– C.L.Rema (IAS Rtd.)
[Source : MCPA Annual Magazine 2004]
Kum 1953, October 2, Gandhi pian champhaphakah khan India rama District tinah Community Development Project Block hawn tan a ni a. Hetih hun lai hian Mizoram hi Assam State chhunga District pakhat, Lushai Hills District tih a ni a. Mizorama Community Development Block hmasa ber “Lushai Hills Community Development Project Block” pawh hemi ni hian hawn ve a ni a.
Project Executive Officer atan Lunglei-a SDO ni lai Pu B.W.Roy, A.C.S chu dah a ni a. Nimahsela 1954 kum tharah chuan Pu B.W.Roy chu Mokokchung, Naga Hills-a S.D.O ni turin sawn a ni leh ta a. A kalsan hmun ruak luah turin February thla tir khan Assam Sawrkarin min dah ve ta nghal a.
Kan thawh tan tirh chuan Chanmari-a Pu Pachhunga in pakhatah office kan nei a; tin, Bawngkawn (Tuna Brigade Hq)-ah khian hmun kan khuar ve ta a, kan insak tam tak pawh tun thlengin a la ding ni awmin ka hmu. Chutih lai chuan helai hi Ramhnuai vek a la ni a, kawng kan lai chawp a, in kan sa tan ta a. 1955 tawp lamah kan luah chho thei ta hram a.
Community Development Project-in a tum ber chu Thingtlang khaw tinah hmasawnna (development) hnathawh tanpui a ni a. Thingtlang mite chu lo neitute an nih deuh vek avangin Agriculture hi ngaih pawimawh ber leh uar ber tur a ni a. Kan hotuten min zirtir dan chuan, “Thingtlang mite chu enge an mamawh bera, an duh hmanhmawh ber in zawt ang a, chumi lam hawi zawng chuan hmasawnna hna chu in thawh tanpui dawn nia,” an ti a.
Hemi hna thawk tura min pui turin mi eng emaw zat min pe a. Officer pathum, viz. Dr.Zokhuma (Vety), Dr.Selbuanga (Medical) leh Pu Sen Gupta (Agriculture) te, Gram Sevak 10, Social Education Officer pakhat, Health Visitor pakhat, Nurse Midwife 3 leh midangte an ni a.
Office hran kan nei bawk a, Head Clerk, UDA, LDA leh Typist, peon te an awm bawk a. Kan bial chhung chu hmarah Neihbawi, Chhakah Lunglei kawng tlangdungah Chhingchhip thleng, chuta tangin Hmuifang, Chhimlamah a ni a. Khawthlang lamah chuan Sairang kan bial tawp a nia.
Thingtlang khuaa kan zina an ngaih pawimawh ber kan zawh chuan, Sikul an ti deuh vek mai a, chumi dawtah tuikhur a ni leh a. Hetih hun lai hian thingtlangah chuan Primary Sikul an nei deuh vek a, nimahsela an Sikul chu a chhe em em vek a, “Sikul in sak that chuan a chung khuh nan rangva bundle 5 kan pe ang che u,” kan ti a.
Kum khat chhungin Sikul in thar an nei thei ta fur mai a. Govt. High School (Thingpui huan), Govt. M.E Schoo; (Sikul pui), Dawrpui Govt. Aided M.E. School, Welsh Mission Girls School, Kulikawnah leh Chaltlangah an awm a, Primary School thar Melthumah te, Thakthingah te, Venghluiah te, Chhinga Vengah leh Bawngkawnah kan hawng thar bawk a, Sikul in chung khuh nan rangva bundle 5 theuh kan pe bawk a.
Thingtlang lamah chuan Darlawngah leh Baktawngah leh Sihphirah M.E.School kan tan a. Thingsulthliahah Primary Health Centre kan din bawk a. Hemi bakah hian tuikhur siam nan khaw tinah cheng 500-800 te kan pe a. Hei hi Cement lei nan a ni ber a, a bak chu anmahni thawh vek tur a ni a.
A tira kan sawi ang khan kan ngaih pawimawh ber chu Agriculture a ni a. Thingtlang lama kan hnathawktute Gram Sevak ho chu Agriculture Training nei vek an ni a. Thingtlangah a theihna hmun apiangah terrace laih te, contour bunding te an zirtir a, thlai chinna hmun nghet siama ei leh bar lama intodelh theih dan te an zirtir bawk a.
Hemi hun lai hian Sihphirah khian in 120 an awm a. Nimahsela in 60 vel neih khawp chauh ram an nei si a. Chuvangin mi tam tak chu thingtlang lam atangin bawng chhawra buh phurin Aizawlah an hralh a, chu chu an eizawnna a ni a.
