Furpui a kiang fel tawh a, Zan lamah Van a thiang tha kuk tawh a, Thla eng pawh a mawi bikin, Arsi te pawh Van dapin an pe iar tawh a. Zing nichhuak leh tlai nitla a noin a mawi em em mai a, Chhun nisa pawhin zahngaihna a lantir tan meuh chuan, ‘Vangpui rim a nam tan’ tih hai rual a ni ta lo.
Kan Pi leh Pute nghahhlelh, Zoram a hun nuam lai ber leh, a boruak rawn inher chhuak ngawt pawh Lunglenna tham; Vangpui (Thal Favang) kan lo chuangkai leh ta reng mai. Mi pangai nih ve si chuan, Vangpui boruak rim a rawn nam tan leh hian, Pan lai nun leh vanglai hunte, a thlir kir loh theih bik thin lohva, Rilru mitthlaah fiah tak maiin a rawn lang leh chuai chuai a. Vanglai ngaiin Vala Lung a leng a ni.
Favang laia Rawlthar leh Tlangval, Pa valai deuh leh Nula thenkhat lehkha zir tawhlo te, Nu tlawngawl deuh leh Nuthlawite thlengin an nghahhlelh thin leh nuam an tih thin pakhat chu, He Favang hun chhung a, “Nghafuan ven” hi a ni.
Nghafuan ven hi thangtharte tan chuan, a hriat loh theih mai awm mang e, ka ti deuh a. Luipui a Sangha (Nghalim anni deuh ber) Kezungpui tiat vel leh Kutphah aia sei deuh, uk deuh khek khawk sang tam rual kha Luipuiah tui (lay eggs) ngam lovin, Luipui fintu luite, ngalrek thleng lek lekah tui tumin an rawn inhawrkhawm a, Luiteah an fuan khawm thin a ni. Chumi hun chang chuan Luite atanga mei eng lang phak lo deuh leh thawm bengchheng hriat phak lohna chinah buk khuarin an veng ta thin a ni.
Pawl 5 ka zir kum kum 10 emaw lek ka nih lai atangin ka veng ve tan a, ka veng fuan ve zeuh zeuh a ni. Nu leh Pa tam tak ten riahchilhin an veng thin a, keini zirlaite erawh chu; Tlai dar 3 banah kalin, a fuan loh chuan, a tuk zing khawvar veleh kan haw leh thin a, Chhunah Sikul kan thulh phah chuang ngai lo a ni.
Pawl 6 ka zir kum hian; tlai dar 3 kan ban veleh, ka classmate kei aia kum 2 zet a upa, Tlangval hreve tawh tak hian, “Nizanah khan Thangdai (Tuichang fintu luite) ah Sangha tlem azawng an kai hman a, Mahse, Rulin a lo chang a, an kir leh a, hetiang hi chu, Upaten, “A zan lehah a fuan ngei ngei thin” an ti a, hawh I kal ve ang hmiang” tiin min sawm a, A beisei awm bawk a, ka “Aw” rang kher mai.
Kan insiam sawk sawk a, kan kal ta vang vang a. chhuk hlir a ni bawk a, darkar 1 vel lekah kan thleng thla ta mai a. Changel buk kan han sual ve thuai thuai a, zanriah buatsaihin kan buai ve chak chak a.
Nghafuan veng lo awmsa an lo tam lo hle mai a, 10 vel emaw chauh an ni. (A fuan tum chuan mi kan tlem hian a vanneihthlak lutuk thin). Zanriah eikham veleh chuan, Valupain keini thalai (Rawltha)r 2 chu Val Upa pakhat leh Tlangval dang 1 nen Sangha a fuan leh fuan loh en turin min tir ta a.
Zan thimah meichher chhiin kan va kal ta a ni. Ka thianpa chuan a meichher ken nen chuan a han bih dak dak a, a te ta hlut mai le. “E… an kai tan e. Mahse, khu pui, Rulin a kaiah tak mai a lo chang leh khuau mai” a ti ta chul a. Chutah Kan Valupa chuan thingbung a keng a, a zuk chhuk a, Rul chu a zuk vawhlum a, Luikamah chuan a rawn khaichhuak ta zar zar mai a.
Rul chu a puar hle mai a, a kaah Sangha 1 a la hmuam mek bawk a ni.
Kan Valupa leh ka thianpa te chuan a pum chu an han zut an han zut a, Sangha a lo dawlh tawh 3 zet mai an zut chhuak ta mai a. Tichuan, Ka thianpa nen chuan Chu chanchin Lawmawm tak chu, Buk lo nghaktute hrilh tur chuan min tir ta a.
