mi(sual).com

1st. Wednesday: Vanlalthangi [88] W/o Lalbiakliana [L] Ramhlun South chu electric man vangin a thi. Pi Thangi hi tuk danga a tih ṭhin ang in In chung zawl tifai tur leh Inchunga a thlai chin te en turin In chung zawl ah a chho va,tuichhe paihna pipe a hawlh faina ṭhin Iron Rod chuan bawlhhawlh a haikhawma, a sir lawk, an in a tanga Ft 2 vel lek a hnai Electric hrui chu a thir tlawn ken hmawr lam chuan va tawk fuh in Pi Thangi hi Current chuan a man ta a ni. Bawngkawn Police-te chuan thil thlen dan an enfiah hnu ah a chhungte ngenna angin Pi Vanlalthangi ruang chu posmortem loh in an chenna veng Ramhlun South-ah vui a ni.

2nd. Thursday: Mizoram University Vice Chancellor, Prof. R Lalthantluanga chuan Chief Minister Lal Thanhawla a kâwm a, MZU-in Mizoram sorkar ṭawiawmna an mamawh tur thu a hrilh. Chief Minister chuan, Prof. R Lalthantluanga chu MZU Vice Chancellor tura thlan a ni chu lawmawm a tih thu hrilhin, MZU leh Mizoram sorkar chu thawhhonaah theihtawp chhuah a nih tur thu a lo hrilh bawk.

3rd. Friday: Cherhlun khua Pu Lalauva leh a fapa Lalbiakrema te pafa lo a feh chu savawmin a bei a, Pu Lalauva hian a ban dinglamah hliam a tuar a, Lalbiakrema hi savawm hian bei nasa bikin a lu ah hmun thum velah a seh a; a dul velah hmun thumah a seh bawk. A thisen a chhuak nasa hle. An ri ah mobile phone keng an lo awm a, In lam an hrilh a, khawtlang mi tlawmngaite’n Lalbiakrema hi an zawn hawng a, a pa Pu Lalauva erawh zawn haw ngai khawpin hliam a tuar lo a ni.

4th. Saturday: Mizo Zirlai Pawl (MZP) chuan Lok Sabha MP, CL Ruala an kâwm a; Mizo zirlai, Minority Scholarship dila hmu lo mi 1,023-te’n scholarship an hmuh theih nana mi pawimawhte dâwr turin an ngen a; MP chuan theihtawp chhuahpui a lo tiam.

5th. Sunday: Aizawlah zu ruih buai avangin tualthihna zahthlak tak thlengin Tuikual ‘A’ Salvation Temple bul a Omega Travels neitupa Pu Zohmingthanga (46) te nupa leh a puzawn Zirkhawthangate nupa chu in ti thiamlovin Omega travels office chung, Pu Zohmingthanga inluah chhungah an insual a, Zohmingthanga hi a thi. A thih lai hian Zohmingthanga nupui hi a zu in luat avangin a lo chatthla ve mek bawk a ni.. A zialo khawp mai.

6th. Monday: Aizawl Bazar bula ÊK IN NUAM chhûngah ek ei ral tur a carbite an thunin Gas a rawn siam vak avangin a puaka; thi an awm lova; hliam erawh an awm nual. Êk in pawh a chhe nasa hle.

7th. Tuesday: Environment & Forest Minister, H Rohluna chuan, a nupui Lalbiaknii nen an inneih kum 21-na hriatreng nan Sponsor Tree Planting Policy (STPP) hnuaiah Lengpui Airport kawngah thing a phun. Sponsor Tree Planting Policy hnuaiah hian mi hrang hrangin thing ṭiak 128 an phun tawh a; thing phuntute’n an chhungte boral tawhte pualin emaw, nau piang pualin emaw, chhungkua/mimal nuna ni pawimawh chhinchhiah tlak hmingin emaw an phun ṭhin a ni.

8th. Wednesday: Serkawn, Lungleia Sap Upa leh Pu Buanga Hall-ah Lunglei District Infrastructure Development meeting neih a ni a, Lunglei khawpui tuipekna tihlenna tur, Greater Lunglei Water Supply Scheme Phase-II siam chungchang leh thil dang pawimawhte an sawiho. Meeting hi Lunglei High Power Committee vice chairman, Joseph Lalhimpuia, MLA-in a kaihruai a; mi pawimawh engemaw zat an tel bawk.

9th. Thursday: Mizoram sorkar chuan Chief Secretary, Prin¬cipal Secretary leh Secretary-te hna chan¬pual a sîksawi a; tun hnaia sawi hlawh tak, Delhi Mizoram House-a Residential Commissioner, SP Singh chu a hna ngai chelh chhunzawmtir a ni.

