The Alaskan serial killer

September 12th, 2013 8:33 am by chhana

https://www.facebook.com/groups/thungaihnawm/permalink/522324474511602/

Hmeichhia 30 chuang zet pawngsuala ramhnuaia hruai a ramsa ang a veh a kaphlum leh thin he American pa a hming Robert Christian Hansen hi kum 1939, Feb 15 khan Estherville, Iowa ah Christian leh Edna Hansen te inkarah a rawn piang a. A tet lai atanga a tleirawl chhuah thlengin mi zawi awi leh rual pawl lo tak, a pa nena in hau buai a in tibuai reng thin ti a hriat hlawh a ni a, school ah te pawh a vun sen tik tiak leh a dangawk nasat avanga chhaih nawmnah a ni fo thin a thenrual a pawl loin thian pawh a neih loh vang a ni ang a khawhar hnem nan ramvah/sapel a hrat hle a; nuam pawh a ti hle.

Kum 1957 khan US Army Reserve ah a in ziak lut ve a mahse kum khat a thawk hman chauh tihin a chhan pawh awm hran lo a chawlh tir leh nghal a ni. Kum 21 mi chauh a nihin kum 1960 khan amah aia naupang nupuiah a nei a; hemi kum vek 7th. Dec.-ah Pocahontas County Board of Education school bus garage a hal avanga man a ni a; kum 3 tang tura tih a nih laiin thla 20 chhung chauh Anamosa State prison ah a tang a, a chhuah hnu lawkah a nupui pawh hian a then zui ve nghal a ni. Hemi hnu pawh hian ruk ruk chhe te te vangin jail bang chu a zut zeuh zeuh!!

Kum 1963 ah a nupui pahnihna a nei leh a; ani nen hian fa pahnih an nei nghe nghe a ni. Kum 1967 ah Anchorage, Alaska ah an pem a, Anchorage ah hi chuan a ram vah thiam/sa pel thiam avangin a lar ve hle a; thenawm khawveng ngainat te pawh a hlawh hle a ni. Sa pel thiam vanga record (hunting record) pawh a siam ve nel nual a; chhang urna (bakery) te a neih chhoh takah phei chuan Anchorage ah chuan pa lar ve tak a ni chho a ni. Mahse buaina hian a tlan san thei lo nge amah ah hian sual hi a nghet ve hrim hrim zawk, kum 1977 khan thing tanna khawl(chainsaw) a ruk avangin man leh a ni a; mahse rilru lam chian loh vanga puhin damdawi chawh ringawt a ni.

June 13,1983 a lo herchhuak a sual chu thup theih reng ni hek lo le!! Kum 17 mi lek nawhchizuar Cindy Paulson chu pawr phing pheng kutkawl bun chung hian tanpuitu zawngin kawngpuiah a rawn tlanchhuak ta heu mai a; truck driver pakhatin lo hmuin a tanpui ta a; tichuan, police hmaah Robert Hansen lak ata tlanchhuak a nih thu a sawi ta mai le!!

Police hmaa Cindy sawi danah chuan Hansen hian $200′- pek a ‘oral sex’ hman puiah a sawm a; mahse a car a a lut chiah chu silai a tinin a in ah a hruai haw ta a; hetah hian a nghaisa a, a pawngsual bawk a ni. A duhtawk a ngah hnuah chuan a nghawng ah chain a hlingin banah a thlung a; chutah amah a chawlh hahdam te te hnu chuan a car bawkin Merill Field Airport ah a hruai leh a hetah hian a ni Cindy hian remchang a hmuh a a tlan chhuah tak ni.

Cindy sawi zel danin, Airport an thlen hian Hansen chuan Cindy hnenah Knik lui bul Matanuska Valley an tih hmuna a in te (cabin) ah hruai turin a in sawi a, he a hruai tumna hmun hi lawng te chi leh thlawhtheihna te chi chauh hmanga tlawh pawh theih a ni. Cindy chu car hnungah kutkawl bun chungin a thu a, Hansena’n a bungrua leh hmanrua ilo a thlawhtheina a a load lai chuan remchang hmuin a tlanchhuak ta thut mai a ni. 6th. Avenue an tih lamah chuan tlan thlain motor rawn tlan hmasa truck chu a lo phar ta tawp mai a; truck driver pawhin chutia nula tleirawl te pangai lo taka a hmu chu tanpui ngaiin a hria niang chu, a ding a; a theih ang angin a tanpui ta a. Cindy ngenna angin Mush Inn lam a pan pui a; an va thlen chuan Cindy chu zuang thla nghalin Mush Inn khualchhawntu chu a bialpa Big Timber Motel a thleng chu phone sak turin a ngen nghal bawk a. Hetih lai hian truck driver fel tak chuan thil dik lo a awm tih hriain chanchin kimchang a hriat theih ang ang chu Anchorage Police Dept.(APD) a lo hrilh ve vat vat a. APD Officer te chu che nghalin Mush Inn lam chu an va pan vat a; mahse nula chuan Big Timber Motel lam taxi a a pan tawh thu an lo hrilh a; tichuan, Motel lamah chuan an tlan phei leh ta a. Tichuan, Cindy chu Motel room no.110 ah kutkawl la bun reng chungin thlaphang takin an va hmu ta a ni.

