( Pending leh Scheduled Box en-in thuziak publish tur kan chatlak dawnin a lang tlat mai. Mi-te ang a ziak mi ni lo mah ila, Misual tan a thahnem ngaihna avang chauhin kei Misual Junior hi kan puak chhuak leh phawng mai teh ang. A zawnin ni li ka post na tur a ni ta a, ka inthlahrung deuh. Mahse, kei thuziak ngai lo hian article 4 ka neih phah ve ta der mai. Chu chu ka tan hian a hlu a, ka lawmman-ah ka ngai. Sr. member-te hi fak an phu hle-in ka hria. Chutih rualin Jr. member-te hian chhawk I tum ve deuh teh ang u. Mi post a ‘No Comment’ lo ti ve ringawt zel lo hian.)
Hna hrang hrang thawktute hian eng ang rilru pu-in nge kan hna theuh hi kan thawh hlawm le? Kan hna theuhah hian ‘Hlawhtlinna’ kan tih hi khawi atangin nge kan teh? Thil hlutna hi Sum hmangin kan teh nasa ta viau mai a. Sum tam tak hai lut thei-te hi hnathawktu hlawhtling chu an ni ngei mai. Mahse, mahni hna thawh phu lohva sum hai lut thin-te avangin ram leh mipui kan rum thin a ni bawk si a. Chuvangin, sum hai luh zat atang ringawt hi chuan hnathawktu hlawhtling leh hlawhtling lo teh chi a ni awm love.
Sorkar hnathawk an nuar fo thin, Group ‘D’ a tanga gazetted officer thlengin, zirtirtu-te pawh. Hlawh tam zawk ngiat leh level pui phak loh vangte a ni fo. An thawh dan en erawh chuan an dinhmun hi a tha tawk viau lo’m ni? tih tur an ni lawi si. Chutiang zelin, dawrkai fel tak tak an awm laiin thenkhat erawh chu hlep tam ringawt tum, a lova luakchhuak a bungraw rate chhiar sang leh customer-te tana biak hupurhawm tak tak an awm fo bawk. Inhlawhfa ho zingah pawh hian tha tak tak an awm laiin, an mahni chhawrtute tan a chhawr nahawm loh fe fe, ngeng ngalh mai an kat nuk bawk a.
Mizo te ngat phei chu chhawr nuam lo kan ti leh zual a nih hi. Kohhran a kan rawngbawltute chungchang lah mi thenkhatte tan ti ti tui bera neih tham an lo ni rawl nen. Kan rawngbawltute hi an insum thei a, a sawiseltute hi min kawk let duh lo mai thin pawh a. Hetiang teh nuai kan nihna chhan hi eng vang nge ni ang le? tih hi ka phak ang tawk tawkin ka ngaihtuah ve fo thin a. A chhan ni ta ber a ka hmuh chu hei hi a ni – Kan hnathawh tum ram leh a thawktute tum ram hi a lo in ang lo thin em a ni.
Eng hna pawh hian tum ram fel tak a nei vek mai a. Politics tum ram chu ram leh hnam tih hmasawn a ni a. Sorkar hna tum ram chu mipui te rawngbawl sak a ni a. Zirtir hna tum ram chu mi puitling ni tura zirlaite buatsaih a ni. Dawrkai, sumdawngte tum ram chu an inhralhna atanga hlep hmu tur a customer hip khawm a ni a. Nitin kut hnathawka inhlawhte tum ram pawh hlawh hmu tura an mahni chhawrtute lungawina khawp hna thawh sak a lo ni leh a. Kohhran a rawngbawl hna tum ram chu Pathian ram din zel leh mi thlarau nun chawm leh enkawl a ni bawk.
Eng hna pawh thawk ila, kan hnathawh tum ram thleng tur chuan inpekna (dedication) hi a pawimawh ber pakhat chu a ni phawt mai a. Hnathawktuten hetiang teh nuai a kan hna kan thawhna chhan pakhat pawh hi kan hna tum ram thleng tura inpekna kan neih tawk loh vang niin a lang. Amaherawhchu, he inpekna hi chuti ngawta neih theih mai a ni lo. Tur-tu dik (genuine motivator) a awm a ngai thin.
Politician chu ram hmangaihna-in a tur (motivate) vangin Politics ah a zuang lut tur a ni ang, sum leh thuneihna um vang ni lovin. Chutiang zelin hna dang thawktute pawh hi ‘genuinely motivated’ an nih a ngai. Chutiang mi chuan sum tam tak la lut kher lo mahse an hlawh an lungkham ber ngai lova. Ngawrh takin an hna chu thawkin, rim hle thin mahse an nuar ve ngai lova, an thawh tur reng thawk-ah an in ngai mai thin. “The Miller of the Dee” ang kha an ni ber ang chu. An lungawina chu an hna-ah khan a awm a, chu chu an thawh theih chuan thahnem ngai takin an thawk mawlh mawlh mai a ni.
A buaithlak ta ber thin chu, hna hrang hrang thawktu tam takte hi chutiang mi (genuinely motivated) kan lo ni kher lo thin hi a ni. Kan tum ram leh kan hnathawh tum ram pawh a lo hrang daih thin. Chuvangin, mit tlung taka hna thawk leh teh tling zo kan inhmu mang lova. “Zawngin a ngum khak a hmu lova” tih ang deuhin kan in kawk kual a, kan in ngaisang lo tawn vel mai mai ni hian ka hre thin.
