Government Aided School hrang hrang te:
Government Aided hrim hrim sikul hi a awm nual thin a. Sorkar hnathawk ang chiah chiaha a enkawl thin chu Deficit school te hi an ni. Retirement benefit leh Medical re-imbursement tih loh ah chuan sorkara thawktu nen inang khat veka enkawl an ni. A hma phei chuan an hlawh tur hi non-planned budget ah ngat dah a ni a, nikhua a lo rei a, planned lam ah dah thlak an ni ta zawk mai pawh a.
Chumi hnuai chiah ah chuan Government Adhoc-aided school a awm leh a, chung te chuan deficit sikul te hlawh ah an phak lo hlek a (tun dinhmunah chuan deficit school nen an inang tawh niin ka hria).
Chumi hnuai leh ah chuan Government Lumpsum aided school a awm leh a. Chungte sikul te chu kum khatah pawisa engemaw zatin sorkarin a tanpui thin. An hlawh pawh private sikula thawkte nen a inang deuh reng.
Deficit School chungchang tlangpui:
Mizoram Deficit School a thawk zirtirtu te thil ngiat leh beisei te hi mi tam takin an hriatthiampui lo emaw ni chu aw ka ti. Deficit School te hi sorkarin a dila a dil te an ni a. Kohhran hian a dil chhuah a ni miah lo. Kohhran sikul thenkhat Deficit a hlankai anih khan a thawktu te zawng zawng pawh deficit status ah dah vek an ni a.
Deficit an nih dawn hian an hlawh tur engkim tihfel vek a ni a, sorkar atangin pay scale fel tak neiin sorkarah Service Book pawh siam sak thlap an ni a. Kumtinin incrrement pawh an nei thlap a ni. Hei hi sorkar kalphung pangai a ni a, thilmak a ni lem lo ve.
Sorkar atanga hamthatna tinreng an dawn vang leh hlawhbi neia an kal vang te, Sevice Book fel tak an neih tho vang te, sorkar hnathawk pangai nen danglamna an neih lem loh vangte pawh a ni mahna, Deficit sikul zawng zawng deuhthaw Sorkarah chhunluh an ni ta a. Kohhran hnuaia Deficit Sikul te erawh sorkara chhunluh a rem ve chiah loh vangin a ngai angin kaltir rih an ni thung a. Deficit an nihna hi thaibova nuaibo a ni lo. He deficit status hi thaibo tumna lo awm ta pawh nise, felfai taka hnathawk tura lak zirtirtu te hi a hlamchhiah ngawt tur a ni lo.
Deficit status hrim hrim hi sorkar hian tihtawp veka nuaibo hmak a duh anih pawhin felfai tak leh fair takin thil a ti tur a ni. A enkawl lai, a chawmlai te an ni a, a tul anih chuan duh thlang thei dinhmunah a dah tur a ni. Deficit a nuaibo duh anih chuan duhthlan tur pahnih – Kohhran hnuaiah thawh zawm zel emaw, Kohhran atanga chhuakin sorkara luh emaw, hemi option pahnih tal hi a siamsak tur a ni. Deficit sikul dang, sorkara chhunluh tak te pawh, sorkarah an thawk zawm mai a. Chutihlaiin thawktu zingah sorkara lut duh lova, Kohhran bel duh tlattu chuan Kohhranah thawk chhunzawmin Kohhran hlawh a la tawh mai tur a ni. Deficit School hi nuaibo leh tihtawp a ni chuang si lo va, a kal ngaiin sorkar hian a la kalpui reng a, chutihlaia hlawh a pe tha duh lo ringawt mai hi, mi tam takin hrethiam ve lo mahse, a tuartu tana a nat turzia erawh chhutpui ve teh u.
Hetiang hi kal dan tur dik tak chu a nih laiin engmah Option pawh siam sak chuang si lovin Deficit Mission school-a thawktute a enhrang nghal ngawt mai hi, a dintu Sorkar thiam loh liau liau a ni. A tirte, deficit status atana a hlankai lai khan he deficit status hi Contract System angin lo kalpui ni ta sela chuan tun tuma thil thleng pawh hi hriatthiam a awlsam deuh ngei ang.
