(Ka inthlahrung viau, a thui ve erh si a. Kum 2011 thlah na’n leh ka post 11-na atan aw…)
Secondhand leh kei
Sum leh paia awlsamlai nei ngai reng reng lo ta chu, Aizawl secondhand market te khi ka va’n fangkual nasa thin tak! Hei mai hi a ni lo; pawl sawmpahnih ka zir thleng in, ka u nen pawl khat chiah a kan inthlauh avangin, lehkhabu thar ka nei khat em em bawk. Ka u in kumtluana a hman chul tawh hnu kha, kumtharah ka chhawm ve mai thin.
Ka pa thukhawchang…
Tin heti hi a ni a, thirsakawr (bicycle) pawh khalh thiam mang lo khan lirthei (two wheeler) neih ka chak ve ta tlat. Kumin kumtira lirthei lei ve ka duh thu ka pa ka’n hrilh ve a. A chhuanlam a ho asin, ‘I tlan chak awm si a’ tih ringawt, ka hnial ngam der silo. A fapa hi min hrechiang lo a ni, khawilam ah nge maw ka’n tlanchak viau ang le?
Lirthei neih chuan nula phurh tur pawh an awm nghal mai zel an ti lehnghal. Tun ang dinhmun a ka awm ringawt hi chuan, ka bantlang mai ang tih ka hlau bawk si. Chu a chhapah chhuanlam siam thei turin tingin hna chhete ka nei ve ngei si. Ka pa hnena ka dil vawihnihna chu pawm a lo ni ta.
Bike ngei aw ni ang…
Nia, tlangval in lirthei lei ve si a, scooty lei te chu tiin bike model hrang hrang ka’n enkual vel a. A thar ngei ka duh bawk. Tichuan le, dawr hrang hrang ah ka’n zawt kual a. Harsatna namen lo ka tawk ta!
Engdang a ni law, parawl a khawsa tih tak ah; lirthei thar lei tur kha chuan, family ration card, inluahlai ngei ka ni tih lantirna (Rental agreement), gas connection card, adt, min dil ta teuh mai. Rental agreement ka neih chhun lah ka keng lo remgchang bawk si. Phur thut a kal ka ni bawk a, ka phur a reh hmak! Mai mai chuan a, a leina pawisa nei renga, an duh duh min dil ngawt mai le tiin ka hawsan daih asin! Ka haw kawng ah, umm.., bus-a chuan a nuam, a him, a tlawm bawk si; office kalkawng ah facebook te kan hmang thei a, a hahdam fe zawk tiin bike lei chu ka thulh titih ta mai.
Facebook tangkaina…
Bus tawt deuh a chuan leh, hmanhmawh huna bus rei ngial nghah chang a awm ta fo mai. Pate thin in a tuar leh ta lo. Englekhawle, lirthei chu ka neih a tul a ni.
Zankhat chu facebook-a fiamthu a ka comment sak mai mai, nula pakhatin, secondhand scooty la thar tha tak hralh a duh kha ka hrechhuak a. Scooty thlalak ka’n en nghal vat a, ka inhmeh dawn riau in ka hre ta tlat. Tichuan le, a lei dan tur ka zawt ta sawk sawk mai.
Seconhand scooty, nula khalh hnu…
A neitunu a tlawm zawk daih awm si a ka tih rilruk laiin, a neitu chu ka chang tawh awzawng lo! Hui ha, a neituin, (Rs. 400 chuang hlek man in) a scooty, secondhand lehnghal, ama man let 75 deuhthaw a chhiar a nih chu! Dil tlawm ka tum lah in a phal lo bur bawk si. Tlangvala pumpa in nula han dawn chiam ka hreh ve tumhrang. Ka lo biak laklawh tawh bakah, scooty chu ka khalh thiam ve thuai ka rin avangin ka dawn duh ta bik lo a. Ka neih zawng zawng sum leh pai khawnkhawm tak meuhin, nula khalh hnu secondhand scooty ka lei ta.
