B.Lalhlimpuia, Zobawk ruang hmuh a ni

August 22nd, 2011 6:50 pm by rra

22//8/2011: July ni 26 chawhnu tlai dar 2:00 vela Mat luia tla B. Lalhlimpuia (22) S/o Lalbeiseia Zobawk Vengthar ruang nia hriat chu vawiin chhun khan Mualthuam South Kai-ah a ruang hmuh a ni. Tarlan tawh thin angin, B. Lalhlimpuia ruang hi Mizo dana ni 7 chhung zet zawn a nih hnuah a ruang hmuh zawh a nih tak loh avangin August ni 4 khan a vuina inkhawm an chenna inah hman a ni a, Rev. J. Chalhlira Zobawk Pastor bialtu chuan vuiin, hemi hnu hian Zobawk Vengchhak thlanmualah a kuang ruak hi phum a ni tawh a ni.

B. Lalhlimpuia ruang nia hriat hi Mualthuam South-a Pu Hlunzauva Mat kama lo nei chuan a rim hriain an zawng a, ruang hi an hmu ta niin kan thudawnna chuan a sawi a, a ruang hi a chhe tawh hle a ni.

Vawiin tlai hian B. Lalhlimpuia ruang hi Rotlang East panpui nghal niin, Zobawk khawtlang hruaitu VC leh Joit YMA te tangkawp chuan lirthei nen ruang la tur hian Rotlang East hi an pan nghal a, Zobawk Vanglaiah B. Lalhlimpuia ruang hi Joint YMA member ten puandum nen lo hmuakin an chenna in labuhpui a ni ang a, hemi hnu hian zanin la laah thlanmualah vuiliam nghal a ni dawn niin kan thudawnna chuan a sawi.

13 Responses to “B.Lalhlimpuia, Zobawk ruang hmuh a ni”

1
Empy Says:
August 22nd, 2011 at 6:57 pm
2
Ozima Says:
August 22nd, 2011 at 6:58 pm
Chhiat tawk ka tuarpui rualin; ruang an hmu leh chu ka lawm pui bawk.
3
Zephyruss Says:
August 22nd, 2011 at 6:58 pm
Chhungte tan pawh ngaih atha deuh ang chu..
4
ninja Says:
August 22nd, 2011 at 6:58 pm
fb lamah ka lo hmu tawh a, a pawiin a va lawmawm em!
5
mr.Duhlova Says:
August 22nd, 2011 at 7:18 pm
Va lainat awm ve aw..engtia che sual nge ni ang le? Kuang ruak phumnaah chuan an phum tha leh mai dawn nge le?
6
chhana Says:
August 22nd, 2011 at 7:56 pm
A lawmawm. A nupui thar kha ka lainat khawp mai.
7
Marcos Says:
August 22nd, 2011 at 8:04 pm
Rip
8
Malawma Says:
August 22nd, 2011 at 8:13 pm
RIP
9
ruata Says:
August 22nd, 2011 at 8:37 pm
BREAKING NEWS : August 22 News : Vawiin tlai dar 5 leh dar 6 inkar vel khan Rangvamual Pu Buakchhunga huan thlang kawrah Thangzapauva kum 48 mi ruang chhar a ni a, hetihlai vel bawk hian Rangvamual thlenhma tawngtaina kawi thlang bawlhhlawh paihna ah mipa ruang tunge a nih la hriat loh chu chhar a ni bawk.

Thudawnna danin Thangzapauva hi Manipur Chekawn khawchhuak a ni a, nupui nei tawhin fa pawh pakhat an nei a, a nupuiin a uire san avangin nupui dang a nei duh tawh lova, a rem remah a teikual ta mai mai niin a sawi. Hun engemaw chen khawchhungah pawh awm lovin ramhnuaiah a awma, theihai sen lai vel khan theihai lawh tuma a lawn chu a tla palha a ban leh khel te a sawh nat avangin chethei lovin a awm ta a, Rangvamual YMA President Pu R Lallianchama chuan a inah la lutin a enkawl dam a, a dam hnu hian thlakhat vel liam ta atang khan Pu Chama te in hi a chhuah sana ramhnuaiah bawk a khawsa leh ta niin thu dawnna chuan a sawi bawk.

Vawiin tlai dar 5 vel khan mi thenkhatin Pu Biakchhunga huan thlang kawr kamah hian thil uih rim an hria a, Rangvamual tlangval thenkhatin an zuk enchian chuan ruang chhe tawh tak hi an zuk hmu ta mai a ni. A thawmhnaw hak atangin Thangzapauva a ni tih a hriat theih a a vun leh tisa a filh nasa tawh hle. Thangzapauva ruang hi Rangvamual YMA hall-ah tunah hian dah a ni a, zaninah an phum nghal rin a nih thu YMA President Pu Chama chuan min hrilh.

Ruang pakhat zawk hi tunge a nih hriat a la ni lova, he chanchin buatsaih lai hian ruang lak chhuah tumin Police leh tlawmngai engemawzatin an buaipui mek bawk.

Source : Vanneihthanga Vanchhawng (LPS news reporter)
10
sisen Says:
August 22nd, 2011 at 8:59 pm
Ruang chhar ava tam ve aw…
11
Lersia Says:
August 22nd, 2011 at 9:03 pm
A bengvar thlak hlemai a… a khawngahthlak ka ti hle bawk…
12
No Comment Says:
August 22nd, 2011 at 10:47 pm
No Comment.
13
LR_rengsi Says:
August 23rd, 2011 at 12:22 am
A chhungte tan ava lungchhiatthlak dawn em…ka tuarpui hle mai..Pathian in awmpui mawlh rawh se.