mi(sual).com

Krismas urlawk ni a ni a, ni dang ang bawkin vur a tla seng seng a, a vawt kher mai. Mipa naupang pakhat, Bobby-a chu an huanah ngawi rengin a thu a, pheikhawk bun tur a nei lova, kawrlum lah a ha hek lo.

A vawi ti chu a khabe a inkhawng hlak hlak reng a. Chutiang chuan darkar khat lai a thu tawh nain, Krismas thilpek atan eng nge a nu a pek ang tih a la hre mai thei chuang lo. A nu pek tura a ngaihtuah apiang chu a leina tur pawisa a neih lohna chuan a chhilh nghal zel a.

Bobby-a pa chu kum 3 kal ta khan a thi tawh a. A nu hovin an khawsa nawk nawk a; an chhungkua an harsa ngang mai. An chhungkaw chawm nan a nu chu a thawk rim lo a ni lo va, hna a thawk lo lah a ni hek lo; nuamsa takin an chhungkua chu a chawi chhuak zo ngang rih lo a ni.

An chhungkua chuan sum leh pai nei lo mah se chhungkaw inngeih tak erawh an ni thung. Bobby-a te unau chu 5 an ni a, hmeichhia 3 leh mipa pahnih an ni a, Bobby-a chu a laita a ni nghe nghe a. A farnute chuan a nu thilpek tur chu an nei thlap tawh a, ani lahin a la nei ve si lo; urlawk zan a ni tawh si.

Bobby-a chu a tho va, Krismas thilpek tur chi hrang hrang zawrhna dawr lam panin a kal ta ngawt a. Dawr tukverh darthlalang phen atang chuan dawr chhung chu a bik tawk tawk zel a, dawr chhunga Krismas thilpek tur an zawrh chi hrang hrang chu hmuhnawm ti em emin a thlir dauh dauh zel a; mahse a enga mah chu leina tur a nei der si lo. Khua a thim dawn tak avangin haw mai a tum ta zawk a.

Thui pawh a la kal hman lo, lirthei tlanna kawngpuia eng thil emaw ni, tle var let reng hi a hmu ta a. Kawngpuia thil tle chu a chhar vat a, cent 10 nawi a lo ni reng mai a; a lawm kher mai. A pawisa nawi chhar chu kengin phur takin dawr lam pan chuan a kir leh a; mahse, dawr nghaktu tin mai chuan a pawisa neih chuan eng thil mah a lei zawh loh thuin a lo chhang zel mai a. A beidawng chu a hma aia rilru hnual zawkin dawr atang chuan a chhuak leh thin a.

Bobby-a chuan a beidawn tawp lamah pangpar chi hrang hrang zawrhna dawr a hmu leh a, chuta lut tur chuan a intlar ve nghal a. Dawr neitu chuanBobby-a chu a rawn pan a, “Puih theihna che ka nei em?” tiin a rawn zawt var a. Bobby-a chuan, “Krismasah ka nu pek turin rose par lei ka duh a; ka pawisa neih chhun chu hei..” tih pahin a pawisa neih chhun, cent 10 chu a pe nghal a. Dawr neitu chuan Bobby-a leh a pawisa nawi chu a en vut vut a, Bobby-a kokiah chuan a vuan chut a, “Hetah hian lo nghak lawk rawh aw. Eng nge ka tih theih tehreng..” tih leh dawr chhung lama luh a rual nghal a.

Dawr neitupa a nghah pahin Bobby-a chuan dawr chhunga pangpar an zawrh hrang hrang chu a en kual a, mawi a ti hlawm kher mai. A pawisain daih ni se rose par lian leh mawi ber mai chu a nu pek turin lei a duh em em a; mahse, a sumin a tlin si lo. Pangpar a en kual pah chuan hmeichhiain pangpar an ngainat chhan pawh hre chhuak ta hialin a inhria a.

Dawrtute chhuah paha kawngkhar inkhar ri khap chu a hre zauh zauh thin a. Bobby-a chu a han hawi kual a, dawr chhungah chuan amah chauhvin a lo awm reng tawh a; nuam lo tihna leh hlauhna a nei lian ta hle mai a.A tawpah chuan dawr neitupa chu a rawn chhuak ve ta nge nge a. Pawisa
pekna dawhkan chungah chuan rose par mawi em em 12, kuang sei nalh tak pu
theuh hi a dah ta a; chung rose par chu a kuangah chuan puanthem var thianghlim takin tawn khawm a ni bawk a. Dawr neitupain rose par mawi em em, bawm var mawi tak chhungah uluk taka a khung lai chu makti takin a lo thlir reng a.

