mi(sual).com

Krismas hi Mizote ta bik emaw tih mai tur hian, Mizo te hian kan hmang nuam thiam ber mai e. Kan Lalpa Isua, khawvela alo pian champha ni a an ruat, December 25 alo thlen dawn hnaih, thlakhat vel hmalam atang hian, a tu a te pawh hi, kan thinlung a phawklek tan a, krismas atan kan thinlung a in puahchah chho tan tawh thin.

Kum khata kan lo nghahfak ni lawmawm a nih avang leh, a boruakte a lo vawh nawm tan tawh avangin, huau huau leh tih a remchang a. December thlatir kan chuankai dek dek tawh chuan, Bazar leh hmun tin mai ah Kristmas hla, hla thar/hlahlui a ri tan chuah chuah tawh mai thin.

Kristmas hlimtaka hman loh hlauvin nu leh pa te, in chei that ngai leh, in sa mekte pawhin Krismas hma a peih ngei an tum a. Chhungkawtin in, mahni in leh a vel ti faiin, inchhung cheimawi loh bik hlauvin, kan phe sung sung mai a. Banga Krismas Card thar leh hlui kan han han tar pawlh chuai mai te hian min ti lung-awi ve thawkhat a.

Nu leh pate’n chhungkaw mamawh mai ni lovin, ‘hrit-mat-mawi mawi’ neih kim vek theihnan ngaihtuahna nasa tak an sen a ngaih thin vangin, mi harsa ve leh chhawng, nu leh pa tamtak tan chuan, Mas- bawr hi chu lungngaih hapta anlo ti reng thin.

Sumdawng lam lahin, chhungkaw tin mamawh tur zawrh hmanloh hlauvin hmun hla leh hnai a mi, an lam khawm chur chur a. Krismas boruak in min man tawh avangin, thalai tamtak thawhchhuah pawh neilo leh thawh chhuah harsatzia hrelo ten, nu leh pa thawh chhuah sa, chhungkuaa krismas hlim taka anlo hman ve theih nan a anlo dah that khiau khiau anlo ruk sak a, thiante nen zankhat hlimhlawp atan anlo kuit vek bawk nen… hlimhlawp ti ila, hlimhlawp pawh a ni meuh dawn e maw ni…zan dar 10 bawr velah an chatthla tawh miau a.

A rui mi in, urlawk zan a intur neihloh hlau reng rengin ruih tur an zawng, Sumdawng ho lahin, mite duh leh mamawh a nih chuan, zu e, zu lo ve, a ruih theih ang ang, mihring tan a tha emaw, thalo emaw, zuar chur chur mai a. A hmei a pa in, ruihna theih a nih tawh phawt chuan an lem liam duak duak tawh mai a.

Ruih theih lam tilo mite pawh, mamawh vang em em pawh nilo, thawmhnaw/thil thar neih ve hrim hrim theihloh vang a, nu leh pa rilru hah pawh hrethiam lovin anla tih tauh khum ang nghawl nghawl a. Thawmhnaw tha neite lahin, inkhawmna mi hmuh ngei tura han hak kha kan lungkham ber a ni lawi si.

Damlo damdawiin a mi khawngaihthlak tak awm te, vengchhunga thihna kut vawtin a man avanga fahrah rethei, thil thar nei ve zolo, ruk ruk ngai khawp te an katnuk bawk a. Chutih lain, Kohhran leh khawtlangin, Biak In chei mai pawh ni lovin, kawngpui dung cheimawi tum in, an hnatlang suau suau a. A rem emaw remlo emaw, kawngdung cheimawi leh vawngfai nih tumin tan anla sauh sauh a.

Peng thuam tinah, bawkte siam in, Lal lo piang mitin hriat/hmuh theih turin, a lem an siam a. Heng kumtin a kan milem siamna leh street decoration atana kan sum hman liam tamtakte hian nakin zelah milem siam ngaih pawimawhna ah minla hruai a ngem le? Lal Isua chibai buk lam aiin, a krismas thli hian min len he heu zo ta em ni le.

December thlatir atang hian, kan khua a har a, hlimna zawng in, hlim taka krismas hman tumin, kan inpuahchah thin. Mi thenkhat, nunhlui leh hun liam ta ngaiin, kan lungte a leng a. Krismas hlim leh lawm taka kan hman theihna atan kawng hrang hrang in kan inbuatsaih thin. Kan lo inbuatsaih dan erawh hi chu Lal Isua lo welcome na lam a tlem hmel leh lawi si. Hmun tamtakah chuan, Lal Isua tel na tlakloh te, Lal Isua tel inthlahrunna tur chi te, Lal Isua lenlohna te a tam ve hmel thin.