10th. Friday: Central Anti Drugs Squad chuan Bethlehem Venga V.Malsawma in, taxi driver Vanlalnghenga (36) s/o C Khawlluaia luah laiah heroin atana siam tur, nachhâwkna chi khat, Loract-D, cheng nuai 50/- vel man leh an hlawhfa chhawr mi pasarih an man.

11th. Saturday: Mid Term Council Meeting of Indian Engineers Federation (INDEF) (North Eastern Region(NER) chu, Tourist Lodge, Chaltlangaah neih a nia; Chief Minister Pu Lal Thanhawla’n a hmanpui.

12th. Sunday: Aizawl lam atanga Silchar lam pana tlan Truck AS 11-AC-5264 Amrul Haque Lasker Silchar a mi motor chu Vairengte khaw dai Aizawl lam hnaih Ṭawngṭaina hmun bulah chesualin Motor hi kawng thlang Feet 200 bawr vel a thui a lum a, motor khalhtu Sahab Uddin Lasker (33) Silchar chu a hmunah boral nghalin, Aizawl atanga Vairengte pana he motor a chuang Tobby Lalrinmawii (36) Vairengte Chhimveng chu Damdawi in thlenpui anih hnuah a hliam tuar lovin a boral zui ve leh bawk. \

Handyman Abdul Samat Barbhuiya (21) Silchar leh an passenger dang pakhat Kamrul Haque (20) Silchar-te chuan hliam tenau tuarin Handyman Abdul Samat Barbhuiya chu Vairengte Damdawi Inah First Aid pek anih hnuah Silchar Gunggoor Medical College ah refer a ni a, mitthi te hi Vairengte CHC ah Postmortem an nih hnuah an ruangte hi an chhung te’n an la nghal a ni.

13th. Monday: Thanga (25), s/o Kaptel, Myanmar chu Vanchengpui leh Lungtan khaw in¬kara Tuichang Lui, Phai¬sen¬chhuah kàiah a tla hlum.

14th. Tuesday: Industries Minister S Hiato chuan Meidum khaw dáia Oil & Natural Gas Corporation (ONGC) Ltd. ten oil lai chhuak tura lei an verh mek a tlawh. Meiduma oil laih chhuah tum hna hi kumin February 1-ah ONGC-in an thawk ṭan a, tunah hian metre 3,000-a thûk an verh tawh a, metre 1,300 verh leh an la hmabak. An verh tawh chin aṭanga a lan danin, oil a awm ngei tur thu an sawi. ONGC hian Bilkhawthlir dái leh Thingdawl dáiah lei an lo verh tawh a, mahse an hlawhchham a, Meidumah hi chuan an hlawhtlin ngei an in beisei hle. Minister-in Meidum a tlawhnaah hian ZIDCO Chairman VL Robiaka, Industries Commissioner RL Rinawma, Geology & Mining Jt. Director Dr H Lallenmawia, Industries Jt. Director Lalrodingi leh Kolasib PHE EE Lalsanglura te’n an ṭawiawm a ni.

15th. Wednesday: Mizoram pumah leh Mizoram pawn hmun hrang hrangah YMA Day vawi 76-na hlim tak leh ropui takin lawm a ni a, khawtlangah rokhawlhna a awm avanga lawm thei lo an awm bawk. YMA Day hi branch tinin anmahni remchan dan angin an hmang a; branch tam zawk chuan anmahni khua/veng chhunga mi harsate ṭanpui nan leh khawlai thenfai nan te a an hman bakah, Home hnena ṭanpuina pekna ní atan te, hnam lâm leh zai hmanga inelna atan te, thing phunna ni atante leh chhùn lam chu intihhlimna hun atante an hmang.

Nikum YMA General Conference-a report atanga a lan danin, Central YMA hnuaiah Sub-Hqrs YMA panga, group 46 leh branch 781 a awm a, member 3,62,220, (mipa 2,19,794 leh hmeichhia 1,42,426) an awm mek a ni.

16th. Thursday: Serlui B Hydel Pro¬ject tuikhuah hnár lam, Thingdawl ram chhunga litengsâwlah Zahmingliana (31) s/o Roliana, Thingdawl a tla hlum. Zo¬hmingliana hian Serlui B kamah lo neiin a riah¬chilh a; a thianpa Vanlalvuana nen mau-pûma an chuan laiin a chesual ta a ni.