Scooty driver
Scooty ka lei tawh, ka room-a min dahsak tu tur-driver ka mamawh ta. Ka vanneih a siamin ka thianpa (Animesh) a lo hman remchang hlauh a. Ka scooty, ka thianpa khalh ah ka chuang ta anih chu. A va han nuam dangdai em! Anandnagar atanga Ganganagar (Bangalore veng pahnih) inkar ah ka khi tluan chhuak zakin ka hria.
Khalh zir ang aw…
Scooty chu ka room bulah a inhung ta ran mai. A zankhatna erawh chawlh hahdam hun ka pe a, ka khawih che eih lo. A tuk tlai ah kalchhuahna tur ka nei a. Ka scooty thlir vawng vawng chungin ke in ka’n chhuak phawt a. Ka tih loh nak ah, mi tam lai a han nawrchhuah ve ngawt chu, kei mi zakzum tan hian a ngamawm hlawl lo a ni.
Khai le, zan dar 10 a pel ta; lirthei tlan an tlem ta in, mihring chhuak pawh an khat ta pharh mai. Favang hun, zan rei ah chuan, Bangalore pawh a vawt tawh viau. Ka scooty kawngpuia ka nawrchhuah meuh chuan thlan a sa phat phat thung. Khai aw, val hi, nula hma ah zam zeuh zeuh mah ila, scooty khalh turin ka khur ang maw? Hnai lo ve a, tiin ka in sangmar a.
Chutah le, a hmeh nunnna kan hmet ta, a ri ve ta dat dat mai. Ka tlanchhuak dawn nge dawn lo aw? ti a mahni a emergency meeting khunkhan ka’n neih te te hnu chuan, lei a ke rap chungin kan tawlh ve hrut hrut a. Khai le, ‘tiang ringawt chu a tawk lo, tiin kawng chhuk ah kan tawlhthlak tir a, chhuk zawng chuan lir ve thei mai. Chho zawng a han tlan tur khan inrintawkna ka tlachham leh ta. Khamawn, val hi tiin kan insang phek leh.
Khami zan khan, feet sawmnga vel zet chu scooty kha a lir ve ngeiin ka ring! Ka va’n hah teh reng em! Hetiang a scooty khalh hi a hahthlak a nih ngai chuan, engtin nge office (Mel 12 chuang) nitin ka kalpui theih ang le? ti rauh rauh chungin minute 5 dawn hmang ralin scooty chu ka hung fel thei hram a. Ka’n hung fel chiah chu, tu’n min hmu hek lo. Rossi-a te intlansiak champion ai mah in ka kal champ zawk ang chu maw le.
Zan hnihna
Nizan ah ke hlang kang lo in ka khalh thei a, zanin chu hmasawn hret a tul tiin thu ka intiam a. A ngai te bawk in thlansa phung a kawngpui ka nawr thlen hnu chuan kan tilir leh lauh lauh a. Minute sawm hnu chuan ke hlang kang chung in ka scooty chu a tlan thei ta! Hu hi hi… a va mak em! Ka va han hlim kher em!
Mahse, kawngkawi a tlan ber mai kha a va’n khirh tak. Ka khalh kawi dawn khan, scooty kha a sak tung hian ka hria a. A kawi/kual ve emaw ka tih khan ka mawng chiah hi a lo kawi/sawi thin a ni awm asin. Ding lama ka kual duh in ka mawng kha veilam ah ka ti sawi ta tluih tluih thin a! Hui ha a va’n hahthlak ngai.
Ka thenawmpa in tlawmngaiin a khalh dan tur, kawngkual a tlan dan tur min han hrilh a. Minute sawm hnu ah chuan ka mawng tisawi kher lovin ka khalh kual ve thei ta. A va nuam em!
Hemi zan hian, kan inbul a ka tlan kual laiin, tlangval pakhat hi, a ui kaiin a kal kual vel a. Ralkhat atang a ka scooty khalh min hmuh vel leh chuan, a rang a rang in ui kha a ko a, kawngsir ah a dinpui nghal vat. Scooty tlanna tur kawngpui a zauh nen, side min pe tha khawp mai! Tichuan ui leh a nei tu in min kiansan hnu chuan inla-confi tawk in ka room bul a kawng kual, dingkual ngei mai chu tlantlang tumin ka inhum ruh a. Ngai teh, engnge thleng ta ka hre hman lo? A ri ta bur mai!