Cindy chu APD headquarters lamah lak nghal a ni a; hetah hian a mi tawn misual pa hmelhmang leh pianzia te chu a puang ta a ni. Hansen chu police lam chuan an han la ta a; mahse, a tang na khawp mai!! Cindy chu puh letin sum tam zawk pek phut a; chutah ani’n a pek duh loh vanga hetianga buaina siamah hian a puh ta a; police lam pawh an rilru a buai hle a ni. Hansen hian man te lo tawk zeuh zeuh tawh mah se amah hi pa zawi awi tak, chhang urna dawr nei a mi nelawm ve pangai tak a lo nih mai bakah a thian pa John Henning chuan Hansen a thusawi dik a a lo tawmpui ve zel avang chuan rinhlelh berah neih harsa an ti ta hle a. A hmeichhia lah hi nawhchizuar a lo ni kher kher bawk nen, he case hian ngaih thu tak leh ngaih pawimawh a hlawh ta vak lo a ni.
Hetih lai hian Anchorage, Seward leh Matanuska-Susitna phai ruam vel vur in a khuh deuh chuk reng naah chuan ruang chhar a awm ta zeuh zeuh a, he mi chhuitu zinga mi Alaska State Trooper Det. Glenn Flothe pawh a buai hle a ni.

Ruang hmasa ber chu kum 1981 ah chhar a ni a, he ruang an chhar hi hmeichhe ruang a ni a; mahse, tu ruang nge? tih an hriat tawh loh avangin an ruang chharna hmun hming Eklutna Road hming puin Eklutna Annie tiin a hming pawh an phuah ta ringawt a. Hemi kum chawnhnu lamah hian ruang pahnihna chu Seward bulah chhar a ni leh a ani hi chu tunge a nih an hre thei a; a hming chu Joanna Messina a ni. Ruang chu chhar chhoh zel niin a then te chu ramsa ten a lo ei nasa tawh a! Kum 1982 ah kum 23 mi Sherry Morrow ruang chu pawnlang taka phumin Knik lui bulah hmuh leh a ni a hei pawh hi ramsa in a lo haichhuak a a lo ei nual tawh a ni.

Det. Glenn lu pawh a hai ta hle mai a; an ruang chhar te chu an chhui danah a thla a thla a kum a kum bo tawh te an ni zel mai a, hnu chhui ngaih na a vang bawk a ni ang FBI agent Roy Hazelwood puihna chu a ngen ta tawp mai a ni! Ani hian an ruang hmuh an exam na result hrang hrang an hliam tawrh dan, an thih pui ber, an thil bo leh a dangte atangin tualthattu rilru put hmang leh a mizia tur ‘MISUAL PROFILE’ chu heti hian a rawn duang chhuak ta a. He misual hi ramsa pel thiam tak mahse mahni inrintawkna tlachham tak, a tun hma nun a hmuhsit leh diriam tawk tawh, a bikin nula lama tla na lo tak a tla na lomai ni lo in nula hoin a an chhaih nawmnah leh endawng tawk tawh thin a nih a ring a, a thahte hriatreng na turin an tlereuh incheina te emaw chu ‘souvenior’ atan a dahthat a ring bawk a, dangdai deuh mai chu he misual pa hi dangawk a nih a ring tel mauh mai a ni!

He ‘Profile’ atang hian Det. Glenn chuan rinhlelhawm a han zawng ta char char a; a tawpah Hansen-a chu an profile fit berah a ngai ta tlat mai a; ani hian thlawhtheihna a lo nei kher kher bawk nen!

