“Rinnain Mosia chuan a lo puitlin hnu khan Pharoa fanua fapaa vuah a duh lo va; rei lo tea tan sual nawmna hlimpui ai chuan Pathian mite nena tihduhdah tuar a thlang ta zawk a; …. Lal thinurna chu hlau lovin Aigupta ram a kalsan a, HMUH THEIH LOHVA CHU A HMUH AVANGIN A TUAR TAN TAN A NI” (Hebrai 11:24-27)
Hebrai bung 11 thu hi a lunglen thlakin, a mawi hlawm ngawt mai. Rinna hi sawifiah tawk theih tak tak nilo mahse, afiah thei ang bera sawifiah a ni a; chumi tifiah tur chuan, Hranghlui Rinna lama fakhlawhte a rawn tarchhuak hlawm a ni. ‘Rinna Pa’ tia vuah Abrahama te nupa chanchinte hi a ropui ngawt mai. Ropui leh mawi ka tih ber mai pakhat chu Mosia chanchin hi a ni.
Rinnain Mosia chu a lo puitlin khan, Pharoa fanua fapaa vuah a duh lo va; rei lo tea tan sual nawmna hlimpui ai chuan Pathian mite nena tihduhdah tuar a thlang zawk thei tlat mai a. Engvangin nge Mosia hian Hmuhtheihlohva hi a hmuh phak bik tlat mai le? Pharoa fanua fapa ni tura chawm seilen khan engtinnge Aigupta ho pathiante ngaisang zawk lova Pathian nung mihringte mita hmuh theihlohva chu a lo hmuh theih bik tlat? Chhan a awm ngei ang!
Hemi hrechiang tur chuan Thuthlunghlui lam a Mosia chanchin ziahna leh Israel fate Aigupta bawiha an tan thu leh, tihretheih annih dan te, Mosia hmanga Pathianin a hruaichhuah dan te chik taka zir a ngai a ni. Khatia Israela leh a fate zawng zawng, a pui a nawia Aigupta rama buh tlan tura an chhuk tak khan; Aiguptaah pawh phul thatna lai ber leh buh leh bal pawh that duhna lai ber hmun Gosen-a an han inkulh takah khan, Pathianin mal a sawm a, an inthlah pung chak ta hle mai a. Aigupta miffing leh thil chik deuh ho te ngaih a ngam thei ta lo a. Josefa thianpa ber Pharoa lah chu mual a lo liam tawh si, Josefa kha tunge ni? Aigupta ram tan eng thil ropui nge a lo tih? Tih lam ngaihtuah hauh lo mai a lo ni si a. Fuihpawrh a nuam ta hle mai a ni.Hetianga Israel fate an lo pun thur thur chuan, an hmelmaten an rawn beih hunah, an hmelma te lamah tang thut anga, an tlawm phah der thei mai ang tih a lo hlau ta a ni.
Tichuan, Aigupta mi nau chharmi ho hnenah chuan, Israel nuin fa a hrin dawn reng rengin, mipa fa a nih chuan tihhlum zel tur tih thupek tihbaiawm tak mai a lo chhuah phah ta hial mai a. Hebrai nu Jekobedi pawh nau hrin a lo hun chuan an chhung buai ta a, Aigupta mi Nauchhar thiam ko ngam lovin, anmahni inchhung rilah a ruk tein nau chu a veiin a hring ta a. Bible sawi angin nausen mipa hmeltha leh duhawm em em mai chu a lo piang ta a ni.
Amaherawhchu, naute na na na chu a lo tap lo thei lo va, a tap ri hriain Aigupta Sipai ten an rawn that mai ang tih hlauvin, a mutna khumte(Luang lawng) chu tuia lang thei turin an siam a, Nile lui kama phairuang zingah chuan an dah ta a, a u Miriamin a veng ta ran zel mai a ni.
