mi(sual).com

Rev. C. Lalsangliana

“Nimahsela Thlarau Thianghlim chu in chunga a lo thlen hunah thiltihtheihna in la nei ang; tichuan, Jerusalem khuaah te, Judai leh Samari ram khaw tinah te, kawlkil thleng pawhin ka thuhretute in ni ang,” a ti a (Tirhkohte 1:8)

He Pentikos Ni lawmawm tak hmangtu zawng zawngte Kan Lalpa Isua Krista hmingin chibai ka buk a che u.

‘Tin, Pentikost ni a lo thlenin, an zain hmun khatah an awm khawm vek a. Tin, thawklehkhatan van ata ri, thlipui tleh angin a lo thleng ta phut a. Tin, chu chuan an thutna in chu a tikhat ta vek a, tin, leite te, amaha insem darhin, mei angin an hnenah a lo inlar ta a. Tin, an chungah chuang theuh va, an zain Thlarau Thianghlimin an khat ta vek a, Thlarauvin a tawngtir ang zelin tawng dangin an lo tawng ta a’ (Tirhkohte 2:1-4)

Kan hriat angin Pentikos hi Judate ‘chawlhkar kut’(×—×’ שבועות) emaw ‘Buhseng kut’ tia vuah thin a ni a, Thawmhnaw var lam inbelin he pentikos hunah hianin Baptisma te chang thinin he hun hi an lo ngai ropui thin hle a ni. Kan Lalpa Isua Krista, thihna hneha a thawhlehna te, Thlarau Thianghlim tihnunna te, a chenchilhna ropui tak te entirna a lo ni chho ta zel a ni.

Pentikos Ni-a Thlarau Thianghlim a lo thlen ṭuma kal khawmte pawh hi hnam hrang hrang, Juda hnahthlak leh saphun (גיעור) te an ni a, Pentikos Ni-a Thlarau Thianghlim lo thlen dan hi a makin a ropui hle a, kan hriat angin Lal Isua Krista zuitute leh a rawngbawlpuite, an hoptupa a thih tak avangin Judate hlauvin an tawmbo thin a, Chutia mangan lusun khawhara an awm chu Jerusalem-ah an inpawl khawm thin a, chutianga an inpawlkhawmnaah chuan ṭhahnemngai takin an ṭawngṭai ṭhin a ni.

Tichuan, Thlarau Thianghlim chu thawklehkhatah an benga hriat ngei tur leh haider theih rual lohin van ata ri, thlipui tleh angin a lo thleng ta phut a, an á¹­hutna in chu a luahkhat ta vek a, an rilru leh thinlung leh thil dang zawng zawng pawh chu Thlarau Thianghlim lo thleng chuan a luah khat ta vek a ni. Tin, benga hriatna chauh ni lovin mita hmuh ngei theih turin leite amaha insemdarhin mei angin an chungah a chuang ta á¹­heuh a, an zain Thlarau Thianghlimin an khat ta vek a, Thlarauin a tawngtir ang zelin tawng dangin an lo tawng ta a ni.

Thlarauin thuneihna a chan na hmunah chuan zalenna a lo thleng a, nun a inpawh tawn a, inunauna leh inpumkhatna boruak thar a lo thleng thin a nih hi. He Pentikos nia Thlarau Thianghlim lo thleng chuan ringtute a thlamuan a, lungawi takin a siam a, hlim leh lawm takin an Lalpa an pawlho a ni. Lal Isua zuitute kha Lal Isua thih takah khan an beidawng em em a, an zam a, an chan a chau khawp mai. Juda-te hlauh avanga inkharkhip, pindan chungnung berah thahnemngai taka tawngtai, chu bak tih tur nei tawh lote chuan Pentikos Ni-a Thlarau Thianghlim a lo thlen hian chanvo ropui tak, nun inthlakthlengna danglam tak an chang ta a ni.

Thlarau Thianghlim hi kan thinlunga cheng reng turin kan duh thin a, kan mangan ni te, harsatna kan tawha kan hriat apiangin auh phakah, koh phaka cheng turin kan duh thin. Pathian thu chuan ‘Thlaraua khatin awm zawk rawh u’, tiin min fuih a, min luah a, min thunun a, a hruaia awm hi kan tih tur dik tak leh he Pentikos Ni thuchah pawimawh tak chu a ni.

