mi(sual).com

Zing Dar 7 vel muttui lai tak hian ka room ah a exer la zo hi thlan tla hluam a rawn lutin, mi rawn sawi harh a
“Thianpa, ka tel ve dawn”
“Engah maw “
“ LPS Pro fight ah”

Zingkar harh hlim, thawhphan lai ni mahse ka nuilo theilo, ka nui vak vak a, ani lah chu a thutak phian si, ka inthlahrung ta deuh a, “engtik nge an neih leh dawn a” ka han tih chuan phur fahranin “ thla khat leh a chanve hnu velah tiin mi han han hrilh a..

A hmel ka han en a, a hrisel tha tih a hriatin, Gym kal ngai miahlo mahse a sek ang tul a, a pian lah chuan Boxer lam pian chu a hawi vak silo.. A pian a Boxer pianlo ka han tih hian, a pian a chhia ka tihna chu ani chiah lo, palian lemlo mahse a dar a pharh thain, a ban bul lah a lian in a sek phiar trung a, tunlai tlangval dang anglo takin a dul lah a kiar heklo in, a phiar sek ang trang a.

A ke a tawi deuh tih leh a hmel a chhe deuh tih lohah chuan chuan a taksa bung hrang hrang te chu infiammi taksa bung ni awm tak aniin, thahrui lah a ngah hmel. Mahse!! Mahse, ain remkhawmin a fulo ani e.. A dar a pharh ang aiin a kawng a lian in, a hlai thla phuk a, chak erawh a chak hmel, a mawng lah tunlai tawngkam takin a khal thain a bawp erawh a tawiin, a bawp tawi kual tha tak chu a malpui lian tak chuan a ti mawilo belhchhah in, a khup a tuah bawk a, chu a khup tuah tak chu a chawn lian tak chuan a mawina a belhchhah hauh silo, chu a chhapah a kephah lah chu tribal certificate hranpa ngai tawh lo tur khawp hian a hlai tha in, chawhmeh leiin bazaar ta se, engmah sawilo in a kephah hmuh ringawt se, sawhthing thlar tha tak a lei duh tih a zuartu chuan a hai ka ringlo.. Mahse, ka thianpa ani miau in, Pro-fight a, a tel tum min hrilh takah chuan tanpui chu ka tih makmawh ani si.. Nia, a trainer turin min thlang hek le!!

Thianpa berin a Pro fight lampang awn ta chu, rilru ah Boxing hlir a lang chuai chuai in, “ A hmasa berah chuan fitness hi a pawimawh a, I taksa I ti fit phawt tur ani” tiin thurawn ka han pe thla rawk a, Awi!! Ka tisual chiang lutuk.. ka thianpa, hnathawh hreh neilo, taksa hrisel tak hnena inla fit hmasa la ka han ti chu, ani ka thusawi ngai pawimawh thang chuan a trainer thar leh a thianpa thusawi chu a awi tha khawp mai a..

Zing dar 4 velah ka mutna tukverh zawn atangin, ring leng lawng hian “ thianpa, thawh a hun e, tlan ang” hi a rawn tita nghek nghek zel mai in, thawh loh chuan thenawm khawveng te an zahawm si, zing tlan ngai reng renglo khan Trainer cum coach ka han nih takah chuan ka tlan ka tlan ve ta mai.. Step chho tlem kal pawh a malpui puam trawlh trawlh thin tan chuan thuilo te tlan pawh a hahthlak si, mahse Pro-fight tel tum tih takah ka thianpa erawh chuan a thei ngang mai.

Kan veng field chuap puak dawn khawpa vawi 3 vel ka tlan hual chhung hian ani chuan vawi 10 chuang a tlan kual hmanin, thlanmual a thlanlung zawng zawng hi alo zuan khum hman vek thin.. Thurawn hrang hrang ka pek zingah “ Infiammi tan chuan ei tih that tur “ ka tih pawh a zawm tha mah mah emawni, tuk khat chu zing tlan turin mi rawn au lo a, chawei khama kuhva lei paha an in kan lut kual chu “ Thianpa, vawiin zing kha ka peih thlawtlo anih kha. Nizan ah vawksa Kg.1 ka ei zo vek a ka pumin a zolo a” a ti chheu mai a. Nia, ani tan chuan vawksa rep bak ei tha awm heklo..

Kar thum vel Fitness that nana kan tlan hnu chuan, trainer cum Coach ka nihna angin ka lung a awi a, Phur taka Boxing glove thar leia tactic leh one two, one two lam zir kan han tum chuh!! Manganthlak tak ani.. Boxing glove a han vuah chiah chu a tang nghal trung in, a hmel nen lam a tang a.. Mihring te hi chuan kut hman thiam leh khawr lam hi kan nei vek a, Mahse thianpa hi zawngin a kut veilam hi a khawr nilo in a hmang thiam thlawtlo ani e..