Ka vanneih a siamin ka na miah lo. Ka scooty a thal chiang hle a, kei erawh ka palen vang nge ni, scooty hnung ah fel deuh in ka ding daih! Ka hamhaih si, ka scooty lah, amah a thawh tum eih bik silo. Ka’n hawikual vat vat a, min hmu tu an awm lo tih ka confirm hnu ah, ka scooty duh tak chu ka’n tungding a. A mak lutuk, a rang miah lo! Vawikhat tluk te chu, khalh zirlai te chuan a awm fo an tih kha maw tiin ka inthiam chawp ta vel. A tukzan atang chuan ka khalh thiam ve ta mai a.
Ka phurh hmasak ber..
Kan nau, nula pakhat phurh a ngai. Tumah ka la phur ngailo tih ka hrilh duh bik si lo. Rin ai daih in ka phur thiam ve; vai putar pakhat in min kamkhat thung. Scooty atanga a chhuk chiah tih in, ‘I chuang thiam hle mai, mi ka vawikhat phurhna a nia’ ka ti mai chu! A hlau si, thinrim ngam chiah bawk si lo. A hnu ah chuan, ke a kal a thlang ta zawk.
Midang ka phurh tawh te…
Mizo nula zaithiam lar tak pakhat ka phurve ngei tawh. A chuan hma atangin, Mahming min bun suh aw a ti chhen lehnghal, scooty vawn ngheh a awl khawp. Vanneihthlak takin ka bun ta em bik lo a. Vawi khat pawh, traffic zone-a ka din laiin, vai putar pakhat hi, eng sawi set set lo in a lo chuang ve ngawt tawh bawk! Helmet (hmeltha proof!) ka khum avangin ka hmel a hmu silo a, kannada-in min be char char a. A duhna hmunah chuan a chhuk ve mai bawk!
Tunah chuan e…
Ka khalh awm tawk chiah secondhand scooty, ka nei hi vannei ka inti, ka inhmeh bawk si Ka’n khalh reng reng hi, Yamaha R15 emaw Pulsar 220 emaw an khalh aia ka confi-lohna reng reng ka hre lo! Nula pawh ka phur hlau tawh bik lo, phurh tur an awm reng lem lo tih mai a nia.
Similar Posts:
- Scooty Tangkaina Pathum
- Lirthei khalh thei chin – kum 18
- Tunlai Mizo Nulate leh Scooty (Feminizing the city/town space)
- Camera thar ka lei ve a
- Rin Loh Taka Min Tanpuitute…
December 28th, 2011 at 4:11 pm
I leina nu chu i inzirtir nghal mai lo nia, an inkar dinhmun a derthawng nge thawng lo te pawh i hre thei ang chu :happy:
Rempuii poh hi va reh ve le, min neih san ta man le
Report this comment
December 28th, 2011 at 4:17 pm
sikuti hi ka khalh thiam der lo, bike a chuan ai chuan nula in sikuti hnunga min phurh hian chuan nuam kati daih zawk :lol:
Report this comment
December 28th, 2011 at 4:18 pm
A va ngaihnawm mai mai ve le. Vawi 1 chiah maw i tluk pui… :lol: Kei chu LML Vespa ka lei ve khan a driver in min phur mai a, tlu miah lo in ka chuang veng zel a sin. :lol: :lol:
Report this comment
December 28th, 2011 at 4:23 pm
two wheeler chu a tluk theih a ka duhtawh lo :lol:
Report this comment
December 28th, 2011 at 4:24 pm
#3:khian chhiarmiahlo in a rawn comment :lol:
Report this comment
December 28th, 2011 at 4:27 pm
thiam hma khawp alom khi :lol:
Report this comment
December 28th, 2011 at 4:29 pm
@badboy, ka chhiar kerh kerh leh kerh kerh loh pawh i hre bak lau…
:lol: 
:lol:
Report this comment
December 28th, 2011 at 4:37 pm
ka chhiarchhuak ve kerh kerh :lol: ka pawh akal tawh hle mai a :lol:
Report this comment
December 28th, 2011 at 4:39 pm
Khai! Ngaihnawm ve!
