mi(sual).com

Aw, hmangaihna-

I natna khirh tak avangin lungngaiin i tap a, “Tihtheih kan nei ta lo” tiin Daktawr meuh pawh an beidawng a. Nunkawng bumboh leh hreawm i hmang mek em ni? Beidawng mai lo la, i rinna beidawnna káwlah liam tir lul suh. Tuar fan fan la, naktuk a lo la thleng dawn. A damdawi an hmuchhuak mai thei asin.

He khawvel lungduh inthenna ramah hian, i lungduhte i then a. Hnukchahna khawvelah hian, hmangaihte hnuk a chat fova; i hnuk pawh a la chat ang. Mahse, khatia indawm kun reng lo khán, han dakchhuak teh. Heta hi- aw hmangaihna.

Lungngaiin tah hla i rem a, i beidawng rum rum a. Inthenna rûn chhung hreawm i ti a ni lawm ni? Min vuan la, i tap leh tawh lovang a; i beidawng leh tawh hek lovang. A chhan min zawt em ni? A chhan chu hei hi ka nei- aw hmangaihna.

He khawvel tar tawh takah hian, hmalam hun thlirin i chau zova. Beiseinain beidawnna káwlah a hnuk liam mek che a. I kut leh ke a zeng tawh a, wheel chair-ah he khawvel zau tak hi zimte in i chén mek si.Hmangaihna ke ka pe ang che a, hmangaihna kut ka pe bawk ang che.

Piantirh ata mitdel i ni a, he khawvel mawina leh ropuina hmu chákin i tuihal tih ka hria asin. Ri hre chákin i beng i lénruai a, i hrethei si lo. Hmu chák leh hre chákin i tap em ni? Hmangaihna mit ka pe ang che a, hmangaihna mitin ka thlir ang che. Hmangaihna beng pawh ka pe dawn che alawm. A chhan i hre chákin ka ring thin-aw hmangaihna.

I hmangaih a ni tih hrilh i duh a, i nunram thawnthu ngaihnawm sawichhuah i chák zia ka hai ring suh. I kâ i ang a, awrawl a awm si lo. Miten an sitin, an nuihsawh che a. Mahse, i beidawng ngai si lova, chakna thar i neih phah zawk thin. Mite hmuhphak loh i hmu pha tlat a.

A chhan chu i hria tih ka hria e. Hmangaihna kâ ka pe dawn che tih i hriat avangin. I tân ùi reng reng ka nei lova, ka phal êm êm vek alawm. Eng dang vang a ni love, hei hian min tirlui zawk a ni- aw hmangaihna.

Hmangaihna mak tak chu-

Mit páwng ve hlit hlet, ha kuh tha ve tak leh ngalkual ve rin ren miten an tih, min hmuh mam tir thlap tu kha eng dang a ni mawlh love. Mite ngaihdanah chuan, a chhiain a laktlak loh a ni mahna; demna tur reng reng ka nei lo che. Keizawng hei hi ka nei a, hei hian ka thlir thin asin- aw hmangaihna.

Thatna leh duhawmna a neih lohna lai tak kha, ka tan chuan a lo mawi zual zawk a. Sawichhiatna-in a tiduhawm zual a, er a hlawh zawh poh leh a ngilnei zual a, sawithen tumna khan, a kiangah min chen tir tlat zawk thin a lo ni.

A tah rualin, mittui ka lo hru ve a. A lungngaihin, ka indawm kun ve a; a nuih rualin thlamuanna ka nei ve chauh thin. Heng zawng zawng min zirtirtu a awm a, fuihtu ropui a ni- aw hmangaihna.

A hmui a sawi an ti maw? A dum si, a thinchhe bawk si an ti em ni? A hmui sawi, dumna leh thinchhiatna takah khan hmangaihna a zual a, a duhawm zual thin.

Ka hmangaih, eng nge i hmangaih tak-

A hmelthatna kha em ni i hmangaih tak mai le? Hmelthatna hi a ngaihzawn theih a, a hmangaih theih tih ka hria asin. Mahse maw, han en teh. A hmelthatna takah khan, mei-in a kang ût huam a, i la hmangaih em le?

A hausakna kha em ni i hmangaih zawk le? Ni e, nimina i hmangaih Mercedes Benz-a lo leng kha, vawiinah Ice Cream zuarin, “Pawisa chhia kan thleng thei” tih a awrh ka hmu asin. I la hmangaih em? Hmangaihna leh hausakna hi a hmangaih theih a, rei a daih ngai si lo. I harh em?

Mahse, hei hi ka hrilh duh che a ni. “Hmangaihna chauh hmangaih la, inngaihzawnna leh a hmanrua te hmangaih suh ang che.” I hmangaihna in hmangaih loh tur i hmangaih avangin, ka dem lova che. Mahse, hei hian a dem che a ni- aw hmangaihna.

Demna che ka nei-

Ka hmangaih, demna che ka nei. Ka hmangaihna che kha min bansan luih tir avang khan.

Pian tirh ata mitdel, hmangaihna mit pe che in, hmangaihna mita thlir che ka tiam a. A hausakna leh hmelthatna kha i thlang ta si. Hmangaihna in ka zawng che a, khawngaihna in ka enkawl che a; ngilneihna in ka dàwm che a. Ka hmangaihna min bansan tir leh si.

Hmangaihna leh a khaw pui chu-

He lei boral turah hian, hmangaihna kumhlun zawngin ka hmanhlel a. Eng nge hmangaihna chu tiin ka zawt ruai a, hmangaihna chu ka hmu ta em le? Ka hmangaihna chhang eitu ten min man tir leh si hi.

Hmangaihna avanga hnehtu kha, hmangaihna avangin a tlawm ta. Nimina hmangaihna zirtirtu kha, vawiinah “Hmangaihna chu eng nge ni?” tiin ka zawt leh si. Khawiah nge hmangaihna leh a khawpui chu min hrilh thei lawm ni?

Engah nge i ngawih reng ni? Chau leh chak lo chung pawhin, zawng zel la. Eng nge hmangaihna famkim tih leh Hmangaihna Khawpui tih i hriat hun chuan, ka hmangaih kha rawn hruai la. “Ka hmangaihna atan ka la dah tha a, ka ngaidam” tih ilo hrilh dawn nia.

A chhan a hre chákin, a hre duh ngeiin ka ring. Hei hian a ngaidamin, a nghak reng che a ni- AW HMANGAIHNA.

Similar Posts:

• Hmangaihna hi enge a awm zia aw?
• Tu hmangaihna nge thuk ber ang?
• What is Love? What does it mean to me?
• Hmangaihna
• Aw hmangaihna khawvel entu!

Recent Posts:

• SADHU SUNDER SINGH-A CHANCHIN ROPUI CHU:
• KA ṬAHPUI LEH SI ṬHIN
• The Alaskan serial killer
• Thanglian, Aw…… Thanglian !
• CFL Hmingthanga Thihcham Vawikhatna Pualin

This entry was posted on Wednesday, October 12th, 2011 at 12:05 pm and is filed under Luangliam, More than words. You can follow any responses to this entry through the RSS 2.0 feed. You can leave a response, or trackback from your own site.