Hlauh thawn ruk ang ngei ngeiin, Pharoa fanu leh a chhiahhlawhte luia inbual tur chuan a Lawngte chu an hmu ta si. An han enchian nak chuan nausen mipa hmeltha leh duhawm lutuk chu a lo awm si. Pharoa fanuin a pa laka humhim a, a fa a neih a duh ta tlat mai le. A nausen lai, a chhia-a tha engmah a la thliar thiam hma atang khan Pharoa fanu khan Lal inah kawlin, a chhiahhlawhte khan enkawl seilian ta sela, Kan bible thawnthu hi a danglamin, Tunge Mosia tih hi Khawvel hian tun ang hian an hre hauh lo ang le!
A vanneih berah Pharoa pakhat chu ani ve pha mial mai thei? Ani kher lo thei bawk. Englekhawle, a nu lo hrilhlawk angin, a farnu Miriami a rawn che ta a, Ama nu ngei, Pathian nung ringtu leh betu Jekobedi enkawl turin an tifel a, Pathian hnamthlan Israel chhungkaw zingah a lo seilian ta tlat a, chu chu a pawimawh lai tak chu a ni ta a ni.
Tui atanga lakchhuah anih avanga ‘Mosia’ an tih taka kha, a naupan buchip lai chhung zawng kha, Pathian nung bia Nu leh Pa thlazar hnuaiah an zirtirna engkim dawngin a awm a, Pathian mite zingah a khawsa a, an Culture kha a culture a ni a, an Pathian kha a Pathian niin, Pathian dik leh Pathian taka chu a ni tih a hrechiang a nih a rinawm. Dinhmun hniam tak; Sal anga tih hrehawm anni nain, Pathian hnamthlan anni tih pawh a hrechiang khawp ang.
Pharoa fanu khan a lo leikan tak tak hnu khan lain enkawl leh hnuhnawh mahse, a nihna dik tak kha tuhnghehin a awm tlat tawh a, a rilru kha a chang let leh thei tawh lo a, Pathian taka kha mihringte mita hmuh theih ni lo mahse, a rinna mita hmu pha khawpin a nu leh Pa te khan an lo tuhnghet hman tlat niin a lang tlat mai.(A tak tak pawhin mihring zingah Hmuh theih lohva hmu chiang teuh ber chu a ni hrim hrim).
A lo puitlin chhoh takah pawh khan, ama mite chu an awm awma awmtir a, ani chu khatih laia khawvela ram ropuim ber Aigupta ram ropuina kha duh tawka chen thei ani na chungin, chung damchhung ropuina lem, thamral leh mai tur ai chuan, Pathian taka chu chibai buka, a rawng bawl a, a mite nena tihduhdah tuar kha a thlang ta zawk tlat mai a nih kha.
Naupang lo pianghlim rilru hi Lehkhapuan var hlak mai, engmah la ziah loh ang hi a ni a, chutah chuan an thil rawn tawng ang ang kha fiah takin a rawn inziak ta thin a, a then chu a fiah vak lo a, a reh leh mai a, a thente erawh chu, nawhreh leh theih tawh mai mai loh tura fiah taka inziak a awm bawk thin a ni. Chu lehkha phek thianghlim tak maia fiah taka thil ziak thintute chu, an thian kawmte, an sikul zirtirtute leh an nu leh pa te anni a, an lo len deuh hnuah chuan, an lehkhabu chhiar leh an thil hmuh/en ten a ziak fiah thei bawk a ni.
Naupang lo piang tir hi, a nu leh pa eng hnam pawh nise, a pawng atakin an nu leh pate culture kha an rawn chhawm ve ringawt lo; an mahni nitin-zantina enkawltu leh an bul vela mite culture kha an rawn la mai a ni. Mizo naupang hi a pian hlimah Bhopal a Hindu kulmuk tak nupain la ta daih sela, chu mizo naupang chuan, mizo tawng a thiam hauh lo anga, Hidu sakhua zuiin hindi paka tak a lo tawng zet zet mai ang. Chutiang zelin, Muslim Terrorist fa, a nu leh pa thihsan nausen kha, American Commando Kristian tha takin lain enkawl selian ta se; Arab tawng thiam lovin, Muslim pawh ni hek lovin, Kristian tha tak niin, Saptawng nalh tak a hmang zet zet mai ang.