Report this comment
December 28th, 2011 at 4:59 pm
@ 1 Asteric.. A neitunu hi hmun dangah a awm daih a..
@ 3 Shailendra.. Vawikhat tluk kha ka duhtawk, hnar a lian duh em mai..
Scootx khalh hi nula bem aiin a lo awl daih zawk a nih hi!
Report this comment
December 28th, 2011 at 4:59 pm
@ 1 Asteric.. A neitunu hi hmun dangah a awm daih a..
@ 3 Shailendra.. Vawikhat tluk kha ka duhtawk, hnar a lian duh em mai..
Scooty khalh hi nula bem aiin a lo awl daih zawk a nih hi!
Report this comment
December 28th, 2011 at 5:08 pm
Dr Mahminga Sailo,
Congrets! Ziak ngaihnawm lutuk. Kei pawh nula senior secondhand car ka lei tum pawh ka dil tlawm a phal miah lo. Bangluru veng i sawi te khan ka lung min ti leng.
Report this comment
December 28th, 2011 at 5:18 pm
Scooty khalh hi nula bem aiin a lo awl daih zawk a nih hi! hahahaha…Scooter khalh ka zir ve tum in, motor pelh nan, kawng cross zawngin kan tlan zauh mai a. Min zirtirtu, a hnung a ka phurh in a hlau mai mai teh a sin aw. :lol: A hnuah min zirtir ngam tawh lo a, tun thlengin ka thiam loh phah… :lol:
Report this comment
December 28th, 2011 at 5:28 pm
Vawikhat chu Hunthar venga jeep khalh zir khu kan en a lawm, student ho zawng zawng kha jeep pakhat ah an in hnawh tut a, an inkhalh chhawk zela. An zinga pakhat kha “Ngawi rawh kei chu ka la thiam lo” a tih chung chung khan “A awl ltk…chutiang khatiang chuan i ti dawnnia” an tia an khalh luih tir a. Chak mangkheng in kopang lamah an tlan chho mai chu….An zuangthla rang hlawm teh nia aw :happy:
Report this comment
December 28th, 2011 at 5:51 pm
@ Mara Hisbicus… Thanks. Nia, kan veng hi nuam ve deuh a nia.
Kan venga mi pawh, kum 50 chuang a nih in scooter a lei ve a. A rilru fim laiin a khalh ngam silo, a beidawng in zu a in rui te te a. A thiam phah daih! Zu tangkaina ka hriat chhun 
@ Shailendra… Mahni a zir hi a tha zawkin ka hria, a thiamte bulah chuan ka khawr tlat a…
@ Asteric… A thiante chuan an tifuh lo ve hle maw…
Report this comment
December 28th, 2011 at 5:57 pm
@Dr Mahminga…nie mawle, lirthei khalh zir sawi apiang hian mitthla ah alo lang a ka sawi chhuak leh nge nge ṭhin.
I zaithiam phurh te pawh chu han share law law la, nge kan chhui kher i duh
Report this comment
December 28th, 2011 at 5:57 pm
Kei pawh ka khalh hmasak ber chuan a brake ka theihnghilh a, ka han rap vak a, a tlan ngaiin a tlan zel si a, ka hre chuak leh hma hlauh a, khalh than loh chuan ke lam a che hmasa duh khawp mai. Post tha e, ngaihnawm khawp mai.
Report this comment
December 28th, 2011 at 6:01 pm
Nula aiin i zei zawk anih hmel mange hairehai
Ziak ngaihnawm khawp mai
Report this comment
December 28th, 2011 at 6:28 pm
kawng laia thil awm te hi hel han tum ve ran ran ila, kan pan ta nget nget zawk ta mai thin a….mak tak a ni.
A ngaihnawm khawp e….
Report this comment
December 28th, 2011 at 6:36 pm
@ Asteric., Ka nula phurh ve chhun han sawi chu ka zak ve tho a..
Bangalore-a awm ve, Mizo nula zaithiam a niaa(h).. 
Scooty ka khalh thiam hma khan thiante hian, ‘i khalh thiam em?’ an ti fo mai a. ‘Khalh thiamlo’ tih aiah, ‘a hnunga thut ka thiam’ ka ti daih zel!