Valupa fel tak Kaihhruaina hnuaia awm anni bawk a, Chhun lamah Meichher tur Mau ro an lo la khawm sa diam a, kan chhi a, a bang kan pu bawk a, kan phei ta a ni. Kha Chanchin Lawmawm kan hrilh laia, Buknghak a lo awm, Nu leh Pa ho lawm lutuk hmel kha ka mitthlaah a la cham reng mai.
“Chanchin Lawmawm thlentute ke chu ava mawi em” tih ziak ang khan. Tichuan leh, Luitea Sangha chho zut zut chu kan thlir reng a, ‘An kai kim ta maw’ tih velah chuan, Mau phelsep hmanga a danna tur an lo tah lawk diam chuan, Lui chu an han dang ta hmak mai a, Len pakhatin an tuam bawk a, chu chu mi 2 in an lo vil ta a, Sanghate chu “Bel chhunga Sa” ang mai anni ta.
Khar an pin fel veleh chuan;Luite kuang zim taka Sangha tlingkhawm tun mai chu kan kut lawng ngei mai chuan kan han man ta anih kha. Nu leh Nula 4 vel awmvete khan nuam anva ti teh lul em!! An te chul mai a ni. Ipte khat kan ruh apiangin Vaukama Changelhnah phahah khan kan chhungkhawm zel a, a tlingkhawm tam chak kher mai.
Khar viltute mawlh mai kha an buai mai! Sangha hlau tawlhthla zut zut kha an tang zel si a, an chhar mawlh mawlh ringawt mai a ni. Kan man rem deuh hnuah chuan, a kuang bang la awmte chu, Lenden thiamin Lenin an han khuh leh thuak thuak a, kan duhtawk ta a ni.
Sangha chu Buk Lamah kan la phei ta a, a hlimawm tak zet mai. Buk kawtah Changelhnah chungah kan chhung vum ta thur mai a, a hmuhnawm duh hle mai. Valupa khan Sangha vumthur atang khan, beltein vawi 3 vel a han suak a, chu chu nuho khan an chhum ta a ni. Tichuan Chaw leh Sa nghah chhungin, Sangha chu kan Insem ta a. Belte bawk khan Valupa khan a han sem ta a, a hlimawm tak zet mai.
Sangha kan insem zawh chuan, Nu leh Nula ho khan Chawei an han siam a, Khami tuma ka Sangha ei aia tui kha ka la ei leh ta ngai lovin ka inhria; A va han tui tak em… Ka ei theih tawk ka ei ringawt mai a ni. Tichuan, Meichher kan siamtha a, a zan a zanin khawlam a hawn zai kan rel ta a. Kan thian dunin hma kan hruai a, Valupain hnung a rawn dawl a, Buk ho chu a meichher chuan a hal alh ta hluah mai a, a engah thui fe chu a kal theih a ni.
Ka kalpuiho kha, Kan khaw chhimlam a vengkhat ami vek anni si a, min tawp san ta dial a, zanlai reh tak maiah, keimahin km 1 dawnlai ka kal angai ta si a, Ka meichher lah a ralna a rei tawh si. Nimin piah lawk a, Nu pakhat thite in zawn vel ka thlen lai chuan, ka la naupang bawk a, ka hlau ru kher mai.
Ka chhak a, Theihai leh Laui(Lamkhuang) buk thim khup mai leh, thliin a chhem rik sung sung te chu, a rap awm lek lek a ni. Hlau teh mah ila, engmah phei chu ka hmuin ka tawk ta lem hlei lova, thim teh mahse, kan veng chhung ani tawh a, Upa ten, “Tlangval ke chu a eng” anlo tih thin angin, In chu ka thleng ve ta mai a.
Ka Nu leh Pa an rawn tho a, Ka Pa hi Sangha Veng fuan thei miah lo ani a, a lawm thiam hle. Tin, a tam vaklo amaw ka tih laiin, kan han bun chhuak chu, tam anti kher mai. Kg 10 dawn lai chu a ni awm e. Ka Pain a then a chhum a, a then a rep nghal a, phur tak a ni. Kei erawhchu, ka chau bawk a, insil pawh insil fai lem lovin, tui takin ka muhil ta bawrh bawrh a.
Nghafuan ven chungchang a hriattur leh Puithuna thenkhat:
1) A chunga ka sawi ang khian Sangha kai tir Rulin a hnawh kir chuan, “A zan lehah a fuan leh ngei ngei thin”, an ti
2) Sangha fuanna tur Luite kha, Raipuarin chhun lamah a lo kan chuan, “Sangha a fuan thei ngailo” an ti.
3) Nula Tlangval Chhun lamah emaw, zan tir lamah emaw an lo chetsual chuan, “Fuan khalh” anti a, “Sangha a fuan thei lo”, an ti.
