mi(sual).com

Rawngbawlna puitham ni lemlo han phawrh ve sek te hi inthlahrunawm hle mahse, mi tih loh dan a ni bik lemlo a, thenkhat  tan alo ngaihnawmin fuihna tha tak te  alo ni ve hial thei bawk si. US, Japan, Singapore etc vel karah, hmun kilkhawr chanchin han phawrh leh zauh te pawh hi a tha ve tho awm e.

Kum 11 lai a lo liam ta reng mai …. thamral tir mai atan chuan a ui-awm ve tho law’maw ni le !

Discipleship Training karkhat kan neih chhunga, ngawi reng leh ngun taka Chhandamna chanchin Tha  lo ngaithla ve kiau a, kum 1999, October ni 9 a, mi 7 Pokhara a baptisma changte zinga pathum chu, an khua Lapa (Nepal hmar lam, bus-a ni khat kal hnu a, ni thum ke a kal leh ngai) a an haw phei hnu khan, an khua, Buddhist sakhaw betu ruh tak takte zingah chuan, an thil hmuh leh hriat te sawi lovin an awm thei ta lo a, Chanchin Tha, Chhandamtu Lal Isua chanchin an puang chhuak ta a. Nasa takin Pathianin a hmang a, mite thinlung chu alo tui zo ta.

La-pa khua a rawngbawlna nei tura hian an mahni baptistu ngei chu min rawn chah tak hial bakah, min rawn lam tur hiala anlo kal tak avang in, Kum 2000, April ni 3 zingah La-pa khaw lam panin kan pen chhuak ta hlawl mai a.

Lapa khuaa lo han kal hmasa te’n, “ Kal duh duh su, a hahthlak bakah, Buddhist ho khua a nia, Kristian sakhua hi an duhlo khawp a nia, keini pawh, Kristian kan ni tih an hriat in, kan haw tur min rawn um a min vau nasa, ‘Kan khua hi, kan pi leh pu te atangin  Buddhist sakhaw be khua kan ni a, nang ni Pathian thusawi tur leh, mite Kristiana siam tur a inlo kal leh vaih chuan, nung damin in haw tawh lovang, in chungah engpawh thleng se, mawh kan phur lovang’ min ti hial a..” tiin a hlauhawm thu an sawi uar hle a. Mahse chu tak chuan kal a ti chak-awm zawmah a, (TT 21:13-14).

Chhuah dawn tukah chuan, kan inchung zawla thingpui in a kan lo ti ti mek lai chuan, nidang a rawn dikdak ngai hlei lo, Parva var hlak hi alo tum a, muangchangin min han thlek ngial a. “Bak..bak.. bur” ti a hram in mi a han thlawhkual nual a. Duhsakna leh malsawmna thu rawn sawi ve ngial pawh a ang hle. Ka thian hruai ve tum (Tibetan thlah) Phurbu chuan, “..a mak hle mai..blessing min rawn pe a nih kha..” a ti hial a. Tichuan muangchangin a thlawk bo leh ta a.

Pokhara atang hian Bus in dar 10 velah kan chhuak a, tlai dar 2:30 ah Malekhu kan thleng a, Bus atanga chhukin, rei vaklo kan nghah hnu-ah, Dhading Besi Busah chuangin, Trisuli lui an kan a, tlai dar 3:15 Dhading Distric khawpui, Dhading Besi an tih chu kan lut phei ta a. He khua Kristian thingpui dawr siamte hnen ah lut pheiin, kan han chawl a, thingpui te an in a, Lapa khaw pilril a haw tur an nih avangin min rawn lam tu Tamang te chuan an khaw lam a hawn tur mamawh leh chakkhai te an lam khawm ve a.

Trisuli lui

Han riah nghal nan em chuan ala hma deuh avangin, kan thlen chin chin khua a riah mai tumin kan chhuak leh ta a. Hanging bridge (Lui chunga lei inkhai) pakhat sei ve tak kan kan hnu-ah tlang chhip pawh chho turin tlang lam hawiin kan lawn chho ta zel a.

Dhading Besi khua tak hi zawl a awm a ni a, mahse tlang in a hual vel vek ve tho a, a chheh vel khaw-per te hi awih tlan a awm an nih ve avangin Mizoram nen pawh a in ang hle.

Tlangchhip kan han lawn chhuak a, motor kawng laih mek kan han pawh chho a, in thum/ li vel chauh awmna Skul Dhara electric pawh awmlohna khua kan thlen chuan, khuain min thim hnan tak deuh mai avang chuan kawngsira in te reuh te pakhat, hotel ve deuh ah chuan mi pakhat tan Nepali Rs 10 chawiin kan riak ta a. Tlangchhip a nih avangin a vawt phian leh nghal a.

Skul Dhara khua

A tuk zingah chuan thingpuite kan in zawh chuan kalzel zai kan rel leh ta a. Kawngpui dung tlem kan zawh hnu-ah kawngpui pensanin, feh kawng ang reng deuh, mahse, khualzin ke a kalte tan a short-cut chu kan zawh ta a. A mual alo pharh nuam chho ta, a zal deuh bawk nen Far-thing awmna thulhna hmun kan han lut chho phei chu a hmun a nuam hle.

Lui dung pawh thla turin, zawi zawiin, kan chhuk thla leh ta zel a, a then lai chu a chhuk ulh ve hle, lum mai pawh hlauhawm ve tak a ni. Mahse lui thlenthlak dawn hnaih hmun thenkhat chu alo zal nuam leh ta deuh a. Leilet han paltlang te chu a nuam ve hle, buh pawh alo hmin par eng chiai a.