17th. Friday: Lunglei Zotlanga Pi Darngaii In bulah 96th. Bn. BSF Signal Bomb (Bomb number R.3.04, mm51, 60A) kah chhuah ni a ngaih puak lo chu a tla a, he thil avang hian tualchhung mipuite chu an ralkhel hle. Lunglei police te hriattir nghalin, Addl. SP Rex Zarzoliana leh police eng emawzat chu thil awmdan enfiahturin an kal nghal a ni. Darkar khat dawn mipui an punkhawm hnuah BSF hotute pawh he Signal Bomb, Signal Light tia sawi bawk hi enfiahin an thleng ve nghal a. BSF hotu te chuan Bomb tak tak ang anih loh thu leh Signal Light pangngai Very Light (Kah en) ang chauh a ni tih sawiin, police-te hriatpuinain leia Bomb, inches 6vela thuka mi chu an pawt phawi ta a ni.

18th. Saturday: Serchhip Hmar veng Presbyterian kohhran Biak In thar chu Synod Moderator Rev. C.Lalsangliana’n a hawng. Biak In hi a dung feet 65, a vang feet 40 a zau a ni. He Biak In sak nan hian mistri tha 1081, labour tha 2240 leh hnatlang tha 2570 sen a ni a, Rs.36,67,210/- senga sak a ni.

19th. Sunday: Chhinga Veng YMA President, Pu PC Thanghuama chu an veng tlangval, Aldrin Malsawmtluanga, (20), s/o Pi Maveni, chuan a thinhnunah a vit a, Pu PC Thanghuama hi Aizawl Civil Hospital-ah enkawl mek a ni. Ngaihtuahawm lutuk erawh a ni lo. An inkhawih chhan hi Aldrin Malsawmtluanga hian ruihhlo a khawih ṭhina, hemi zilhhau tura a kal Pu PC Thanghuama chuan a’n nam deuh dawrh avangin Aldrin hian a bul hnaia chemte lo awm chuan a vit ta mai niin a lang.

20th. Monday: Mizo nula pakhat, Vairengte khua, Mumbai-a hnathawk tura hruai thlak chu commercial sex worker anga chhawr tum a ni a; hemi chungchangah hian report an dawn bawhzuiin, Mizoram police-te chuan Mumbai-ah an zu chhanchhuak. Mizo nula hian hnathawk tur anga hruai thlak ni si, commercial sex worker anga chhawr tum a nih avang hian, a chhuah rûk theih hmasak berah a chhungte be pawpin, thil awm dan a hrilh a; a chhungte hian CID (Crime)-ah an fanu thil tawn chu an hrilh a, CID (Crime) hnathawkte chuan Mumbai hi pan nghalin an chhanchhuak ta a ni.

21st. Tuesday: Tun hnaia sawi hlawh tak, Delhi Mizoram House-a Residential Commissioner, SP Singh chu Aizawlah Civil Secretariat-a OSD anga awm tura sawn a niin Mizoram sorkar chuan notification a tichhuak a; notification-ah chuan, SP Singh hian a hlawh atan Mizoram sorkar hnuaia a Commissioner/Secretary puite hlawh ang a la ang a, a hna thar tur hi a rang lama zawm tura hriattir a ni. Mi ṭhenkhat phei chuan fiamthuin “Delhi Mizoram House atangin celebrity-ah a inlet daih,” an ti hial. Delhi Mizoram House, Joint Residential Commissioner HL Rochungnunga’n RC hna a hmui rih ang.

22nd. Wednesday: Mizoram University chuan first year BA, BSc, BSc (HSc) leh Bcom result an ti chhuak a, 45.87% in an passed. BA-ah general exam mi 3,237 zingah 1,375 in an pass a, honours exam mi 1,571 zinga 889 in an pass a ni. BSc-ah chuan general mi 20 exam in pahnih an passed a, honours exam 403 zinga 120 in an pass bawk. Bsc (HSc) honours exam 19 zinga 13 in pass-in general-ah chuan pasarih zingah pakhat chiahin a passed. BCom-ah general exam 125 zinga 50 in an pass laiin, honours exam 120 zingah 76 in an pass thung.

23rd. Thursday: India ram chhunga khaw fai thlanchhuahte hnena pek ṭhin Nirmal Gram Puraskar Award Chief Minister Lal Thanhawla’n Mizorama khawfai 5 thlanchhuahte hnenah a hlan.Khaw fai lawman dawngtu khuate chu: Bawngthah, Hliappui, Lallen,Phulmawi leh Zawlnuam Thuampuite an ni.Nirmal Gram Puras-kar (NGP) Award hi Total Sanitation Campaign hnuaia hnathawh dan teh nante, faina lama khaw hrang hrang te’n tan an lakna tura inelna atan kum 2005 atang khan India ram President-in kum tin lawmman a hlan ṭhin a.