4) Sangha a fuan dawn chuan, Tlai lamah Lipuiah Sangha an inperh pap pap hmuh tur a awm thin.
5) Sanghate hi Luitea an fuan theih loh/ngam loh chuan, Suarah an Fuan thin a, Khar pin a har avangin, ruh kim an har thin khawp mai.
6) Luite apiang a fuan hmasa thin a, Luipui/lian apiang a fuan hnuhnung/tlai thin. entirnan, Hnahchang, a dawtah Mat, chuan Tuichang, a tawp berah Tuipui. chutiang zelin.
Khai le, In duh dan danin han Comment teh u le.” Nghafuan ven hi Tur leh Bomb tel miahlo ani a, a tha khawp alawm”, kan ti nge?, “Sangha an rem chak Lutuk ang asin, Tihtawp daih chi a ni” kan ti le. Tunlaiah hian an la veng ngai em? Kan zingah Nghafuan veng tawh emaw, Rut tawh emaw kan awm em? I han sawi ho teh ang u le.
September 2nd, 2011 at 3:33 pm
raipuarin a kan chuana fuan ngai lo ha ha. ka awih chiah lo 🙁
September 2nd, 2011 at 3:40 pm
“Aryan an hma a rawn hruai hi chuan Comment a fuan tha duh bik” an ti.
September 2nd, 2011 at 3:50 pm
Bomb leh tur/Ru hmanglo vin Nghafuan ven ngawt hi chuan an lo rem mai biklo anih hmel. Khawvel hmun hrang2 ah hian an veng ve tho mai. Lui lam anih chuan nuam hi ka ti em em thei zel mai, tuifinriat erawh a al em mai ka ngaina theilo hairehai 😛
Chhimtuipuiah sawn February thla hian a fuan tlat bik. “Lungmak” Zoram Genesis pawhin a thlalak a neih bul tiau phoah buk 100 bawr vel neiin an veng thin. Chutih hunah chuan zu zuar nen, KS nen an awm kim thin hle hairehai 😛
Khasi nghafuan venna ka kal kha mak kala ti ber. An lo kir leh lam an lo man ni khan ka hria. A chho nawr lam an chhuah tlat.
September 2nd, 2011 at 3:50 pm
Nghafuan ven hi ka la hmu ve miah lo va, ka hmuh ve chhun chu Zonet a Nghafuan ven an rawn tih lan kha a ni mai. Chu lah a ven a ven tak tak a ni lehnghal. A lawmawm hle mai Nghafuan ven chanchin i rawn Post a.
September 2nd, 2011 at 3:52 pm
Keini Tui chhung a cheng-ho hi chuan atam thei ang ber a inthlahpun hi kan duh a, chumi avanga Fuan thin chu kan ni. Min lo man rem zel te chuan kan inthlahpung chak thei nang ! Sim ula a tha ang.
September 2nd, 2011 at 3:52 pm
#3 Chhimtuipuia nghafuan ka sawi khi Nghavâng anni tlangpui (ka hmuh chin).
September 2nd, 2011 at 3:52 pm
naupangte ni mahila…nuam ka ti ve thin khawp mai…ngawi rawn dawh leh teh .post tupa…
September 2nd, 2011 at 3:54 pm
PKFanai, Chhim lam chhuak ini maw? 🙂
September 2nd, 2011 at 3:55 pm
lol……a nih hmel…ka ti.
September 2nd, 2011 at 3:56 pm
A fuanna tura puanfen/pawnfen sûk hian a fuan duh lo an ti bawk.
Ka vêng fuan ve tawh, a nuam khawp. Tin, in vênna atanga a hnâr lam ah (Chhak deuh fêah) khan suarah thiante nên a fuan tur hre lâwk lovin kan dai darh tawh bawk.
September 2nd, 2011 at 3:57 pm
Nia, Pu Hv. A tlangpui thuin, an kai kim kan nghah chhung leh, kan ruh chhung hian an lo tui fel ve deuh vek hman thin a, kha kha an keu hnuah Luipui lamah an chhuk leh mai thin a, an rem phah lovin keipawhin ka hria. Hnahchang, Tiau, Darzo Lui tih vel hi September thla tawp lamah an fuan tanin ka hria a, Mat leh Tuichang hi October ah Tuipui hi chu December atang a February thla thleng pawh chu a ni hial mai thei. I hriatna ami chu,Fuankhalh an tam duh hmel. A fuan theih ka ring lo ve, Khawilai suarah emaw an fuan daih ka ring.
September 2nd, 2011 at 3:58 pm
Tel ve ava chakawm ve…!
Sangha tui tur, an tui hmaa lo man zawh chuan sangha chu an rem duh ngawt lo maw? Khasi ho tihdan anga an tui zawh hnua lo man chu a finthlak viau maithei a ni…ka rin dan in….
