mi(sual).com

Han ti ve pawp teh ang, post khat bawkah. Khawtlang lunglen te hi a lo nawm ve khawp hi a

Awle hei kumpuilingleta kan lo nghahfak, Christmas chu kan lo hnaih leh tawh hle mai a. Chumai a la ni hlei nem, kum tawp a lo hnai bawk a kumtharin min lo hmuak leh ta ut mai bawk si nen. Naupangho tan thil thar awh tur zawn hunlai a lo in pha man chho leh a. Thalaite tan lek phei chuan ka riang bik ang tih hlau takin kawppui nei lote pawn a chhia a tha kawppui turte kan zawng leh ruai tawh a; a thing fu deuh lah an awm ve leh nawk thin bawk.

Tuipui ral rama hla phuah thiamte pawn-

“The time of year to be with the one that you love”

te an lo ti hial a. Chuti khawpa hun pawimawh leh nuam. Khawthlang lamah te phei chuan induhsakna leh hmangaihna lantirna hunahte an lo hmang tawh thin reng a. Inhala, indo reng thinte pawn ingaihdamna hunahte lo hmangin insiamthatna hunahte an lo hmang ve chawk bawk.

Keini ramahte chuan, mi ramte anga a ti Christmas tura kan lo ngaih thin vurte tla ve lem lo mahse, “BER” thla a lo kai phat tawh chinah hi chuan khaw awm dan ten lungte a han kuai tan a kan rilrute pawh a Bethlehem ruih tan bawk a. Mut pahin kum kan hman dante thlirletin, thenrual thate nena kan hlimlai nite mitthlaah a rawn zam tan a.

A hma lawk a tlang pang hring dup thinte pawh ruah tui a lo tlem tak avangin a lo ro rire tan a. Thlasik ni kawla rawn chhuak chiai chiai chuan nihawi par ro rim rem a dai tlate chu a rawn en de sit set tan a. Han hawi vel ila ralkhata tlang pawng fir ferte pawh tiau chhumin a lo bawh paw chiai chuai a.

Hetiang a khua a lo inmung chhoh tan tawh hi chuan, a hma zawnga “symphony of destruction” te ti bur bur thinte pawn kan hla phuah thiam Pu Rokungate ho hla phuah ngat lo chu tiin

“Bethlehem mual tlai tla engah”

tihte chuan rilru a luah hneh tawh zawk thin a.

Mitinin a kum kalta aia hman nawm theuh tumin kan han inpuahchah leh a. Veng hrang hrangte pawn Gospel campingte an chher chhuan chho leh duat tan bawk a. A mi lian atanga a te berte thlengin mahni fate tan tiin theitawp chhuahin thawmhnaw mawi leh thil tharte an han lei a. Chutah ram changkang zawkte pawh a an lo tih ve fo thin, hunpui laia duty turte insiamin, a thim a var thlu lova  “hrui pawt pawl” te pawn phih thluk tur mawlh an zawng leh ruai tawh a. Buai fe fete pawh kan la awm leh hmel viau.

Ni dang zawnga “tu dang mah ka ngai lo kei leh ka music playerte emaw a awm chuan”, ti thinte pawn he hunpui a lo in her chhuah dawn meuh hi chuan mi zik mup mup laia, mahnia room a khawhar taka,”kei a riang chan tawk” tih mai chu dawn ngam bik lovin khawlaiahte an rawn lim chhuak ve ta zuai zuai mai bawk a.

Hlate khua a haw turte pawn kiam lam an han pan tan a. A then lah pek “khua hmun a len loh zawng” tiin hreh tak chungin inthen a lo tul leh thin nen, an kalna tur motor rum khu vung vung karah chuan inkuah vawng vawngin an han in mangtha a.

Bazar lam pawh mipui khat hmur karah a thenin
“Hlim takin I chawimawi ang remna Lal lo piang lawmin”
te an lo tih lain a then lah in chhun nisa hnuaiah
“Aw zan thianghlim” te tiin an lo chhawn ve mek bawk a. Hmuntin maiah Christmas lam hawi hlate a ri chuah chuah a. “Sale,sale,sale helamah a tlawm” ti a au thawm lah bang lo. Mahni thil en duhte pawh en tha hlei thei lo khawpin mipui insulpelin min han chil leh chiam anga.

