mi(sual).com

Vawikhat chu thlan kan laih na-ah hian pa pakhat fiamthu thiam tak, sawitur hre tak hian thil eng engemaw hi a sawi a, kan hlimpui dar dar hle mai a. Chuta a sawi pakhat ka la hriatreng chu, “Nupui te zingtho tur hi an pawnfen hmawrah hian han pawt ila anlo thu hniam leh ruai ruai a, chutah lehlam hawi pahin rizaiin han inkhuh leh daih ila, “hmmm….Leh si a.” an ti a an tho tau nghawng nghawng a, naupang sikul kal reh hma loh hi chu min be tha duh mang reng renglo zu nia mawle” a tih chu le, a dik nge diklo tih phei chu ka hre lem hlei law.

Ni e, ‘Leh si a’ tih tawngkam hi chu a chhe zawng anih hi chuan a runthlak hle thin hian ka hria. Thil eng emaw kan duhloh leh tumloh dana a lo awm hlauh hi chuan vui hmuipu tak hian, ‘Leh si a’ tiin kan lunghnur hle thin in ka hre bawk. Mahse thil tha lam leh lawmawm lam anih hlauh thung erawh chuan Hnapkhawn pachang hmu an sawi ang maia nuih vur vur a awl ka ring leh bawk a.

Tumkhat pawh ka thianpa hian a bialnu rim puiah min sawm a. Chhun lama an lo sawi lawk vek a nih avangin lo awm ngei turah ngaiin phur takin kan kal a. kan nula rim tur-I u fate naupang eitur hmawmsawm eng ilo sweet, wai wai, chocolate leh puitling ei tur kuhva hring nikhat tla lai tur hi kan pawipawn bawk a. kalkawnah te chuan “Nuam zawng zawng an nei vek ang” ti niawm takin kan hlim phei nasa mai a.

Chutah an in kan thleng ta a, kawngkapui sir dinglama ‘Bell’ tih intarna chunga hmeh kheuh chu ka thianpa chuan a han hmet a, chuveleh inchhung lamah chuan engemaw ni hi a chiau hlut a, a reh fel hmain nutling rawl tih hriat fahran mai hian, “Lo lut rawh u” a han ti a.

Chuveleh ka thiana chuan,”Het sala, a mah chu a ni lo tawp” tih melh a min melh pah hian a lu a thing nar nar mai a. engpawhnise kan hmet chiau laklawh tawh si a, a changtunu a awm emaw awmlo emaw kan luh chu a ngai ta hrim hrim a, rilru nuam zan lo chuan kan inzui lut ta a.

An chhungkua chuan chanchinthar enin TV an lo hmachhawn thap mai a, nula chu an awm a, mahse ‘amah’ chu a ni ta tlat lo mai. Ka thiana chuan,”Khawnge Mapuii a awm na nge?” tiin a han zawt ta phawng mai a. A nu chuan,”A thiannuin naute a nei a, enturin a va kal lawk a nih kha, a rei lovang, lo thu rawh u” a lo ti a. Ka thianpa lah chu bawngpatuai hel ang mai hian a ding tlat mai a. “A…. engteh vak a nil ova kan committee turin kan rawn tlawh kawi lawk mai mai a nia, kan kal leh zawk mai ang, kan ban hma leh kan la rawn lut leh zawk mai ang” tih pahin a inher vut a, a kal ta nghal a, kan inzui chhuak leh ta nge nge a. 🙁

Kalkawngah chuan ngawi rengin hlam thum vel kan kal ta tihah kawngsira Coca cola bur ruak chu feet engemawzata awmhmun sawn tur hian, “Leh si a” tih pahin a han chhuih leng vawn vawn mai chu(h) a lung hi a awi mawlh lo a ni. Chutah a rawn tawng chhuak leh a,”Ka neih chhun chhunin thil ka lei ve tun tun a, keimahnin kan ei zo vek ang” tih pahin naupang lawm tura kan lei wai wail eh sweet leh thil dang te kha a phawrh a, kal pah chuan kan ei ta mial mial a. Tlangvala pumpa kal pah a wai wai han ei rik rep rep mai chu a zahthlak lek lek zawk a ni, nuih a za duh bawk si, nuih ngam na chi lah a ni der bawk silo. Mahse thinrim hrik thlak nan kan thial tau nghawng nghawng mai a, kan ei zova a dang kan ei zel a, kan ken zawng zawng chu kan ei zo vek a, thenawm nuthlawi inah kan leng ta zawk a.