September 2nd, 2011 at 4:07 pm
PKfanai, Chhim chhuak i nih ka rinna chhan chu i thuziakah khian Lamkhuang tih khi bracket chhunga i dah vang mai mai mawle.
Chhimtuipui hi January leh February hi kan kal hun a ni thin. Rafting expedition hian Chhimtuipui hi vawi 1988 atang khan vawi engemaw zat ka kal ve tawh thin. Chutih lai chuan ka sawi Lungmak bul suar vela fuan leh Lawngtlai lang thei thuak suar chhete, keini hoin “Khup lang suar” kan tih fiamthu bulah buk sa meuhin an veng thin a ni.
“Khup lang suar” kan tih chhan hi suar bul tiauah buk kan sual a. Khami tuk khan tiau vaivut (Balu) ah khan khup (knee) thla khuar duk a awm a hairehai, chuta tanga kan phuah uan mai2 chu ania. Zanghmi suar thlang deuhah khan a ni e.
September 2nd, 2011 at 4:14 pm
3. “an kai” ka tih khi, “a chho lam” i tih nen khian thil thuhmun a niin ka hria.Luitea an chhoh(kai) kim kan nghak thin. @6.Nghavang fuan chu a tlai daih, kumthar lamah a ni thin. @7.A remchang hmasaah,Ngawi rawn dawh chu ka tum ang e.@8.Nang chuan ka Lui sawi atang khian ka pian leh seilenna khua chu i hre nghal mai thei ang.I Trade mark, “hairehai” pawh hi Chhimtuipui dung i hrutna vel atang a i chhar anih ka lo ring thin a. Nge, Nangma chinchhuah zaw? 10. Upate hian,Hmeichhe lo inrawlh ve tur hi an ‘discourage’ thiam khawp mai tiraw.
September 2nd, 2011 at 4:14 pm
Nghafuan let lam/haw lam lo man chu a tih chi daih zawk ang chu…. Pu HV
AN tui hmaa lo vai vek te chuan anrem chak dawn emai, uihom.
Nghafuan vengah hian Hmeichhia an tel ngailo emaw ka tia!!!
3) Nula Tlangval Chhun lamah emaw, zan tir lamah emaw an lo chetsual chuan, “Fuan khalh” anti a, “Sangha a fuan thei lo”, an ti. [Heihi A Thra tops 😛 ]
September 2nd, 2011 at 4:31 pm
ka veng ve toh…mahse a fuanlo tum a ni thin tlangpui
September 2nd, 2011 at 4:32 pm
pu HV a hi thuziak i thiam khop mai.. a chhiar anuam thei lutuk..
September 2nd, 2011 at 4:36 pm
ka lung a tihlen khawp mai a..
September 2nd, 2011 at 4:37 pm
ka veng ve toh…mahse a fuanloh tum a ni thin tlangpui
September 2nd, 2011 at 5:00 pm
Pu Rk@ chu i va han ziak thiam mai2 em..lung loh loh te pawh i ti leng dawn alawm mawle,lui lam chanchhin hi chuan ka lung min len riau thrin.. (Y)
September 2nd, 2011 at 5:32 pm
A ven chu sawi loh, a hmuh pawh ka la hmu lo ve 😛
Mautheia an rawn zawrh erawh ka hmu fo .. a tui ka ti hle bawk.
” Nghafuan ven hi Tur leh Bomb tel miahlo ani a, a tha khawp alawm”, kan ti nge?, “Sangha an rem chak Lutuk ang asin, Tihtawp daih chi a ni” kan ti le.. tih hi chu:
An tui zawh tawh ber chuan a pawi vak dawn em ni ka ti deuh. An tui hmaa man erawh chuan an rem duh khawp ang.
September 2nd, 2011 at 7:16 pm
Tuna tharthawh chi ni tawh lo mah se ka lung a ti leng e. I ziak ngaihnawm hle mai. (Y)
September 2nd, 2011 at 7:18 pm
A ngaihnawm khawp mai…
September 2nd, 2011 at 7:24 pm
darzo lui ngha fuan chu a ven hun chiah a ni maw!?
September 2nd, 2011 at 7:32 pm
hnahchanglui, darzo lui hi khaw dangin in nei ve em le, hriat a van chakawm ve..,
September 2nd, 2011 at 7:49 pm
ka mobile phone atangin ka comment ve a, error a pe zel a, hei ka haw ve chiah, ka rawn comment zui…..! A ngaihnawm hle mai.
Aizawl atang chuan Dialdawk nghalim fuan khu a ven a nuam tawk khawp mai.
@PKF : Nghafuan hi chema sah hian an fuan nawn ngai tawh miah lo bawk. An thisen chhuahna kha an chhinchhiah ve a ni mah na!