Hemi hun lai a kan Gram Sevak chu Pu Lalzinga (Zingpawla an tih mai) inah a awm a. Pu Lalzinga hian bawng 10 rual lai anei a, a in bulahhuan zau vak lo a nei bawk a. Gram Sevak chuan Pu Lalzinga chu , “Zikhlum chin dan ka zirtir ang che ” a ti a, Bawng ek leitha leh fertilizer hmangin an bei ta a. Kum 1954 tawpah chuan Pu Lalzinga chuan a zikhlum manah cheng 3000 (sangthum) a lei hman a. Hetih hunlai hian zikhlum chu ser-ah cheng 1 a ni a. S
ilchar atangin motorin an zuk phur a, bazarah an hralh thin a ni. Pu Lalzingan zikhlum man atangin cheng 3000 a hmu tih an hriat chuan a khaw pumin 1955 kum chuan zikhlum chu an ching ta a. Silchar atanga zikhlum phurh angai ta lo va, bazarah ser-ah seki leh dere (tunlai pawisa chuang 40 ang hu) in an hralh thei ta a. Kum 1956 kha chuan Sihphir khua chuan rangva in chung an nei thei ta deuh vek mai a ni.
Motor te an lei a, chhip phura bazar kal ngai lovin motorin bazar an thlen thei ta bawk a. Hei hi khaw thenawmte pawhin an lo hria a, tan an la ve ta a, Aizawlah nitin bazar te a awm theih phah ta a ni. Hei hi Mizoram pumpui tana zir tur leh entawn tur tha tak niin ka hria a. Thlai emaw, thei emaw, hralh tla mi kan chin phawt chuan a rah kan seng ngei ang tih hi hai rual lohvin ka hmu chiangin ka hria a ni.
Mizoram hnufualna bik pakhat chu kawng kan nei lo hi a ni a. Kum 1954 lai chuan Silchar kawng pawh hi a la chhe em em a, Bus service-te pawh a la awm lo va. Phai lama kal duh chuan mi motor (truck emaw Jeep emaw) kal remchang chan mai loh chuan kalna dang a awm lo va, Lunglei kawngah khian Serchhip thlengin Jeep a kal thei chang chang a. Sairang thlengin Jeep a kal thei bawk.
Aizawl leh Thiak inkara khuate hian lamlian awmna hi Jeep kal theih nan siam an duh a. Kan kutah pawisa a awm tlem avangin khawtinin mahni ramri chhung theuhvah theihtawp chhuahin a harsa zual lai beih nan Sawrkar pawisa tlemte kan neihchhun chu hmang ila kan ti a. Anni pawhin chu chu an lo rem ti ve a. Chutichuan harsa takin Thiak Bungalow thlengin Jeep kal theihin kan siamta a. Kum 1956 tawp lam khan kan zo thei chauh ani.
[Part – II ah chhunzawm tawh mai ang, a sei deuh a ni.]
Similar Posts:
- Thlarau Rih Zawng
- Mizoram Development Intan Dan II
- Sikul kan inkaltirna te hi an tha tawk em?
- Panlai Nun – Lirthei Ngaihsan Lai
- Ngaihtuahna ti thui
November 30th, 2011 at 2:09 am
Zing thawh hunah chhiar ang.
Report this comment
November 30th, 2011 at 2:14 am
A ngaihnawmin hruaitu hmasa te an lo thawk ropui hle mai. Hengte hi thangthar ten i hre ve zel ang u khai.
Report this comment
November 30th, 2011 at 3:05 am
1st….angah ka in ngai tho…
chhiar phawt ang lem……
Report this comment
November 30th, 2011 at 5:47 am
Chhiar a nuam khawp mai. Good morning…….
Report this comment
November 30th, 2011 at 7:21 am
Va ngaihnawm ve. Thiak Bungalow khi 1903 a sak a ni a, 1956 ah jeep a thleng thei ve chauh a ni maw!
Report this comment
November 30th, 2011 at 8:34 am
A ngaihnawm hle mai . a bengvarthlak e .
Report this comment
November 30th, 2011 at 12:31 pm
Post tha hle mai
Chhiar nuam ka tih zawk tak ani. Intodelh ang u le.. 
Report this comment
November 30th, 2011 at 1:54 pm
E khai ! Post vil hman lo, tunlai chu engtizia nge maw ni hranghlui ho article hlui ka hai chhuak a, rambuai hma lam a kan lo advance hman zia kha ka zuk mitthla thin a, rambuaiin a kan moral a tih chhiat zia ka chhut hian lung a awi thei lo ve.
Report this comment