Ka thianpa pakhat pawh a naupan ar sualhuai lawm kha ‘Pa’ a nih hnu pawhin a sim thei lova, vawi khat pawh a ar huai ber khan a cho loh val a tawng ta hlauh mai a, a tlawm hi a ngai em em mai a. Ar sualhuai zawng in veng kilkhawr deuh deuhvah a in khalh chhuak tuktin ta mai a. A vanneih a siamin veng pakhat a ar sualhuai bera an sawi chu a neitute ui chung chung a dil thlu thei ta hram a. Phur tak main a ar lei haw chuan tlai lama a sual tir na hmun a kal turin min rawn sawm tur thu a rawn sawi a.

Tichuan tlai ah chuan mi rawn sawm ta ngei mai a, sual tir na tur hmun kan thlen chuan an lo insual tir laih laih hlawm tawh a. Ka thianpa chuan a arpa chu leiah an tum thlak tir chhak a, a arpa lah chu lei a thlen rualin a’n khuang al al mai bawk a. Darkar chanve hnuah chaun kan insualtir ve ta a. Engemaw chen an insual hnu chuan ka thianpa arpa chu huai tak mai hian a tlanchhe ta tlat mai le, a va man a, a han insualtir leh pawh chuan a sualpuipain vawi 2/3 vel a lim leh pawp chuan a tlan chhe leh mai thin a, a tlawm chu a ni ta der mai.

Ka thianpa thinrim chuan, “Leh si a” a ti a, a ar chu a man lawk a, kan tlan haw leh ta viah viah mai a. Kalkawng ah chuan a tawng tlem kher mai, a tlem pawh ni lovin a tawng lo a ni ber. An in kan han thleng a, an bath-room lam chu a pan ding nghal nal nal a, a va ri thak thak a, a hnu ah chuan ar thi tur chalchang tih hriat tak hian thawm a awm zui bawk a. Chutah ka thianpa chuan,”Tlaiah chaw ei nghal ang che” min han ti nghal tawng mai a, bath-roomah enge a tih chu ka hre chiang ta nghal mai a. Chu chu a lawm ka sawi fo ’ Leh si a’ tih hi a va thinrim thlak kher em ve le.

Amaherawhchu hetiang runthlak leh thinrimthlak hi nimahse a tha lamah vet hung chuan a lawmawmin a va lungawithlak duh leh si thin em!! Tumkhat chu “Ka duati” te in a leng tura Zirtawpni tlai atang a in puahchah tawh chu Sunday chawhnu inkhawm kal zawh vek tawh hnuah chuan keimah chauhin an in lam pan chuan ka kal thauh thauh mai a, Sunday chawhnu a inkhawm dawnlo tih chu Inrinni zana ka hriat lawksa a nih avangin phur takin ka pen thauh thauh a. Kalkawnga mi ka tawh te hnenah chuan, “In tan hmun siamin ka kal dawn hi” tih tak mai te ka nap a, mahse ngawi rengin ka kal pel ta zawk a, an in ka thlen a an gate ka hawn rik rual chuan an ui buk chhir chher, a neitute ta niawmlo taka hmel chhia, mit la kalh zui chuan mi lo bauh khar khar a.

Ka duat-i chauh a awm ka rinlaiin verandah ah chuan api, upa ve tawh tak chu a lo thu khiau mai le. Chu pitar chu tawng tlemlo tak, mi hauh kawngah chuan inthlahrunna nei tlem tak, huat loh tur nei tlem tak, leh ngainat zawng nei tlem tak bawk hi a nia. Amaherawhchu a tute ho leh tlema hmu zing ho chuan a mizia chu kan hre deuh fur tawh a, ‘A tar a ve deuh tawh anih hi’ kan ti mai a. Mahse a duhna ah chuan a fing fu roh si a. Tichuan, “Ka pi, nangmah chauhin elaw I awm a, khawnge Mami?” ka han ti a. Ani chuan,”Kei leh ui chiah hi inah ka nawm, midang chu an inkhawm vek, an inkhawm pawh an rei ang” a han ti tawng mai a. La hre ngai lo tan chuan haw leh vang vang na chi hi a ni a.