Kan Fate kan enkawl dan hi ngun taka in enfiah theuh kan ngai a ni. Kan awmpui eng mizia nei nge tih pawh hriatchian loh, eng sakhua nge a zui tih pawh hriatchian lohte lakah kan lo hnuchhiah lutuk palh ang e. Kristian Mission sikul te pawh rinngam an har lain, khawi Private sikul hriatchian mang lohah te an naupan lai hun tha zawng zawng kan lo dah palh ang e. Hostela dah loh tur ka ti lo; kan dahna hostel hriatchian erawhchu kan tih ngei ngei tur a ni. Phai rama Kristian sikul ni lo, zirtirtu tam zawk sakhaw dang bia sikula dah bo daih te hi ngaihtuah ngun ava ngai em!
“Naupang chu a kalna awm kawngah chuan zirtir ula, a upat hun pawhin a thlah lovang”.(Thufingte ).
“Beiseiawm a la nih laiin I fapa chu thunun la, Boral mai turah ngai suh” (Thufingte 19:18)
“ I fapa chu thunun fel la, chawlhna a pe ang chia, A ni, I rilru lawman a thlensak ang che”. (Thufingte 29:17)
Similar Posts:
- A kaw tawp – 2
- Thimin min hualvel laiin Pathianin hna a thawk thin (Sunday Pual)
- THIL TAK LEH TAK LO
- Sunday Pual – Numbers 4:6-a “Savûn țha mi” a tih hi “Eng Vûn Nge?
- TUIPUI SEN KAN KHA THILMAK A NI EM?
October 30th, 2011 at 7:35 am
Mosian duhthlanna a siam fel dan hi a ropui ka ti thin, Pathian thu zawng nilo a hnam ang a ngaihtuah leh chhut pawhin, a hnam a phatsan lohna hi a ropuiin a mak a ni. Tun thleng pawh a an finna leh remhriat zia an chhui chhuah phak loh khawp a hnam fing ho lal nih aia a mite kianga awm a, sal nih an thlang tlang tlat mai a nia.
Kei ni ta ila ka thlan tur ka ngaihtuah hian a mak ka ti lo thei lo a ni. Amaherawh chu post-tupa hian Hmuhtheihlohva a hmuh vang tih min rawn hrilh ta hlauh zawk a, ka var hawk e.
tren tren.
Report this comment
October 30th, 2011 at 7:43 am
ava ngaihnawm leh thin tak em! kan ram hian hetiangang zirtirna hi ala mammawh reng tak asin.
Report this comment
October 30th, 2011 at 7:48 am
a ngaihnawm khawp mai,sunday zing sermon a ni e…
Report this comment
October 30th, 2011 at 7:56 am
Report this comment
October 30th, 2011 at 8:10 am
Kum 2003 a Itanagar a kristian mission school kan din tirh khan mizoram leh Meghalaya kristin school leh College te ngaihsan ani angchiah hian Hindu school Rama krishna mission leh Vivekananda school ten ngaihsan an hlawhin kristian te pawhin an lo bawh nasa a, kristian school awm ho an lo ram ti tih a. Chumi beilet tur chuan Pathianin min ko tih ka chiang ta hle mai a, he sermön hi khawpui kohhran hrang hrangah ka tlangau pui ta a ni. Theih tawpin ka kaitawi a, Samuela a nuin a train chungchang pawh a leng ta lo a ni. Pathianin Nyishi ho zingah chuan mal a sawm hlein ka hria. sunday hman nuam vek u le.
Report this comment
October 30th, 2011 at 8:37 am
a tha hle mai .
Report this comment
October 30th, 2011 at 8:41 am
La khelh loh game ania, khelh ve hunah a pawimawh dawn hi. Score chat chat thei turin game, nakin lawka khelh tur zirchianna
OT zuai, Pu Pkfanai, Nyishi ho hi i lam sek a, an nula thlalak lo post teh..ka hmu chak tlat nia maw le. Hage chu nitin ka hmu thei a, Galo ka hmu tawh a, apatani ho pawh an tam. An sawi hmangin Nyishi ho hi kawlh leh hlauhawm ah an ngai aniang, an tih viau zel mai a, hnamkawlh sen nula chu hmuh ve a chakawm a lawm le.
