thiantha Lal Isua
- Ka thian tha ber
- Mizoram Kristian history research tur
April 22nd, 2011 at 1:04 pm
comment ch1iah 1la
Report this comment
April 22nd, 2011 at 1:09 pm
Tha thei hle hlawm mai.Misual ho tih takah tun kum chu Good Friday lam post a tha hnem hle mai,kan mamawh nasa mai si a.
Report this comment
April 22nd, 2011 at 1:37 pm
Kross hian thlan a dawh zawm, tholeh Krista, puithiam lalber khan sawipuina, ama thisen kengin vanbiakbuka a luh tlang daih tawh thu AD 68 laiah pawh chhiar theihin Hebrai mite hnena lehkhathawn kan kawl, chhiar chiang ve teh u.
Report this comment
April 22nd, 2011 at 2:21 pm
Kan naupanlai khan club kan din ve a .Kan naupang tlangin thiam pawh kan thiam ve thlawt.
Kolasib ah PHE players te tel nan nen kan in sut tum pawhin an van nei min hneh hram.
Hun a kal a kan veng A team(eleven)ah kan kai chho a .Kolasib bum huap mihausa in club a din a kan thian te 4 vel an peng chiah mai chuh.Kan vengpa a naute 2 kan thiampui deuh deuh te an tel ve chu unau an in vel loh chauh.
An u chuan veng phatsantu in ni kan inah pawh in awm ve lo ang te a ti.
An pa ber pawh hmanlai inkhelhtiam ani a a hmingah pawh khelthiam tih phuah zawm hial a ni a .Ka pa in cup tam tak a chawi tawh veng a phatsan ngai lo tiin a hautu zawk a tap pur mai.
Report this comment
April 22nd, 2011 at 2:45 pm
Bob dylan pawn In a many dark hour…..i’ve been thinkin’ about this ..that Jesus Christ
was betrayed by a kiss….but i can’t think for you….u’ll have to decide
whether Judas Iscariot……had God on his side.ati
Report this comment
April 22nd, 2011 at 4:04 pm
I ziak thiam vei fu mai
Report this comment
April 22nd, 2011 at 4:23 pm
Football khel mi ka ni lo va, a khel thinte’n engti ang takin nge an ngaih hlut tih hi ka hriat thiampui pha kher lovang. Amaherawhchu, eng thilah pawh inphatsan hi chu a tuartu tan a nâ a, tharuma chinfel mai theih si lohvin thinlung lam a khawih tel thin.
Thu i la lâwn nalh khawp mai.
Phatsana awm tan phatsantu nih ve kher erawh a tul ka ti lo.
Report this comment
April 22nd, 2011 at 4:40 pm
ngaih nawm
Judas Iscariot-a pathum in nei bik a nih chu 
Report this comment
April 22nd, 2011 at 6:30 pm
Ziak tha in i tehkhin tha khawp mai. Ni e inphatsan hi chu a thinrimthlak duh alawm, naupan lai phei kha chuan kan la na lehzual bik emaw tih tur mai kha a nia.
Report this comment
April 22nd, 2011 at 6:47 pm
rilru na hi a tak in taksa hi a na vawng vawng thei asin.
Report this comment
April 22nd, 2011 at 8:50 pm
Thirna tlang dang atangin a ni a…Tha hle mai. Pathian Lehkhabu Thianghlim ah hian engkim hi a insawifiah vek lo a. Pu Paula pawh khan a kim lova a hriat thu leh a a kim lo veka a hril thu a sawi a nih kha. A nilo zawnga interpret pawh a awl,kal sual ta pawh an tam..mahni nun hmanga teh vek lah kan bo chuang lo.. Thlarau Thianghlim hruaina ka mamawh tak zet a ni…. A pawimawh ber chu he thuziak ang hian Pathian pawlna ngaichang chungin a tha zawnga Bible thu leh hla kalpui hi a fuh thin in ka hria….
A inhmeh kual vel vek e….Good Friday ah hetiang lam chi post a awm nual hi a lawmawm a ni. Krismass aiin a ngaihpawimawh a phu zawkin ka hre fo thin. Mizo mizia ah hian tuarna lamah hian kan intawiawm tha zawk fo a. Chutiang zelin pianni leh inneihni aiin Thihni ah kan buaiin ka la thutak zawk fo thin… Good Friday,mizo ril nen a inrem em em kan hmang tha lo deuh hi chu tlem chuan pawi ka ti deuh thin. Zokhua velah chuan kan la urhsun viau a mah se khawpui lamah hian tlemin a dang lam deuh a ni…Mahse a tha tho mai e,kan tan a thihna leh thawhlehna a ni tih kan rin hi a hlu ber tho e….
Good Post
Report this comment
April 23rd, 2011 at 10:24 am
ngaihnawm reuh ka rin aiin.
hmanah kan sual vangin thinlung kehin a tap tawh a, tunah lehzel tah tir chu a dik lo, a ni thei lo. post tha a ni, hetiang lam chhiar nast hi a tha, thlarau nun a khawih tel zel bawk nen. Lal Isua tuarna hi hrechiang tak tak zel ila aww (ot em?)
Report this comment