Mahse kei chuan ka hriat than tawh a vangin ti duhdah ni si lova fiam ka chak vet lat avangin ka la ding reng a.”Chu, ka pi nang leh ui chauh chu in vengtu leh nghaktu ah an dah che u a ni maw?” ka han ti chu, “Ka ke a na a ka inkhawm lo mai mai a nih hi, ui pawh hi tawng thei se chuan a inkhawm ve mai thei, engahnge nang dam sen lul si I inkhawm loh?” tiin min zawt let ta khauh mai a.”A…ka pi ka inkhawm pheikhawk a chhia a ka inkhawm ta lo mai a ni; ka ti a. Chutia ka biak khawtlai nachhan pawh inchhung lam a awm an awm leh awmloh ka hriat duh vang a ni deuh ber a, mahse thawm a reh em avang chuan midang an awmlo tak tak anih dawn hi ka ti a, ka thin chu a rim tan dawn ta mai a.

“A nih, ka pi ka kal leh mai ang e” ka’n ti a. “Kal tawh, inkhawm loh chuan mahni in a awm tur” a’n ti zui leh hram a. A thutna chawpa han chhuih lirh tawp mai hi ka chak khawp mai a. Chutia haw leh tum a ka inher lai tak chuan ka aw hriat than em em, en lo pawh a ka hriat chian chuan, “Hey, haw i va tum leh hma si ve, lo kal rawh, lo lut rawh” tih ri ka hre ta a.

Chutah thinrim chu chawp leh chilhin lawmnain a rawn thlakin, “Leh si a” ka ti a, rangtakin ka vir zawk a hmanhmawh takin inchhung lam chu varandah a ui leh pitar awm pawh en lo chuan ka pan ta a. “Engatinge i lo chhuah vat loh?” ka ti a. “Ka pi nen in ti ti ka ngaithla chak a” tih pahin a nui har har a. Thildang ka sawi leh hma chuan,”Lokal rawh ka room lamah ka lehkhabu ka remfel a, min lo pui rawh” a’n ti zui a. Kei chuan, “I pi a lo kal anga….” Ka’n tih chuan, “Ka pi chu kaihloh chuan a kal theilo, a ke a ti ulh a” a ti a. Midang awm heklo le a room lamah chuan kan inzui phei ta a, lehkhabu kan rem that a nge rem that a lo tih tun thleng hian ka hrechiang thei ta lo.Ngaihtuahzui peih te tan ni tawh mai rawh se. Chuvangchu a nia, “Leh si a” hih a tha lamah chuan a lawmawmin ava hlimawm tak em! Ka tih nachhan ni…..

Vawikhat pawh kan tehnawm pitar hi a damlova a na hle maia, a thaw leh a marphu chauh hi an en tawh a. Engemaw chen hnuah chuan a thaw leh a mar chu a awm ta lo nge nge a. Chutih lai tak chuan thenawm pa pakhat inti bengvar tak mai hian Biakinah kalin dar (mitthi dar) chu a lo han vua a. Mahse chu pitar chu a hnu rei vakloah chuan rawn thaw lehin a mar te chu a rawn awm leh reuh sia, a dar vaw zo lo haw leh chu, “Pitar kha a thi leh lo, a thaw te, a mar te a awm leh tawh” tiin an lo hrilh a. A ni chuan, “Leh si a” a thih leh pawn ka vaw tawh reng reng loving, a thih dawn a ruaia mi han tih zah khanglang chu le, a thi tak tak a nih pawn dar aiah khuang vaw tawh zawk ang” a ti ta niawm asin maw le.

A tawp berah chuan he tawngkam tawite, ”LEH SI A” hian lung a tiawiin min tihlim a. Kawng lehlamah erawhchuan a lung chhiatthlakin a huatthlalaawm em em a, thin a tirim bawk a. Amaherawhchu , “He kan khualzinna khawvel hi zawng famkimlohna khawvel a ni miau si a”, tih hi ka awm khawhar changin kei misual hian ka ngaihtuah ta mai mai a. Midang hriat atana ziah tur em chuan a HO ka ti a, mahse ka ziak leh ta lawi bawk si, “LEH SI A”. 😛

This entry was posted on Saturday, August 27th, 2011 at 6:13 am and is filed under Luangliam. Both comments and pings are currently closed.