Mahse contract system a ni miah si lo. An pay scale, a tanna, increment leh a tawpna ceiling (6500-200-10500) hi ngun takin han bih chiang teh. Hetiang ang pay hi kum 2001 bawr chho vel khan Mizoram Private sikula thawk te’n an nei em?
4th pay commission anih laia deficit sikula thawk tura lakluh ho te pawh 4th pay angin hlawh pek nghal mai an ni a, chumi hnuah 5th pay siam anih khan pay thar angin hlawh an la ve nghal mai. Hlawh mai a ni lo, arrear zawng zawng nen, engkim sorkar nen a rualin angkhat veka siam thin a ni.
Hlawh a pun reng rengin enhran an tawk ngai lova, step-up anih pawhin automatic in a step-up ve mai. Tuna 6th pay sorkarin a pek tan chiah khan, anih dan tur dik takin deficit school pakhat chu hlawh siam sak nghal an ni a. Mahse, hetih lai hian thil danglam tak a lo thleng ta a, sorkar lam atangin eng thil emaw ruahmanna a lo awm ruk avangin an hlawh pek chhuah tawh pawh rulh tir leh an ni nghe nghe.
Deficit school-a thawktu te hlawh tur hi khawnge a kal bo zawh tak? A hma zawng zawngin an hlawh tur a awm vek a, arrear pawh a pe vek a. An hlawh tur hi thil dangah an hmang a ni mai zawk lo maw? MLA hlawh a pung a, NLUP sem a ni bawk a, budget tihsan a ni chuang si lo, duhtawka an nek ngam ber deficit mission sikula thawktu te hi an tawrhtir mai a ni zawk lo maw?
Tunhma lama Kohhran sikul hlang hlak anih lai, deficit an nih hma daih tawha zirtirtu hna lo thawk tawhsa ho kha chu rawngbawlna avang liau liauva hnaa lut an ni a, zahawm pawh an zahawm hle. Tuna Mizoram Deficit Mission School-a thawk mek zirtirtu hrang hrang te hi, an thawhna sikul a inang lo ang chiah hian Kohhran hrang hrang, inang lo tak tak hnuaia mi te an ni a, kan ngaihdan leh hmuhdan a inang lo viau maithei. Anni hi Pastor tur emaw, Evangelist teacher tur emaw Missionary tur emaw atana lak an ni lova, Sorkar atanga hlawh la tura lak, chutiang ang chiaha advertisement pawh hmua hna dil thlap an ni hlawm tih erawh hi chu hriatpui a tul khawp mai. An dinhmun hi mahni dinhmunah inchantir ta la, tunah hian thim zingah awmin kalna lam tur reng hre lo leh tuilairapin i awm mek tihna a ni ang.
Mizoram Cable TV lama fakselna leh chanchinbu lama SMS hmanga ngaihdan thawhtu te paw’n na tak takin Deficit School-a thawktute hi an sawt nghek nghek thin. Mizote hi thil hrechiang mang hlei lova huaisen taka thil sawng pawp pawp thin kan ni a, sawi sual palh hi chu a pawi lem lo, a thamral leh mai a. Ziak sual palh erawh a pawi a, a ngheh tlut tawh vangin nasa takin mi rilru a hliam thei a ni.
Ngaihtuah zui atan:
1. Deficit sikul-a thawktu te hi kan itsik mah mah thin a ni lo maw?
2. Kohhran sikula thawk an nih avang hian kan hmu hniam lutuk thin a ni lo maw? Mihring pangai, na ti thei, hrehawm tithei, riltam ve thei tho an nih hi.
3. Thil hre chiang mang hlei lo hian intifing takin thil kan ziak chiam chiam thin a ni lo maw?
4. Kohhran mipuite sum thawh khawm hmanga chawma enkawl tur ni ta se, tuna an hlawh ang zat lai han pe thei tur hian kan Kohhran budget te hi tihsan belh a ngai viau lovang maw?
5. Deficit status diktak hi a hrechiang zawk te’n lo ziak teh u.
6. Chhungkaw tam tak sumhnar a ni a, an inghahna, an eizawnna ber a ni. Deusawh mai lovin thil awmdan chiang takin hriatpui i tum teh ang u.
7. Deficit sikula thawktu te hian an kuang lo an nawr takzet em le? An chanpual tur dik tak an nawr zawk a ni mai lo maw?