Report this comment
December 28th, 2011 at 7:13 pm
A va ngaihnawm em! Ka nui nasa, i mawng tisawi vel lai tur te khi!! :happy:
Congratulations on your new (used) Scooty!!. Nula phurh tur pawh i hmuh thuai nan best wishes ti mai ang!!
Report this comment
December 28th, 2011 at 8:39 pm
ila changkanh thlawt alawm,thirsakawr khalh ka zirlai te kha mi ti hre chhuak e a,
Report this comment
December 28th, 2011 at 9:37 pm
@ Mamboihi.., ka va lawm tak em. Tin i mi duhsakna khi thleng dik thuai se ka va ti tak em!
Report this comment
December 28th, 2011 at 9:38 pm
vai scooter-ah dim lo baksakin keimahin ka zir ve tawp, thiam ve tawp. Car ka neih tirhin office-ah ka han keng ve leh ngawt a, engtin tin emaw chuan ka thleng ve mai! Chhungte erawh chuan min ngaihtuah nasa.
Zam a zal ve tawh nge ni? kei chu scooty hi bike ai chuan ka thlang ta tlat mai, lainatna nei hi a ang reuhva.
Report this comment
December 28th, 2011 at 9:50 pm
Scooty lam post ah chuan hei chu ka uar tlat!! Ka chhiar leh a, ka la nui vur reng mai!. I chetsual a scooty hnungah fel deuh a i ding lai hmel tur te ka ngaihtuah!! Vai putar lo chuang ve ringat te khi!! hahhaha… ka nuih a za em ani min lo hrethiam teh u!hahahha…
I scooty nei chu nangmah tluk zetin ka lawm anih hi!! :lol:
Report this comment
December 28th, 2011 at 9:57 pm
Thuziak i lo thiam hi le. I ziak ngaihnawm thiam, ning miahlo in ka chhiarchhuak vek.
2Wheeler lei, khalh thiam thei thlawt lo an awm nual.
Report this comment
December 28th, 2011 at 10:10 pm
@ Mamboihi.. A va lawmawm ngai em! Vai putar lo chuang ve ngawt khi ka thawhpuite ka hrilh a, min zilh sap sap! Remchang an hmuh chuan mi rawk/suam an tum zel an ti a. Mahse, ka vannei a, a chhuk khan ‘thank you’ a ti ve ngei!
@ Sheldon.. Ka lawm e. Damdawi in in chhuahsan tawh maw?
Report this comment
December 28th, 2011 at 10:16 pm
Mahminga, nula phurh i chak ve em em laia vai putar lo chuang daih khi ka nuih a za tawp thei lo!!! :lol: :lol:
Nula fel hmeltha deuh next time ah chuan i phur tawh dawn nia, chuan vai putar a lo chuang ve ringawt thei tawh lovang!!
Report this comment
December 28th, 2011 at 10:25 pm
@mahminga, la chhuahsan lo. Mahse kan tha zel.
Hmanni a nula (police ania) scooty khalh pawh kha a huaisen ve ngawt chuan ka hria. Zarkawt Traffic Point ah sawn a kual dawn a, a kual thiam thlawt lova, Traffic Police in a kual sak tawp. Ka vawikhat khalh chhuahna a ti.
Report this comment
December 28th, 2011 at 10:44 pm
Thenawmpa scooter khalh zir te pawh min ti hrechhuak alawm maw le. A palian angreng si a, a han chuang a, a scooter(bajaj) lei thar kha a lang te rawt mai ania. Ani pawh kha a khalh thiam biklo a, zamlo na na na chu a tlu bawk khup thruai thruai a, mahse hneh lutukin a scooter tlu kha a tung ding lawp zel!
A tlu leh a, mahse a scooter kha a zo ve hrim hrim a, rang lutukin a tung ding leh lawp lawp mai alawm!