A vei lam a hmang thiamlo tih vang hian a ding lam hi a hmang thiam e tihna ani lo, a vei lam aiin a zia tih chauh zawk ani.. Punching Bag a han hnek tur te chu a bei maksak in, kei chuan Baseball vawm tur ang ka ti mah zawk. A kut ding lam hi hnung lam a la phei a, a taksa awn deuh ha a posi a han lak a, a han hnek chu Na tak aniin Punnching bag rit tak pawh a then nalh nalh mai thin..

Mahse!! han ti leh thin teh ang, thianpa kutthlak chu na eng ang mahse inhnek natsiak a tel tur anih miau loh avang chuan a vawi khat hnek tura ain puahchah chhung chu a rein a tumpui ten chu hun chhung chuan point tam tak an hnek chhuak hman dawn si…

Ka bei a dawng in kan venga Boxing khel ve thin ka han rawn a, ani kei aia boxing lam hre zawk ta chu kei aiin a beidawng leh chhawng a, kar 2 vel chauh a awm tawh si. A taksa fit in thahrui ngah mahse anin tihsiakna ber tur a thiam loh chuan a ngaihna a awm dawn silo.. tan ana ve ting tang tawhin rilru a hah duh hle a, chutah Thianpa chuan tihdan a ngaihtuah in “ Kan khuaah Burma Sipai bang U Manga, Boxing thiam deuh a awm a, Burma sipai ah chuan Mang tysona an ti thin, chupa ka han inzir teh ang, kan khua ah ka zin dawn” kar 2 vel lek chhung chuan eng a thiam ringlo mah ila, Thianpa ina a rilrua a tum tawh chu thlak a har tih ka hria in ka pawm pui ta in, an khaw lamah chuan ain phur chho ta a..

An khua a thleng tih mi rawn hrilh in a zir tan nghal thu te a rawn sawi a, ni 3 hnu velah “ Thynpa, ka fit khp ag thla 1 chhung ka kut ka la hmnglo nia o” tih sms ka dawn chu enin, ka thianpa chuan mipat hmeichhiatna lamah a insum thu mi rawn hrilh na ani tih ka hriain ka nuih a za ru hle a..

Karkhat hnu vel chuan a SMS , “ Ka thym th rass, mhse zn 4 ka mu puak th, nktk h rn ho dn, chk bn top” tih hi ka dawng , naktuk tukleh lawka inhnek tan turin mangpui zan 4 a zawna hmuh chuan a taksa tan a pawi thei em tih thleng thleng ka ngaihtuah phah ta hial a. Nia, tan ana ve lakloh tawh si ani..

Tichuam Profight chu an tanin ka thiana te inhnekni pawh chu a thleng ve ta a, kan section YMA ina min tawiawm avangin kan ri chho ve hul hul a. Inhnek tan hma a ka thianpa han in hrosa vel atang pawh chuan a tumpui pa chu a zam ani tih a hriat amai a, tichuan vanneih asiam nge, dawizep kan tum fuh zawk, a tumpui tur pa chuan ka thiana chu a tum hreh deuh aniang ain hnukdawk ta a..

Hrechianglo tan chuan ring chhunga a kekawrbul eng, a mawnga kan veng puanthui U Thanin luruh lem a bel sak ngei ha chunga a han zuang thauh thauh chu Pa tamtak tan chuan khurh na tham ani reng ani, a sek tha ropui si a.. Second round a thleng ve ta mai chu aniin a phur pawh a phurin sawi nuam ati hle a.. A inhnek leh hun alo thlen pawh chuan kan phur tlangin tawiawmtu pawh a hma aiin kan tam zawk a..

A tum pui tur chu SAI ah pawh Boxing lo zir ve tawh aniin, Ring chhung an han lut a thiana inhrosa vel a hmuh chuan ani Boxer pangngai pawh chu a hmel atangin a zam tih a hriat a, an inhnek hma lawk chuan a coach ina “ Round 2 tal inhnek ula, I hnehloh lutuk chuan ka tihtawp tir dawn nia, insurrender nghal chu a zahthlak” tia a hrilh chu kan veng YMA president U Zathanga chuan alo hria ani awm e..

Chu chuan ka thiana an huphurh zia chu ati chiang hle a, mahse an han inhnek tan ta a, an tum ang alo ni ta lo aniang nge, rond 2 na atang chuan ka Thiana chu a thle a thle ta mai. An han inhnek tan kha, a tumpui pa chuan a pawh tha ngamlo in Boxing khel thang tih takah a veh a veh a, Thiana lah chuan a style ngai ngaiin ring lai taka dingin a kut vei lam chu a phar chhuak a, a kut hnunglam tawmin a tumpuipa chu alo chang ta a, an inveh an inveh in round khatna a zo ta hram a.

