Nimin tlai chu ka u fanu sikul bang hi a rawn leng a. A chhungte nghah pahin kan inah chuan a homework te a ti nghal a. Pindan lehlamah awm mah ila a lehkha zir lai chu ka lo ngaithla reng a. Naupangte, KG-II zirlai chauh ni mah se a thil lam dan (pronunciation) chuan ka rilru a la ta tlat a ni. Hetiang deuh hian a lam a:
Phi-Ei-Ar-Ar-O-Thi – Parrot
Tunlai English medium sikul (thenkhat) ho lo that tawh zia hi tiin ka ngaihtuah mai mai a. Discipline leh thildang kha chu lo dahtha ta ila, Sap tawng (English) lam dan tur thlengin a pawl hniam ber atangin tan an la tawh a ni.
Hetih rual hian keini, Sap tawng hman ngaih pawha kan lam dan a ‘Zo’ em avanga hmang zak tlat ho hian kan ngaihdan kan sawh sawn a hun ve ta. ‘Zo’ taka thenkhat an tawng avanga kan hmusit nghal ringawt te hi kan la changkan loh zia ti langtu a ni.
Sap tawng hi kan tawng a nih miau loh avangin ‘Zo’ accent emaw, ‘Vai’ accent neih hi i zak lovang u. TV kan en a, Japanese/Korean film kan en thin. Sap tawng an thiam loh zia leh an lamdan nuihzathlak zia kan hre theuh awm e. Anni chauh hi a ni lo. College kan kal laia ka French leh German classmate te’n English an thiam loh zia leh anni ai chuan keini, Mizo kephah hlai te’n kan thiam zawk zia hrechiangtu ka ni. Chuvangin ‘Zo’ taka Sap tawnga kan tawng hian i zak tawh lovang u. Amaherawhchu, midang tan hriatthiam harsa ni lo hram rawh se.
Duhthusam chuan kan naupanlai atang khan Sap tawng lam dan diktak hi lo zir ila, anmahni (English/American) ho tawng dan ang chiahin kan tawng thei tur. Kan thei a nih chuan British/American accent ngeia tawng tluk a awm lo. Mahse, mi nazawng, than kin tawh tan accent zir that leh hi thil namai lo tak a ni. Kan tih theih awlsam ber chu kan thil lam dan hi zahpui lo ila. Chutih rualin kan Sap tawng chu kan mi biak a te khan hrethiam se la, kan tawngkam (sentence) a dik bawk tur a ni.
Sap tawng lam dan dik lo ngaihnep ai chuan mahni tawng ngei thiam lo ho hi i ngainep zawk ang u. Hnam dang tawng i hmusit ang u ka tihna lam a ni lo. Mizo ni si, mahni tawng ziak chu sawi loh, a chhiar pawh chhiar tha hleithei lo nih hi a zahthlak ka tihna lam a ni. Mizo tawng ai chuan Sap tawng thiam zawk anga in ngaih tlat te hi intihtheih nan hman chi a ni lo.
Tichuan ka u fanu chu ‘parrot’ han spell leh turin ka ti a. ” ‘Parrot‘ a ni lo, ‘Pharrot‘ tih tur, Phi-Ei-Ar-Ar-O-Thi – Pharrot” tiin min chhang a.
Similar Posts:
- Parrot Flower
- Zirna sikul hi
- Liverpool FC ka tlawh ve a
- Pronunciation i lo zir lawk ang u
- Engtin nge Mizo tawng hi kan humhalh ang?
May 25th, 2011 at 11:31 am
A bul atangin kan zir tha leh teh ang
Report this comment
May 25th, 2011 at 11:36 am
Ka american thrian chuan “basic” hi beizik a ti a, ka english thrian chuan baizik a ti. Kha daih kha ‘sin.
Report this comment
May 25th, 2011 at 11:47 am
Hmanah Australian putar pakhat thusawi kan ngaithla a, saptawng thiam intih ve nak laiin ka hre fuh thei der lo. Engtizia a China te chu sawifo nge maw anih le ka ti a, a thusawi tawp lamah chain alo ti lek ani tih te ka’n hre ve leh hnuhnawh a. Kan thusawi an hriat theih a, an thusawi kan hriat theih hi a pawimawh ber anih hi a ka ti ta.
Report this comment
May 25th, 2011 at 12:03 pm
Rajnikanth Medical college of engineering for commerce and Spoken English ah kal vek mai ang u…
Report this comment
May 25th, 2011 at 12:26 pm
Mizoram chhung ah na nana hi chuan lam sap telh tawlh hian lam zo deuh aichuan nuih an hlawh zawkin ka hria. In nuih kan ching lutuk hi chu a changkan loh thlak ve khawp mai.
Report this comment
May 25th, 2011 at 1:23 pm
#30 ka rawn sawi zau ve hlekduh lo hrethiam teh Welsh ho te chuan anmahni trawng hran an nei a a bakah British English kan tihah hian chi hrang a tam mai Cockney phei chu hriat a har ve khawp mai
Report this comment
May 25th, 2011 at 3:51 pm
Good post…..
Report this comment