mi(sual).com

Thu hma

India khua leh tui tana ni pawimawh tak – August ni 15 kan lo thleng leh ta reng mai!  Mizote tan chuan Zalen Pawl leh Mizo Union chanchin chhui leh sawi pawh a nuam zawk viau ang le. Mahse vawiin ni hlutak hi kan nunkhawchhuah theina tura tha leh zung lo sengtute hre reng chungin hun hlimawm tak hmang turin ka duhsakna ka hlan a che.

Mi hriatreng tlakte chu

British-in min awpbehna lak ata talchhuak turin Bengol hoin rilru leh ngaihdan thar an nei hmasa ber a. Chu chuan tanrual duhna thinlung India mipuite hnenah a thawk ta.  Kum 1987 khan Meerut atangin zalenna India chuan a sual tan a. He Indian Sepoy Mutiny  hi chhan hran hran avanga lo chhuak  ni mah se India’s First war of Independence Day tih a ni kumkhua tawh dawn a ni.  Mangal Pandey leh Tantia Topete huaisen zia leh thih hlau miah lova  theihtawp chhuahna thinlung(spirit) kha tunlai khawvel kal zelah pawh hian  entawn tur an va ni chiang em! Tin, ka sawi mek Revolt of 1857-a India nula- Rani of Jhansi turu zia kha sawi hmaih phal chi a ni lo bawk ang. Kha hun pawimawh tak mai kha tuna kan nun khawsak theihna a ni si a.

Revolt of 1857 a zo a. India mitte thinlungah inunauna thlipui nasa takin a thleh chho a. Mi tha tak tak-  Robin Dranath Tagore , Auro Bindo Ghosh, Maulana Abul Kalam Azad, Gopal Krishna Gokhale, Moti Lal Nehru, Subhas Chandra Bose, Sardar Patel, Aravinda Ghosh  ,Dr. Annie Besant , Allamah Iqbal .Dr. Bhimrao Ambedkar ,Bhagat Singh ,Bal Gangadhar Tilak , Bhulabhai Desai ,Bankim Chandra Chatterjee, Chakravarty Rajagopalachari , Chandra Sekhar Azad , Jawaharlal Nehru , J.B. Kripalani , Khan Abdul, Lala Lajpat Rai , Mahadeo Govind Ranade , Purushottam Das Tandon , Rajendra Prasad , Ram Manohar Lohia , Rash Behari Bose ,Sarojini Naidu ,Surendranath Banerjea , Dr. Sarvepalli Radhakrishnan, Dr. Zakir Husain leh mi dang tamtak an lo lang chho ta.

Pu Gandhi pawh a lo lang

South Africa lama Civil Rights nasa taka a buaipui hnuin ama ram ngeiah kum 1915 khan a lo chhuak chho ve a. A thuziak leh thuiltihte avangin India lama Zalenna sual mektute chuan beisei sang tak nen Bombay lawngchawlh hmunah an lo hmuak a. Zawimuangin mipuite rilru zalenna sual kawngah a khalh ngil deuh deuh a. Mipa chauh nilo hmeichhiate pawn ram tan a aia nasa zawkin  zalenna duh avangin an theihna a sawmkhawm ve ta. Non- Cooperation Movement leh Salt Satyagraha te phei chuan nasa takin British dinhmun a ti derthawng a. India dinhmun a siam tha hle a ni.

Kan dinhmun a tha zel

Kum 1939 khan indopui-2 a lo chhuak leh ta hlauh mai. He hun hi remchanga lain kan hruaitute khan nasa takin an nawr leh zel a. British chuan India puihna a mamawh hle a; mahse Gandhi leh midangte chuan Zalenna an pek dawn loh chuan an pui duh hlek lo mai. Nazi hoin ram lak tuma mi a do chu Britishin a duh lo ang bawkin India chuan a duh lo a ni tih chu an tan chhan tlat a. Indopui lai chuan Europe leh South East Asia lamah India mi British Sipaite chu  British lamah an tang tha duh lo hle a.

September 7th 1940 khan Nazi ho chuan London an bomb ta chiam mai a. He campaign- The Blitz an tih mai hian  a kum leh  May thla thleng a awh a. London mai ni lovin hmundang- Birmingham, Liverpool, Southampton, Manchester, Bristol, Belfast, Cardiff, Clydebank, Kingston Hull leh  Coventry te kha German ho khan an bomb a ni. Hemi avang hian British chu a zam a zal tan ta a. A ram awpbehte puihna a mamawh nasa leh zual ta sauh mai le.  Kum 1942 March thla khan British chuan  Stafford Cripps hmangin India nen inbiakna dawhkan an kil ta. Mahse he Cripps Missionah hian India chuan zalenna puitling a neih theih dawn loh avangin pawl pahnihte hi an hmin lo ve ve a ni.