September 2nd, 2011 at 8:05 pm
Kan hawlhrawk hawlh chanchin ka rawn post ve ang! Khawthlang lamah hian hawlhrawk hawlh hi an uar ve thin khawp mai…..kaikuang leh nghate lam ani thung!
Nghadawl leh kaikuang tin khat hi darkar 2/1 chhung hian kan man thei thin. A nuam ve khawp mai!
September 2nd, 2011 at 8:22 pm
Lushai_er, hawlhrawk chu han post ngei teh. Ka lung a leng deuh tlat mai. “Nghafuan chema sah loh tur” tih khi ka hre deuh takin ka hria. Chem kan lek ngai lo reng a ni.
September 2nd, 2011 at 8:27 pm
lushai_er, “Chem a sah..” i tih khi ka vawikhat hriatna. Chhinchhiah tlak anih hi. Thang khiu ve ngawt teh ang (Y)
PKfanai Hawlrawk ah khan kalo inhnamhnawih ve lawk mai aw (inthlahrung der) 😀
Bairabi lamah khuan Hawlrawk hi kan hawlh nasa thin. Thleng chiah pahin kan hawlh thin a, anuam ve thin. A hawlhrawka pawh kan hawlh a a hawlhtu te pawh an lo inhawlh ve bawk mahna hairehai 😛 😉 :Lak dam awih loh: tlan chhe daih te’ng 😛
September 2nd, 2011 at 8:33 pm
#29 Hawlhrawk*
September 2nd, 2011 at 8:40 pm
29. Hv, kan khua ka chhuahsan lai leh, nghafuan kan ven lai vel khan, ka la naupang em mai a, hlei rual tak tak kan la ni lova. Engdangmah ngaihtuah lova sangha buaipui hmeichhe ho bungbu kut kut lai, lo buaipui lehchhawng tawk, tlangval harh deuh kha chu an awm thin awm e.(i han sawichhuah takah chuan)
September 2nd, 2011 at 8:43 pm
#31 mitthla theih riai ruai ala awm nual alawm hairehai 🙂
Lui lam sawi hi chuan ka tui em em hi ani ringawt. Tumkhat pawh Tlawng tuilen laiin inah ka awm thei ngang lova, ruah sur bur bur laiin Tlawng ka pan. Ruakin ka awm mai a, ka haklai kha plastic bag ah ka khunga chutiang chuan ka kal theuh2 mai. Sangha erawh 2 emaw ka man hram. Eitur dang kha a tam tho a pawi lemlo. Chhungte in ngaihtuah tir chu pena ve thei tak ka ni hairehai 😉
September 2nd, 2011 at 8:48 pm
Thla bial zan (Arkaiden) hian luite sangha leh kaikuang hi man an awl bik riau a sin…! Mak deuh asin, Lengpuiah hian ‘hawlhrawk’ chu sawi loh kan lui hmingte hi ‘Chiahpui’ & ‘Chiahte’ te an nia, a piah deuhvah chuang ‘Lunghmul’ te a la awm ta deuh deuh ve………a hmul hlawm khawp mai ! :tlanchhe ve daih ang:
September 2nd, 2011 at 8:56 pm
32. Thil hi chu i lo dai chikim ve a ni. Tuichang leh Mat vel a Lenden hrat ho pawh hi, Adama suit ngatin a ni an beih thin ni.
September 2nd, 2011 at 9:07 pm
E heu, hei chuan min kai harh tlat, zupawl vuak kha in post loh chuan ka post ani mai hehe. Zupawl vuak han nawm zia kha aw, a sa ka ei duh chu a ni chuang lem hlei lo a
September 2nd, 2011 at 9:11 pm
Pkfanai hi i han titi dan atang hian i khua leh unaute thlengin ka hre thei e. Misual rual zingah i rawn titi tui thei viau zel a, i khabe liam kan lo chang thap zel a nia.
Hnahchang lui hi chu Darzo ram chinah chuan an humhalh tha khawp mai. Nghakuai nen mai pawha ei khawp hawn theih awm hialin an humhalh tawh.
Nghafuan ven hi kum khat tal Mizoram pumah hian veng lo ila a ziaawm khawpin ka ring.
September 2nd, 2011 at 9:37 pm
36. Pu Muantea, Lushai_er, chhana pa,adt. hian, “Eng topic pawh post la, Pathianthuah i kuai lut thei zel a” an ti teh fo a, Secular topic hlang hlak ka han ti ve chhin anih hi. @ doc, ‘Zupawl tuam” chu han post ngei teh. E, tak a. Tuipui ‘D’ hovin, Darzo kai lai vel an humhalh tlat a, Wards Lake ang maiin Sangha an tamin, an ngam tih thu ka dawng a, min tihlim khawp mai.