Report this comment
October 30th, 2011 at 8:57 am
Typing mistake a awm nual mai. A chhan chu ka computer hian mizo tawng a thiam lo a, “Lo la teh” te hi “Lo la the” a ti zel a, “Lawmna” te hi “Lawman” tiin a lo thlak daih zel a, a hahthlak khùp mai. @doc, Nyishi chu an thin a rim tawh chuan, an dawn a tawi tuk mai a, an nula ho pawh hi, an thinrim hmel tur suangtuah tel zel a ngai. Mahse an fair a, an rilru a tluang tha tlangpui.
Report this comment
October 30th, 2011 at 9:29 am
Hmuh theih loh hmutute hi a hun lai chuan midangte tan mi a an ni. Lota khan lawnga tuk lai khan thil atthlak an ti ngei ang. Zawlnei Elisate putuah khana chiang ka ti thin hmuh theih loh an hmuh meuh chuan ‘kan lama tang an am zawk’ an ti mai a ni.
Paula kha Judate tan chuan mi a a ni…Krista avanga mi a..mi hmuh ve loh chu a hmuh avangin. Ka rilrua riak reng thin chu Pathian duhdana thutlukna kan siam dawn leh kan hmuh ang sawi tur chuan mi a nih a tul thin. Pathian duhzawng nia kan hriatah chuan fing lem loin min lo chhuah pawh ni se hmuh theih loh kan hmu tlat a lawm.
Fa chungchangah chuan kei, computer thar nen hian ka tehkhin ru thin. A thar a chhunga eng software mah la awm lo software kan han install a kan dah loh zawn tum chu a chi miah lo. Lehlamah an lo liana khawih pawlh an nih takah chuan eng enge maw an install virus pawh a lut hial thin. Mahse anti virus tha mi kan dah chuan kan buai lo vang…Isua Krista chu. Mahse anti virus pawh hi update zel a ngai a a hlui rin rei chi a ni lo.
Ka luangliam ta mah mah e..i post ngaihnawm e.
Report this comment
October 30th, 2011 at 9:52 am
Vakul@9, Lotan lawng a tuk chiah maw? Hairehai
tren tren.
Report this comment
October 30th, 2011 at 10:23 am
Ngaihnawm tuar tuar mang e. Fate enkawl hi a va har dawn tak em tih min hriatchhuahtir a, zirtirna tha leh ropui tak a ni e.
Ka lawm e,
I tan chauh,
Lr
Report this comment
October 30th, 2011 at 10:32 am
@10 lehpek a. Ka heti leh thin tumkhat pawh ‘hmuh theih loh hmutu’ tih thupui hmang hian thu min sawitir ve a, ka’n sawipawlh tak tak mai a..he mite pahnih hi. Inkhawm banah min hrilh tliar tliar mai maw le. Tha e…a chiangin ka hria ti tawp mai ang.
Report this comment
October 30th, 2011 at 10:39 am
Sermon ropui tak a ni e. Sunday inkhawm peih lo hian ka’n chhiar chhuah dap chu a.
Report this comment
October 30th, 2011 at 10:58 am
A ngaihnawmin analogy ṭha tak pawh a ni e. Rinna ‘chi tuh’ pawimawh zia i rawn sawi fiah khawp mai. I thuziak hi a ṭha ka tih em em nachhan chu ringtute tana pawimawh em em mai, thlarau lam thil i chhui nasain i ngaihtuah nasa tih a rawn tilang hi a ni.
Engtin nge Mosia khan Pathian a hriat tih i chhui luh dan hi a fuh lutuk
Bible chuan a kip a kawiin min hrilh kher lo mahse a NU aṭangin a ni ngei ang tih hi a pawmawm em em a ni. Hetianga hriatfiah chi hi Bible-ah hian a awm nual mai.