Quit India Movement chu

July 14, 1942 khan Indian National Congress chuan Resolution thar an tichhuak leh ta. He resolutionah hian  India chuan Zalenna puitling (full independence) a beisei ta tlat mai. British-in a tihhlawhtlin theih dawn loh chuan Civil Obedience Movement thlak an tum leh ta. Indo buai lai a ni bawk si, British chu a lu a hai viau mai. Gandhi chu an man ta a, Aga Khan Palace, Pune ah sawn an khung ta hmak mai. Indian National Congress hruaitute pawh an man a, Ahmednagar Fort an khung khawm ve hmiah bawk.  Hemi avang hian Britsih chuan India mi 100,000 an man a, tharum thawhna khawi emaw lai laiah a thleng nual bawk a ni.

Engtin zel?

Hruaitute inbe pawp thei tawh lo mah se  India mite thinlungah chuan zalenna duh avangin inunauna, impumkhatna leh British rorel duhlohna lam chu a a nghet deuh deuh a.  Red Fort-a Indian National Army  tanglai mi pathum - Colonel Prem Sahgal, Colonel Gurubaksh Singh Dhillon leh Major General Shah Nawaz Khante sipai dan anga an chunngthu relna thuchhuak chuan India mipui thinlungah British duhlohna  nasa takin a tuh leh zel a.  Royal India Navy chuan lungawi lohna an lantir ve  ta.  Bristish India Army zinga India mi  Sipai hel an pung tulh tulh mai. Civil mi an chak tulh tulh mai bawk si. British Sorkar chuan Indian National Army leh British Army Officerte chungchang an thurel chu sut lehin a chhuah zalen ta.

Zalen kan ni ta

British awmhmun chu a nghet lo tulh tulh a. Khawvel ramdangte’n inawpbehna an duh loh avangin British chuan tantu a nei ta lem lo bawk  a. Hetiang a nih avang hian an ram pawh ni lem lo awpbeh reng chu chhuahsan an tum chho ta. Kum 1947 kumtir khan Labour Party chuan India tan zalenna an pek tur thu an puang ta dum mai le! Viceroy ni lai Louis Mountbatten chu India hnenah thuneihna hlan turin thu an pe ta a. Mahse vanduaithlak takin zalenna kan hmuh kum hian abik takin Hindu leh Muslimte inhmuh thiam lohna avangin buaina duhawm lo tak kan nei a ni( India phel a nih chungchang hi ka ziak chak zawng a ni lem lo nangin ka lo tarlang zuai a ni).

15^th August, 1947 khan zalenna hlu tak chu kan lo nei ta a ni.

Lawm tur a va ni em!

He ni hlutak hi khua leh tui tha tan chuan ni pawimawh tak a ni. India ram pumpuiah ropui tak leh hlim takin he ni hi lawm a ni thin a. President hian 14th August zan dar 7-ah ram chhung mipuite hnenah thu a sawi thin a. AIR leh Doordharshan atangin an puang zar thin a ni. Sikul kan kal ve lai chuan, Hostelah ka hovin President Speech hi a ngaihthlakna  hun programme hlimawm tak kan siam a, kan ngaithla thin.  Khang hunte pawh kha a ngaihawm thar khawp mai! A lawmna pui ber hi Delhiah neih a ni thin a. India Prime Ministerin Red Fort-ah India Flag a pawh pharh hnuah thu a sawi thin. Tin, District capital leh State capitalah pawh hman a ni thin bawk. Sikula naupang leh Sipaiin hnam puanzar chibai an buk leh dawn a ni. Mizoramah chuan a lawmna pui ber chu AR Lammualah neih a ni ang.

He ni hlu takah hian kan tana nun hlantute leh kan nunkhaw nawm nana tha leh zung sengtute ngaihtuah let ila; thinglung thianghlim leh ngaihtuahna tha tak tak keimahniah siamtharin awm mawlh rawh se!

Note: Independence Day lawmna atan Pu Nehru thusawi ropui lutuk – ‘Tryst With Destiny ‘ hi  tawite han ngaithla ila 

Similar Posts:

• Ramdang Sipai
• Independence nge Independent kan mamawh?
• Sapram (UK) Sipai a tan ve i duh em?
• Happy Republic Day
• ANZAC Day

Recent Posts:

• MIZORAM SUM LEH PAI DINHMUN IN HMA A SAWN NASA
• ZoRO Press Release
• MIZO KRISTIAN MARTAR THENKHAT TE
• BEIDAWNG SUH
• Bawihpuia kha

This entry was posted on Monday, August 15th, 2011 at 8:48 am and is filed under Event. You can follow any responses to this entry through the RSS 2.0 feed. You can leave a response, or trackback from your own site.