A tawp khar nan Thiana tawngkam ka’n hawh lawk ang e. Education Department atanga “appointment order emaw approval letter” emaw hmutu te zawng zawng hian engah pension nge an hmuh ve si loh? “Deficit Status ah hian in qualify ta lo ve” tih pawh ni si lova 6th pay pek loh ngawt te hi India Dan-pui-a kan Fundamental Rights – Right to Equality (Article 14 – 18) a khawih buai a ni zawk lo maw?
Similar Posts:
- Mizoram Deficit Mission School Nov. 8 atangin indefinite strike
- He thu hian ngeng a chhun thuai thuai nia
- Mizoram a sorkar hnathawk hlawh hi a tam lutuk em, Tax pe ve dawn ta ila
- Zirtirtu hna
- HSLC Exam tih tawp ?
(Y) 
November 4th, 2011 at 9:03 am
A pawi hle mai. Ka sawrkar chak tak hian ngaihven thuai se kan va duh em. Nuar lo thei lo dinhmuna an awm ta hi eng kawng zawng pawhin a pawi a ni, nawrh te chu an han hreh ve tehreng nen.
Report this comment
November 4th, 2011 at 9:14 am
Tukin chu as_K a rang tlat!
Report this comment
November 4th, 2011 at 9:16 am
6th pay in la la ve tlat lo hi ka tuarpui che u a, la ve ngei tura in nawrna hi ka support tlat. Sorkar hnathawk dang anga pension te in beisei tlat erawh ka support lo nasa che u. Sorkar hnathawk dang te benefit dawn zawng zawng in dawn ve hi chu Sorkar hnathawk dang tan a fair miah lo. Sorkarin ro a ro a rel sak lo che u a, entirnan Synod HSS ah chuan Presbyterian mi leh sa lo chu a ngheh theih lova chutiangin Baptist HSS ah pawh a ni tho a. heng zawng zawng Kohhran inthlunbikna te hi thiat a nih loh chuan Sorkar hnathawk dang anga ngaih ngawt theih chu in ni lo.
Report this comment
November 4th, 2011 at 9:23 am
He issue ah hian comment ka chhiar tam viau va, mi tam ber chuan an lung awilohna hi sorkar ah ni lovin kohhran ah an thlen tur ani, an ti. Pathian hnenah, ti tawk pawh an awm. Sorkar lah hian sum an harsat lai alo ni khanglang nen. Mahse minister in a lo sawi hmuh zau pek a, an la bengchheng rih mai thei.
Report this comment
November 4th, 2011 at 9:23 am
Good Post.
@.As_Khiangte :1st theihna thuruk min lo hrilh ve teh
Report this comment
November 4th, 2011 at 9:33 am
Deficit a hlankai a nih dawn khan pension benefit sawi tel a ni lova, a thawktu ten retirement benefit hi an nei lo reng a ni. Pension pek hi sorkar bat a ni lova, pektir tum pawh hi a dik lo. “State dangte pawn an pe” tih thawm a awm avanga dil tel ve mai an ni e.
Deficit ah a lo hlangkai tawh a, mi tamtak ten innghah nan leh eihmuh nan an lo hmang tawh. A nih dan tur dik takin hlawh hi siam sak rawh se. Tunah pawisa a nei lo a nih pawhin, lak ve phalna order siam se. A neih veleh a pe mai tur a ni.
Report this comment
November 4th, 2011 at 9:34 am
A van mak teh nuaih vele. Fel fai tak hian thil hi relfel thlap thlap nithin sela chuan tlem chuan awmzia a awm tur ania. “He said, she said” ang chi hi chu rilru hah taka chanchin ngaihventu tan a hahthlak duh dawn em asin.
Report this comment
November 4th, 2011 at 9:37 am
@EmEich, thil dang ngaihtuah lo a post chhuah hun awm vela lo chan char char a ni mai, chet ran a ngai bawk, vannei a ngai bawk, exer lak thrat leh chaw ei thrat a pawimawh, kerh kerh ti lo mi nih a ngai bawk
Report this comment
November 4th, 2011 at 9:54 am
@6 Caribou,
Report this comment
November 4th, 2011 at 9:57 am
Report this comment
November 4th, 2011 at 9:58 am
Zirtirtu hna hi kei ‘noble profession’ ka tia.
Report this comment
November 4th, 2011 at 10:05 am
#11 amen.