Dawr neitupa chuan bawm a chhin hnu chuan Bobby-a chu a en a, a ipte
atanga Bobby-a pek cent 10 chu phawrh pahin, “Bawiha, hei hi cent 10 man a ni e,” a ti ta a. Bobby-a chuan dawr neitupa chuan a pawisa pek zat chu a hriat sual emaw a ti hial a. Chutah dawr neitupa chuan nui sang hian, “Rose hi man tlawm zawka kan hralh lai a ni a, rose par 12 hi cent 10 man a ni a, i duh tho ka ring e” a ti zui ta a.

Dawr neitupain a kuta rose par awmna bawm a rawn hlan chuan Bobby-a chuan a chunga thil thleng chu a mumang a ni lo tih a hre chhuak a. Dawr neitupa chuan Bobby-a chu kawngka thlengin a va thlah a, a inthen dawn chuan dawr neitupa chuan, “Merry Krismas, ka fapa,” a ti zui a.

A dawr chhunga a luh veleh dawr neitupa nupui chu a rawn chhuak a, a pasal chu makti takin a en a. “Tu nge maw i biak tak bawrh bawrh le? Tu tan nge maw rose par kha i tawn khawm mawlh mawlh chu le?” a rawn ti a. Dawr neitupa chuan tukverh atang chuan pawn lam a thlir vang vang a, a mittui rawn hnam chu a khap per sak sak a.

A nupui lam hawiin a inher a, a nupui hnenah chuan, “Tukin khan thil mak tak ka tawng a ni. Dawr hawng tura ka inpuahchah laiin rose par ka zawrh zinga a nalh ber ber 12 chu Krismas thilpek atan pe turin aw-in min rawn hriattir asin. Ka aw hriat chu ka ngai thutak lem lo nain rose par ka zawrh zinga a nalh ber ber 12 chu ka dah hrang ta tho va. Tuibur hmuamda emaw lek khan ka dawrah hian mipa naupang pakhat, pawisa nawi tlem te chauh nei, a nu tan Krismas thilpek tur rose par lei duh hi a lo kal a.”

“Mipa naupang hmel chuan tun hma kum eng emaw zat liam tawha keima hmel kha min hmuhtir a. Chutih lai chuan naupang rethei tak, Krismas lai pawha ka nu thilpek tur leina eng mah nei zo ngai lo ka ni a. Ka lo upat tak hnu hian tum khat chu putar pakhat, ka hriat ngai reng reng loh hian khawlaiah min lo tiding a, dollar 10 hi min dil ngawt mai a.”

“Zanina kha mipa naupang ka hmuh rual rual khan ka aw hriat kha tu aw
nge tih hrilh nawn ka ngai tawh lo; tichuan, rose par ka zawrh zinga nalh ber ber 12 ka dah hran kha ka tawn khawm ta a ni,” tiin a chhang ta a.

Dawr neitupa leh a nupui chu an inkuah vawng vawng a, pawnah an chhuak dun a. Khua a vawh tehlul nen, an nupa chuan khawvawt chu an hre chang reng reng lo.

Kristian Thalai

Similar Posts:

• Pawisa hian hlimna a lei thei
• Masi Hmang turin min rawn dawr r’u
• misual.com hi dawr ni ta se
• Jesus will return by 2050, say 40pc of Americans
• Mizo mipa ten hna i thawk nasa ang u

Recent Posts:

• Burma-ah ka zin Part – IV (Tuingo khuaa lung satel mak an tih kha)
• Thianpa lr hlonchhing birthday lawmnan..
• Paula Pawla
• Hmangaih CFL
• MIZO SAKHAW BIAK DÂN LEH A TOBUL ~ 2

This entry was posted on Friday, December 23rd, 2011 at 10:29 am and is filed under Christmas. You can follow any responses to this entry through the RSS 2.0 feed. You can leave a response, or trackback from your own site.