September 2nd, 2011 at 9:41 pm
Pkfanai, kei aiin Ku muantea hian post se ka ti zawk a, a post loh erawh chuan ka rawn post ngei ang, a hun a thleng tep leh nghal..zupawl, kawng bil mat mai kha chu an lo thau thin bawk a, han hlap thal thak kha avan nuam em..A sa chu ka ei duh lo, muk chawrno nena chhum pawlhin a tui hang erawh ka hawp kuang kuang thei thung 😛
September 2nd, 2011 at 9:44 pm
I ziak ngaihnawm thin khawp mai…Pu PK nge nge..Nghafuan chu ka la veng ve chiah lova., a lo nawm hmel hle mai. Lui te dung zawh pawh hi nuam ve mai2 thin khawp mai. Sangha fresh tak han ei hi chu a tui a ni. Lui lam sa hi chuan chaw a heh tlat thin…:-):-)
September 2nd, 2011 at 9:59 pm
Eu.. doc-a te chuan zupawl an vaw thin bik a ni maw?.lol. naupang ho tak hi chu aw.. An vaw lo. an tuam thin.haha.
September 2nd, 2011 at 10:03 pm
SUnday chu Sangha hmeh ngei angai ang…!!!
September 2nd, 2011 at 10:13 pm
A bengvarthlak e Nghafuan ven kal ngailo leh kal ngaitoh lo tur te tan phei chuan atha lutuk mahsela, Tunhnuah chuan i ti lo hram tawh ang u Sngha rem na tha tak ani sia
September 2nd, 2011 at 10:20 pm
saint Sammoo min rawn correct har hlawm ka ti reng ani. Lumet leh sam met in hnial ang deuha min chuk luai luai ka in ring ania. Nia a dik takah chuan Zupawl tuam ani. Buhpawl tuam ai maha nuam ka tih chu, thlam hung kha ani.Kan hnung zui Upa ten an thlam an han hung hnu ah, zanriah hmeh tur zawngin thangchep leh vaithang kam ho kan han en dik zung zung a. Chawei puar peng pawng hnu zanlai bawr velah zupawl hung chhunga han um zuai zuai kha a nuam. A thiam ho chu an thut hmunah an thu a, an zawna lo kal kha an thal thak thak zel nia maw le.
September 2nd, 2011 at 10:25 pm
Vawikhat chu ka sava vehin luite a sangha fuan ka phawk tawh a lawm. hmanraw dang nei hek lo le, ka chawi zawh tawk lung ka phawk a, a buk tha lai ber kha ka’n deng vak mai a, lung dangin ka vawm zui chiam bawk a. Kan hmehkhawp chu ka deng thlu ve der a sin. Hmun dangah in ching ve em? 1- nghate khai- nghakuai te 4 vel thirchakai ang deuh hian kan tawn khawm a, a chah kan thil far a, nghate-in an rawn bawr lat2 a, kan phih thut a, a thil ve far zel. 2- kah-khet- nihliap tang kan tat zum a, a hmawr leh lamah pawhfan, luite/kawrte sangha,nghazawngek tih vel kha kan perh/kap thin. Nuam ve thei tak a ni.
September 2nd, 2011 at 10:32 pm
Zupawl hi tui ka ti viau thin kha a ni sia, tun hnu hian ka duh ta mang tlat lo..ei khat tak deuh vang nge ni?
September 2nd, 2011 at 10:38 pm
A sa tak hi chu ka duh bik lo, mahse duh tawka meia han ur hnu a, muk chawrno nena han chhum han kha chu a tui hang kha tui ka ti ve khawp mai
September 2nd, 2011 at 10:42 pm
Sangha fuan sa a tui ngai lo, a da dup thin. luidung thui tak zawh in an thau an hmang ral zo a, ei meuh chuan cher tak an ni tawh. Zupawl thau mum kang mai hi chu aw….
Han vaw let phung mai ila, thla eng hnuaiah han rawh mawm hluam mai ila.
September 2nd, 2011 at 10:44 pm
Zupawl hi a mawng a chum bat a, a kawng bawr a bil mat chuan a thau ngei ngei. Hetiang a han thlan ngat tawh hi chu han rawh pawh hian an tlawrh siah siah bik mai ani
September 2nd, 2011 at 10:47 pm
44. Sammoo chu, i va ti uih awm ve aw, han ti ila, khar pinna tur pawh i nei awm si lo. Nghakuai kam leh phih hi ka ti ve nasa; Nghavawk hian an ngam khawp mai. Ka nau mipa naupang nen Nghafuan venna a kan tel ve tumin Nghakuai kan kam a(perhpawng kan tarh a). Sangha a fuan lo na a, a tuk zing a kan haw turin kan va en chuan, a lo inzem/inkual var rui mai a. Tim dai chungin ka han pawt chhuak a. Ngharul sei tawk tak mai a lo ni a. Luia tleng luh leh a tum nasa mai a, hmanraw dang awm hek lo; Lungtumin ka chhuhlum a, In thlengin ka kokiah ka bat a, kawiz nghawng a khawng tha duh khawp mai. Kaikuang/Nghathal pawh ka hmang ve nasa. Luiin min hual bawk a, Luikal chu kan hrat khawp mai.