Heng zawng zawnga ka tarlan duh chu hei hi a ni: Hna vawn lai nei mek te hian an hnathawh tum ram tin zawn a an thawh a pawimawh a. Tuna zirlai leh hna zawng mek-te hian chhungril lam a tur-tu an neih ang zelin, an tuina zawng tur tak, hna, thawk tura an inbuatsaih a tul hle bawk a ni. Chutiang a nih chuan, inpekna in a rawn zui ang a, hlimna leh chan tawk a lungawina neiin mahni hna theuh hi thahnemngai takin kan thawk thei dawn a lo ni. Mahse, he khawvel ram zau-ah hian, hnathawktu-te hi hetiang tak hi kan ni theuh thei ang em le? tih erawh chu ngaihtuah tham niin ka hre bawk si.
August 27th, 2011 at 9:08 am
firstgie paws a nih avang ringawt pawhin ka chhiar chhuak ang!
August 27th, 2011 at 9:10 am
(Y)
August 27th, 2011 at 9:15 am
Tur tu an awm chuan a nuam ngai a nia, tur tu a that chuan arsi lak pawh kan huam thin a ni lawm ni? Gud post…
August 27th, 2011 at 9:33 am
No Comment.
August 27th, 2011 at 9:43 am
Sum to sum. SIPMIU
August 27th, 2011 at 9:50 am
ka inthlahrung deuh comment lo mai te’ng 🙂
August 27th, 2011 at 9:52 am
A ngaihnom mai piah lamah value system te poh a khoih tel vek ang hei hian, han ziak zel teh a……… (Y) (Y)
August 27th, 2011 at 9:56 am
I ziakmi khawp alawm le (Y)
Hna kan thawk rau rau anih chuan khami hna kha theih tawpa inpezo leh tha theih ang tur berin kan thawh kan tum mai tur a ni. Kan peihlo anih chuan phun nawilo vin kan bang mai turah ka ngai.
Hlawh pun chungchang pawh ka ngaihdan hi midang ngaihdan ani vak thinlo. Ka ngaihdan chuan hlawhpun te hi dillo vin kan hotu ten a hun an tihah chuan kan phu tawk an tih angin min pun mai turah ka ngai. Dil chhuah hlawh pun nih ai chuan hlawh punsak tlaka min hmuh avanga min pun sak khan ka lawm zawk ang.
August 27th, 2011 at 10:21 am
A first para intro khian min ko! Thu ziak mi tha tak2 in lo tam hle mai ka fin phah toh teh e misual ho vang hiam 😀 ngal fimin dam reng teh misual.com
August 27th, 2011 at 11:04 am
Kei zawng comment lamah ka lo ramtang rih ang e. (H)
August 27th, 2011 at 11:23 am
(Y) good post
August 27th, 2011 at 12:27 pm
thu hmahruai khi kei poh ka ngaihdan chiah, senior te chhawk ve zeuh2 hi kan tih tur awm reng a ni, buai tak ve tho in an awm a, awmhmun a post tha deuh lo chan ringawt hi i sim ang u, :p
good post
August 27th, 2011 at 12:36 pm
Amen pek mai tlak khawp a tha alawm le. (Y)
Mitin hian kan hna hi rinawm tak leh taima takin, post tu sawi ang khian kan hnain a tum ram hre ranin han thawk theuh ila chu, mi ramah chuan kan ti kur dup bik hauh lovang mawle.
August 27th, 2011 at 2:58 pm
Ngaihtuahna i seng nasa hle tih a hriat theih a, a ropui ve hrim hrim. I han sawi tak ang khian mahni hna theuhah hian lungawi hlawm ula chuan a tha tur. “In lung a awi chuang silova, In hnathawh lai theuh hi bansan ula, tuna in hlawh zat ang hlawh tur hian midang kan chhawr mai ang e” tiin sawrkar hian Order tichhuak sela tumah in bang leh ngam awm chuang silova. Ni e, “Hna leh a Tum Ram” ngaihtuah miah lova hlawh hmuh nan hrim hrim a hnathawk in tam ber ka ring e.
August 27th, 2011 at 5:11 pm
ziak thra khp mai..
August 27th, 2011 at 9:37 pm
Thanks to all Comment-petu zz-te.
# 7 malsta hian ka thu ziak mawng pawp lai min rawn bel sak zauh mai.
August 27th, 2011 at 9:54 pm
Goal hrechiangte hì, an hlawhtling thin. Post tha e.
August 27th, 2011 at 10:46 pm
Thuziak tha tak anih hi. Chhiar a manhla khawp mai.
Junior chungchang bikah chuan, Junior leh Senior ti pawhin kan inthen lem loh hi maw le. Kei pawh ka la Junior ve khawp mai, misual ah hian.
August 27th, 2011 at 11:20 pm
Hlawhtlinna hi kan tum kan neihnaah a innghat a, hlimna chu kan neiha kan lungawinaah a innghat. Mi fing lo apiangin lungawina(complacency) an nei tam a; hma an sawn lem hlei law. Nun hian target a neih loh chuan a zik a ngui a, a vuai mai thin a, target a ngah lutuk chuan hlawhtling chuang si lovin a kerkaw dem thin(Jack of all trade but master of none).
Hnaah reng reng principle/vision neih a tul a-a hlawhtlinna turin commitment & conviction a pawimawh ber. Mi chet vel dan thlir hian an ke chheh rual pen ve phet kan tum a, kan veikhawr mai mai-kan hmaa eng kan hun kha en tlat mai ila kan buai lo a ni mai.
Mahni hna ngaipawimawh lova thil dang dah pawimawh chiam chiamte hian thil dang pawh kha an lo dah pawimawh tak tak hran lo-an theuleu a ni ber. Tui zawng hre lo khawpa mi hawklak hi an awm ve chawk a-tuina ngah lutuk hian an hlawhtlinpui tur loh ber kha an umzui thui duh khawp mai.
Hnaah i rinawm ang u.