Han sawi belh hlek ila: Mosia Nu khan Mosia kha Pathian chanchin a hrilh mai bakah khan a chipuite saltanna aṭanga chhanchhuak tura Pathian mi ruat a nih a rin thu a hrilh ṭhin em ni ang aw ka ti. A chhan chu Mosia’n Israel mi a chhan avanga Aigupta mi a tihhlum chungchangah khan Stefana khan heti hian a sawi a: “Mosia chuan ama kutin Pathianin anmahni a chhanhim dawn tih a unauten an hria emaw a ti a, nimahse an hre silo (TT 7:25)” tiin.
Rinna leh beiseina chi tuh hi a lo va ṭangkai thei dawn em tih min ngaihtuah thar tir — a rah (result) kan hmuh hun hi tlai deuhin lang ṭhin mahse. I ziak ṭha thlawt e PK.
Report this comment
October 30th, 2011 at 11:07 am
A tha hle mai!
Pu Bela(Rev.Vanlalbela) Sermon te pawh min tihrechhuak alawm le. ‘Tihian a sawi a ” Pathianin Bible-a thil ropui a tihte hi ngun takin han zir chiang ila, a par chhuangte hi han keu ril tial tial ila, a laiah hian Pathian tana hman atanga rinawm taka lo fatu tlat an awm thin”
Report this comment
October 30th, 2011 at 12:14 pm
Sermon ropui tak a ni
Report this comment
October 30th, 2011 at 1:22 pm
Ngaihnom hle mai……….doc_lib te lah in nun hi game a maw an la ti tat erawh hi chu buaithlak a ni
. :tlanchhe nghal:
Report this comment
October 30th, 2011 at 1:49 pm
Rin loh khan ah min hruailut daih mai,tha khawp mai
….Sermon muthlu miah lova kan ngaihtlak chule.. 
Report this comment
October 30th, 2011 at 2:00 pm
@9. Vakul, Computer nena i tehkhin khi a dik ka ti khawp mai. Kan thil install leh duh duh lo install ve ringawt te, virus rawn thun ve ringawt turte thlenga kan ven leh hmuhchhuah a thenfai zung zung a ngai dawn khawp mai. Tin, englai pawha veng thei tu ‘Anti-virus’ Permanent a install ngei ngei hi tihmakmawh a ni e. @ donald, iti lawm awm e, nangni angin in rawn kalh keuh chuan, a message a zero thei tlat a, in rawn second ngat hi chuan, a strong em em tawh mai a ni. Thanks.
Report this comment
October 30th, 2011 at 2:45 pm
A va tha kher em……I la lut nalh khawp e.
Report this comment
October 30th, 2011 at 6:06 pm
Naupan laiin Pathian thu chu kan dawng tha hle hlawm awm e Zofate hi chuan, nunpui thuah leh Hmuh theih lohva hmuh thuah chuan Mosia chu kan tluk lo hlawm a nih hi.
Report this comment
October 30th, 2011 at 11:08 pm
Van rawn contri thra leh pek ve. Phone in ka nu ka han hrilh chhawng ve lawp lawp a…ka u kha i lo hrilh ve dawn nia te ka ti vel!!
Report this comment
October 31st, 2011 at 12:42 am
Post tha hle mai.
Kristian chhung kua pawimawhna a lang chiang hle mai. Mosia’n mipui khati zozai thlaler ah an hruai kha chu Pathianin leadership a pek kha a ropui dawn mange.
Tunlai hian Mosia hming awmzia kha kan theologian te hian Hebrai tawng a “Tui ata lak chhuah” tih kha ni lovin Aigupta tawng a ni zawk an ti a ” Fapa” tih tur a ni e an ti.
sawi ve mai mai..
Report this comment
October 31st, 2011 at 3:28 am
#9 : Lota lawng tuk? Mak danglam ve thin!
Report this comment
October 31st, 2011 at 3:33 am
Naupang lo pianghlim rilru hi Lehkhapuan var hlak mai, engmah la ziah loh ang hi a ni a, — Tabula rasa tiin kan zir ve thin nguk nguk a, khawvel philosophy takin!