September 2nd, 2011 at 10:50 pm
*Kamiz*
September 2nd, 2011 at 10:53 pm
nghafuan ven ai chuan sangha vuak hi a nuam dangdai a sin. thangthar ho chuan in hre ve kher lo maithei a.
September 2nd, 2011 at 10:55 pm
Mizo nge nge..Zupawl sa ei kan lo tam hle mai… A va han tui tak em aw.. Ka ril a tam..Zupawl han rawh tui hlup hlup mai ila..
September 2nd, 2011 at 10:56 pm
Sangha vuak chu, nuam e, ru kha kan va han zawng nasa thei tak. Ka kal hmasak ber chuan kut durh phung khawp ka vua a, ru chiah hnuah sangha a man ve theih tawh reng reng hleihnem maw le
September 2nd, 2011 at 10:59 pm
Mizo chauh lo pawh hian sazu hi an lo duh a ni ngei ang. Sap nu te hian an duh ‘puk puk’ em mai. Kan duh dan erawh a tuihnai a lawm.
September 2nd, 2011 at 11:10 pm
Tunlaiin, Stephen Hawking chanchin naupang ka zirtir lai a ni a. Hetia kan nunhluite sawiho a, inhau lo leh hlim tak a, kan han ti ti ho hian, ka hrechhuak zawk mai. Sawitur ka va ngah em. Kan sangha vuak tum kha…”Par ang an chul, kan nun khuarei an chang zo ta…au mah ila, kir zai an rel tawh si lo” ka Lung a leng tak tak dawn tlat mai.
September 2nd, 2011 at 11:27 pm
Zupawl leh sangha in lo chhum pawlh a law.? Thianho 4-5 velin luite kan vaw ve thin tih bak a lian thamah ka la tel ve lova, sangha tlang vuak ang te kha a nuam awm ngawt mai.
September 2nd, 2011 at 11:40 pm
Tuna ka awmnaa ka awm tirh hian thawhpui ten ‘sial mual zau a riakte tui tlan khu a thianghlim lo, kan ti thianghlim dawn, lo telve rawh’ an tia, bleeching powder an keng teuh mai a, a tirah chuan ka hrethiam lo kher mai.. kan han tithianghlim ta a le.. A tihthianghlimna kha sangha, kaikuang adt. khan an lo ngeih vak lo a niang chu.. Kg 2 vel theuh chuan kan hawn hlawm kha. Hriselna lama thawk tih takah luite tui tihthianghlim zeuh2 kan ching riau..haha.
September 2nd, 2011 at 11:41 pm
Nyishi ho hian, an nupui manah Sial 10 ai a tlem lo te an inpe thin . Adi ho zet erawh chuan, Zupawl rep 5 an inpe thin. Amaherawhchu, a mipa zawk kha a hmeichhe in lamah kum 3 tal a awm phawt thin a ni. Thingtlang khua a zin chang hian an induhsakna sang tak chu, Zupawl sarep inhmeh pui hi a ni. A Lu hi ei ngaihna vak kan hre thin silova, thleng kotlangah an dak far thin.
September 3rd, 2011 at 12:11 am
Zupawl lu te chu a beng tawn tawnah kan khai a, a hmui atanga tanin kan dit meng trawk trawk mai a lawm.. Lung in ti leng tlat.. Buh chhek turin khuantevikah kan han thova, khabe khawng dat dat leh thaw khu hlat hlat chungin feh kawng dai zawng2 kan pal darh a, thlam thlen dawn a ruaiah, mau bulah kezungpui auh thawt khawpin kan han chhuih leh ta nghal a,.. Phurh tam loh chuan chhek zawh har bik kan hlau si, zo tawkin kan han phur a, kezungpui bih ngar ngar khawpin dawrawn kan han awi chho a. Zema kan han keuh chiah kha chu.. Ring kha a thang awk awkin ka hre thin..hah viau mah ila kan hma lawkah ‘mas’ khan min hmuak miau mai si a le(h)..