Lawmman hi mihring tam dan a zirin hetiang hian pek a ni.Mihring1000 aia tlemah – Rs50,000/, mihring 1000-1999 inkarah – Rs 1,00,000/,mihring 2000-4999 inkarah- Rs 2,00,000/-, mihring5000-9999 inkarah – Rs4,00,000/, mihring 10000 chunglamah – Rs 5,00,000/-te pek ṭhin a ni. He lawmman dawng thei tur hian khuaa in zawng zawngin inthiarna ṭha- (ek in leh zun in) an neih vek a ngai a. Zirna in – school leh anganwadi-ah te inthiarna ṭha a awm a ngaih bakah vantlang hmunah inthiarna a awm ṭhat a ngai bawk a ni. Lawmman semna inkhawmah hian Environment & Forest Minister H.Rohluna, Mizoram Law Commission Chairman R.Lalrinawma, ZIDCO Chairman VL Robiakate bakah PHE Special Secretary Dr.Dilraj Kaur te an tel a ni.

24th. Friday: Synod Revival Team Retreat chu Chaltlang Kohhranah Synod Moderator Rev. C. Lalsangliana a hawng. Tun ṭum retreat-ah hian Synod hnuaia Revival Team 70 zinga 69 an tel thei a, riak lut mi 296 niin, mi 56 an lang a ni. He retreat hian tun Pathian ni lo awm tur (26th. June) thleng a awh ang.

25th. Saturday: Mizoram Synod Choir member 24 leh Central KTP hruaitu mi pathumte chuan ‘I Love Taiwan Mission 2011’ programme a kal turin Aizawl an chhuahsan. An programme ang chuan July 21st. (Ningani) ah Aizawl lo thleng leh tura beisei anni.

26th. Sunday: Bawngkawn Police-te chuan hmun hnihah mi in rawk avangin mi pali kum tlinglo vek an man.

27th. Monday: Mizorama ran chi hrang hrang awm zat tarlanna, 18th Quin¬quennial Livestock Census 2007 : Volume I & II chu AH&Vety Minister, Nihar Kanti Chakma-in a office-ah a tlangzarh. He lehkhabiin a tarlan dan chuan Mizoram-ah ran malkhaia tam ber chu Zo ar a ni a, 8,49,424 awmin Zo vawk chu a tam ber dawttu a ni a, 47,143 a awm a; ran awm miah lo a awm a, chu chu Sabengtung a ni.

28th. Tuesday: SCERT hnuaia Science Promotion Wing leh Department of Science & Technology (DST) ṭangkawp chuan Govt. Comprehensive Model School-ah Inspire Awards Scheme 2010 hnuaia 1st State Level Science Exhibition neih a ni a, Planning Board Vice-Chairman Lalkhama’n a hawng.

29th. Wednesday: MULCO zawmtu society hrang hrang member-te chuan Ṭhuampuia MULCO ram chhunga mimal thenkhatin in hmun pass an siam chu duh loin an ban phun ṭhenkhat an ṭhiahsak. MULCO Chairman Vanlalthlanga sawi danin, MULCO dairy plant hmun hi kum 1972-a AH&Vety department-in mimal ram a lei a ni a, kum 1994-a AH&Vety atanga MULCO a indan hnuah MULCO kutah hlan a ni a, tun thlengin MULCO-in a enkawl zui a ni.

30th. Thursday: India sorkar, Mizoram sorkar leh Mizo National Front (MNF) ten inremna thuthlung, Peace Accord, an ziah ni champha vawi 25-na lawmna inkhawm ropui takin Vanapa Hall-ah neih a ni a. He inkhawm pawimawh tak hi Mizoram sorkar leh Mizoram Kohhran Hruaitute Committee (MKHC) ṭangkawpin an buatsaih a ni. He inkhawmah hian Mizoram Governor Lt. Gen (Rtd) M.M. Lakhera, PVSM, AVSM, VSM, Mizoram Chief Minister Pu Lal Thanhawla leh CM hlui MNF President Pu Zoramthangate pawh telin thusawina hun an nei hlawm. Mizoram chhunga District khawpui zawng zawngah he hun hi hman a ni bawk.

Kumin chhunga kan hun chanve chu a zo leh ta ruai mai le. Dam takin u le.

Similar Posts:

• CBI in Vairengte Naupang bo an chhui mek
• BRTF Kawng ve hi le!!
• Ramri ah Assam Sorkar in In an sa..
• Cabinet in district thar siam remti lo
• Mizoram sorkar leiba – “Vaibelchhe 3,611″

Recent Posts:

• KA ṬAHPUI LEH SI ṬHIN
• The Alaskan serial killer
• Thanglian, Aw…… Thanglian !
• CFL Hmingthanga Thihcham Vawikhatna Pualin
• NGAIHNAWM KAWLEKSAWN – 2 :

This entry was posted on Friday, July 1st, 2011 at 5:00 am and is filed under Information, Mizoram. You can follow any responses to this entry through the RSS 2.0 feed. You can leave a response, or trackback from your own site.