Kohkir leh theih se, ka chak berte zinga pakhat chu, fate nena infiam theih hun lai, inkhualtelem theih hun laia kir leh kha a ni ang. Ek an cheh a, inthlahrun nachang an hriat lai, chaw an hawp puk puk vanga kan lawm tih an hriata an intihtheih lai hun, an tihsuala kan hau an hlauh em em lai hun, ti tha an intiha fak an beisei lai hunte kha, koh kira han chen za leh ka châk a ni.
Lawm beiseia kan mitmei an en a, kan chetna lam apiang an hawi lai khan, kan lo lawm hman lo va, kan han lawm zauh chuan an nui khek tuar tuar a nih kha.
An lo leikang a, kan fiamthu an man rual rual khan, tih tak zeta kan tawngtai kha an hrethiam a, nakinah phei chuan chhung inkhawm an nghakhlel a, chanvo neih an châk a, khang hunte kha koh kir theih se, tih dan tha zawk ka hre tawh asin mawle. Chhuat laia min bawhbeh a, min hneh tak tak emaw ti ni awm taka a intih theih laite kha aw.
Khuma inbuan an châk em em laia kan peih loh san hun te, min fiam duh a, kan lehkha chhiar lai min rawn bawhte khan, min tibuai emaw tiin kan hrawk a, inthiamlo takin an kal kiang a, mahnia hlimna an zawng a, kim inti lo takin an inkhualtelem a. Kan telpui chhuna an hlim theihzia kha. Mawl ber cheia min chei khan an hlim em em a, min ti ti pui siam siam a.
An nu leh pate chu khawvela fing ber, huai ber, engkim hria emaw min tih laite kha a lo ropui mang e. Tlachhama kan awm lai pawhin engkim neitu emaw min ti a, thla pawh ko thla thei tur hialin min ring a. Derdep te mah ni ila, chak ber emaw min ti a, kan bulah an thlamuang em em mai a.
Chuti chung chuan, khang hun lai khan kan fate, kan rohlu neihchhun chu thlahthlamin thian kawmin kan lensan fo va. Ni e, kan leng tur min ngen a, an tapte chu kan han velh belhchhah a, kan leng haw min lo lawm a, min bawhte chu, balh hlauh vangin kan han nam kiang a.
Khawvelah hian khatiang hun kha rawn inher let leh thei se, fate chuan duh leh sechal lemah min chantir leh se, an hrui fei lo tak khan chhuat laiah min kai kual leh se, kan chungah chuang leh se, duh leh inchai leh ila, min hneh leh em em se ka ti a ni.
Biak in kawnga phur taka an kal a, haw lama an muthilh dawn vanga kan hruai peih loh angte kha a awm tawh lo vang mawle. A zirlaite kha thiam tura vau lovin, hlim taka a zir theih nan a rualin ka zir ang a, ka inthiam khalh tir leh tur a!
Tunah khan fa eng ang nge i neih? A tet lai atang khan thian angin kawm chho rawh le. Computer hmaah i hun i hmang tam lutuk em? A in awm tlei nan computer games i khelhtir nasa lutuk em?
Nang aiin nau awm tura in lak kha a ngaina tawh zawkin a lang em? Koh kir theih loh hun kan hmang theuh va, fate tana hun kan lo pek tlem avanga inchhir hi a pawi asin aw! Naupan lai atanga thian anga inkawm a, nula tlangval an nih thlenga inthian zui theih hi a tha ber. Chutiang nih ngat chuan fate ruih bo san a rem lo va, faten min ruih bo san a rem bik lo a ni.
Koh kir theih chang se, fate tana hun leh mahni inpe lo nu leh pa tam takte hian a bul tan that leh kan chak hlawm turzia hi aw! An puitlin hnu chuan khuma inbuan leh rawt chu thil tih theih a ni tawh si lo. Mahse, tuma chhuhsak theih loh hun duhawm kan nei mek zel ania aw! Tuna fa naupang te te neite tan hei hi zirlai mawl tak, tangkai tak si ni thei se ka ti ngei mai.
– C. Laizawna
Tuesday, 27 September 2011 07:00 Vanglaini