September 3rd, 2011 at 12:17 am
Nghafuan hi ka la veng ve miah lo, ka chak ve khawp mai.Hnahchang lui, lung ava ti leng ve, ka pa te khua thin ania, tunah chuan a ram toh ani awm e. Ka pa pawh hian nghafuan hi ala veng lo aniang a ti ti ah a tel lo tlat. Lung avan ti leng em (Y)
September 3rd, 2011 at 7:27 am
A bengvarthlak ngei mai a! “Nghafuan” hi tun hma chuan sangha hming ve reng emaw ka lo ti thin a. Lunglei khaw chhak lama phairuam Nghasih lui fintu, Theiriat dai atanga lui rawn luang saw a hming ka hre ta lo. Pu Sakaia serthlum huan kiang lawkah BAWNG indawh hi a lo awm a. Kum tam a liam ta. Chumi kiang lawk tiauphovah chuan mei chhemna a lo awm a, khuk pawh a khu tawh lo.
BAWNG chu ka vawikhat hmuhna a ni a, ai-awt bawm lian nen ka tehkhin ber e. Nghalim tui zo, lui mawng lama rawn tawlh thla kha BAWNG chhunga tla lut tura duan a ni ta berin ka hria. Sangha engmah a lo awm lo va.
Khami tuk ber kher khan nawhalh kan lo ken theihnghilh a. Hang han sona tur kan vai ta hle a. Mahse, mei chhemna chu kan han thai kan han thai a. Vanneihthlak takin a ling tlem te a lo la awm hram a. Fawhkai nen kan inchhem alh thei hram a. Thlasik daifim kan inpal huh nasa bawk a, ai a nuam hle.
Bawng chu ka va thlek leh dek dek a. Nghalim an lo tla khat thuak mai chu, ka rak ring khawp mai! Ka zuk man, a nal bawk a, ka’n tichhuak pang a. Ka ui khawp ngang mai.
A bak zawng zawng kha chu chhuah ka tum tawh lo, sangha lu-ah ka seh hmiah hmiah mai a. Ka ka chu a thi sung mai a, ka la nui ang heu ho va! Khami tuk kha Bawng dawh ka hmuh hmasak ber leh ka hmuh hnuhnun ber a ni ta, kum 1967 hun lai kha a ni.
Sangha ka ei tawh zawng zawngah khami tuma mi kha a la tui ber, a tui ngawih ngawih hi a ni ringawt mai a ni.
“Nghafuan ven,” tih thupui ka hmuhin, ka lo tawn dan nen chuan a lo inang lo deuh! Engpawh ni se, sangha kha a fuan (school) hrim hrim.
Potomac lui hnar lam, suarah lensuah-a nghafuan ka thianpa nena kan han suak zet mai chu … a tirah chuan kan hlawhchham khawp mai a. Mahse, sangha tlantu sava (kingfisher) thlawk chho kan zui ta a. An duh leh kan duh a inang tih ka hre ru kar bawk a. Annin an dawlh awl theih theih chuan, engah nge kan theih loh bik ang le?
Khai le, suah hnih velah bucket a khat mai si a. Kan suak zel a, kan chhuah zel a. Sangha kan thlau kan thlau a ni ta mai a. Nuam ve tak chu a ni. Sangha man hi a hlimawm a, kan rak phul hlut zel mai a.
Krista ngei pawhin ringtu thar neih belh hi sangha man ang hrimah a lo chan ve ni te pawhin a lang.
Petera pawh khan a nupui hnenah, “Lalpan mihring mantu (fishers of man)-ah min siam tawh,” tia a sawi khan, a nupui khan, “Honey, how can I cook them for you?” a ti emaw in lo ti ringawt ang e.
September 3rd, 2011 at 7:36 am
Chawnghilh, Bawng dawh hi an sawi ka hre fo a, ka la expi ve hlei nem.Arunachalah hian ka hmu zeuh zeuh zawk.Kei aiin i lo senior ngial mai a. “Do You think, a good fisherman could make a good fisher of men?”
September 3rd, 2011 at 8:15 am
A ngaihnawm hle mai . .
September 3rd, 2011 at 10:20 am
Ku Chawnghilh, i luite sawi hi Khuai lui a ni e. Bawng hi vawikhat chu ka dawh ve tawh. Lung ngawi dawh nen a inang reng mai. Suar chhip lamah lung leh thildang kan dawl phei a, a remchang laiah Bawng kan dawh tawh mai thin. Buh seng laiin kan dawh thin, buh seng chawhmeh ve a ni a ni mai.
September 3rd, 2011 at 11:09 am
Post pawh a tha, comment pawh a tha par par e. A ngaihthlaknawm ngei mai. Century tal han vaw chhuak teh u, sawi ve tur neih ve a chakawm mang e.
Zupawl tuam leh a dangte pawh in han sawi kai a, post awm hma hauh pawhin a lo phur lawk surh theih a lo’m le. Han post ngei teh u.