Report this comment
November 4th, 2011 at 10:14 am
Thil hi chu, fair taka tih a tha. Fair lo deuh ni a lang pawh ngawih liam pui mai mai lova tih dik tum pawh a tha. Tute emaw break nan leh tute emaw hlei hluak taka duhsak na atana Pay Commission hman te hian, hlawh pun avanga lawm aiin lungawi lo leh rilru na kan siam tam mai mai a ni. A pun chuan rual takin pung mai se a tha.
Report this comment
November 4th, 2011 at 10:31 am
Central sorkar a 6th Pay Commission recommend kha central sorkar (leh UT) a thawkte tan chauh ani a. State ah chuan an sum neih milin pay committee an siam ve thei. Automatic a central sorkara thawkte entitlement lo pek ve rignawt an tum lai khan secretariat leh directorate vela thawk chauh an ngaihtuah a. An rin ai daihin liability a lo sang si a. Tunah pawh sorkar plan budget a 70% lawih hi hlawh leh a behbawmah a kal ral der tawh ania. Ram paingsual kan nihna chu hetah hian a chiang khawp mai.
Report this comment
November 4th, 2011 at 10:50 am
NLUP power hi a na ngei e
Report this comment
November 4th, 2011 at 10:50 am
‘State dangte pawn an pe’ tih thawm a awm avanga dil tel ve mai an ni e” zia lo thin ve aw.
Report this comment
November 4th, 2011 at 11:10 am
Save keuh teh ang. A vui nasa pawl tak ka ni awm e. Mizoram zirnaah hian Kohhran sikul tluka thawhhlawk an awm ka ring lo. Chutiang zawnga thlir ringawt pawhin an phu a ni. Kan hotute hian antih loh tur thil tamtak an ti foin ka hre ve a. Lo in ngaihtuah chiang deuh deuh sela a tha ang.
Tin, tuna sorkar buaina em em chhan hi 6th Pay an insawibat vang kha ni ta berin a lang bawk.
A changtu Minister lah hi a lo TURU vak lem bawk si lo va. Ka rin a ang lo tak tak he pa hi.
@Awmawmpuia(#3): I thusawi khi a dik chiang em? Ka hriat ve dan chuan Baptist Thelogical College-ah(AICS) thleng khuan kohhran dang ami thawknghet(substantive post) a awm asin. Presbyterian nula, Missioanry atana lak pawh Baptist hian an nei. Tin, a enkawl lai sikula thawkte phei chu awm nuaih mai. Presbyterian pawh a nih ve deuh tho ka ring, ka chiang lem lo.
Report this comment
November 4th, 2011 at 11:12 am
6th pay an la dawng ve lo hi pawi ka tihpui.
Amaherawhchu:
1. Pension Sorkar a tanga lak an phut ve erawh awmlo ka ti.Sum indaih lohna a vanga Pension dan hmang an siamthat hnu lehnghal a.
2. Mizoram Sorkar hnuaia thawktu dang te khawi hmunah pawh awm thei tura sawn theih an nih laiin, an ni chu hung bik,ta bik nei,huap bik nei an ni tlat.Sawn kual theih an ni ve lo.
3. Kohhran/School Managing Board in thuneihna tam zawk an chan na hmun a nih miau a vangin, Sorkar School nen chuan ang khata en chu a harsa khawp ang le.
Report this comment
November 4th, 2011 at 11:13 am
Teacher ho hlawh leh NLUP hi a sawi zawm kan tum anih chuan a awihawm nan proof na documents han post ula. Hmuh pawh a chakawm alawm le.
Report this comment
November 4th, 2011 at 11:16 am
Mawhphurhna zawng zawng phur tura sorkarna siam ngam a, intiam thlap anni bawk a, a lungawilo leh sawisel tur nei tawh phawt chuan han nawr vir luih luih mai ang u hmiang. Hehe.. noi
A ti fel theitu ni mang si lo a, midang lo sel vak vak hi chu a ho ka ti ve khups mai.
tren tren.
Report this comment
November 4th, 2011 at 11:36 am
@17 Ignatia, tunhma Science leh Mathematics thiam kan tlem em em lai te kha chuan lakngheh an awm tawh tih chu ka hria. Tunah chuan Presbyterian leh Baptist Institution ho ah hi chuan a ngheh theih tawh loh Kohhran dang tan. In AICS lam erawh chu ka hre pha lo tlat. Tin, deficit school a ni chiah lo deuh a. haha.