Bible thu erawh chuan, “Ngai teh, khawlohnaa dinin ka awm a; Ka nun sualin mi pai a,” —Sam 51:5
a lo ti keuh mai si a! Philosophy ka lo zir ve sateh thin kha a va han phiat leng nasa chiang tak em!
Report this comment
October 31st, 2011 at 3:44 am
Mosia khan Aigupta ram finna kha kum 40 chhung a lo ching let tawh a. Thlaler tumkawng en thithlai khan another forty years! Chumi hnuah kum 40 dang kha Israel fate hruaichhuah hna namai lo tak a hmachhawn leh a. A hnampuite hruaichhuak tur leh humhalh tur khan kum 80 chhung preliminary a lo hmang ral hial a. Keini ve hi … ?? PREPARATION nei mang lo, arkhawthim daia ram kalsiam han rel ve ngawt kan tum thin hi … Mosia khan HMUH PHAK RIH LOHVA kha a lo hmu kiau mai a, thisen chhuak (blood shed) leh thisen theh (sprinkling of blood) rawngbawlna a lo hlenchhuak hmasa a nih reng kha. Krista thisen hi Kross-a baw chhuak mai a tawk zo lo va, van biakbuk tak tak zawka Tholeh Krista, kan chatuan puithiam lalber, kan aiawhtuin min leina thisen a luhpui ve leh kher leh zahngaihna thutphah chunga a han theh hi kan sawi uar ve tur a ni (Hebrai 7 atanga bung 10) inkar chhungah a inziak chiang hle si!
Kan aiawh puithiam lalberin, Pa tana min lei letna Ama thisen a han theh (sprinkled) thlen chiah khan —Pa Pathian Yahweh chuan A Fapa tholeh rawng bawlna a lo ACCEPT (pawm) a, min leina thisen theh pawh a lo ACCEPT (pawm) a. Ringtute hi PAWM kan lo ni ta, kan aiawhtu azarah. Pa LUNGAWINA (consent) mai aia ril a ni —ACCEPTANCE hi! ACCEPTABLE YEAR OF THE LORD tih hi LUNGAWI KUM ti maia lehlin hi zawng a tawngchham hret! PAWMA KAN AWM VE TAK thu, REJECT kan nih lohzia hi i hre chiang teh ang u! Chu chu Mozia pawh khan aitechhin ramin a lo entirlawk daih tawh asin!
Report this comment
October 31st, 2011 at 7:07 am
@22.bmw, i comment chuan min tihlim hle mai. A nung chung ngei a ka hmuh chak pakhat ini e. Vakul, boihapa leh Donald adt. nen hian MI ve ila a nuam awm reuh. @23,critic,i sawi hi hnialkhan tha ve tak chu a ni. Mahse heta ‘she’ tih hi Pharoa fanu anih a, moseh=a born child tihna anih chuan, bible a diklo tihna a ni dawn si. Chuvangin Mosia nu ngei jakobedin Hebrai hming Moseh(mäsä=to draw forth) a phuah anih a rinawm zawkin ka hria. Thanks.
Report this comment
October 31st, 2011 at 7:22 am
@Chawnghilh, keichuan i ‘tabula räsä’ hi a dik thui hlein ka hria. Amaherawhchu, khawlohnaa din leh sual chi(seed) atanga lo piang kan nih avang erawh chuan, ‘Isua ke bul thlenpui’ ngei hi ‘ultimate goal’ chu a ni. He khawvela Setana chhuah zalen anih chhung erawh hi chuan, thlem thluk/bum thluk theih erawh kan la ni reng tho. Chuvang chu a lawm, ‘englai pawh a, ngaihvena, fiah a,in veng fimkhur tur leh inring reng tura min chah lawm lawm ni. Keichuan Mosia ti mosia tu hi chu a naupanlaia Pharoa chhiahhlawhte enkawlna hnuaia seilian lova, nakin lawkah Pathian nung lo betute kutah a la awm dawn tih hre chunga enkawltu Hebrai chhungkua te hi anni tih hi ka tanna tlat a ni e.
Report this comment