Round khatna ka han thlir atang chuan ka rilru a hah ru hle a, anni Boxing a zir zira chuan tunah chuan ka thianpa chu a hrechiang dawn tawhin Boxing tactic engmah a hrelo tih a hre dawn a, a ngam tawh dawnin kan dinhmun a chau tan tih ka hre nghal a.

Ring chhunga a kut hum dan atang chuan Mang Tysona hnen atang chuan engmah a thiam belhlo tih ka hre bawkin Aizawl atanga Champhai District, Burma ram depa awm an khua a, a han zinna pawh chu a thlawn tih ka hre nghal bawk a.. An inbei rei tual tual a thianpa chu a thle hnem tulh tulh in, a hnek thluk chu hlau miah lo mai ila point awm intihsiakna anih avang chuan kan dinhmun athalo tih ka hre nghal a..

Thiana chu lah chu ring laiah a ding tlatin, a kut dinglam chuan a hlawi thleh fua fua reng mai si a kut thlak na tak chuan a fuh hlauh chu kan beiseina awm chhun ani si.. An han hnek fuh lah chuan ring leng lawng in “ E he he!! Ehe” tiin a tanmun a han siam rem in, a posi ngai la a, a kut ding lam a han inrin fe pawh chuan a che thei meuh silo. Tichuan kan chaklo ta nge nge a.

Mahse, ka thianpa chu an theihnghilh lo aniang, hei tunkum Profight an neih leh dawn pawh in TV lam fakna ah ka thianpa inhnek lai chu a lang chamchi a. Nia, a thiamloh leh a hmuhnawm dangdai avang chuan a lar zekin mahse ka thianpa ngei chu LPS Profight Fiamthu ani ta si..

Profight, tharum hmanga innuaina ah Fiamthu a an hman ni mahse, kei erawh in ka thianpa hi ka ngaisangin a bula awm nuam ka ti si.. A hming tak chu Thangrikhuma aniin, kei ai a kum 6 dawna upa ni mahse a Pute in a awm ani avang leh kan thenawm lawka awm anih avangin kan inkawm choin, kan inkawmngeih ta viau a. An khua hi Burma ram bul lawkah awm niin, a put bula lekhazir tura rawn awm ani a, Kut hna thawh a hrehlo in BA pawh IGNOU lama a zir avang in chhun lama ITI lamah carpentry a zir pah bawk a.

A tan chuan Lehkhazir hi hna hmuhnan nilo in eizawnna tur ani a, ani ngei pawh chuan BA a pass zawhah Industry hnuaiah Micro loan lain Carpentry shop a hawng a. Lehkhathiam tena kuthnathawh kan hrehloh hunah kan Ram chu a changkang ang tih hi a thupui aniin amah ngei pawhin a hreh ngailo. Mahni ke a din hi a thupui aniin chuvanga BA a zirlai pawha ITI lama mistiri zir pawh ani reng a.

BA a pass pawh khan party lam atang leh hmelhriat tha zara hna hmuh tum ai chuan Carpentry dawr hawngin bul a tan a . Ani chuan, lehkhathiam mistiri ka nih hi, “ Thiana, vengthlang mistiri Pu.Lalsanga pawl 6 ai chuan Tlangrikhuma BA mistiri hi miin an duh asin “ tiin lehkhathiam pawimawhzia a sawi thin, BA nafam chu midang ai chuan hmathlir anei aniang nge Khuma Carpentry bakah Kunga Chow industry siam a tum ani awm e..

Nia, ka thianpa hi thenkhat tena 99 an tih ang chi hi ni deuh mahse ka kawmngeihin ka chhuang a, Mahni kuta din a tumna leh kuthnathawh a hreh lohna te, a neih ang ang a midang tanpui a hreh lohna te hi ka chhuangin kei atan zawng Ka Idol ani si.

Similar Posts:

• LPS Pro-Fight ah induhsakna a awm emni?
• Mizo Kick Boxing-ah Champion
• Ka thianpa Vs Sap leh Negro.
• Pi Mary Kom tan ang aw…
• Lammualah Mizo Boxer hmasa ber

Recent Posts:

• ARSI THEM LEH KAN KHAWVEL
• Phaia chhungte dinhmun hre turin chah
• Health minister bàn turin CM ngen
• Daihnai lui-II
• Kan va tam em!

This entry was posted on Monday, December 12th, 2011 at 6:00 am and is filed under Fiction, HAHAHA. You can follow any responses to this entry through the RSS 2.0 feed. You can leave a response, or trackback from your own site.