Report this comment
November 4th, 2011 at 12:11 pm
#21 Eng kohhran pawh nise decision maker chu mihring tho an nia, duh zawng, ngainat zawng leh it zawng chu an nei ve ngei ang a, Kohhran dang dahngheh theih loh tih chu DAN ang em chuan a awm dawn maw ni le?
Report this comment
November 4th, 2011 at 1:11 pm
An lo sawi hmuh tawh a nih si chuan an tihsak ngei a ngai ang.
Report this comment
November 4th, 2011 at 1:26 pm
Deficit sikul Zirtirtu te hi chu political apoint an ni lo asin mawle, an result a tha thei ropui si, duhsak awm ngawih ngawih ani
Report this comment
November 4th, 2011 at 6:16 pm
@Awmpawng(#21): A post tu hi a zahawm viau nangin ka’n lo chhang leh lawk che. Eng tik hun lai tak sawi che maw i… Maths leh Science thiam tlem lai chu kum zabi hnuhnungah pawh 80′s chho vel daih ni turah ka ngai. Tuna Higher Secondary ang zawnga zirna kalpui a nih hnu pawh hian an la nghet chiang alawm. Tunah pawh hian an nghet zel ang Bawiha. Nghet lo tura lak ngawt thu va awm suh.
Report this comment
November 4th, 2011 at 6:23 pm
Ka hriatthiam loh pakhat chu, Presbyterian Hospital, Durtlang employees te pawhin pension an nei a – sorkar atang lovin. Engatinge school ho hian sorkar atangin an demand le? New Pension scheme ang hi em ni an demand, MDSMA ho hian?
Report this comment
November 4th, 2011 at 6:58 pm
@Zualtei: Helai tak hi tawng fimkhur ka mamawh khawp mai. Deficit sikul thenkhat hian pension benefit an nei ve tlat lo. A bak chu ka sawi thui lo mai ang e.
Report this comment
November 4th, 2011 at 10:19 pm
@awmawmpuia, a ngheta lak hi chu an awm na meuh mai. A hna awmdan azir a ni zawk e.
Pension han tih hian a chiang chiah lo maithei, retirement benefit tiin sawi ta zawk ila. 1st sept’ 2010 atang khan Mizoram sorkar chuan New Pension system a adopt a, 10% saving scheme a ni. Chungte pawh chu a huam tho a ni. Amaherawhchu, retirement benefit hi chu point pakhat ve mai a ni.
Sorkar hian 6th Pay (Revision of Pay) hi a hnuaia thawkte, Deficit Mission School-a thawkte pawh tiamin,a pe vek tur zawk a ni. He ROP hi a hman tlat tawh avangin. Tin, contract teacher/lecturer thahnem tak deficit school-ah hian a dah bawk a. A then chu Kum 10 dawn lo thawk tawhte an ni. Mahse Gov’t institution-a kum 2/3 lek lo thawk tawhte pay a revise sak daih tawh laiin deficit-a thawk, sorkar lak ngei, senior ve tawh viaute hi hlamchhiah an ni leh tlat bawk si.
State danga christion/mission school tam takte hi chuan duhsakna an chang viau hlawm a, mahse kan ramah zawng a la har a ni ang e. Kohhran school-a thawk kan nih avanga inpekna thuk zawk nei tura beisei leh tuar chak deuh zawk tura min ngaia min ngaihsak tha vak duh lo a nih chuan kan tuar zel mai a ni ang chu.
sawi tur a tam, mahse ka duh tawk rih.
Report this comment
November 5th, 2011 at 1:46 am
He’ng harsatna hrang hrang in hmachhawn lai hian Kohhrana Education lam changtute hi an ngawi reng mai nge, an theih tawkin Sawrkar lamah palai hna an thawk?
Report this comment
November 5th, 2011 at 2:34 am
Post chiang tha leng lawng hle mai
Deficit han tih ringawt pawh hi a nalh chiah lo ani.
Education department hi PWD aia tenawm deuh hlek ah an chhuah thin in ka hria!
Kan sawrkar ‘chak em em’ hian a solution ngaihtuah vat rawh se!
Report this comment