mi(sual).com

Duhtak Connie, German lam hotupain min rawn pan a, hlim nui sang chungin a kut rawn phar chhuak a, “Hans Wolf-a Dusseldorf khua ami, Rimawi tumtu pawla Cello chang ve thin ka nia, Krismas chibai le” ti pahin ka kut chu a rawn vuan a, a han hmer vawng vawng mai chu, I suangtuah thiam phak bak a ni ngei ang ka ring. Keipawh chuan, “Captain Jim Macpherson-a, England a Dorset khuaa Sikul Zirtirtu ka nia, Nangpawh Krismas Chibai le” ka han ti let ve a.
Nuisang chungin, “Dorset I tia law?, ka hrechiang the a sin” a ti ta mai a.

Kan eiin kan in dun ta a. Kan han ti ti tak zelah chuan, Saptawng pawh a pai lo tluk a ni e!. Mahse, Dorset khua hi a la hmu ngai reng reng lo va, England leilungah pawh hian a ke a la nghat chhin lo tih te ka hre leh ta zel a. Sikulah English Subject-ah an lo zir thin hi a lo nia. Tin, Saptawng thawnthubu chhiar peih tak mai mi hi a lo ni roh a, a lehkhabu ngainat te chu, Thomas Hardy-a ziah ‘Far from the madding Crowd’ tih te kha a lo ni nawk mai a, hrelo zia a lo ni lo ve.
Nupui a nei tawh a, thlaruk liamta mai khan Fapa duhawm tak mai an lo nei nghe nghe hi a lo nia. Ka han hawivel chuan, hmuntin maiah chuan, Kawr Pawdal ha leh kawr uk ha hi an lo tla ho nuai nuai mai a, mei an zu a, an eiin an in ho bawk a, thenkhat hlim takin an lo nui ho bawk bawk hlawm bawk a. Krismas Cake(Marzipan) I ur ngei mai kha Hans Wolf-a nen chuan kan ei dun a, Cake a ei tawh zawng zawngah tui a tih ber thu a sawi chhuak ve hial a. Dawt a sawi ka ring lo, Hmelma ani na a, kan rilru leh ngainat zawng a inang fuh kher em mai. Connie, chutiang ang reng reng a, Krismas Party hlimawm chu ka la tawng ngai hauh lo mai nia!

Tute emaw hian Football an lo kawl a, an rawn lachhuak a, an Kawrchung chhah pui pui te chu tiang khawmin Si banah an hmang a, England leh German sipai te chuan Football an khel ta a, an hlim ngei mai. Hans Wolf-a nen chuan kan pawlte ve ve chu kan lo fuih a, Hans Wolf-a chuan. “Jim Macpherson, hetiang hi Kan indo dan tur dik tak zawk chu a niin ka hria; Football khelh avangin mi tumahin an nunna an hloh kan hre ngailo a, Tumah Fahrah an nih phah lovin, tumah an hmeithai phah hek lo” a tih chuan min hneh hle ani.

Kei pek chuan, “Cricket nise ka va ti em.” Cricket ah na na na chuan kan han hneh chiang khai dawn mai si che u a” ka han ti a, kan nui dun bawk bawk a. Mahse Connie 2-1 in kan hneh ta lo hlauh a ni. Mahse Hans Wolf-a chuan, “Kan goal aiin in pawl goal a zau zawk tlat a, a fair vak lo anih kha”, tiin min la hnem talh a.

Hun leh tuilianin min nghak hek lo le, Football an zo tawh a, kan ei leh intur te kan tlan zo thawkhat tawh bawk a, tlai khua a lo ngui tan ta bawk a, la kham loin la inngai teh mah ila, ‘ mahni Camp lam pan hun ani ta’, tih chu tuman kan hai si lo. Hans Wolf-a chu a nupui leh fapa a hmuh thuai theih nan duhsakna ka hlan a, Indona chu tawp thuaiin, mahni in lama chhungte kan hmuh thuai theih ka beisei thu ka sawi bawk a.

Hans Wolf-a pawh chuan, “Chu ngei chu a tu lam ve ve pawhin kan duh leh thlakhlelh chu a ni tih a chiang khawp mai, Jim Macpherson, fimkhur tak khan aw, he hun hlimawm tak kan hman leh nangmah ngei pawh hi ka theihnghilh leh thei tawh ngai lo vang” a ti ve bawk a. Min thlah nan a inkheng khawng auh a, hreh hmel takin min kalsan ta a. A liam dawn tepah vawikhat chu a ban a rawn vai leh hram a, a bak chu Kawr pawdal ha ho an tawmna khuar lam pan karah hriathran theih a ni ta lo.

Zan lamah pawh chuan, German lam Camp atang a Carol hla an rawn sak chu a hriat theih a, “Stille Nacht, (Silent Night)” tih hla ngei mai chu German tawng leh English inpawlhin an rawn sa a, Kan pawlte pawh chuan, “While Shepherds Watched” tih hlain kan lo chhawn ve a, Chutia engemawchen, zaia kan inchhawn hnu chuan, kan reh ta thiap a. Kan damchhunga kan theihnghilh leh tawh ngai loh tur hun hlimawm leh hlu tak kan chang ho a, kan tan a va hlu em, ka damchhung zawngin ka theihnghilh leh thei tawh ngai loving.

Duhtak Connie, Nakum Krismas hunah chuan, tuna kan indo avanga krismas kan hmang dun theilo te hi chu, Mangchhia kan mang a, kan han thangharh ta daih ang chauh ani tawh dawn si a, Vawiin atang khan, a tu lam pawl ve ve pawhin Indo kan kham tawh zia leh Remna leh Muanna kan thlakhleh zia kha a chiangin ka hria a, hlim takin Kan awmdun leh thei thuai dawn tih hi ka chiang a ni.
(Tawk leh phawt aw….)

This entry was posted on Wednesday, December 7th, 2011 at 12:00 pm and is filed under Christmas, Luangliam. Both comments and pings are currently closed.