Report this comment
December 28th, 2011 at 10:46 pm
Tleirawl tha zat a la reh loh vang nge, ka bike khalh ah kan nu a chuang ngam lo fo, scooty ah erawh chuan a hlauh thu a sawi ngai lo….a hrim2in sikuti khalh hi a lo nuamin a lo tangkai joke daih mai
i ziak thiam khawp mai……
Report this comment
December 28th, 2011 at 10:48 pm
Mamboih le(h).., kei pawh ka nuih a za leh hnuhnawh..
englekhawle, i mi duhsakna khi thleng thuai turin rinna ka nei 
Sheldon.., lo dam tha thuai teh u’n. I nula hmuh chu a va huai tak ve. Kei pawh hi Aizawl ah khan scooty khalh ila, ka mawng hi a la her tluih tluih mai thei asin..
Report this comment
December 28th, 2011 at 10:49 pm
@pakak… kan nu ve thung hi chuan Bullet leh bike danga chuan te hi nuam a ti teh asin! A khalhtu thiam dan a zir ani e….
Report this comment
December 28th, 2011 at 11:05 pm
HuuuhaA!! Mut hmunah mahniin khi vur vur! Vai putar khi hit khawp mai :lol:
Report this comment
December 28th, 2011 at 11:25 pm
Ka va tang ve…khalh i zirlai khan i bul ah ka awm ve reng emaw te ka lo ti vel,ka mit ngei a hmu che ang mai in a mood ah min chen tir thei a lawm maw le,i thu ken hi chu ka awih miah lo na in..:lol:
Report this comment
December 29th, 2011 at 7:08 am
Ekhai a ngaihnawm e…. Kei pawh Mizoram ah chuan Scooty driver hna ka thawk ve lauh lauh mai. Vawi khat chu ka nu ka thlah tur an chhe khang lang a, Vaivakawn lai takh sawn ka nawr a, mahse ka zak lo, nawr tur nei lo an tam em mai ka ti a. Kan kawmchhakah nula pakhat scooty a ke thep a, ka nawr pui a, a zak deuh a, ka nawr sak a, zak reng reng suh aw… nawr tur nei lo an tam em hi ka tih kha….Aizawl ah scooty khalh tur chuan tui hleuh thiam a ngai tlat…. a chhan chu awm traffic jamah hian in rah khalh phei zet zet a ngai a, tui chhek thiam lo tam chuan a buaithlak ngawt ang hahahahaha..
Report this comment
December 29th, 2011 at 7:37 am
ngaihnawm hle mai….i vaipa phurh ber mai hi thra ka ti lutuk :lol:
Report this comment
December 29th, 2011 at 9:04 am
Report this comment
December 29th, 2011 at 9:05 am
@ Robert.., ka tawn tak tak a ni e, ka nula phurh pakhat khian nizan khan a lo chhia ve a, a nui ve nasa a ni awm e..
ka palenzia maw., feet 5 ka tawng ve chiang khawp! 
@ chhingdailova.. Chuti chu tui hleuh ka zir vat a ngai a ni, lo haw hunah ka in tithei hle4g thei thei nang le..
@ dingtea.. Vai putar hi ka lo phur lo reu reu ang tih ka hlau..:-P Ka nula phurh aiin a hit tlat. Theih chang se, a sakhmel tawn leh a, lawthu hrilh tak ka nap e.., vai putarte kha:-P
Report this comment
December 29th, 2011 at 10:26 am
A hlimawm hle mai. Ngawi rengin kan nui vur vur mai. Ft 5 chu i tling chiang chiah maw?? Vitamin ka ei e.
Report this comment
December 29th, 2011 at 12:33 pm
I thu ziak chhiar a nuamin, thu ziak thiam tak i ni. Ziak zel rawh.
Report this comment
December 29th, 2011 at 3:20 pm
@ Pastor…, Ka insawi theihna chu, ‘Nepolean-a aiin ka sang zawk’ tih hi a ni fo asin…
I tilawmawm.
@ vlhauhnar… Ka lawm e.
Report this comment
December 30th, 2011 at 1:56 am
Chhiar a nuam e.
A zei lo chi i nih dawn hi a. I thiam har emmai.
Report this comment
December 30th, 2011 at 2:09 am
Two wheeler khalh ka thiam si lova, nula bèm aia scooty khalh thiam a awl zawk chuan tih ve mai chi a nih chu maw le. Kan college kal laia asst. Prof. (a la tlangval!) pakhat pawn bike a lei ve a; a khalh thiam thlawt lova a hralh leh tawp..
Report this comment