Tichuan, Cindy testimony leh Hazelwood-a misual profile a duan tangkawp chuan Det.Glenn leh APD te chuan Hansen-a In te, a thlawhtheihna te, a car te dap phalna ‘warrant’ chu an hmu ta hlauh mai a. 27 Oct,1983 a lo herchhuah meuh chuan hnuchhuitu te chuan hmeichhe tlereuh chi hrang hrang, silai a inchung a athuhruk te an hmuchhuak ta a, an hmuhchhuah tangkai ber chu ‘map’ chikhat thlawhtheihna khalh tuten an hman thin ‘x’ mark a chhinchhiahna awm teuh chu a ni.

Heng an hmuhchhuah te hmang hian Hansen-a chu dawp tan a ni ta a; a tirah chuan tan a khawh nasa hle mai a; mahse, a mah a in rin tawk loh na chu rawn lang chhuakin a buai tan ta a. A thah a te chu Cindy a puh let ang khan puh ve te a han tum kual leh vel a; mahse, amah dawp tute an theuneu lo bawk a a tawpa tawp ah chuan a in puang ta nge nge a ni.

Robert Hansen hian Alaska hmeichhia 30 chuang zet pawngsual a rikrapah puh a ni a; heng zingah hian a tlem berah 17 chu that ngaih a ni. A map a a mark na atang hian ruang a dahna hmun 17 chu a mah ngei hian a kawh hmuh a; heng zinga 12 phei chu hnuchhuitute hian an hre lo hrim hrim a ni. Mark tam tak la awm mah se Hansen hian a hriat tawh loh thu in a chhang a, ruang 11 chu phawrhin an chhungte hnenah pek let an ni.

Tichuan Robert Christian Hansen chu thiam loh chan tir niin kum 461 tang tura a chungthu rel a ni a ‘parole’ a chhuah pawh phal miah loh a ni. Tunah hian a mah hi la dam in Spring Creek Correctional Center, Seward Alaska ah a la tang a ni.

He pa chanchin behchhan hian movie leh serial film tam tak siam tawh a ni a; a tharlam ber chu tun kum 2013 a tih chhuah Nicholas Cage, John Cusack leh Vanessa Hudgens te channa THE FROZEN GROUND hi a ni.

Similar Posts:

Recent Posts:

13 Responses to “The Alaskan serial killer”

  1. 1
    shailendra Says:

    Ngaihnawm dawn ve. Mahse ka chhiar hman rih tlat lo mai

    Report this comment

  2. 2
    badboy Says:

    comment ila ngaihnawm reuh phian tukchhuah nuam vek u (B)

    Report this comment

  3. 3
    badboy Says:

    First khat mahnak alai a.. first dawn maw tia khilai naupang zit zet khi ava dangnal reuh ve mawle :-P

    Report this comment

  4. 4
    shailendra Says:

    huhuiiii… Phawi tlai ve ziah :-P

    Report this comment

  5. 5
    badboy Says:

    THE FROZEN GROUND enteh ang hman bawk a :-D

    Report this comment

  6. 6
    Awmtea Leo Khiangte Says:

    Chhiar tan dawn ang.

    Report this comment

  7. 7
    sheldon Says:

    A piangsual ve chiang hle mai. Hetiang a sual uchuak ho hi chu mob rule hmanna chi mawle.

    Report this comment

  8. 8
    chhana hlawnchhing Says:

    Dangdai hle mai a a chetdan chu

    Report this comment

  9. 9
    bbney Says:

    A va ngaihnawm em. Lie to Me serial-ah khan he pa chanchin behchhan deuh hian episode pakhat kha chu an siam tawhin ka hria. Rinhlelh a nih hmaa mi 30 vel pawngsuala rikrap thei chu a rapthlak khawp mai.

    FBI agent khian engtin nge dangawk lampang tih khi a chhuichhuah ang le. :-S

    Report this comment

  10. 10
    ZerO Says:

    Ka chhiar chhuak a, ziak ngaihnawm hle mai. (Y)

    Report this comment

  11. 11
    buh-duha Says:

    I ziak ngaihnawm thiam hle mai…A dang pawh han ziak zel teh..

    Report this comment

  12. 12
    Fingber a Says:

    kum 2 vel hnu ah ka ron login ve khang lan chu le… . a hmuhnawm dawn phian hi… (nawi a chakom reau mai a)

    Report this comment

  13. 13
    SHauzelSailo Says:

    A thahte chu an thih hma in an va khawngaihthlak in an va thlabar doin tak em.

    Report this comment

Leave a Reply

You must be logged in to post a comment.