Lal Isua tan kan nung a nih chuan, Lal Isua duhzawng chu hei hi a ni daih si a….Lal Isuan a ai awha a pawm te chu a hnuaiah hian a tarlang  a. He Kristmas lo thleng ah hian Lal Isua tan engnge kan tih ve tih hi in zawhnawn fo a tha awm e. Thil tamtak chu kan ti ngei a, mahse Lal Isua lawm leh duh zawng chu hei hi a ni si a.

“Chu mi hunah chuan Lalber chuan a ding lama mite hnenah chuan, ‘Ka pa voh bikte  u, lo kal ula khawvel siam tantirh ata in tana ram buatsaih chu chang rawh u;ka ril a tamin nangnin ei tur mi pe a; ka tui a halin in tur mi pe a; mikhual ka  nihin mi thleng a;saruak ka nihin puan mi sintir a; ka dam lohvin mi kan a; tan ina ka awmin ka  hnenah in lo kal si a,” a la ti ang.”Chu mi hunah chuan mi felte chuan, ‘Lalpa, engtikah nge riltamin kan hmuh chia  ei tur kan pek che? tuihalin kan hmuh chia in tur kan pek che?Engtikah nge mikhuala kan hmuh chia kan thlen che? Saruaka kan hmuh chia puan  kan sintir che?Engtikah nge dam lovin emaw tan inah emaw kan hmuh chia i hnena kan lo kal?’  tiin an la chhang ang.Tin, Lalber chuan an hnenah, ‘Tih tak meuhvin ka hrilh a che u, Heng ka unau te  berte zinga mi pakhat chunga in tih chu ka chunga ti in ni,’ tiin a la chhang  ang” Mat 25.

Lal lopiang chibai buk tuma kan inbuatsaih dan hian Krista lokal chhan a thelh thin avangin, Kohhran  programah meuh pawh, Pathian in a min pek a tum ‘A Fapa mal’ ‘Lal Isua’ lo dawngsawng tur kan awm thin lo. Chung ai chuan Krismas hmannawm leh nawmloh thu te kan khel ta zawk a.

Krismas hlawhtlinna chu, thil thar neih leh neihloh, ruih tur hmuh leh hmuh loh, zaipawl zai thiam leh thiam lohah te teh ta ber a. Ruai tui leh tui loh, Street decoration mawi leh mawiloh te, manto leh to loh te pawh ala ni hial awm e. Lal Isua/Thlarau thianghlim te nen a inkhawm hun chhung darkar 1:30 te pawh a rei ta a niang – thutna lah kan siam dup nuam thiam ta khawp.

Kan inbuatsaih dan leh kan beisei a dikloh avangin, Krismas kan hman dan dan in, min nghawng let leh a. Kumtin mai hian, thalai accident a thi leh ruihtheih avanga mual liam ta a katnuk reng ta mai. Krismas a zawh rual rualin chhungkaw tamtak chu, lungngaihna in a tlakbuak zui thin. Thlahnih/thum hnu-ah, chhungkaw thar din/sawn man inhlan alo ngai ta fo thin.

Chutiang zelin, Krismas a zo a, kumthar kan lo kai a, nunphung pang ngaite te bawkin, nunthar nei lovin bul kan tan chho leh a.

Khawnge ! Tuntum Krismas-ah erawh hi chuan, Pathian in min pek ‘A Fapa’ Lal Isua ngei hi chibai bukin turin inpuahchah dan dikin inpuahchah ila, ilo dawngsawng teh ang u. Kan thinlung, kan inchhung ngei ah Lal Isua lo piang ngei se, Lal Isua rimtui chu kan chhehvel mi harsa khawngaihthlak lehzual te hnenah luang lut rawh se.

Chutiang zelin, kumthar 2012 ah pawh, kumthar ni atangin nunthar nen bul i tan chho ang u. Lalpa lokal lehna ni a hnai tial tial si a.

Similar Posts:

• Nausen Lal Isua hi engtin nge kan lo lawm ang?
• Krismas a lo hnai leh ta
• Ka dawn sei ngamlo e
• Christmas hlathu diklo ka tih thenkhat
• Advent nge Advance Christmas?

Recent Posts:

• Burma-ah ka zin Part – IV (Tuingo khuaa lung satel mak an tih kha)
• Thianpa lr hlonchhing birthday lawmnan..
• Paula Pawla
• Hmangaih CFL
• MIZO SAKHAW BIAK DÂN LEH A TOBUL ~ 2

This entry was posted on Saturday, December 24th, 2011 at 8:33 pm and is filed under Christmas. You can follow any responses to this entry through the RSS 2.0 feed. You can leave a response, or trackback from your own site.