mi(sual).com

[MUP TLANGAU OCTOBER 2001 atanga lak chhawn]

Taibawnga hi Mizo(Lushai) tlangval pakhat tlangchhipa ka in tetakte atanga hnaite thingtlang khua a cheng a ni a. A hmangaih em em nupui duhawm tak a lo nei ta a. Nimahsela an inneih ruai theh an zo fel hman chauh tihah chuan a kawngah natna duhawm lo tak a awm ta a.

A mu ta reng mai a. A nupui chu damdawi min rawn diltir a, vanduai thlak takin chumi ni chuan mel sanglia hlaah ka zin chhuak dawn a, chumi hnu thlali hnua ka han thlen leh chuan Taibawnga kawngna chuan zual lam a lo pan zela. A damloh ni atanga khum ruh taka a mu chu a tho thei lova, a indelh pan nasa hle bawk a.

Tun hmain thing atangin a tla a, chuvanga kawngna nei a ni a. Hemi khawngaih thlak tak natuar nupui neih hlimin a chhuahsan leh tak hi tihhlim tumin theihtawp kan chhuah a. An khaw Puithiam ten theih tawp an chhuah bawk a, tumahin an thlamuan thei lo a ni.

Hetih hun lai hian British Sawrkarin hemi rama chengte tan hian Aizawl Kulh bulah, kan awmna bul lawkah Damdawiin maurawpin a sa a. Bengali Doctor a awm a, Taibawnga chu Damdawiinah kan dah ta a. A nupui pawh chu a pasal hnena kir leh tur leh Damdawiin-a awmpui turin kan hun tawp thlengin rinawm takin a awm ta a.

Pathianni chawhnu apiangin damlote tlawh turin Damdawiinah kan kal thin a. Chhandamna thu ngaihthlak nuam an ti ber a. Taibawnga chuan thutak chu a man fuh bika. Reivak lo hnuah Lal Isua ringtu a lo ni ta a. Dinhmun khawngaih thlak takah a ding a, thut leh zangthala mut a thei lova, bawkkhupin a mu a.

A chang chuan a na chu a zual hle thina. Pathianni chawhnua ka kal hun tur chu nghakhlel takin a lo thlir thin a. Sunday School dar rite a lo ngaithla a, naupang ban hunte leh ka tlawh hun turte a lo sunagtuah thin a, hlim takin kan titi a. Midangte pawh ngaithla turin an lo kal kawm a, Pathian thu an hriat chhunte chu midangte a hrilh chhawng zel thin a. Chutiang chuan Taibawnga chu a Sakhua tharah chuan a lo thanglian ta a ni.

Chakna a mamawh a, engemaw ti hunah chuan mi nunrawng leh duham ten dam chhuak dawn tawh lo niin an hria a. A vawk leh a kelte a thil neih dangte an laksak ta vek maia. A thilneih a chan takte avang chuan a tap ka hmu fo thin a, mak pawh ka ti lem lova, damchhuah a in beisei a. Damchhuak leh pawh nisela rethei kutbengin a awm tawh dawn a ni. A tirah chuan heng rukru nunrawng takte hian a rilru an tibuai hle a.

A hnu deuhah chuan a mah hmangaihtute tan rohlu tak a buatsaih hlut zia a lo hre ta a ni. A rinna leh a hmangaihna a lo pung chhova, khawvel thila rethei taka a inngaihna chu a lo reh ta a ni. Damchhuah inbeiseina a nei ta lova, a hmangaih chuan VANIN a thlira, thlen hlan a nghakhlel ta em em a ni. A taksa khawngaih thlak tak chuan a thlarau nun a tih chauh chang a awm thin.

He thu hi a sawi ka hria, “Thi mah ila, Isua ka ring tawh” a ti a. A nun leh a tawngka mawi tak mai chuan a bula damlo dangte pawh a hneh a, a khum bula mu Beri Beri, eichhiat avanga vung tuar pawhin Chhandamtu a ring ta a ni. Chutichuan Taibawnga chuan thla tamtak natna tawrhnan a hun a hmante chu thih theih tawh loh beiseina nun a neih nan leh hlim taka damlo dangte tana thusawi nan a hmanga, kum hnih deuh thaw natna a tuar hnuah a taksa chau tak chu Isua hnenah a MUHIL ta a ni.

Kan zin bo hlanin a hun tawp chu a lo thlengin a rinna chu a nghet ani tih ka ring a. Ringlotu thlana phum tute chuan hnam kawlhsen tak atanga Kristian hmasa ber, thawhlehna hlimawm tak beiseitu leh changtu an phum tih an hre lovang.   Chuti chuan Taibawnga, damlo rethei kut tual leichham chu Mizoram (Lushai Land) a Chanchintha rah hmasa ber a lo ni ta a ni.

(He article hi Magazine hrang hrangah chhuah tawh thin mahse tunlai hun atan hian hriat nawn leh a tul hle a. MUP  Member senior Pu Ch. Aikima’n a han thawh leh a ni. Taibawnga hian 30.3.1896 khan Pu Buangate hnenah hming a pe a. High School tlang Aizawlah hian phum niin hriat a ni. Hriatrengna lung pawh tha takin INTACH(M) in an phun sak a ni. Ed.)

Similar Posts:

• “I âw-ah a âw ka hre thei asin!”
• Natna mak!
• Kan thiam theihloh thil pahnih
• Chief Minister leh Hindu Rituals
• Thihna hnehin a tho leh ta!

Recent Posts:

• ZU HI SUAL A NI LO, A IN A TE PAWH AN SUAL HEK LO
• Like!
• LUNGHNUR
• SADHU SUNDER SINGH-A CHANCHIN ROPUI CHU:
• KA ṬAHPUI LEH SI ṬHIN

This entry was posted on Friday, April 22nd, 2011 at 5:29 pm and is filed under Mizo Society & Culture. You can follow any responses to this entry through the RSS 2.0 feed. You can leave a response, or trackback from your own site.