Pafa, nufa, nupui leh pasal te inkarah sualnain hem a thlak a, á¹­awng inhrepawh tawn hlei thei lova awm changte kan nei thin. Chutiangbawkin, rawngbawlna kawng thuah pawh rawngbawltu nun inkara sualna tlazep avangin Pathian leh a Kohhran tana thawkho thin leh ram leh hnam tana á¹­hahnemngaia inpe, thawkho thinte pawh á¹­awng inhrethiam tawn hlei thei lo a kan awm hun a lo thleng fo á¹­hin. Inhnaih tea ding tlang ni si, mahnia hawi lam nei hrang tlatin rawngbawltute, ram hruaitute ho pawh awm theih a ni. He Pentikos Ni hian kan thinlunga inpumkhatna, thawhhona tha min thlen sela, a va lawmawm dawn em?

Ringtun nunah hian manganna leh beidawnna te a lo thleng fo thin a, Hla siamtuin –

‘Chau leh ngui taka ka awmin,
I tan zam hmel ka put pawhin,
Dotute tana Lal lukhum,
Aw i tiam kha min hrilh nawn leh rawh’

– a tih ang khan keini pawh Lal Isua leh Thlarau Thianghlim chenchhilhnaa rawngbawlna nung tak te, nun hlimawm tak te lo nei thin tawhte kan ni mai thei. Harsatna a lo thlen chang hian Pentikos Ni-a Thlarau Thianghlimin ringtu hmasate a thuam a, lawmna ropui tak nen a kaiharh a, Lal Isua hriatpuitu rinawm tak leh ama hminga rawngbawlna nung tak neitu an lo ni thar ta ang hian keini pawh tihchak thara kan awm theih nan chaute hnenah chakna, beiseina neilo te hnenah beiseina thar min siamsak duhtu i pan thin ang u.

Keini Mizo Kristian te tluka Thlarau Thianghlim ngaisang leh tuipui hi an awm awm lo ve, tih tur hial khawpin kan tuipui a, Mizo Kristian te rilrua Pathian kan suangtuahna leh rilruin a pawm dan zawng zawng hi Thlarau Thianghlimah hian a inchhung lut vek a ni kan ti thei ang. Heti taka Thlarau Thianghlim leh a hnathawh ngaisanga tuipui, kum 100 lai Harhna boruakin a chenchilh kan nih lai hian kan chhehvela ringlote atang hian han inthlir let ta ila, Mizo Kristian, Thlarau Thianghlim chenchilh intite hian eng ang danglamna nge kan neih?

Thlarau Thianghlim hmaah chuan engmah thup theih a ni lo. Kan vantlang nunah te, kan ram rorelnaah te, ei leh bar kan zawnna kawng tinah te, kan khawsakphung, ni tin chanchinthara kan chhiar, TV leh Radio atanga kan hmuh leh kan hriatte han en chuan kan ram leh hnam duhthu a sam lohna tam tak hmuh tur a awm a ni.

‘Pathianin Mizote thim ata min hruaichhuakin eng mak takah min hruai lut a, kan ram hi Thlarauin a chenchilh a ni,’ tiin kum 100 lai harhna kan lo chang a ni tih te kan puangchhuak a, chutih lai mekin kan ram hruaitute, Kohhran hruaitute zahpah nei lek lova an khum ta phiar phiar mai te, tualthah, ruk ruk, pawngsual, inthamna leh eirukna thu te, diklo taka thiltih leh lungawilohna lantira chawnghei te, nawrh te, kawngzawh te, sawisen loh khawpa tam Thlarau Thianglim chenchilh Mizo Kristiante nunah hian a van tam si em! Hawh u, i inchhut let ang u. He Pentikos Ni hi kum dang ang bawkin a lo inher chhuak leh ni satliah mai lo sela, kan nunah awmze neiin thu sawi sela a va pawimawh em!

“Kan ram, kan hnam min chawiliantu Thlarau,
Vawi tam tak kan ti vui che, min ngaidam rawh,
Kan au che thisena lei ten,
Thlipui ruahpui Harhna rawn thlen leh rawh”

– tia kan hlaphuahtuten an phuah ang hian Lalpa hmaah thupha chawiin kir leh ila, a Thlarau Thianghlima siamtharna chang turin i inhlan thar leh ang u.

Kan khawtlang nun pumpui leh kan ram rorelna thlengin he Thlarau Thianghlim hian min fan chhuak rawh se. Kan rama inthlanpui lo awm leh turah te, kan ram dinhmun insiam chho mek zelah te pawh hian he Thlarau Thianghlim, a mite kaihruaia chenchilh tlat thintu hian min chenchilh chauh ni lovin kan nunah thu nei rawh se, chumi atan chuan i inpe phal ang u.

Pathianin a thu malsawm rawh se, Amen.

[youtube]http://www.youtube.com/watch?v=CT4ZfLUigPc[/youtube]

This entry was posted on Sunday, June 12th, 2011 at 6:30 am and is filed under Religion. Both comments and pings are currently closed.