A tu a te pawh hlim sarh hmelpuin kan han in kal pel leh zut zut bawk anga. Lal pian champha lawm tur kan ni tih pawh hre ve lem lo thil nung lote thleng pawhin kan hmu tharin, kuhva chhakna bang sen neih nuaihte pawh kan hmu mawi zo leh vek tawh a.

Urlawk zante kan han thleng leh ta cheng anga, nu leh pa mahni fate awmna hre lo leh ngaihtuah luat vanga zan mu pawh chhing lo an awm leh nual anga. Kumdangahte chuan veng hrang hrangah kohhran leh thalai ten zaikhawmnate neiin hunte an hmang thin a.

“Kar hla a lenrual lung duhte in damlai em mi le”

tihte an han sak phei chuan kum kalta chhung zawnga kan thian kawmte rilruah an rawn thar leh thin a, inhmu thei lo mah ila kan rilruah in ngaihdamna leh in thianthat tharna a rawh tuh thar leh a.

Kan han bang a mahni panna tur lam lama kalte pawh kan han intawk leh suau suau anga. Thalai tam tak zauthau tawhte tan chuan a hrilh hai thlak leh hle mai dawn thung.”Khap association” hovin kan kawng kal lek pawh min han mit mei leh reng anga. A chang leh, hmanhmawh tawh nen a “pawt ding pawl”in lai em em in min han pawt ding leh ang chet chawt anga. Chutah, kan kalna turte han sawi ila, a eng amah hmain min dawp titih leh nghal ngawt ta mai thin a.An duh loh ang deuha han chhan lahin min nam ang sawk sawk a.Christmas urlawk zan a ni tiin thawm pawh dim thei anga tha taka hman tum pawn kalna tur thlen hma hmain thinrim teuhin kan in chhuah phah fova.Tamtak phei chuan thil tha lo tih phah nante kan hmang fo reng a.

Kan ni nghahfak ber chu a lo thleng leh anga, kum dante ang bawkin naupangho tual laiah phingphihlip tualchai ang main an han leng leh vel anga. Chungte han hmuh chuan kan nunhlui lunglenna chu min han kaihthawh thar tir leh thin a.Chutah vawin chauh hi Christmas hla a hun taka sak theih hunte tiin am takin hlim loh bik hlauin kan han hmang anga. Khawtlang lahin Biakina kal lo chu thil ti sual turah min han ngai leh nghal ngei anga.

Tum anga tam biakin lamahte han lan tum ve mahila nu leh pa, pitar putarte zawk ten “khuang hnih hla lo chu” an lo tih hlur tawh bawk si chuan, thalai solfa hla sak chak zawk zawk tawh te tan phei chuan tum ang the ruaiin Christmas pawh a puiin a manhla lo duh phian.

Christmas vuak velte a han liam a kan hla phuahthiam leh zaithiam mual liamta, Pi Lalsangzuali Sailo te ho rilruah an lang leh ta ruih mai a.Kumtawpni tlaia ni tla tur eng sen ruih ina kawl tawp thleng a in zarpharh hnuaia sava thlawk noh nohte han thlir laia

“kum hlui aw kum hlui kan ti vawng vawng”

tih an lo rik toh hi chuan, kan thiante eng vak a kan ngaih loh thinte pawn lung anti leng ve ta zel mai a. Ui viau mah ila Khuanu rel a ni miau si nen, hupbeh a innghahtir theih a ni bawk si lova. Chuvang chuan he hun tawite hi am ten fimkhur takin hmang theuh ila. Hunte nite hi a ral zel a, he hun lawm awm leh hlimawm tak lo thleng tur hi insiamthat nan hman tum theuh ila. Kan thil tih sualte pawh kumhlui hi liam tel pui tir a, kumtharah chuan nun thara nun theuh I tum ang u.

Krismas Chibai vek ule.

Similar Posts:

• ‘Mas kan hnaih leh ta hle mai…..
• AIDS vei thar a nih saw……
• It’s that time of the year again!
• Merry Christmas!
• Krismas a hnai leh tawh sia, ruai theh lam i sawi leh tawh mai teh ang u

Recent Posts:

• FANCHUN
• Chiahpuam Part II (Sawrkar hian hmalakna a nei tawh em?)
• Lal Isua Leh Nikodema {Sunday Pual}
• Thihthiap
• KAINA’N MI THAH A HLAUH THU LEH THLAH INANG LO

This entry was posted on Wednesday, December 7th, 2011 at 7:00 am and is filed under Christmas. You can follow any responses to this entry through the RSS 2.0 feed. You can leave a response, or trackback from your own site.