Chhuk bir tak tak kan pal tlang thlak hnu-in, lui kam kawng chu alo zal deuh a. Ni a sat tak em avangin, kawngsir dawrte ah chuan kan chawl ta a. Cold drinks te kan in a, kan harh deuh sawng sawng a. Kal zai an rel leh ta a.

Luidung zawh bakah hahchawlhna tur khua alo awm ve leh zauh thin.

Tlai dar thum vel a lo ri ta…khua pawh a tlai lam ve ta deuh a. khaw pakhat Darkha khua kan lut chho ta a. Kawngsir maiah dawr te alo awm a, kawt zawl tlem a nei a, chu zawlah chuan veivakte tan hahchawlhna thuthleng te an lo dah ve a. In tur awm chhun Cold drinks te in in kan hah chawl leh ta a. (Zing lama kawngpui laih mek an pensan tak kha, he Darkha khua rawn pawh tura an laih mek a ni). Reivaklo ah chuan kal zai kan rel leh ta a.

Darkha khua

Jharlang khua

Luidung zawh ah lui then khat kan kan nual hnu-in, tlai lamah chuan, Jharlang khua kan lut ta a, ala hma deuh avangin, chawl lovin kan pal tlang ta zawk a. Ramhnuai kawngah chuan kan kal zel a, khua pawh alo tlai ta-in, alo thim hnai ta. Reivaklo hnu-ah chuan a thim zui chu a ni ta mai a. Zan arsi eng ruai hnuaia rei vaklo kan kal leh hnu chuan, thingtlang khual zin te riahna ve ber in te pakhat kawngsirah alo awm a, bati anlo chhi eng teng teng a. Kawngsir mai a ni a, kan han lut a, a reh thiap avang chuan, mikhual an neilo emaw ka ti hman tawh a, mahse kan han thut fel hnu chuan, bati eng teng tengah chuan, mikhual ngawi renga thu an lo khat fu mai a, an bal khak dum deuh bawk nen, thimtham deuh rohah chuan hmuh nghal mai anlo harsa deuh a ni. Kan bag te hawng-in Bible tracts te chu a awm zawng kan han sem a. Revolving tape, (Electrict awmlohna a hman tur, kut a tuai vir mai chi, battery ngailo) ka han phawrh a, Tamang tawng sermon chu ka han play ta a, tuaivir chak leh a speed a rang a ni mai a, a rei deuh chuam ban te a kham ve duh hle. In tuaivir chhawk chi a ni a, kan nau Tamang tlangval pahnih chu ka play tir ta a, mikhual dangte pawh chuan an ngaithla ve thap a.

Chaw te an an eifel hnu chuan (In chu a chhawng a nih ve avang in), a neitupain chuan a chunglamah chuan inchung lawnna thing tlawn tun rahna tura tlem a reh ve deuhah chuan min chhoh pui ta a. In chungah pawh chuan mi panga vel chu ngawi rengin an lo mu tawh a, keini pawh chu kan mu ve ta a.

Tlai lamah Himalaya tlang hmingthang te zinga pakhat, Ganesh Himal a lo lang ve riai a.

A tuk zing kan han chhuak leh chu, taksa a lo rawl ve thim them a, Tamang min hruaitu chuan, artui hel a rawn la a, min hip tir a, tichuan, zawi zawi in kan kal leh ta a. Reivaklo-ah chuan, lei min nasa tak hmun kan va thleng a, lei chu a lo char deuh tawh na in, kawng pang ngai alo hnawl fai duak a, ral leh lam kawng pawh tur a, harsa tak leh kikawi tak a ko pang vuan phei chunga in ham kai phei a ngai a, a hlauh awm ve hle. Ruam lah a thuk phian leh nghal a.

Ni leng a kan kal leh hnu chuan tlai lamah chuan khaw nuam ve deuh hlek, ruam thuk tak tak pang a awm kan thleng ta a. Lapa thlen hma a khua a awm tawhloh avangin leh Lapa khua chu a la hlat tham deuh avang, Burang khua a riah a, a tuk chhun en a hahdam deuh hlek a, Lapa khaw thlen chu a tha zawk in kan hria a, la thim lo mahse riah hmun kan sual ta zawk a.

Burang khua

A tuk zing chaw ei khamah kan chhuak leh ta a, lui zu pawh hma chu chhuk hlir a ni tawh a. A kham a sangin tluksual palh pawh a hlauhawm thin hle.

Hmun thenkhat chu a kham ve hle

Tichuan lui kan zuk thleng a, lei pakhat kan kan hnuah, kawng alo in then a, pakhat chuan tlang lam a pan chho a, kei ni kal zelna tur erawh chu, lei pakhat zawh hnu-ah chho ulh deuh mai zawh chhoh a ngai ta a.

Tichuan zawi zawiin, step ah kan lawnkai chho a, kawng chu alo zal ta hret hret a, khaw kawt chhuah kan chuangkai ta hlawl a. Naupang ho hian min lo hmuak ve deuh a niang lung chungah anlo bawr taih a, min lo Namaste ve thap a.

Tichuan, kawng laka zan 3 kan riah hnu-in, Pokhara kan chhuahsan atang a, a ni 4 na, kum 2000, April ni 6, (Ni lai thawhtan) ah chuan, Hlapa khua chu kan lut ta a ni.

This entry was posted on Sunday, August 21st, 2011 at 6:00 pm and is filed under Religion. Both comments and pings are currently closed.