mi(sual).com

Uluk taka ka inngaihtuah hnuin hetiang deuh hi a lo ni zo ta a ni.

1. Lawhleng: Hei hi Mizoram hmar tawp lam, 54 degree east longitude leh 37°N latitude ngaihruat rinte intantlangna lai tak sawntlung pang vei lama vate fù sawina a ni. He vate hi pitte nge chipte a nih hriat tuma tan la Mizo hnam heti zozai zingah hian kan la awm lo a ni. Chuvangin hriat a ni lo.  A tobul: Run leh Tiau inkara kan pi leh pute chen laia hnamchawm tlangval zing daikalin lamhnai vau sira a hmuh chhuah a ni. He a thil hmuhchhuah avang hian an khaw lal chuan inthiam lo angreng takin eng vak a ti lo.

2. Sawngkawn: He thumal hi a hmel en thuak aia a un loh avangin he thufiahbu-ah hian a lan ve khap tlat a ni.

3. Bakvawmtepu: He thil hi kum 1990 chho, aih ka tih sual, kum 2011 kum laihawl chho, Tuirial vau lehlam (khawi lai atanga tehin nge tih chu kan hre theuh awm e. A hre lo tan 8-na khu en mai tur, a nih loh pawhin chhiar kan mai tur. Chu mi lehzel pawh peih lote tan chuan by-heart mai tur) herhse (10-na khu en rawh) kunga zawngtah zar deng sâwp vek khawpa têk a tlak laia misual.com tlawh thangte’n Lawrkhawm.com-a tawnsabawpa an tawn a ni. A awmzia chu, in english, to act against one’s wishes due to the involuntary palpitations on the brow caused by unattended husbands who occupy a central place in the administrative and juridic sections of the Municipal Corporation of Aizawl, Aizawl(Aizawl) tihna a ni.

Kan naupan laia ka zir ka la by heart reng a ni. A awmzia tak chu he dictionary siamtu kei meuh pawh hian ka hre hlei law. Nang mi naran mai mai chuan i va han hre bik awm hlei lo e ka ti thin. Ve mai mai an’a. Eng teh chiam chu ni lo mah ila.  A tobul: Mizo tawng hlui ‘bakvawmtepu’ tih atang simsialna kal tlanga lak a ni.

4. Simsialna: Hei hi zirna sanga an zirlai(subject) pakhat ‘TAWNGZIA’  an tiha thumal tangkai ber a ni. A aia tangkai dang reng a awm thei lo. A awmzia chu: thumal (ent., zawngdaikalh) pakhat atanga a awmze milpui loh pui (ent. sunhlu) kaih pèna rawt dip sawina a ni. Thu mal tobul chhui nan a tangkai bik. ‘simsialna kal tlanga la’ tih hi a tam hle. A tobul: Mifing tuemawina simsialna kal tlang veka ‘sim’ tih leh ‘card’ tih atanga a chher chawp a ni. Chu vang chiah chuan a ni, ‘simsialna=sim card/dual sim’ kan tih ni. Warning: Mi felfai, fekfawn leh kohhran mi dang zawng zawng tan hman loh a him zawk.

5. Van chang rila van chang kuai: He tawngkauchheh awmzia hi sawi peih lo viau mah ila sawi a ngai si a ni. Thlarau thianghlim indungbawh zara nau thianghlim piangte’n Pialral an panna kawng dung, Hringlang Tlang piah mual phei hriang thing zara lelte leh vahmim thlahpawlh rannung chi khat ‘chengkek’ tia thenkhatina an koh, thenkhatina ‘ngawihup’ an tih bawk lo hram dan tur a ni. He rannung hi thenkhat te chuan ‘changrual’ ti te, ‘lenhmui’ ti te pawhin an ko bawk. Kei erawh chuan ringtu nun tha lam zawha a THU THIANGHLIM rin tlat ka duh avangin chinrang tih zawh ruala dawntliang tia ka koh loh chuan ka lairil a kam tlat thin.

A lam dan: International Phonetics Alphabet hman kher hi Mizo leh Mizo karah chuan a ngai ka ti lo va kei misual hian. Chuvangin a thuin ka rawn sawi mai ang e. Van tih hi ‘van dumpawl’ kan tiha ‘van’ ni lo, ‘a va’n chhe lo reuh e!’ kan tiha ‘va’n’ rik ang hian lam tur a ni a. A dang chu lam dan pangngaia lam tur a ni deuh mai: a danglamna awm chhun chu ‘chang’ tih lam ruala hnap tihpuar tur. A tobul: Kei chu ka hre rin ran.

6. Inchemhar: ‘In’, ‘chem’ leh ‘har’ hi piangthar lo chuan ziahzawm ve loh tur. ‘Vei lama pumpelh tum ran rana ding lama thingtuai sat thut’ tihna a hi. A tobul: Luang ro thli chhem nghin rik dan atanga lak a nih hmel. Mahsé ka confi bik chiah lo. Exam-na -a a lo chhuah palhin hmuh loh der tur.

7. Paipàwn: Mi rin loh ang deuhva chaw tlang keng chunga computer khawih sawina.

8. Hnam sakhua: ‘Pialral ram mawi’ tih hla Lallianmawia Pachuau sak, John Lennon-a muhil thei lo  phuahah khan he thumal un tak mai hi kan hmu hmasa ber a ni. Enlightenment Philosophe an tihho zinga thawhhlawk bera an ngaih, William Hnamsakhuason hming chawia he hla hi phuah a ni. ‘Waiting for Godot’ tih a ziah lai khan Samuel Beckett-a khan ‘Muse’ ang deuh rohvin a hmang. A Hero a ni. A awmzia ni ta bera lang chu hei hi a ni. Philosopher rual zinga hetiang han sawi chu nuam fahran lo mah se ka han sawi dawn ang e. Takah ka peih leh lo. A buaithlak mai mai.

9. Tanakha: Khawvel hrehawm tih changa lang kuka inkhuh bo daihna dawi hlo. A tobul: Awi khawvel hi ka tan a kha lua e! tih hi khawchhak lungleng lamin han lam la, serfang han pum-dawlh thut la i hre thiam mai ang.

He dixionari-a leng ve lo thu un dang te: phingchil, rùrà, khuailai chi, hahum, tih zawng hi a leng ve ta lo a ni.

Similar Posts:

• Mizo ṭawng.. (kan hnam ṭawng!)
• I ni ve em?
• Martaw-Ka-Baw
• Zahmawh sawi hi sual a ni em?
• Mizo puanropui leh puanchei

Recent Posts:

• NUN THÂMRAL
• President Trump ka hmuhdan (amah thlawptu lam atangin)
• YMA LIBRARY ENKAWLTU TEN SEMINAR & TRANING KAN NEI
• February 2017, Mizo(ram) Diary
• misual.com tih tawp a ni dawn?

This entry was posted on Sunday, July 3rd, 2011 at 8:00 pm and is filed under Information. You can follow any responses to this entry through the RSS 2.0 feed. You can leave a response, or trackback from your own site.